Bìoball air-loidhne

Thodŏpho 26 - Geba Roman New Testament

Păulu Adèjî̄b́è d́ŏ Agrî̆ppa Ahlò̆mò̄ nu

¹ Alekă Agrî̆ppa d́ògè Păulu, “Na thaè d́ò danè̄ d́ō d́ò d́ò̆è,” cò d́o lōwa do. Păulu tad́ăhta hwă acukhò cò d́ò wolai ze ne gōjo:

² “Ŏ Saphra Agrî̆ppa, jo gomolage je ne agèlèwî, d́ŏ agò̄ sò̆hto ò ńò hlò̆mò̄ khŏdini jo kî akò d́òscĭge Jŭdapho amè jè dèhmŭ tòcò jo nu.

³ D́okhlŏ ḿî azaabla d́ŏ ab́èkja Jŭdapho anuad́ò̆ kî ahô̆ajò tòcò nu. Mègōnu d́ō, ja damòhta nè agò̄ khòthad́ò̆ kî sòkhĕńebò̄ jè tîkî.

⁴ “Hlĕ ji bĭsèpho nu jî ḿî bija danè̄ nu Jŭdapho aò Jerŭsalèm tòcò thîhè̆ lŏ tèpwè. Cè tòcò thîhè̆ htè aŭsu jò ò d́ŏ ji htĭ je ge, alekă je le ògè d́ŏ Jerŭsalèm u bu nu.

⁵ Cè tòcò atha ḿî ò d́ŏ agā kha thè̆thî ji nikhĭ d́ō zè mè za tèpwè. Manè̄ cî thîhè̆ jè ad́ehtakjalagè kî thîhè̆ tèpwè htè jò òi wu nu wò d́ò̆, jè mèkôgè Pharizè̆pho htè aòi hmetekle dèhmèla tòcò akă nu.

⁶ Kî khŏnujo d́ŏ jè dèsascĭi agī nib́è Kib́ĭcè aḿăkhai wi phĭ wu phŭ tòcò akhoacè̆ jè b́èhmŭdurakò̆ gōjo.

⁷ Dèaḿăkhai ḿî wa scigīkhwĭ nu thèb́è̆dahta thè̆musè̆munè agī nib́è dèdè̆ nu. Ŏ saphra, d́ŏ dèsascĭi anu dèdè̆ akhoacè̆, Jŭdapho tòcò sajògè jè!

⁸ Kib́ĭcè ka b́awè̄htoge athĭ tòcò nu, thĭ aò b́ĕjo tòcò tu b́u ma ńò nè?

⁹ “Jè thè̆ne gomogè htè jè dèmè ḿî agā htad́ĕd́ò Jezŭ Nazarè̆thpho ami.

¹⁰ Jè mègè dè ajo d́ŏ Jerŭsalèm u bu nu. Jî htînī bija tcahtĭ òè̆bwè d́ŏ dèkî̆dî̄ abu, d́ŏ Phŭgido tòcò adèila jè aphlŭathere kî cè tòcò B́ècirrathĭ nu, jè d́è̆lî̄hta jè dèb́ètha ahtad́ĕd́ò cè tòcò lò.

¹¹ Òè̆pla je lenī sinagŏgā abu kî mèjomèhnă cè tòcò cab́ô̆htè za gā bāphlòḿĭbò̄ zè dèb́u nu. Jè dèthado zo kho mè pwĕ acab́ô̆ jô lô cè do d́ŏ bija ad́ŏ htĭge alewe nu.

Păulu D́ò̆sa Adèb́ăkhlè
( Thodŏpho 9.1-19 ; 22.6-16 )

¹² “B́ĕ je le d́ŏ Damăskus u agò̄ phò bija tòcò akhî nu, je lekôgè Phŭgido tòcò adècô̆thèlè̆ kî adèthodŏ,

¹³ kî Ŏ saphra, b́ĕ lumuhtihta nu, ja tcahtîgè dèhlî̆ agè̄gòbrò d́olĭ kî lumu aò d́ŏ Mò̄kho ahlî̆la nu dèdè̆ hlî̆lab́è khwè̆b́agè jè kî ahèkô ja kă tòcò nu.

¹⁴ Wa lakhu d́ŏ lākho gŏ abwè kî dè alē dèdè̆ d́ò jè Hebrè̆upho alē, ‘Saŭlu, Saŭlu, ńò lô mèssègnè̆ ma jè nè? Ni gī htĭ hnèhlî ḿî dè aba domo,’ ad́è̆gè jè do.

¹⁵ Kî jè d́è̆gè, ‘Nî ḿî d́ò̆ bò̄bwè? Ŏ B́ĭcè?’ Dè alē d́òscĭge jè, ‘Jî ḿî Jezŭ nò lô mèssègnè̆ dèbwè nu.

¹⁶ Barasă d́ō, wè̄htobò̄. Jò pòhtahtî nè ḿî agè̄ lè̄hta nè jô zôpho agā kha nè dètcahtî jo thè̆thî d́ŏ na tcahtî htŏ jè khŏdini nu, kî d́ŏ alekă jò gò̄ pòhtahtî we nè nu.

¹⁷ Jè gè̄ mèhlô̆htakò̆ nè d́ŏ Israè̆lpho tòcò acukhòbu kî bwèthŭkupho tòcò acukhòbu htè jo thodŏle nè d́ŏ cè tòcò ò nu.

¹⁸ Na ka b́ăhtab́èkò̆ zu mugādŭ cab́ô̆htè ca ka d́ab́age ze ne dèhlî̆ aklè̆ d́ŏ dèkhi abu nu, kî cò ò hwă d́ŏ Sătana acukhòbu, ze gē geb́ahtîbò̄ Kib́ĭcè kî nib́èbò̄ dèb́u d́ŏ jò ò, dèkhòwè adèb́ăplè kî ab́è mètcahtĭ tòcò anikhĭ dèila nu,’ cò d́ògè jè do.

Păulu D́ò̆sa Adèphîdèmè

¹⁹ “Ŏ Saphra Agrî̆ppa, alekă ja da htakhokă be Mò̄kho Adètcahtî ńò.

²⁰ Ḿî jò d́ò̆htôd́ò̆dèlègè dòkhò̆, aŭsu ḿî bija aò d́ŏ Damăskus u bu tòcò nu, alekă bija aò d́ŏ Jerŭsalèm u bu kî bija aò d́ŏ Judĕage bu tòcò nu kî d́ŏ bwèthŭkupho tòcò papa, ja hna cè tòcò gā salage atha kî geb́ahtî Kib́ĭcè, d́è̆lî̄hta d́ŏ dèb́ăkhlètha kî dèphîdèmè abu nu.

²¹ Dè ajo akhoacè̆ Jŭdapho tòcò phò hwă jè d́ŏ Zarādo abu nu, ca thaè mèthĭgè jè.

²² Ḿî d́ŏ Kib́ĭcè adèhôwîhômò akhoacè̆ jò sò̆hto ò hmeteklekò̆ htô̆do khŏdini jo, khathè̆thîkò̆ d́ŏ bija adodo ascisci lŏcăcè ahlò̆mò̄, jò d́ògè dè htè ajāthôthô Prò̆fèt tòcò kî Mŏzè adèd́òdòlò agî̄ phî̆hta;

²³ htè Krĭstu gā khab́èkò̆ dèssègnè̆bòdò kî Za gā htabogekò̆ dèthĭklè̆ nu, Cò kò d́òhlî̆htakò̆ htè dè gî̄ hlî̆la b́èkò̆ wî bija tòcò akho kî bwèthŭkupho tòcò akho kho nu.”

²⁴ B́ĕ cò d́òka hwă ze ne nu, Fèstus kèwohta kî d́ògè, “Păulu, nu blu htŏ! Nè dèthîhè̆ tòcò mèblugè nè,” cò d́ò lōwa do.

²⁵ Păulu d́òscĭge cè, “Ŏ Dèado Fèstus! Ju du blu ńò. Ḿî jò d́ò dèdî̄dèhma athĕbwe lò.

²⁶ Saphra Agrî̆ppa! Nî thîhè̆ tèpwè dè ajo tòcò jo, kî jî jî̄b́èhtî nè d́ŏ dèhlî̆dèṕla abu, adî ḿî pwè ni nikhĭ ahnahnă dî ḿî ńò, manè̄ d́ō, dè ajo tòcò dî phî̆htagè d́ŏ dèhudèzò aklè̆ dimĭ ńò.

²⁷ Ŏ Saphra Agrî̆ppa, nu b́u tèpwè prò̆fèt tòcò nu ā? Jî thîhè̆ tèpwè htè nu b́u cè tòcò nu,” cò dò do.

²⁸ B́ĕnu Saphra Agrî̆ppa d́ògè Păulu, “Tîkî be lò, nè gè̄ mèphî̆htagè jè Krĭstupho no gomogè nè è̆ do ā?” cò d́ò lōwa do.

²⁹ Păulu d́òscĭge cè, “Tîkî be zāhwahwă, òjî̄we zāhwahwă, jè thèb́è̆hta d́ŏ Kib́ĭcè ahlò̆mò̄ htè tè b́è htĕ nè lò ńò, ḿî khŏdini asòkhĕńe jè dèjî̄b́è ajo tòcò lŏcăcè gî̄ ḿîbò̄ acab́ô̆ jè nu, d́ŏ aplôb́è htaĺabi akhlŏ nu,” cò d́ò lōwa do.

³⁰ B́ĕnu Saphra wè̄htogè, mādo kî Bĕrnice kî bija gŏ abwè wè̄htogè,

³¹ kî b́ĕ cè tòcò ge sò̆dūsòd́è̆ kî dòdò̄maja akhî nu, za laglahlègè lōwa htè, “Bija ajo dèbwè dè mènigè dè d́ŏ amò tani dèthĭ kî dèhtînī dèkî̆dî̄ bu dimĭ ńò,” nu.

³² Agrî̆ppa d́ògè Fèstus, “Bija ajo dèbwè do johta ma Caĕsarè ńò d́ō, zò mò b́ahlô̆ hwă htŏ dòkhò̆,” cò d́ò lōwa do.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan