Bìoball air-loidhne

Thodŏpho 4 - Geba Roman New Testament

Petru kî Zowănnī d́ŏ Zarādo Akhoane Ahlò̆mò̄

¹ B́ĕ cè tòcò jî̄b́èhtî phătha bija nu, phŭgi tòcò kî Zarādo akhoane kî Saducè̆pho tòcò ledogè.

² Cè tòcò thèhtègè, manè̄ d́ō bōhmubicè gībwè thôithò̆i bija kî bò̄igè ab́èkja Jezŭ adèhtaboge dèthĭklè̆ akhoacè̆ nu, ḿî ad́è̆lî̄hta bija athĭ tòcò gā htaboge awîakè̆ lò.

³ Zò phò lōwa kî htînī lōwa dèkî̆dî̄ abu htô̆do alekă dini nu, manè̄ dèkhidî̄gè cè akhoacè̆ nu.

⁴ Barasă bija òè̆bwè athîhè̆b́è zè dèjî̄b́è tòcò b́ugè cè kî bija ab́udè tòcò b́ahtagè abwè jè̄htò dòkhò̆.

⁵ Alekă dini Jŭdapho akhoane, anedothabwe tòcò kî Skrĭbāpho tòcò ladēplogè lōwa d́ŏ Jerŭsalèm u bu,

⁶ ploplo kî Phŭgima Ănna, Kaĭphas, Zowănnī, Alèssăndro kî bija alewe òèòò htè aḿî Phŭgima akhwĭathèlè̆ tòcò nu.

⁷ Za hna sò̆hto ò hwă bōhmubicè gībwè d́ŏ cè tòcò ahlò̆mò̄ kî htôtcadè̆cagè lōwa, “Thĭ mègè dè ajo d́ŏ da aphlŭathere abu mĭdîḿî ńò d́ŏ da ami abu nè?” cè d́è̆ lōwa do.

⁸ B́ĕnu Petru ò pĕhtagè kî Spirito Tcahtĭ kî cò d́ò lōwa tòcò, “Htĭge akhoane tòcò kî athobwethabwe tòcò,

⁹ b́eḿĕ khŏdini wè kè̄ b́è dècirra d́ŏ wè mè dè aè d́ŏ akhad́e dèbwè anikhĭ kî wè mèhmage cè cadè̄ nu d́ō,

¹⁰ thĭ lŏcăcè kî Israè̆lpho lŏcăcè thîhè̆bò̄ zè dèhmage ajo nu ḿî d́ŏ Jezŭ Krĭstu, Nazarè̆thpho ami abu, Cè htè thĭ htalaglothĭgè dèbwè nu, htè d́ŏ Kib́ĭcè b́awè̄htoge htŏ Cè dèthĭ aklè̆ dèbwè ami abu bija ajo dèbwè sò̆hto ò thĭ hlò̆mò̄ jo nu òhma thoŏthèè tèpwè jo.

¹¹ Jezŭ ḿî awîakè̆ b́è hwela Cè Tcahtĭ abu ad́ò; ‘Lo htè thĭ htîphlòḿĭ to d́ŏ nu, kèhtagè lo anebu akăd́ò̆ htè Cè akhlŏ nu dèhlô̆htage tò ò ńò nu.’

¹² Bija aila za dèhlô̆htage ḿî htĕ Cè dèbwè lò. D́ŏ Lākho akho jo, mi alewe htè B́ĭcè ila d́ŏ dèhlô̆htage anikhĭ tò ò dèmè̆ ńò,” cò d́ò lōwa tòcò do.

¹³ B́ĕ htĭge akhoane tòcò tcahtîgè Petru kî Zowănnī adèkhŭdèhè̆ kî thîhè̆gè zî ḿî bija adî thîôthîcè ńò, bija atèpwèpho tòcò lò d́ō zè htèdômô̄dahmăgè. Zo gomohtanige cè tòcò òkô nènògè Jezŭ akă nu.

¹⁴ D́okhlŏ ḿî za tcahtî ahmage dèbwè sò̆htoplo cè tòcò d́ō, cò tò d́òscĭge zagè lōwa tòcò dimĭ ńò.

¹⁵ Mègōnu d́ō, za hna hèhtaphlòmĭ lōwa tòcò dèladēplo akhlŏ, za la d́òb́èsab́è lōwa,

¹⁶ “Wè gè̄ mèb́è bija ajo tòcò cadè̄? Manè̄, cè tòcò mègè dèbòdèba d́ŏ Jerŭsalèm upho lŏcăcè ahlò̆mò̄ kî wa da jab́i zagè ńò.

¹⁷ Barasă cab́ô̆htè agè̄ dè hèbrè bija tòcò ahlò̆mò̄ ńò anikhĭ nu, b́èkî wè mèd́îd́ă cè tòcò agî̄ dî jî̄b́èhtai Jezŭ ami ajo dimi d́ŏ bija tòcò ahlò̆mò̄ taplă be ńò,” cò d́òhlè lōwa do.

¹⁸ Zo joge hwă lōwa, zè hmèla lōwa agô̄ tô thôithò̆i pĭpib́è Jezŭ ami ńò nu.

¹⁹ Barasă Petru kî Zowănnī d́òscĭge cè tòcò, “D́ŏ Kib́ĭcè ahlò̆mò̄ nu, ab́è ḿî wò sòkhĕńe thĭ ā? Kib́ĭcè ā? nu gomo dò̆ d́ò̆è thĭ è̆.

²⁰ Ḿî wa nu, gajă wa tcahtîb́è thîhè̆b́è tòcò nu, wò tò d́òi ńò wò tò ò kèhta ńò,” cò d́ògè lōwa tòcò do.

²¹ Ḿî akhoane tòcò ithidĭ grî̄pîńî d́okhlŏ hwă cè tòcò kî hnagegè lōwa. D́ŏ zi gī cirra lōwa tòcò anikhĭ ca ta pahtîgè klèthòò̆ dimĭ ńò. Bija lŏcăcè tòcò htăhtaigè Kib́ĭcè d́ŏ dèphî̆htagè tòcò akhoacè̆ nu.

²² Manè̄, bija htè ab́èmèhmage kî dèbòdèba phî̆htanigè dèbwè nu ca tha ògè ad́e lwīscĭsè.

Ab́udè tòcò Da Dèkhŭdèhè̆

²³ Petru kî Zowănnī b́è hna hèhtaphlòḿĭ hwă, ze lehtîgè zò khò̆ tòcò kî d́ò̆sagè lōwa htè Phŭgido tòcò kî anedothabwe tòcò d́ògè cè tòcò cadè̄ nu.

²⁴ B́ĕ ab́udè tòcò thîhè̆b́è dè ajo d́ō, zo htŏhta ploplo ze lē d́ŏ B́ĭcè abu kî d́ògè, “Ŏ B́ĭcè ab́òla Mò̄kho, Lākho, Htĭ pèllè kî dèlŏcăcè ḿî Nè,

²⁵ htè d́ŏ Spirito Tcahtĭ abu, Ńò d́ò̆sagè nò zôpho Dăvid alòmò bu nu; ‘Bwèthŭkupho tòcò athogothagè̄ manè̄? Bija tòcò kŏhtakjala hnahnă manè̄?

²⁶ Lākho asaphra tòcò prahnèsèhnè ane, Bija aŭi htĭge tòcò ladēplo lōwa agā htakhokă Dèado kî Zi Krĭstu,’ cò d́ògè do.

²⁷ Athĕbwe nu, d́ŏ u bu nu, cè tòcò ladēplo kî htakhokăgè Jezŭ nò htôrôgè si tcahtĭ dèbwè nu. Èrŏdè kî Pò̆nsio Pilăto ploplo kî bwèthŭkupho kî Israè̆lpho tòcò ladēplo kî htakhokăgè Jezŭ, Nò Zôpho Atcahtĭ, htè agā htakhokă kî Krĭstu.

²⁸ Cè tòcò ladēplo lōwa ḿî cab́ô̆htè zè gè̄ mè dèlŏcăcè htè nò htulahmèla hwă htŏ akè b́è mè ane d́ŏ nè dècô̆thèlè̆ kî ab́è na tha nu.

²⁹ Ŏ B́ĭcè, khŏnujo hmăibò̄ cè tòcò adèmèscisă wa tòcò nu, kî ilabò̄ wa nò zôpho tòcò akò d́ò̆sakhŭthaklabò̄ bija Ne lē Nè hwè nu.

³⁰ B́ĕ Na tad́ăhta Nu cukhò d́ŏ dèmèhmage kî dèbòdèba d́ŏ Nò Zôpho Atcahtĭ Jezŭ ami abu nu,” cò d́ò do.

³¹ B́ĕ cè thèb́è̆hta hwă nu, zò sò̆hto ò ale geme kî gleglāgè, kî cè tòcò ò pĕhtagè Spirito Tcahtĭ kî d́òŭsaŭgè Kib́ĭcè Alēahwè d́ŏ dèkhŭdèhè̆ abu nu.

Ab́udè tòcò Òimèiplo lōwa

³² Ab́udè tòcò lè̄la athoatha dèmè̆ lò kî tò d́ò aòi adî̄adè ńò, ḿî òimèiplo lŏ lōwa lò.

³³ D́ŏ dèphlŭdotheredo abu bōhmubicè tòcò kha wî B́ĭcè Jezŭ adèhtaboge athè̆thî kî Kib́ĭcè hlòlagè adèhludètădo d́ŏ cè lŏcăcè alò.

³⁴ D́ŏ ab́udè tòcò aklè̆ assègnè̆bòdò, òbaòsè̆ tò ògè ńò. Manè̄ alākhodoklè̆, ahiaphă ò tòcò sè̆kè̆ hwă aè̆,

³⁵ ze le pula abwî d́ŏ thodŏpho tòcò akhahtî nu, kî thodŏpho tòcò belani bija d́ŏ aè̆ tò ò ńò tòcò pwĕ aloba zi nikhĭ nu.

³⁶ Kîd́ò̆ Zŏzè htè thodŏpho ami ḿî Barnăbas (ahtabohtab́ă ḿî dèmèmòhtage apho) htè Lĕvipho aò d́ŏ Cĭproge dèbwè nu,

³⁷ sè̆kè̆ hwă zò khlò zè lè d́ō le b́è̆lăgè abwî d́ŏ thodŏpho tòcò akhahtî nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan