Bìoball air-loidhne

Zowănnī 5 - Geba Roman New Testament

Dèmèhmage d́ŏ Htĭhnò Akăhtî nu

¹ Mèhwă alekă Jŭdapho apwè̆ ògè tèpwè kî Jezŭ htagè d́ŏ Jerŭsalèm u nu.

² D́ŏ Jerŭsalèm u, ab́ôhtî Thŏ Khaglè̄ nu htĭhnò ògè dòhnò, adadā ò jè̄dè̆; Hebrè̆upho jo ami ḿî “Bèthazătha.”

³ D́ŏ dadākho nu bija ascwiasè̆, acuthĭkhathĭ, akhed́ekhigād́ŭkhi sòḿĭlă òèòò, òsô̆wô̄i htĭ ka papipapò̆.

⁴ (Manè̄ d́ō B́ĭcè aMò̄khobwèzo la mè geme i htĭ tapla tapla.) Htĭ papipapò̆ akhè̆, akhè̆ladē nī htĭklè̆ aŭsu dèbwèbwè hmage tèpwè.

⁵ B́ĕnu bija htè dèsè̆ phî̆htagè sŏscĭ ad́e lwīthô adābu ògè dèbwè.

⁶ Jezŭ tcahtî cò ò agò̄la òjî̄òkjagè gōnu d́ō, “Na thaè hmage tèpwè ā?” Cò d́ò lōwa do.

⁷ Bwèsè̆ d́òge Cè, “Sara, b́ĕ htĭ geme akhî nu, bija azāladē nī jè htĭklè̆ tò ògè dèbwè̆ ńò, ḿî b́ĕ je le gŏ apla nu akhè̆ladē ŭsu jè htĭklè̆ ò thèjô̆ dèbwè dèbwè,” cò d́ò̆sa lōwa do.

⁸ Jezŭ d́ò cè, “Wè̄hto, phîni scid́ŏ hwî̆jā kî khè̆lebò̄ dakha,” Cò d́ò lōwa do.

⁹ B́ĕnu lò bija anu dèbwè hmage danāgè kî zî phî zi scid́ŏ hwî̆jā, wè̄hto hègè. Anu dini ḿî d́ò̆gè Munisòd́è̆.

¹⁰ Megōnu Jŭdapho tòcò d́ògè bwèsè̆ ahmage dèbwè gōjo, “Ajo ḿî Munisòd́è̆, nè dè hè b́ii zāi b́è ni scid́ŏ hwî̆jā ńò,” cò d́ò lōwa do.

¹¹ Cò d́òscĭge lōwa tòcò, “Bija amèhmage jè dèbwè d́ò jè, ‘Phîni scid́ŏ hwî̆jā kî khè̆lebò̄,’ cò d́ò jè do.”

¹² Cè tòcò d́è̆ cè, “Ad́ò nè ‘Phîni scid́ŏ hwî̆jā kî khè̆lebò̄,’ dèbwè ḿî bò̄bwè?” cè tòcò d́è̆ lōwa do.

¹³ Barasă bija ab́èmèhmage dèbwè dî thîhè̆gè cè ńò, manè̄, Jezŭ sèdòbògè bija aboahò acè̆ nu.

¹⁴ Alekă Jezŭ tcahtî cè d́ŏ Zarādo abu d́ō, Cò d́ò lōwa, “Tcabò̄, na hmage htŏ. Mè bebò̄ ḿè dèkhòwè ḿè, dî ḿî ńò d́ō dè azî̄ d́olĭ jo gā lab́è nè,” Cò d́ò lōwa do.

¹⁵ Bija anu dèbwè hè kî d́ò̆sagè Jŭdapho tòcò htè amèhmagegè cè ḿî Jezŭ nu.

¹⁶ Mègōnu akhoacè̆ Jŭdapho tòcò mèbamèsè̆kò̆ Jezŭ d́ŏ Zè mèhmage bija Munisòd́è̆ akhoacè̆ nu.

¹⁷ Jezŭ d́ò cè tòcò, “Ja Pa mèwe dè htô̆ khŏnujo, kî Jè mè dè dè,” Cò d́ò lōwa do.

¹⁸ Dè ajo akhoacè̆ Jŭdapho tòcò thaè mèthĭkò̆ Cè d́ŏ Zè mèkè̆ Munisòd́è̆ akhlŏ, Zo jo Kib́ĭcè Ca Pa ḿî Zè mè jăthô Ze ne Kib́ĭcè akhoacè̆ nu.

B́ĭcè Pho Aphlŭathere

¹⁹ Jezŭ d́òscĭge cè tòcò gōjo, “Jò d́ò̆sa thĭ adî̄ahma, Bija Apho nu dè mèzadè zo lo za la dimĭ ńò, ḿî Zè mè acab́ô̆ Za tcahtî Ca Pa mè nu lò. Pa mè atherĕ nu, Pho mèkô tèpwè.

²⁰ Apa b́èlò̄ Apho kî Cè d́è̆lî̄ lōwa Zè mèdè tòcò nu. Kî Cè kè d́è̆lî̄kò̆ lōwa dè adoamu d́olĭ ajo cab́ô̆htè thĭ gè̄ htèdômô̄dahmăbò̄ nu.

²¹ Acab́ô̆ Apa b́awè̄hto athĭ tòcò kî i lōwa dèò nu, Apho ḿî ḿî ki ikò̆ bija arră dèò acab́ô̆ Ca tha ò adĕ nu.

²² Apa di cirra bija dèbwè̆ ńò, ḿî Ci ila Zo Pho aphlŭathere agī cirradè,

²³ cab́ô̆htè bija lŏcăcè gè bè̄dòbè̄thebò̄ Apho acab́ô̆ zè bè̄dòbè̄thegè Apa nu. Gajă bija adèbè̄dòbè̄the Apho ńò tòcò dè bè̄dòbè̄the tèpwè Apa htè athodŏlegè Cè dèbwè nu ńò.”

²⁴ “Jò d́ò̆sa thĭ adî̄ahma, bija htè asòkhĕńe Je lē kî ab́u Cè htè athodŏle Jè dèbwè nu, nib́è dèò alahtŭlablo, da khab́è dècirra ńò, ḿî hlô̆hta hwă dèthĭ nib́è tèpwè dèò alahtŭlablo.

²⁵ Jò d́ò̆sa thĭ adî̄ahma, akhîagla b́è htŏ khŏnujo htè athĭ tòcò gî̄ thîhè̆b́è B́ĭcè Apho alē, kî athîhè̆ tòcò kò ò thôḿô̆b́è.

²⁶ Acab́ô̆ Apa thè̆ne ḿî dèthôḿô̆ akhawi nu, Ci ilagè Zo Pho dèthôḿô̆ akhawi gōnu lò lò,

²⁷ kî aphlŭathere agī cirradè, manè̄ d́ō, Zî ḿî Bija Apho akhoacè̆ nu.

²⁸ Htèdômô̄dahmăbò̄ ḿè, manè̄ akhînare kè b́èkò̆ htè bija aò lūkho abu lŏcăcè tòcò gî̄ thîhè̆b́è B́ĭcè Pho alē.

²⁹ Kî gè̄ wè̄htoge d́ŏ lūkho nu, kî amè dèwî tòcò gā htabogekò̆ d́ŏ dèthôḿô̆ abu, ḿî bija amègè dèkî̆kkè tòcò nu gā htabogekò̆ d́ŏ dècirra abu nu.

Akhathè̆thî Jezŭ Anikhĭ tòcò

³⁰ “Jè dè mè za dèjo lo Ja la dimĭ ńò. Acab́ô̆ Jî thîhè̆b́è nu Ji cirradè kî Jè dècirra ḿî adî̄ahma, manè̄ d́ō tè b́è Ja wāhlè Jè dèthaèni ńò, ḿî Pa athodŏle Jè dèbwè adèthaèni dòkhò̆,” Cò d́ògè lōwa do.

³¹ “Ja gā kha dò̆ ma Ji nikhĭ thè̆thî d́ō, dè htè Jò d́ò tòcò nu atè b́è lèkha tèpwè acab́ô̆ thè̆thî adî̄ahma ńò.

³² Akha Ji nikhĭ thè̆thî òwe dèbwè be kî Jî thîhè̆ Zè dèkha Ji nikhĭ thè̆thî ḿî ab́è.

³³ Thĭ thodŏlegè bija d́ŏ Zowănnī ò kî za khagè dèdî̄dèhma athè̆thî.

³⁴ Ḿî Jè nu Ji di nib́è dèkhathè̆thî d́ŏ bija aò ńò. Barasă Jò d́ò dè ajo nu ḿî cab́ô̆htè thĭ gô̄ hlô̆htabò̄ nu.

³⁵ Zî ḿîgè hmîŭd́ŏ agè̄ hlî̆hlu hlî̆phru dèmè̆ kî thĭ thalōthalai tèpwè d́ŏ zè dèhlî̆ abu tod́odasa.

³⁶ Jè dèkhathè̆thî ḿî ado d́olĭ Zowănnī è̆. Manè̄ dèphîdèmè htè Ja Pa hna mè jè tòcò ḿî thè̆thî htè Ja Pa thodŏlegè jè nu.

³⁷ Kîd́ò̆ Ja Pa htè athodŏle Jè dèbwè thè̆ne ḿîgè Ji nikhĭ thè̆thî. Barasă thĭ dî thîhè̆gè Ze lē da kha ńò ńò kî thĭ da tcahtî Zu mūkă da kha ńò ńò.

³⁸ Thĭ tò òigè Ze lē Zè hwè d́ŏ thĭ thabu ńò, manè̄ thĭ tu b́ugè Cè htè Co thodŏlegè dèbwè ńò akhoacè̆ nu.

³⁹ Thĭ wāhlè thuŭthèè hwă Cè Tcahtĭ, thĭ gomo ḿî thĭ nib́è dèò alahtŭlablo. Ahnèhnè ḿî Cè Tcahtĭ kha Ji nikhĭ thè̆thî dòkhò̆,

⁴⁰ ḿî thĭ nu, cab́ô̆htè thĭ gī nib́èbò̄ dèò athôḿô̆ anikhĭ nu thĭ da thaè lehtî tèpwè Jè ńò dòkhò̆,” Cò d́ògè lōwa do.

⁴¹ “Ja da thaè wāhlè tèpwè bija adèkòihtăi ńò.

⁴² Barasă Jî thîhè̆ tèpwè htè thĭ ḿî bija cadè̄ nu, kî thĭ tò òi Kib́ĭcè adèb́èlò̄ thĭ thabu ńò nu.

⁴³ Je legè d́ŏ Ja Pa ami abu, ḿî thĭ dè lèkhagè Jè ńò. Ḿî bija dèbwèbwè gē le ma d́ŏ zi mi abu d́ō, thĭ gè̄ lèkha tèpwè cè.

⁴⁴ Thĭ thaèni tèpwè bija adèkòihtăi, barasă thĭ da wāhlè dèkòihtăi d́ŏ Kib́ĭcè dèbwè lò ò ńò acè̆ nu, thĭ ku b́u d́ò̆ Jè cadè̄?

⁴⁵ Gomo ḿè Jò gò̄ khlò thĭ d́ŏ Apa ò nu ḿè. Bija agò̄ khlò thĭ ò dèbwè ḿî Mŏzè htè thĭ sascĭigè dèbwè nu.

⁴⁶ Thĭ ku b́u b́eḿĕ Mŏzè d́ō, thĭ ku b́u tèpwè Jè Jè, manè̄ ze hwegè Jî wî Jè kè̆.

⁴⁷ Ḿî thĭ tu b́u zè dèhwela ńò d́ō, thĭ ku b́u za d́ò̆ Jè dèjî̄b́è cadè̄?” Cò d́ò lōwa tòcò do.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan