Bìoball air-loidhne

Zăkomo 5 - Geba Roman New Testament

Dèigomohtani Aniò̆jòa tòcò

¹ Sòkhĕńebò̄, thĭ aniò̆jòa tòcò, joha kî haphuhasiribò̄ d́ŏ dèbadèsè̆ agā lab́è thĭ kho tòcò acè̆ nu.

² Thĭ ŭcalèkhjă tòcò thŏô̆lōhtŏ, kî thĭ dèkô̆dèthò tòcò go a lō htŏ.

³ Thĭ hô̆ kî htè̆ tòcò htalaî a lōgè; kî htalaî nu agî̄ ḿîkò̆ thĭ nikhĭ thè̆thî ahtad́ĕd́ò thĭ kî agô̄ hmô̆thwîhmô̆glakò̆ thĭ hî thĭ b́a acab́ô̆ hmî hjŭnīa nu. Thĭ pulacò̆htagè thĭ ŭcalèkhjă d́ŏ muni agudulă tòcò abu jo nu.

⁴ Thĭ di isôihlè̆gè bija akèb́u d́ŏ thĭ lèbu tòcò nu ńò. Sòkhĕńebò̄ zè dèdahta tòcò nu. Ḿî zè dèjohta alē hŏhta tèpwè d́ŏ B́ĭcè Dèado anigu bu nu.

⁵ Thĭ kha pwè̆ kha la htŏ d́ŏ Lākho akho jo kî thĭ dèò ḿî apĕhtagè kî dèmè mòthomòtha thĭ ne tòcò nu. Thĭ mè b́ô mè tho thĭ ne d́ŏ thĭ dèthĭ amuni anikhĭ nu.

⁶ Thĭ cirrathĭ kî mèthĭgè bija adèkèḿè tò ò ńò ḿî bija adî̄ahma tòcò kî cè tòcò dè mèscĭ tèpwè thĭ ńò.

Dèkhòthad́ò̆ d́ŏ Dèbadèsè̆ aklè̆

⁷ Mègōnu d́ō, thè̆buthè̆we tòcò, khòthad́ò̆bò̄ htô̆do B́ĭcè gō doge nu. Tcabò̄ bija amèkhlòlè dèbwè òsô̆wô̄i alākho aphò̆athè alīdobwîthè̆ cadè̄ nu. Zò khòthad́ò̆ òsô̆wô̄i hwèhtĭ d́ŏ thèd́è̆zunila adābu nu.

⁸ Nè ḿî ḿî khòthad́ò̆wî̄thazôbò̄. Mèdohtabò̄ nè dèsascĭi; manè̄, Kib́ĭcè adèdole b́ôhtî htŏ.

⁹ Thè̆buthè̆we tòcò, mô̄mô̄îî hlèbò̄ ḿè lōwa ḿè, cab́ô̆htè thĭ gè̄ tè b́è cirrabò̄ ńò nu. Tcabò̄, acirradè dèbwè sò̆hto ò d́ŏ khaglè̄htî nu.

¹⁰ Mègōnu d́ō, thè̆buwe tòcò, gomohtanibò̄ prò̆fèt adèjî̄b́è d́ŏ B́ĭcè ami abu tòcò nu, dòniphînibò̄ zè dèkhòthad́ò̆wî̄thazô d́ŏ dèbadèsè̆ aklè̆ nu cadè̄ nu.

¹¹ Wo jo cè ab́èhôwî, manè̄ zò khòigè dèbadèsè̆ cadè̄ nu. Thĭ thîhè̆b́è htŏ Jò̆ba adèkhòthad́ò̆ kî Kib́ĭcè igetcagegè lōwa d́ŏ muni agudulă dini cadè̄ nu. Manè̄ d́ō, B́ĭcè ḿî akhòwèhmòb́èdè acè̆ nu.

¹² Thè̆buthè̆we tòcò, d́olĭ kî ajo, b́ĕ thĭ aḿăkhai dè nu, hôd́ăbò̄ ḿè thĭ ne ḿè. Hôd́ăi ḿè Mò̄kho Lākho kî dè alewe dimĭ ḿè. D́òbò̄ dè ab́è d́ō, “Ab́è,” atè b́è ńò d́ō, “Atè b́è ńò,” lò, cab́ô̆htè thĭ gā da khab́èbò̄ B́ĭcè adècirra ńò nu.

¹³ D́ŏ thĭ klè̆ nu aohmŭora ò dèbwèbwè ā? Cè kè thèb́è̆hta d́ò̆è. Athalōthala ò dèbwèbwè ā? Ca gā thăbô̄ d́ò̆è dèthăbô̄ htăhtai.

¹⁴ Dò̆ thĭ klè̆ nu ascwiasè̆ ò dèbwèbwè ā? Jonībò̄ cè dèòplo athobwethabwe kî cè tòcò gô̄ htôrô d́ò̆è cè kî si d́ŏ B́ĭcè ami abu nu.

¹⁵ Dèthèb́è̆ d́ŏ dèb́u abu jo gè̄ mèhlô̆htage d́ò̆è bwèsè̆ kî B́ĭcè kā b́awè̄hto d́ò̆è cè, kî cò kò ò b́eḿĕ dèkhòwè abu d́ō, akè b́è b́ahlô̆ d́ò̆è.

¹⁶ Mègōnu d́ō, d́òlabò̄ thĭ dèkhòwè d́ŏ dèbwè kî dèbwè ò, kî thèb́è̆hta hlèbò̄ lōwa dèbwè kî dèbwè anikhĭ cab́ô̆htè thĭ gô hlô̆htagebò̄ nu. Manè̄ bija adî̄ahma dèbwè adèthèb́è̆ dîgrînî nu ḿî akhlŏhtamame pwĕdimi acè̆ nu.

¹⁷ Elĭjah ḿî bija amè cab́ô̆ wa dèbwè nu. Ḿî b́ĕ cè thèb́è̆hta dîgrînî cab́ô̆htè hwè gū du zubò̄ ńò nu d́ō, hwè du zu tèpwè ńò d́ŏ thŏd́e kî ahlè̆thăthô adābu.

¹⁸ Cè thèb́è̆hta tapla be kî Mò̄kholè̄ tòla tèpwè hwè kî lākho bohtai tèpwè aphò̆athè.

¹⁹ Jè thè̆buthè̆we tòcò, d́ŏ thĭ klè̆ nu dèbwèbwè gè hèphròthĭwî̄ dèdî̄dèhma aklè d́ō, jogekègebò̄ cè,

²⁰ zò mò thîhè̆ cè htè ajogekège cè dèbwè nu gô hlô̆htakò̆ dèthĭ aklè̆ kî zè dèkèḿè òèòò kè̄ b́è b́ò̆b́ikò̆.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan