Bìoball air-loidhne

Thodŏpho 18 - Geba Roman New Testament

Dèb́òhta Kòrĭnthia Adèòplo

¹ Alekă Păulu hèhta hwă Athèn u d́ō, legè d́ŏ Kòrî̆nthia u nu.

² D́ŏnu zè htèglè̄nigè Jŭdapho ami ḿî Akwĭla htè ahiaphă ò d́ŏ Pò̆ntus u dèbwè nu. Cè kî zè hmè̆ Priskĭlla, hèhta Ităliage kăkòlò̆, d́ŏ Saphra Klò̆dio adèhmèla akhoacè̆ Jŭdapho aò Rŏma u tòcò b́è hmòphlòḿĭgè nu. Păulu le hègajāhtî cè tòcò,

³ kî b́ĕ za tcahtî lōwa sa hithèd́o d́ō, zè dèphîdèmè la lōwa akhoacè̆, zò sò̆dūsòd́è̆ kô hwă lōwa akă d́ō, zè mèplogè lōwa dèmè.

⁴ Gŏ Munisòd́è̆ ani nu, za hta dòdò̄mòjahtî bija d́ŏ Sinagŏgā kî cwinigè Jŭdapho tòcò kî Grĭspho tòcò d́ŏ dèòplo abu nu.

⁵ Cĭlas kî Timò̆theo ò d́ŏ Macedŏniage kî dolegè d́ō, Păulu ila pĕhtazòhta zo sŏ zè khè̆ d́ŏ dèd́ò̆htôlani bija kî khagè thè̆thî d́ŏ Jŭdapho tòcò ahlò̆mò̄ htè Jezŭ ḿî Krĭstu nu.

⁶ B́ĕ cè tòcò htad́ĕd́ò kî mè sè̆tha cè akhî nu, zu duhtrub́ă hwă zi scid́ŏ d́ŏ lōwa tòcò ahlò̆mò̄, cò d́ò lōwa, “Thĭ thwi gā lahte d́ò̆è thĭ kokho! Ja thabu ahlî̆aplă htŏ. Khŏnujo je gē lehtî d́ò̆è bwèthŭkupho tòcò nu dòkhò̆,” cò d́ò lōwa tòcò do.

⁷ Mèhwă zè hèhtagè sinagŏgā akhlŏ kî legè d́ŏ ab́u Kib́ĭcè ami ḿî Tĭto Jŭstus ahi nu. Zi hi òb́ôhtî sinagŏgā lò.

⁸ Krĭspus, htè aḿî sinagŏgā akhoane dèbwè kî cè thèd́è̆gumu phî̆hta lōgè ab́u Kib́ĭcè tòcò. Kòrĭnthiapho òèòò htè athîhè̆b́ègè Păulu adèd́ò̆htô tòcò phî̆htagè ab́udè kî khagè dèŭsab́ăhtĭ.

⁹ Dènè nu Dèado jî̄b́èhtîgè Păulu d́ŏ dètcahtî abu, Cò d́ò lōwa, “Scisă jî̄b́èhtabò̄ ḿè kî òzòlòbò̄ ḿè.

¹⁰ Manè̄, Jò òkô na kă. D́ŏ u ajo tu u abu, bija aò Jò ò dòkhò̆b́è òèòò d́o acè̆, agè̄ mèkĕmèbrô nè kò tò ò dèbwè̆ ńò,” Cò d́ò lōwa do.

¹¹ Păulu ò hwă b́ĕnu, cò d́ò̆htôlanigè bija Kib́ĭcè Alēahwè sci ahlè̆ lwīthô adābu.

¹² B́ĕ Gălio htè Akhaĭage Amādo nu, ca tcahtîb́è Jŭdapho tòcò mènomèbè hwă Păulu d́ō leigè lōwa d́ŏ dècirra alle nu.

¹³ “Wè mè bija ajo dèbwè dèhmŭ d́ŏ zi cwikè̆ bija agè̄ thèb́è̆ B́ĭcè ahtad́ĕd́ò wè è̆ anuad́ò̆ abu acè̆ nu,” cò d́ò Gălio do.

¹⁴ Dukhlŭkî Păulu b́ăhta ahòbŭ hnî̆ńò nu, Gălio d́ògè Jŭdapho tòcò gōjo, “Sòkhĕńebò̄, thĭ Jŭdapho tòcò, dè ajo gî̄ ḿî ma dèkèḿè akî̆kkèmèhlò̆ ḿĭdîḿî ńò dèhlòdèplè domomo d́ō, takî jò gò̄ sòkhĕńe thĭ è̆ d́ŏ dèthazô abu nu.

¹⁵ Barasă d́ō ḿî tèpwè dèjî̄b́è ahmô̆athè kî amiakhè̆ ab́èkja thĭ anuad́ò̆ lò. Mègōnu d́ō, tca kî mèdò̆ d́ò̆è thĭ è̆. Ja da thaè cirraphame dè ajo dèzè̄ ńò!” cò d́ò lōwa tòcò do.

¹⁶ Mèhwă za hna hèhtagè lōwa tòcò d́ŏ dècirra hi akhlŏ nu.

¹⁷ Kîd́ò̆ cè tòcò hlò̆wè̄ sinagŏgā akhoane ami ḿî Sòsthenes alò, ze de zo bogè lōwa d́ŏ acirradè tòcò ahlò̆mò̄ nu. Gălio da tcawè̄ mŭpla cè tòcò ńò.

Păulu Geb́a d́ŏ Antiò̆ka U

¹⁸ Păulu òkô hwă bōhmubicè tòcò akă b́ĕ Kòrĭnthia aniathè̆ pwĕdimi d́ō, zè hèbāgè thè̆buwe tòcò, d́òlegè thè̆bò d́ŏ Sĭriage, ploplo kî Priskĭlla kî Akwĭla. Dukhlŭkî zè hèhta Cĕkhrea u bu hnî̆ńò nu, cî d́îgè zu khulŭ acab́ô̆ zè dèŏlăphlala ògè adĕ nu.

¹⁹ B́ĕ zo dole Ephè̆sus u nu, Păulu b́è̆lădagè Prîscî̆lla kî Akwĭla u bu. Ze lenīgè d́ŏ sinagŏgā abu kî dòdò̄mòjakôgè Jŭdapho tòcò akă b́ĕnu.

²⁰ Bija hò̆lagloi nòthò̆ cè hnò̆nu, cò tò òjî̄ kôgè lōwa tòcò akă ńò.

²¹ Ḿî cò d́ògè lōwa, “Kib́ĭcè adèthaèni kò ò b́eḿĕ d́ō, je gē geb́ahtîkò̆ thĭ tapla be,” cò d́ò lōwa tòcò do. Alekă cò d́ò thè̆bò kî hèhtagè Ephè̆sus u.

²² Zè khè̆ladē d́ŏ Caesăria u nu kî le hnŭsègè dèòplo d́ŏ Jerŭsalèm u, mèhwă ze gelagè d́ŏ Antiò̆ka u nu.

²³ Cò ò sò̆dūsòd́è̆ d́ŏnu tod́òdasa, Hwă d́ō ze legè d́ŏ Galătiage agebu kî Phrĭgiage nu kî ikhoiăgè alôkô ze le tòcò nu.

Apò̆llòs d́ŏ Ephè̆sus u kî Kòrĭnthia u

²⁴ Alèssăndria upho kî Jŭdapho ami ḿî Apò̆llòs dèbwè dolegè d́ŏ Ephè̆sus u nu. Zî ḿî bija alòmò za kî athî Cè Tcahtĭ dèbwè nu.

²⁵ Cè b́è thôithò̆i nòthò̆ Kib́ĭcè aklèthòò̆ bu kî d́ò̆htôd́ò̆dèlè nòthò̆ bija d́ŏ dèthosôthasô abu kî thèihŭ ladîlase nòthò̆ bija Jezŭ awîakè̆ hnò̆nu, zi thîhè̆ jŭ Zowănnī adèŭsab́ăhtĭ kòlò̆.

²⁶ B́ĕ Priskĭlla kî Akwĭla thîhè̆b́è zî jî̄b́è khŭthakla d́ŏ sinagŏgā abu nu d́ō, ab́èthagè cè tòcò acè̆, cô thôithò̆i d́okhlŏ lōwa B́ĭcè adèdî̄dèhma aklèthòò̆ lò.

²⁷ B́ĕ Apò̆llòs gomo agē lewè̄ d́ŏ Akhaĭage nu, thè̆buwe tòcò ikhoiă cè kî cè tòcò hweni bōhmubicè tòcò agî̄ phîni wîwîmòmòbò̄ cè nu. Zo dole d́ŏnu tapla, d́ŏ Kib́ĭcè adèhludètă akhoacè̆, zè mèzo zagè ab́udè tòcò pwĕdimi.

²⁸ Manè̄, zè dèthôithò̆i ḿî zî phîni d́ŏ Cè Tcahtĭ abu acè̆ nu, za dara bègè Jŭdapho tòcò htè Jezŭ ḿî Krĭstu nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan