Bìoball air-loidhne

Thodŏpho 19 - Geba Roman New Testament

Păulu Dole Ephè̆sus U

¹ B́ĕ Apò̆llòs òwe d́ŏ Kòrĭnthia u bu nu, Păulu hèpôd́ŏ khò̆kho dòkhò̆ htô̆do Ephè̆sus u, htè d́ŏnu zè pahtîgè zo bōhmubicè tòcò nu.

² Cè d́è̆ lōwa tòcò, “Thĭ nib́è hwă dèb́u nu, thĭ phîni htŏbò̄ Spirito Tcahtĭ ā?” cò dò lōwa do. Bōhmubicè tòcò d́òscĭge cè, “Ńò! Spirito Tcahtĭ ò hnò̆nu ma bija tò d́òb́î̆sa wa dèbwè̆ ńò,” cò d́ò do.

³ “Mègōnu, thĭ kha dèŭsab́ăhtĭ cadè̄?” cè d́è̆ lōwa do. “Wa kha Zowănnī adèŭsab́ăhtĭ,” cò d́ò̆sa d́ò̆ lōwa tòcò do.

⁴ Păulu d́ò̆sagè cè tòcò, “Zowănnī adèŭsab́ăhtĭ ḿî dèkhahlô̆ adèŭsab́ăhtĭ, barasă za hna bija aku b́u bija ale ze lekă dèbwè htè Jezŭ adèjî̄b́è nu,” cò d́ò do.

⁵ B́ĕ bija tòcò thîhè̆b́è dè ajo d́ō, cè tòcò kha dèŭsab́ăhtĭ d́ŏ B́ĭcè Jezŭ ami abu nu.

⁶ Kî b́ĕ Păulu htèla cu cuî̆tha lōwa tòcò akokho nu, Spirito Tcahtĭ la zo kho, kîd́ò̆ cè tòcò jî̄b́èhtagè dèlēdèhwè amŏamo kî dò dòlògè dè tòcò.

⁷ Bija ajo tòcò ògè scigībwè.

⁸ Păulu gohtagè adèmè d́ŏ sinagŏgā abu nu, kî d́ŏ thŏhlè̆ adābu nu, cò d́ò̆sa khŭthaklagè bija aboahò tòcò Kib́ĭcè Ahtĭage awîakè̆, cab́ô̆htè bija tòcò gî̄ thîhè̆bò̄ nu.

⁹ Barasă tòcò cò ḿî akosanidagè d́ŏ atu b́u dè ńò nu. D́ŏ Bija aboahò thèd́è̆bo ahlò̆mò̄, Cè tòcò d́òkè̆d́òôgè B́ĭcè Aklè nu. Mègōnu d́ō, zo htobā hwă ze ne, zo jo ladēplo zo bōhmubicè tòcò kî d́òb́èsab́è lōwa gŏ ani lò d́ŏ Tĭrannus ahiò̆bu nu.

¹⁰ Zè mègè gōnu gīd́e adābu, htô̆ Jŭdapho kî Grĭspho aò d́ŏ Asĭa tòcò thîhèb́ègè Kib́ĭcè alēahwè nu.

Zekeva Apho tòcò

¹¹ Kib́ĭcè mègè dèbòdèba acòklîcòhjè̆ d́ŏ Păulu acukhòbu nu.

¹² Pwĕ tîkî̆jā acîlî zè mèib́ègè acab́ô̆ dèhtô̆cu, dèkô̆dèthò tòcò nu bija lei ascwiasè̆ dō, za hmage kî dèscidèhnè hèhtakè̆ tèpwè.

¹³ Barasă Jŭdapho tòcò bahta Jezŭ Ami d́ŏ hnè phîni tòcò akho, cò d́ò, “Jè hmèla nè d́ŏ B́ĭcè Jezŭ abwèblô Păulu ami abu nu,” cò d́ògè gōnu tòcò do.

¹⁴ Amè gōnu tòcò nu ḿî Jŭdapho Aphŭgido Zekeva aphokhŏ thăthô dèbwè nu.

¹⁵ Dèhnè akî̆kkè d́òscĭge cè, “Jo ŏlă tèpwè Jezŭ, kî jî thîhè̆ tèpwè Păulu. Barasă ni ḿî d́ò̆ bò̄bwè?” ad́ògè cè do.

¹⁶ Mèhwă dèhnè phîni dèbwè hlò̆wè̄ aŭsu dèbwè alò kîd́ò̆ alewe dèbwè alò, gònò lakhugè lōwa, kî mè nihnasapògè cè tòcò lŏcăcè. Cè cwèhtaphlòḿĭ toklŏhtu tab́akăgè d́ŏ lōwa ahibu kî b́èdūb́èhtă zî̄gè.

¹⁷ Jŭdapho kî Grĭspho aò d́ŏ Ephè̆sus u bu tòcò thîhè̆gè dèwîdèkè̆ ajo gŏ abwè; cè tòcò htèdômô̄dahmă kî Jezŭ Ami Tcahtĭ b́è bè̄dobè̄mugè.

¹⁸ Ab́u Kib́ĭcè tòcò aklè̆ le d́ŏ bija ahlò̆mò̄ kî d́òphlò̆htagè cè tòcò mèd́udèkhodè cadè̄ nu.

¹⁹ Bija amèdebe bija gādŭ tòcò lei aôacè kî scwihtakè̆gè hmî d́ŏ bija hlò̆mò̄ nu. Cè tòcò d́ôtcage ô cè kî dèhtò̆dèla abwî ḿîgè hô̆ ab́e jè̄thò̆ abu nu.

²⁰ Ajo akhoacè̆ Kib́ĭcè alēahwè d́èlò̄d́èkhò̆gè dagwālè̄ d́ŏ Lākho nu.

Dègòthò̆gòrò d́ŏ Ephè̆sus U nu

²¹ Dè ajo tòcò phlòtôlô hwă d́ō, Păulu bè̄htagè atha agē geb́a d́ŏ Jerŭsalèm u klè ahtakô Macedŏniage kî Akhaĭage tòb́ò̆ nu. Cò d́ò̆sagè bija tòcò gōjo, “Jo do hwă d́ŏnu d́ō, je gē le tcab́è Rŏma u papa,” cò d́ò do.

²² Mègōnu d́ō, zo thodŏlegè amèzo cè gībwè htè Timò̆theo kî Èrastus agē le cò hlò̆mò̄ d́ŏ Macedŏniage bu nu, ḿî cè nu cò òdagè d́ŏ Asĭa nu tod́odasa.

²³ B́ĕnu dègòthò̆gòrò òhtagè d́ŏ dèb́udènè akhoacè̆ nu dèdè̆.

²⁴ Bwènīd́ò amū hô̆ cubōkhajò ami ḿî Demĕtrius dèbwè mūgè cî b́icèmo Artĕmis anikhĭ zarāpho ajò, kî zè dèmè è acè̆ nihlunită d́owĕgè dèmèpho òèòò tòcò nu.

²⁵ Zo jo ladēplo lŏgè cubōkhajò dèmèpho lŏcăcè kî cò d́ò lōwa tòcò, “Thĭ thîhè̆ lŏ tèpwè htè wo dohtamuhtai kî dèmè ajo dèdè̆ akholè̄kălè̄ lò nu.

²⁶ Khŏnujo tapla thĭ thîhè̆ htŏ tèpwè lòmò̄, htè tè b́è htĕ Ephè̆sus u bu lò ńò, ḿî gŏlālā d́ŏ Asĭa jo nu, bija Păulu ajo dèbwè nu ci cwini bija òèòò d́ŏ zè dèdara abu, bija cukhwa B́ĭcè htè atè b́è B́ĭcè ahnè ńò tòcò nu.

²⁷ Dè ajo ḿî ad́îd́ăkaklè wè dèphîdèmè akhlŏ nu, amè jòla wî b́icèmo Artĕmis ahĭahtè̆. Agudulă nu, d́ŏ Asĭa nu dèthub́uthèb́è̆ wî b́icèmo jo gè̄ hlè̆mè̄ d́ŏ Lākho thèd́è̆b́è akho nu,” cò d́ò lōwa do.

²⁸ Dèjî̄b́è jo mèthadosôgè cè tòcò d́ō, cè tòcò kèwohtagè kî cò d́ò, “Adoamu ḿî Ephè̆sus ab́icèmo Artĕmis!” cò d́ò do.

²⁹ Bija thèd́è̆ u bogalāgè. Bija phò hwă Macedŏniapho Kăjō kî Arĭstakus ahèkô Păulu akă gībwè nu, bija cwè cwidôhôi cè kî hlò̆htaigè cè d́ŏ u adègajā alle nu.

³⁰ Păulu thaè damò tèpwè bija cab́ô̆htè ca gā b́ăhlôbò̄ lōwa nu, ḿî bija ab́udè tòcò tè è ńò.

³¹ Păulu athò dèkhodène b́ĕnu tòcò cò hmèkôgè bija kî damò cè cab́ô̆htè ze gē de lebò̄ d́ŏ dègajā ale ńò nu.

³² B́ĕnu bija aòplosò̆plo lŏcăcè kèwohta amŏamo pwĕ acab́ô̆ da mègè ane nè hnò̆nu bija dî thîhè̆ za be ńò.

³³ Tòcò cò ḿî bija jo ladēplo cè ḿî da acè̆ nè hnò̆nu zî dî thîhè̆ be ńò ńò. Jŭdapho tòcò sathîńî le hwă Alèssăndro d́ŏ ahlò̆mò̄ d́ō, bija tòcò kèwohtŏphu ikhoiă cè tòcò nu. Mèhwă Alèssăndro jehta acukhò bija kò òzòlò anikhĭ cab́ô̆htè cò kò d́ò hlî̆htaphlò̆htabò̄ dèwîdèkè̆ jo nu.

³⁴ B́ĕ bija tòcò thîhè̆b́è zî ḿî Jŭdapho nu d́ō, za haphuhta thò̆drò lōwa kî d́ò, “Adoamu ḿî Ephè̆sus ab́icèmo Artĕmis,” cò d́ò do kî kèwohtŏphugè gīnare adābu.

³⁵ B́ĕ ubupho adoabwe dèbwè mèlathò̆ hwă bija adèbogalā nu, cò d́ò, “Ŏ Ephè̆sus ubupho tòcò, d́ŏ thĭ bija aòthôḿô̆we aklè̆, Ephè̆sus ḿî atcaikhwèi dèado Artĕmis ahi ana kî zè bwèjò ḿî aò d́ŏ Mò̄kholè̄ aladē nu, adî thîhè̆ ńò òbò̄ dèbwèbwè ā?

³⁶ Bija da jab́ikèhta dèbwè̆ ńò, kî thĭ mò thomôrôthamèrè kî mè tŏmutosă dè ale tò ò mè ńò.

³⁷ Bija htè thĭ leigè b́ĕjo tòcò nu dî ḿî tèpwè bija amè dèkhòwèdo ahtad́ĕd́ò Artĕmis tòcò nu ńò.

³⁸ B́eḿĕ Demĕtrius kî zè bwè dèmèpho tòcò thaè mèhmŭdura bija dèbwèbwè d́ō, akhoane kî mādo tòcò ò tèpwè b́ĕjo, za gā htai d́ò̆è zè dèhmŭ d́ŏ dècirra alle nu.

³⁹ B́eḿĕ thĭ thaè htôtcad́è̆tca dè d́ō, le d́è̆tcabò̄ d́ŏ dèladēplo abu nu.

⁴⁰ Dè mè ane khŏdini jo dèdè̆ nu, aphî̆hta za wi nikhĭ dègòthò̆gòrò, athĕbwe ḿî dè amòphî̆hta gōnu tò ò ńò,” cò d́ògè bija do.

⁴¹ Mèhwă za hnage hi ge phă gè bija tòcò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan