Bìoball air-loidhne

Thodŏpho 21 - Geba Roman New Testament

Păulu Le d́ŏ Jerŭsalèm u nu

¹ B́ĕ wa d́ab́a hwă wo khlŏ d́ŏ bija tòcò ò nu, we legè ahlò̆mò̄ htô̆do Kò̆s khò̆htĭkho nu. Alekă dini we dogè d́ŏ Rŏdès khò̆htĭkho nu, alekă we legè d́ŏ Pătara u nu.

² B́ĕjo wa pahtîgè thè̆bò agē le d́ŏ Phoenĭsia dokho d́ō wa htanīgè abu.

³ Wa tcahtîgè Cĭpro khò̆htĭkho d́ō, wè khè̆ladē hwă d́ŏnu, d́òle d́ò̆ ahlò̆mò̄ d́ŏ Sĭriage, Tĭro u nu, manè̄ d́ō, bija b́è̆lăkè̆gè dî̄dè d́ŏnu acè̆ nu.

⁴ Wa wācăhlè hwă bōhmubicè tòcò d́ō, wò ògè d́ŏnu dòsòd́è̆ adābu. D́ŏ Spirito Tcahtĭ adèhtowè̄htosò̆ abu, bija tòcò d́ò̆sa Păulu agē de lebò̄ d́ŏ Jerŭsalèm u ńò nu.

⁵ Barasă wi nikhĭ akhîagla b́è tapla we le tèpwè lò. Ploplo kî amihmu kî abĭsèpho tòcò le thè̆gè wa htô̆ wè hèhta u akhlŏ nu. B́ĕ wo dole pèllèwe nu, wo dōhnŏla kî thèb́è̆htagè.

⁶ Mèhwă wu hnŭsè hwă lōwa d́ō wa htanī thè̆bòbu kî bija tòcò gegè ahiaphă.

⁷ We lekô htĭ aklè, b́ĕ Tĭro u kî dolegè d́ŏ Ptò̆leme u nu, htè wu hnŭsè hwă ab́udè tòcò kî òkôgè cè tòcò akă dè thè̆ adābu.

⁸ Alekă dini we ledogè d́ŏ Caesăria u nu. B́ĕnu we le òkôgè Philĭpo, ahwe Cè Tcahtĭ htè ab́èrôhta agè̄ mèzo dè d́ŏ Jerŭsalèm u abu, thăthô dèbwè aklè̆ dèbwè ahibu nu.

⁹ Zo phomu aphôthè ògè lwībwè htè abò̄i Kib́ĭcè alēahwè nu.

¹⁰ Wò ò b́ĕnu ò hwă amunimuthè̆ pwĕdimi d́ō, prò̆fèt ami ḿî Agăbus aò d́ŏ Judĕage dèbwè lehtîgè wa.

¹¹ Ze lehtî wa kî phî hwă Păulu ahnî̆jābi kî cŏglo hwă cu cu za kha, cò d́ò, “Spirito Tcahtĭ d́ògè gōjo; D́ŏ Jerŭsalèm u bu nu, hnî̆jābi ab́icè jo nu, Jŭdapho tòcò gō cŏ gî̄ gjî̄ hwă cè d́ō, ci ki ilaphlòḿĭkò̆ lōwa d́ŏ bwèthŭkupho tòcò acukhòbu nu,” cò d́ògè do.

¹² B́ĕ wî thîhè̆b́è dè ajo d́ō, wa kî bija gŏ abwè damògè Păulu agē de lebò̄ d́ŏ Jerŭsalèm u ńò nu.

¹³ Ḿî Păulu nu, cò d́òscĭgegè wa, “Thĭ thaḿò̆ mègè danè̄? Thĭ mèphilajòlagè jè dèbè̄la tha d́ŏ thĭ mugādŭhtĭ aklè̆ nu ā? Ḿî jè nu, jò ò dòlògè akè b́è cŏglo taka ńò agī thĭ b́è d́ŏ Jerŭsalèm u bu d́ŏ B́ĭcè Jezŭ ami abu nu dòkhò̆,” cò d́ògè do.

¹⁴ Zò dò sòkhĕńe gāgă we lē ńò d́ō, wè lè̄ thèd́è̆ cè kî d́ògè, “Htĕ ab́è B́ĭcè Atha lò,” gōnu be lò.

¹⁵ Alekă wò b́ò wo zo hwă we dèphodèli, wa htagè d́ŏ Jerŭsalèm u nu.

¹⁶ Bōhmubicè aò d́ŏ Caesăria tòcò lekôgè wa kă kî cè tòcò leihŭgè wa d́ŏ Cĭpro khòhtĭkhopho dèbwè ahi agò̄ sò̆dūsòd́è̆ anikhĭ. Zi mi ḿî Mnăson, htè bōhmubicè aŭsu aklè̆ dèbwè nu.

Păulu Lehtî Zăkomo

¹⁷ B́ĕ wo do Jerŭsalèm u nu, ab́udè tòcò scĭi mòmòwîwîgè wa.

¹⁸ Alekă dini Păulu lekôgè wa kă agē lehtî Zăkomo kî adoabwe tòcò nu.

¹⁹ Zu hnŭsè hwă bija d́ō, cò d́ò̆sagè lōwa tòcò htè d́ŏ zè dèphîdèmè abu nu Kib́ĭcè mènigè bwèthŭkupho tòcò anikhĭ pwedè̄ nu.

²⁰ B́ĕ bija tòcò thîhè̆b́è dè ajo d́ō, zè bè̄dòbè̄thegè Kib́ĭcè. Cè tòcò d́ò, “Thè̆buwe Păulu, nî thîhè̆ tèpwè Jŭdapho htè apôglohme Mŏzè Adèhmèla tòcò aklè̆ ahtò athò̆ phî̆hta htŏ ab́udè tòcò.

²¹ Kî cè tòcò thîhè̆b́è htŏ nò thôithò̆i Jŭdapho aò bwèthŭkupho tòcò aklè̆ agā bāladē Mŏzè Adèhmèla nu, na hnagè cè agô̄ dèhô̆rîkî̆ aphokhŏ tòcò aphekhĭ ńò kî agô̄ dô lôkô mo pa anuad́ò̆ ńò nu.

²² Gè̄ mèb́è cadè̄? Dèladēplo kò ò hmahmakò̆ d́ŏ bija tòcò thîhè̆b́è no dolegè jo nu.

²³ Mègōnu d́ō, mèkôbò̄ acab́ô̆ wi ikŏikja nè nu. D́ŏ wè klè̆ nu, ahôd́ă ane ò lwībwè;

²⁴ Jobò̄ cè tòcò kî mèb́ô̆mèb́ăge thĭ ne, kî ilabò̄ thĭ d́îklò thĭko ahlè̆. Bija gŏ abwè gî̄ thîhè̆kò̆ htè zî thîhè̆b́è thĭ wî thĭ kè̆ atè b́è ńò, ḿî thĭ òiwe Dèhmèla nu.

²⁵ Gî̄ ḿî ma bwèthŭkupho anib́è dèb́u tòcò nu, we hweni hwă cè tòcò cè ki d́ò̆sa htŏ cè wè dèbēpha, ca ka ta ab́è dèhî bija mèi mòkhĭ tòcò ńò, dè athwi ńò, dèphodèwe athĭ thŏo tòcò ahî ńò kî za da lathulakèḿèb́è ńò nu,” cò d́ò̆sa lōwa tòcò do.

²⁶ Alekă dini Păulu jo hwă zò khò̆ akè b́è mèplî̆mètcăge tòcò nu d́ō, za htagè Zarādo bu cab́ô̆htè ze gē Mè thîhè̆bò̄ bija zè dèmèplî̆mètcăge amuni gē pĕhtakî ci ki ila dèhlu zi nikhĭ kî zò khò̆ gŏ abwè anikhĭ nu.

Păulu Adèb́èphò

²⁷ Athaḿò̆ b́agè thăthôdini nu, Jŭdapho aò d́ŏ Asĭa tòcò htèglè̄nigè Păulu d́ŏ Zarādo bu kî ca thakăhtagè bija tòcò akă kî phògè lōwa.

²⁸ Zè kèwohta, cò d́ò, “Le mèzobò̄! Israè̆lpho tòcò! Bija ajo dèbwè ḿî ahè d́ò̆htôlani bija gŏ abwè kî gŏlālā ahtad́ĕd́ò Israè̆lpho, Mŏzè Adèhmèla, kî wa Zarādo ajo nu. Khŏnujo ze le joi bwèthŭkupho tòcò d́ŏ Zarādo abu nu, kî mè cîpôgè dèlletcahtĭ ajo nu,” cò d́ò do.

²⁹ (Athĕbwe ḿî cè tòcò tcahtî ŭsugè Ephè̆suspho Trophĭmus kî cè d́ŏ u bu nu kî zo gomogè Păulu jole nī cè d́ŏ Zarādo bu nu.)

³⁰ Dè ajo htowè̄htosò̆gè bija thèd́è̆ u; bija aò d́ŏ d́òlè̄ d́òlè̄ nu cwèlegè; cè tòcò zabā hwă Păulu kî cwihtakè̆gè cè d́ŏ Zarādo akhlŏ nu kî glè̄b́igè khaglè̄ ze lekă.

³¹ Bija adobè dobo thaḿò̆ mèthĭgè Păulu akhî nu, Rŏma aklĭbodo atcai Jerŭsalèm dèbwè thîhè̆gè dèbogalā d́ō,

³² taplakhă lò, zo jo ladēplo hwă klĭbo tòcò kî klĭpho tòcò d́ō zo thodŏlegè lōwa d́ŏ bija aboklè̆ nu. Bija tòcò tcahtî mādo kî klĭpho tòcò d́ō, zò sò̆tab́a debogè Păulu.

³³ Mādo phò hwă Păulu d́o, za hna bija cŏgloi lōwa htaĺabi gīb́ò̆, zô htôtcadè̆cagè lōwa zî ḿî bò̄bwè kî zè mègè danè̄ nu.

³⁴ Bija aboahò aklè̆ dèbwè d́ò domo, dèbwè d́ò domo pwĕ mādo dî thîhè̆ za be akoakă ńò nu. D́ō za hna bija lei Păulu d́ŏ klĭpho ò, dèd́owè̄ alle nu.

³⁵ B́ĕ Păulu khè̆hta khab́ò̆ nu lò, bija aboahò tòcò sèsòwò̄htagè pwĕ klĭpho tòcò hè j́ai b́è cè nu.

³⁶ Ḿî bija lô kèwokô ze le, “Mèthĭkè̆ cè,” dòkhò̆.

Păulu D́òhlô̆ Ane

³⁷ B́ĕ ze lei Păulu d́ŏ dèd́owè̄ alle nu, za dagè mādo agî̄ jî̄b́èhtî lōwa. Mādo d́è̆gè cè. “Nî jî̄b́è za tèpwè Grĭs alē ā?” cè d́è̆ lōwa do.

³⁸ “Mègōnu d́ō, nî dî ḿî tèpwè Izî̆tpho aleihŭ bija abwè lwīhtò d́ŏ lothĭḿizekho agā htad́ĕd́ò dè dèbwè ńò hŏ ā?”

³⁹ Păulu d́òscĭge cè, “Jè mā! Jî ḿî Jŭdapho aò d́ŏ Cilĭciage, Tărsus u, htè amidokhè̆do tu u nu dèbwè lò. Ibò̄ jè akhwè agî̄ jî̄b́èhtî bija tîkî,” cò d́ò lōwa do.

⁴⁰ Mādo ŏlă tèpwè cè d́ō, Păulu hta sò̆hto ò hwă d́ŏ khab́ò̆lò nu ze we wa zu cukhò cab́ô̆htè bija kò òzòlò nu. B́ĕ bija ò pwècîgè tapla, zî jî̄b́èhtîkò̆ bija tòcò kî Hebrè̆upho alē.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan