Bìoball air-loidhne

Thodŏpho 22 - Geba Roman New Testament

¹ “Jè thè̆buwe tòcò, Ŏ apa tòcò, sòkhĕńebò̄ jò d́ò dè d́ŏ dèwolai ane d́ŏ thĭ hlò̆mò̄ nu tîkî.”

² B́ĕ bija tòcò thîhè̆ jî jî̄b́è Hebrè̆upho alē d́ō, d́î̆ bija òzòlògè gè.

³ Păulu d́ò, “Jî ḿî Jŭdapho dèbwè kî jò òlagè d́ŏ Cilĭciage, Tărsus u bu nu. Jo dohtagè d́ŏ Tărsus u bu, jè mèhlô̆gè cè d́ŏ Gamălia acukhòbu kî cô thôithò̆igè jè phĭ phŭ adèhtulahmèla akă tòcò nu. Jè mè pĕhtazòhtagè Kib́ĭcè adèmè acab́ô̆ thĭ mègè khŏnujo nu.

⁴ Jô lô mèssègnè̆ bija alôkô KLÈ ajo tòcò pwĕ jè mèthĭ cè tòcò, jo cŏ jî gjî̄ hwă amihmu amikhŏ tòcò je lehtînī cè d́ŏ dèkî̆dî̄ abu nu.

⁵ Jò d́ò dè ḿî adî̄ahma nu Phŭgima kî adoabwe lŏcăcè tòcò khani za tèpwè jè thè̆thî. Manè̄ d́ō, cè tòcò thè̆lekô jè cè d́ŏ thè̆buwe aò d́ŏ Damăskus u bu tòcò nu. D́ŏ jè dèlle klè asŏakhè̆ nu, jè dèkŏdèkja ḿî agē gei dèkî̆dî̄pho tòcò akè b́è cirra d́ŏ Jerŭsalèm u bu nu.

Păulu D́ò̆sa Adèb́ăkhlètha
( Thodŏpho 9.1-19 ; 26.12-18 )

⁶ “B́ĕ je lekô klè kî do b́ôhtî Damăskus u, lumuhtihta akhî nu, dèhlî̆segòdrò aò d́ŏ Mò̄kholè̄ dèdè̆ hlî̆ khwè̆b́agè jè.

⁷ Ja lakhu lākho kî thîhè̆b́ègè dèlē dèdè̆, ad́ò jè, ‘Saŭlu, Saŭlu, nò lô mèssègnè̆ ma jè nè?’ ad́ò jè do.

⁸ Jò d́òscĭge Cè, ‘Nî ḿî bò̄bwè, Ŏ B́ĭcè?’ jè d́è̆gè cè do kî Cò d́òge jè, ‘Jî ḿî Jezŭ Nazarè̆thpho htè nò lô mèssègnè̆ dèbwè nu,’ Cò d́òge jè do.

⁹ Bija aòkô ja kă tòcò tcahtî tèpwè dèhlî̆, ḿî zî dî thîhè̆gè dèlē ajî̄b́èhtî jè nu ńò.

¹⁰ Jò d́ògè, ‘Jè gè̄ mèb́è danè̄? Ŏ B́ĭcè?’ Dèado d́òge jè, ‘Wè̄hto kî le d́ŏ Damăskus u bu nu. Nè gè̄ mèb́è danè̄ nu dè kò d́ò̆sakò̆ nè,’ cò d́ò jè do.

¹¹ Dèhlî̆ gè̄gòbrògè pwĕ ja gādŭ khigè nu d́ō jò khò̆ tòcò pôglo ju cukhò khaĺè jo dokò̆ d́ŏ Damăskus u bu nu.

¹² “Bija jo ami Ananĭa, alôkô Mŏzè adèthôdèthò̆ htè Jŭdapho aò d́ŏnu lŏcăcè d́ŏb́èj́ab́è dèbwè nu lehtîgè jè.

¹³ Cò sò̆hto ò hwă jo wōlò d́ō, d́ògè, ‘Apîkò̆ Saŭlu, tcahtîgebò̄ dè dakha!’ cò d́ò jè do. Ja gādŭ hlî̆hta danā kî ja tcahtîgè cè.

¹⁴ Mèhwă cò d́ò, ‘Wi phĭ wu phŭ Ab́ĭcè rôhtagè nè agî̄ thîhè̆ Zè dèthaèni, agā tcahtîb́è bija Adî̄ahma Dèbwè, agî̄ thîhè̆ Cè thè̆ne jî̄b́èhtî nè alē nu.

¹⁵ Nî gî̄ ḿîb́è Zi nikhĭ thè̆thî d́ŏ bija akhwĭthèlè̆ lŏcăcè ahlò̆mò̄ dè htè na tcahtî kî nî thîhè̆b́ègè tòcò nu.

¹⁶ Mègōnu d́ō, nò dôigè danè̄? Akhîb́è htŏ d́ŏ nu gū ŭsab́ă ne ne htĭ kî ŭsab́ăkè̆ nè dèkhòwèkhòkha d́ŏ dèjohta Zi mi abu nu.’

Păulu B́è jole Agò̄ D́ò̆htôlani Bwèthŭkupho tòcò

¹⁷ “Tapla be B́ĕ Jo dole hwă Jerŭsalèm u bu, b́ĕ jè thèb́è̆hta d́ŏ Zarādo bu nu,

¹⁸ ja tcahtîb́ègè Cè d́ō, cò d́ògè jè, ‘Mèplă! Hèhtaplă Jerŭsalèm u, manè̄ d́ō, cè tòcò gī dî phîni tèpwè nè dèkha ji nikhĭ thè̆thî ńò.’

¹⁹ Jò d́òscĭge Cè, ‘Ŏ B́ĭcè, cè tòcò thîhè̆b́è htè ja hta sinagŏgā dawa ladē dawa, htînī bija ab́u nè tòcò d́ŏ dèkî̆dî̄ abu kî de, bogè lōwa nu.

²⁰ Kîd́ò̆ b́ĕ akha Ni nikhĭ thè̆thî Stè̆phano hlòlagè athwiahtĭ akhî nu, jò sò̆hto òplogè amèthĭ cè tòcò kî jò woigè cè tòcò ascid́ŏkhlŏ akhoacè̆ nu,’ jò d́òscĭgegè Cè do.

²¹ Alekă Cò d́ò jè, ‘Lebò̄! Jo thodŏ nè d́ŏ bwèthŭkupho htè aòjîòzo tòcò nu dòkhò̆,’ Cò d́ò jè do.”

²² Bija tòcò sòkhĕńe tèpwè zè dèjî̄b́è htô̆ cò d́òhtani dè ajo nu d́ō, cè tòcò kèwohtagè, “Mèkè̆ bija ajo dèbwè jo! Zò dò mò ò bija ńò!” cò d́ò do.

²³ Bija tòcò kèwohtŏphu, hwehwă zi scid́ŏ kî bāphî̆bāphègè.

²⁴ Mègōnu d́ō Rŏmapho aklĭbodo d́ò bija lei cè d́ŏ dèd́owè̄ alle nu kî hna bija hlîplè̆ hwă cè, htôtcad́è̆tca lōwa htè bija tòcò trai ma cè pwĕ gōnu acè̆ nu.

²⁵ Barasă b́ĕ bija tòcò cŏwè̄glo hwă cè, thaḿò̆ hlîplè̆gè cè nu, Păulu d́è̆gè mādo htè asò̆hto ò ca kăhtî dèbwè nu, “Thĭ de thĭ bo Rŏmapho dèbwè nu dukhlŭkî thĭ cirraphame cè hnî̆ńò nu ab́èklèbò̄ ā?” cè d́è̆gè lōwa do.

²⁶ Klĭbodo dèbwè thîhè̆b́è dè ajo d́ō, ze le d́ò̆sagè mādo, “Nè mè danè̄ nu nî thîhè̆bò̄ ā? Bija ajo dèbwè ḿî Rŏmapho nî̄!” cò d́ò lōwa do.

²⁷ Mègōnu d́ō, klĭbodo lehtî Păulu kî cò d́ò lōwa, “Nî ḿî Rŏmapho dèbwè ā?” cè d́è̆gè lōwa do. “Jî ḿî hŏ!” Păulu d́ò̆sagè cè do.

²⁸ Klĭbodo D́ògè cè, “Jo lōla òè hô̆ agī nib́è Rŏmapho ahtŭaja,” cò d́ò̆sa lōwa do. “Jò òlanigè Rŏmapho dèbwè dòkhò̆,” Păulu d́ògè cè do.

²⁹ Taplakhă lò, bija ahtôadè̆ Păulu tòcò sè gôlô̄gelegè. Kî d́ŏ co cŏ zî gî̄ nigè Rŏmapho dèbwè acè̆ Klĭbodo thaganāgè.

Păulu d́ŏ Jŭdapho Adècirra Alle

³⁰ Alekă dini Klĭbodo thaè thîhè̆ Jŭdapho tòcò sawè̄ Păulu alò dèkèḿè ḿî da acè̆ nè nu d́ō zo jo ladēplo lŏ Phŭgido tòcò kî Jŭdapho acirradè lŏcăcè, mèhwă za hna sò̆hto ò Păulu d́ŏ cè tòcò ahlò̆mò̄ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan