Bìoball air-loidhne

Zowănnī 10 - Geba Roman New Testament

Atcai thŏ Agèlè

¹ Jezŭ d́ò; “Jò d́ò̆sa thĭ adî̄ahma, bija ade lenīkô thŏgòbò akhaglè̄do ńò, ḿî alenīkô klè alewe dèbwè nu, zî ḿî a ahudè kî dehwĕpho lò.

² Ḿî bija alenīkô khaglè̄do dèbwè nu, zî ḿî thŏ tòcò ab́icè.

³ Atcai khaglè̄do dèbwè b́ăhtani tèpwè cè khaglè̄. Thŏ tòcò thîhè̆ ze lē d́ō za ba co thŏ tòcò ami kî leihŭ tèpwè lōwa d́ŏ agòbò akhlŏ nu.

⁴ B́ĕ zo johta co thŏ akhlŏ nu, ze le ŭsu kî co thŏ tòcò lôkô ze le, manè̄ athîhè̆ ze lē akhoacè̆ nu.

⁵ Barasă thŏ tòcò dè hèkô tèpwè bija lewe akă ńò, ḿî acwèthĭwī tèpwè cè, manè̄ adî thîhè̆ ze lē dakha ńò acè̆ nu.”

⁶ Jezŭ d́ò̆sa bija dègèlè ajo barasă, Cò d́ò̆sa lōwa tòcò danè̄ nu zî dî thîhè̆gè tòcò ńò.

Jezŭ Atcai thŏ Aè

⁷ Mègōnu, Jezŭ d́ò̆sa d́ò̆ cè tòcò ahlò̆mò̄, “Jò d́ò̆sa thĭ adî̄ahma, Jî ḿî thŏgòbò akhaglè̄ lò.

⁸ Bija lŏcăcè ale ŭsu Jè tòcò nu ḿî lŏ a ahudè kî dehwĕpho tòcò lò, barasă thŏ tòcò dò sòkhĕńe tèpwè ze lē ńò.

⁹ Jî ḿî khaglè̄do. Bija dèbwèbwè gē lenīkô ma Ju bu d́ō, cò kò òmòòmab́è tèpwè, cè tòcò gē lenī kî hèhta kîd́ò̆ gā pani tèpwè sèa alleaklè.

¹⁰ A ahudè dèbwè lenī d́ŏ akā ahumèkè̆dè, mèthĭmèhlè̆mè̄ kî mèkè̆mèô dè lò. Je legè cab́ô̆htè cè tòcò gī nib́èbò̄ dèthôḿô̆ pĕhtabala anikhĭ nu.

¹¹ “Jî ḿî atcai thŏ aè. Atcai thŏ aè dèbwè nu ilaphlòḿĭ ca thathôḿô̆ co thŏ tòcò anikhĭ.

¹² Ḿî ab́èhtŭb́èngā dèbwè nu, zî dî ḿî atcai thŏ ńò, kî thŏ tòcò tè b́è cè è̆ ńò, b́ĕ ca tcahtî khajab́ô le nu, zè lè̄ladēda hwă thŏ tòcò d́ō zè cwèphlò tèpwè. Khajab́ô tòcò glā hwă thŏ kî zè mèphrulaphrî̆hta tèpwè lōwa.

¹³ Bwèb́èngā dèbwè nu zî ḿî ab́èhtŭb́èngā lò d́ō, zè dèb́èhjŏb́èma thŏ anikhĭ tò ò tèpwè ńò.

^14-15 Jî ḿî atcai thŏ aè. Acab́ô̆ Apa thîhè̆ Jè kî Jî thîhè̆ Apa nu, cab́ô̆ gōnu akhò̆ Jî thîhè̆ jo thŏ kî Jo thŏ thîhè̆ Jè. Jî ilaphlòḿĭ Ja thathôḿô̆ Jo thŏ tòcò anikhĭ.

¹⁶ Jo thŏ atò ò agòbòbu ńò òwe tòcò be. Ajo tòcò ḿî ḿî Je gē geib́è cè cè, kî cè tòcò gî̄ thîhè̆kò̆ Je lē d́ō, thŏ kò òkò̆ dopho lò, kî atcai thŏ kò òkò̆ dèbwè lò.

¹⁷ “Dè ajo akhoacè̆ Ja Pa b́èlò̄ Jè, manè̄ d́ō, Ji ilaphlòḿĭ Ja thathôḿô̆ cab́ô̆htè Jî gî̄ phîhtagebò̄ Jè è̆ tapla be nu.

¹⁸ Bija dî phîkè̆ thĭwī za Ja thathôḿô̆ dèbwè̆ ńò. Jò ò kî dèkhwèdèja d́ŏ Jî gī ilakè̆, kî Ji gī phîge Jè è̆ lò. Dè ajo ḿî Ja Pa hmèlagè Jè d́ŏ agè̄ mèb́è dèdè̆ nu.”

¹⁹ Dèjî̄b́è ajo acè̆ dèbēpha òhta d́ò̆ Jŭdapho tòcò aklè̆ tapla be.

²⁰ D́ŏ cè tòcò aklè̆ òè̆bwè d́ògè, “Zè hnè Zu phŭ ò kî Zu blu htŏ. Thĭ sòkhĕńe ma Ze lē nè?” cò d́ò do.

²¹ Alewe tòcò d́ò, “Dèjî̄b́è ajo tòcò ḿî tè b́è ahnèaphŭ ò adèjî̄b́è ńò. Dèscidèhnè mèhlî̆htage za tèpwè bija gādŭkhi ā?” cè tòcò d́òhlègè lōwa do.

D́ŏ Zarādo Apwè̆bu nu

²² B́ĕnu akhî ḿî dèhòkhè̆, dèhôwîhta Zarādo Apwè̆ b́ègè d́ŏ Jerŭsalèm u nu.

²³ Jezŭ hèpôĺôgè d́ŏ Zarādo abu Sòlòmòn adadā nu.

²⁴ Jŭdapho le ò khwè̆b́a Jezŭ kî d́è̆gè Cè, “Nè gè̄ mè htèniwĭniwa wa dādè̄? Nî gî̄ ḿî b́eḿĕ Mèssĭah d́ō, d́ò hlî̆htaphlò̆htabò̄ dakha,” cò d́ò lōwa do.

²⁵ Jezŭ d́òscĭge cè tòcò, “Jò d́ò̆sa hwă htŏ thĭ, ḿî thĭ tu b́u Jè ńò. Dèmè htè Jè mè d́ŏ Ja Pa ami abu tòcò nu kha tèpwè Ji nikhĭ thè̆thî.

²⁶ Barasă thĭ dî ḿî Jo thŏ ńò akhoacè̆, thĭ tu b́u ńò.

²⁷ Jo thŏ tòcò thîhè̆ Je lē, Jî thîhè̆ cè kî zô lôkô Je le.

²⁸ Ji icè tòcò dèthôḿô̆ alahtŭlablo, kî cè tòcò tè kè̆ tô ô b́è pĭpi ńò, bija ta ăwū za cè d́ŏ ju cukhò bu dèbwè̆ ńò.

²⁹ Ja Pa htè aila Jè cè tòcò nu ḿî ado d́olĭ dèlŏcăcè lò. Mègōnu d́ō, bija ta ăwū kèhta cè tòcò d́ŏ Ja Pa acukhòbu dèbwè̆ ńò ńò.

³⁰ Jè kî Apa ḿî dèbwè lò,” Cò d́òge lōwa tòcò do.

³¹ Mègōnu d́ō Jŭdapho tòcò htula lo kî d́ò agē hwĕthĭ Cè.

³² Jezŭ d́ò cè tòcò, “Jè d́è̆lî̄ htŏ thĭ Ja Pa adèphîdèmè pwĕdimi. Thĭ thaè hwĕthĭ Jè ḿî d́òlè̄ domomo akhoacè̆ nè?” Cè d́è̆gè lōwa tòcò do.

³³ Jŭdapho tòcò d́òscĭ Cè, “We hwĕ nè lo ḿî tè b́è dèphîdèmè aè akhoacè̆ ńò, ḿî dèhtad́ĕd́ò Kib́ĭcè akhoacè̆. Manè̄ d́ō, nî ḿî bija, barasă nè mègè ne ne Kib́ĭcè akhoacè̆ nu,” cè tòcò d́ògè lōwa do.

³⁴ Jezŭ d́òscĭge cè tòcò, “D́ŏ thĭ Dèhmèla Acè abu nu, ahwela gōjo te b́è ńò ā? Kib́ĭcè d́ò thĭ, ‘Thĭ ḿî kib́ĭcè tòcò,’ nu.

³⁵ Kib́ĭcè Alēahwè ḿî ab́è thèjô̆ lò akhoacè̆, Zo gō jo b́eḿĕ bija htè anib́è Kib́ĭcè Alēahwè tòcò Kib́ĭcè d́ō,

³⁶ Apa rôhta hwă thodŏlegè Jè d́ŏ Lākho jo. Mègōnu d́ō, Jò d́ò, ‘Jè ḿî Kib́ĭcè Apho,’ akhoacè̆ thĭ d́ò zabò̄ Jî ḿî ahtad́ĕd́ò Kib́ĭcè ā?

³⁷ Jè gè̄ dè mè ma dèmè htè Ja Pa thaèni Jè mè tòcò ńò d́ō, b́u ḿè Jè ḿè.

³⁸ Barasă Jè gè̄ mè nòthò̆ Zè dèmè hnò̆nu, thĭ gū tu b́u ma Jè ńò d́ō, b́ubò̄ dè htè Jè mè tòcò nu, cab́ô̆htè thĭ gî̄ thîhè̆ kî b́ubò̄ Ja Pa ò d́ŏ Ju bu nu kî Jò ò d́ŏ Zu bu nu,” Cò d́ò lōwa tòcò do.

³⁹ Mègōnu d́ō bija tòcò thaè phò kòd́ò̆ Cè, ḿî Zè sèphlòhtagè lōwa tòcò acukhòbu dòkhò̆.

⁴⁰ Mèhwă Jezŭ geb́agè d́ŏ Jòrdăno gòlò̄wē tapla be htè aŭsu Zowănnī ŭsab́ă bija htĭ alle nu kî ògè d́ŏnu.

⁴¹ Bija òè̆bwè lehtî Cè, kî cè tòcò d́ògè, “Zowănnī dè mègè dèbòdèba ńò. Gajă ḿî Zowănnī d́ò̆sa bija ajo dèbwè awîakè̆ nu, ab́èzî̄ hŏ!” cè tòcò d́ò do.

⁴² Kîd́ò̆ bija aò d́ŏnu òè̆bwè b́ugè Cè.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan