Bìoball air-loidhne

Thodŏpho 20 - Geba Roman New Testament

Păulu Le d́ŏ Macedŏnia Ki Akhaĭa

¹ B́ĕ dègòthò̆gòrò lapwè hwă nu, Păulu jo hwă abōhmubicè tòcò, ci ikhoiă lōwa kî zu hnŭsè hwă lōwa tòcò ze legè d́ŏ Macedŏniage nu.

² D́ŏ klèkhoklèlò nu ci ikhoiă hwă bija tòcò ze lenīgè d́ŏ Akhaĭage bu,

³ kî cò ògè d́ŏnu thŏhlè̆ adābu. B́ĕ ca prahnèdòlò agò̄ d́ò thè̆bò kî le d́ŏ Sĭriage nu, zî thîhè̆gè htè Jŭdapho tòcò thaè mèthĭ cè nu d́ō, zè bè̄lagè ca tha agē geb́a alekă d́ŏ Macedŏnia dòkhò̆ nu.

⁴ Ahèkô ca kă ḿî Pĭrrus apho Sopătèr htè aò d́ŏ Bĕrea u ale dèbwè nu kî Arĭstakus kî Sekŭdus aò d́ŏ Thèssalò̆nika u ale gībwè htè Kăjō aò d́ŏ Dè̆rbe u, kî Timò̆theo, Tikĭkus, Trophĭmus aò d́ŏ Asĭage tòcò nu.

⁵ Cè tòcò ledòlò lŏ d́ŏ Trŏas u nu kî òsô̆wôgè wa d́ŏnu.

⁶ B́ĕ Toko Gimi Ta pa ńò Apwè̆do b́è hwă alekă dini nu, wò d́òhta thè̆bò, we legè d́ŏ Philippiăno u kî legè ahlò̆mò̄ jè̄thè̆, wo dole kî tcahtîgè cè tòcò d́ŏ Trŏas u bu nu. Wò ò sò̆dūsòd́è̆ d́ŏnu dòsòd́è̆ adābu.

Păulu Le d́ŏ Trŏas u Agudulă Tapla

⁷ B́ĕ Munisòd́è̆ ani lumula nu wa ladējīplo lōwa akhî wî b́îpha toko. Alekă dini Păulu gè hègè klè d́ō cò d́ò̆htôlanigè bija htô̆do klăḿè̆lumu nu.

⁸ Bija dola òèòògè hmîŭd́ŏ d́ŏ agò̄hta dòdò htè wa ladējīplogè lōwa nu.

⁹ Kîd́ò̆ b́ĕ Păulu d́ò̆htô phătha nu, ab́òĺòpho ami ḿî Eutĭkus dèbwè nu sańăla ògè d́ŏ phò̆būtèlò akho nu, sòḿĭkhĕ kî za ladē d́ŏ thŏdò dòdò nu do d́ŏ hilè̄ nu. Bija le zāhtage cè d́ō ci thĭgè.

¹⁰ Păulu la lākho kî zāhtage abĭsèpho kî d́ò, “Thĭ mò b́èhjŏ ale tò ò ńò, ca thathôḿô̆ òwe tèpwè,” cò d́ò bija do.

¹¹ Ze gehta hwă d́ŏ hikho dò dò nu d́ō, cî b́îpha hwă toko, ca agè tòcò. Mèhwă zò dòdò̄htî wed́ò̆ lōwa tòcò htô̆ dèhlî̆hta nu, kî zè hègè cè klè.

¹² Bija gei abĭsèpho atha ò thôḿô̆ d́ŏ dèthakhŭthaganāi abu nu.

D́ŏ Trŏas do d́ŏ Milĕtus nu

¹³ Khŏnujo we legè ahlò̆mò̄, mègōnu wò d́òlegè thè̆bò d́ŏ Assòs u nu, htè wo gō johtab́è Păulu d́ŏ thè̆bòbu nu. Ajo ḿî wa dèpradòlò, manè̄ d́ō, ca thaè hègè za khakhò acè̆ nu.

¹⁴ B́ĕ ze lehtî wa d́ŏ Assòs u nu, wo johtanī hwă cè thè̆bò abu d́ō we legè d́ŏ Mitĭlene u nu.

¹⁵ Alekă dini wò d́ò thè̆bò kî ledogè d́ŏ Khĭòs khò̆htĭkho ò nu. Gīni dini wo dolegè d́ŏ Sămòs khò̆htĭkho ò nu kî alekă dini we le ahlò̆mò̄ htô̆do Milĕtus u nu.

¹⁶ Păulu thaè hè tôkô̆gè Ephè̆sus cab́ô̆htè cò kò dò sòd́è̆òdabō d́ŏ Asĭa ńò nu. Manè̄ d́ō, ca thaè dole plăgè Jerŭsalèm u cab́ô̆htè zo gō dolekhlubò̄ Pèntèkò̆stè Pwè̆ nu.

Dè hèbā Ephè̆sus Upho Adoabwe tòcò

¹⁷ Păulu ò d́ŏ Milĕtus thodŏlegè bija agò̄ d́ò̆sa dèòplo adoabwe aò d́ŏ Ephè̆sus u tòcò gē lehtî cè d́ŏ nu.

¹⁸ B́ĕ cè tòcò dolehtî cè nu, zî jî̄b́èdòdòhtîgè lōwa tòcò kî d́ò, “Thĭ thîhè̆ tèpwè hlĕ jè khè̆nī Asĭa alākhobu lò nu jè mè ja agè cadè̄ nu.

¹⁹ Ja khazôgè Kib́ĭcè d́ŏ dèbè̄b́ôla ane kî dègādŭhtĭla abu nu, ja khab́ègè dèothootha kî dèbadèsè̆ d́ŏ Jŭdapho tòcò acukhòbu nu.

²⁰ Jè gè̄ mèb́è thĭ nikhĭ dè è dè ò̆ nu jè dè htèniwĭniwa dakha ńò, ḿî jò d́ò̆htôlanigè thĭ, jô thôithò̆igè thĭ d́ŏ bija aboahò aklè ḿîwî, d́ŏ thĭ hilaphăbu nu ḿîwî lò.

²¹ Ja hnanohnabègè Jŭdapho tòcò kî Grĭspho tòcò agē geb́ahtî Kib́ĭcè kî aku b́u wî B́ĭcè Jezŭ Krĭstu nu.

²² Khŏnujo thĭ tcahtî htŏ jè acab́ô̆ dètha adèkî̆dî̄pho dèbwè nu jē le d́ŏ Jerŭsalèm u nu. Barasă d́ŏnu da gī phî̆htanikò̆ jè nè? nu jî dî thîhè̆ mè ńò.

²³ Ḿî Spirito Tcahtĭ mèthîhè̆gè jè htè dèkî̆dî̄ ale kî dèlômèssègnè̆ òsô̆wô̄i jè klè tu u hwă tu u abu nu.

²⁴ Barasă ji nikhĭ dèlômèssègnè̆ jè dèòthôḿô̆ tè b́è ajwīamo ji nikhĭ ńò, ḿî jè gè̄ mèhwăb́è jè dèmè htè B́ĭcè Jezŭ ilani jè, htè aḿî Vanzĕlō ab́èkja Kib́ĭcè adèhludètă nu.

²⁵ “D́ŏ thĭ klè̆ nu jè hè d́ò̆htôla htŏ Kib́ĭcè Ahtĭage awîakè̆ nu. Khŏnujo jî thîhè̆ ladîlase htŏ htè thĭ gā da tcahtîb́è bekò̆ ju mūkă dèbwè̆ ńò.

²⁶ Mègōnu, b́ĕjo kî khŏnujo lò, jô hôd́ă htè ab́èkja thĭ nu, ja thabu òhlî̆òplă htŏ.

²⁷ Manè̄ d́ō jè mèhlî̆hta htŏ Kib́ĭcè adèthaèni akhoacè̆ nu.

²⁸ Wòisòibò̄ thĭ ne kî thŏpho tòcò htè aḿî Spirito Tcahtĭ lè̄lanigè thĭ tòcò nu. B́oab́oò̆bò̄ Kib́ĭcè adèòplo tòcò htè Zî bwîigegè Zo Phokhŏ athwi nu.

²⁹ Jî thîhè̆ thoŏthèè tèpwè htè htwimi khajab́ô amòscisă tòcò hlò̆wè̄ zòlò kî zò gò̄ dò khòwèkò̆ cè tòcò tîkî̆ ńò nu.

³⁰ D́ŏ thĭ klè̆ hnò̆nu ahlòhlî̆hlòplè hwă dè agī cwinīkò̆ bōhmubicè tòcò cò cab́ô̆htè zô gô̄ lôkôbò̄ lōwa alle nu.

³¹ Mègōnu d́ō, wolakèlaibò̄ thĭ ne, gomohtanibò̄ thŏd́e adābu, jô thôithò̆i thĭ thè̆musè̆munè kî ja gādŭhtĭ lagè thĭ nikhĭ dèbwè dèbwè ladū akho nu.

³² “Khŏnujo ji ila thĭ d́ŏ Kib́ĭcè acukhòbu nu, kî d́ŏ zè dèjî̄b́è kî Zè dèhludètă akhoaă abu nu, cab́ô̆htè thĭ kè̄ b́è b́òhtabò̄ kî gī nib́èkôbò̄ ab́è mètcahtĭ tòcò akă dèilani nu.

³³ Ja da dagè bija hô̆htè̆, pĭd́ŏpĭsa kî dèkô̆dèthò dèbwè̆ ńò.

³⁴ Thĭ thîhè̆ tèpwè htè d́ŏ jè dèphîdèmè abu jè mèkèhta tèpwè dî̄dè d́ŏ aloba ji nikhĭ kî jò khò̆ jè khè tòcò anikhĭ nu.

³⁵ Jè mè dè ajo ḿî akè d́è̆lî̄ thĭ klè agū htukhohtuă, agè̄ mèzo akhozeăze tòcò nu. Gomohtanibò̄ B́ĭcè Jezŭ adèjî̄b́è htè Cè thè̆ne d́ògè, ‘Dèthaganāi ò d́ŏ dèi abu d́olĭ kî dèphî abu,’ nu.”

³⁶ Zî jî̄b́è hwă zo dōhnŏla ploplo lōwa tòcò kî thèb́è̆gè.

³⁷ B́ĕnu bija tòcò agādŭhtĭ la lōgè. Zò phòb́a hwă lōwa agò̄, cî cwîgè lōwa.

³⁸ Dè amè othootha gudŭ cè tòcò ḿî d́ŏ cò d́ò lōwa tòcò gā da tcahtîb́è pĭpi be zu mūkă ńò nu. Alekă cè tòcò le thè̆htagè Păulu d́ŏ thè̆bòbu nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan