Thodŏpho 12 - Geba Roman New Testament

Dèlômèssègnè̆ Òèhta

¹ Hlĕnu Saphra Èrŏdè lô mèssègnè̆gè Dèòplo tòcò.

² Za hnagè bija bēthĭ Zowănnī amè̄ Zăkomo kî d́a.

³ B́ĕ ca tcahtîgè ab́ètha bija Jŭdapho tòcò nu d́ō, zò phògè Petru papa b́ĕ Toko Gimi Ta pa ńò Apwè̆do ni nu.

⁴ Zò phò hwă lōwa, zî htînī lōwa d́ŏ dèkî̆dî̄ bu nu, kî za hnagè klĭpho tòcò dôi cè lwībwè dopho, lwībwè dopho, kî b́ĕ Păskwa Pwè̆ gā hwă nu, gô̄ htôd́è̆ kî cirrakò̆ lōwa d́ŏ Jŭdapho tòcò ahlò̆mò̄ nu.

⁵ B́ĕ Petru òwe dèkî̆dî̄ abu nu, Dèòplopho tòcò thèb́è̆hta dîgrî̄nî̄ tèpwè zi nikhĭ d́ŏ B́ĭcè ò nu.

Petru Adèhlô̆htaphlòhta

⁶ B́ĕ Èrŏdè thaḿò̆ cwiphlòhta cè anu dènè nu, Petru sòḿĭgè d́ŏ klĭpho gībwè aplè nu. Bija cŏglogjî̄glo cè kî htaĺabi gīb́ò̆, kî d́ŏ akhlŏ nu klĭpho tòcò dôi dèkî̆dî̄ akhaglè̄.

⁷ Kî tcabò̄, Kib́ĭcè Abwèzo dèbwè sò̆hto ò zo wōlò kî ahlî̆segòdrògè d́ŏ hiò̆bu nu. Cò zòkhwèb́è hwă lōwa aplĕb́akho, htowè̄gè lōwa, cò d́ò, “Wè̄hto plaplăbò̄,” cò d́ò lōwa do. Htaĺabi tòcò ladēplôgè Petru acukhò lò.

⁸ “Cŏglo hwă ni hnî̆jābi, kòhta na khatòkò,” Mò̄kho Abwèzo d́ò cè do. Petru mègè gōnu. Kî cò d́òwe lōwa, “Gāb́i ni scid́ŏdo kî lôkô je le,” cò d́ò lōwa do.

⁹ Zè hèhtakôgè lōwa akă akhlŏ, ḿî da mègè nè nu zî dî thîhè̆gè ńò, kî Mò̄kho Abwèzo ḿî athĕbwe ā? ḿî zî di thîhè̆gè ńò ńò. Zo gomo ḿî ca tcahtî dètcahtî lò akhoacè̆ nu.

¹⁰ Zè hètôĺô hwă klĭpho aŭsu dopho kî gīpho dopho d́ō, zo dolegè d́ŏ khaglè̄htaĺa aphlò̆nī d́ŏ u bu tèb́è nu, kî aòtab́ăgè aloala. Zè hèhtakô hwă klè tòb́ò̆ alò, Mò̄kho Abwèzo lè̄ladò̆gè cè dèbwè lò.

¹¹ Petru thîhè̆lage ze ne, cò d́ò, “Khŏnujo jî thîhè̆ ladîlase htŏ Kib́ĭcè thodŏlegè zò Mò̄khobwèzo agè̄ mèhlô̆hta je d́ŏ Èrŏdè acukhòbu kî Jŭdapho tòcò adèthaèni nu,” cò d́ògè do.

¹² B́ĕ zî thîhè̆lage ze ne nu, zo dogè d́ŏ Zowănnī htè bija jo ami Mărko zo mo Marĭa ahi nu. D́ŏnu bija òèòò ladēplo lōwa kî thèb́è̆htagè.

¹³ Petru tòklò hihlò̆mò̄ akhaglè̄, kî zômo ami ḿî Rŏda dèbwè le d́ŏ agā b́ăhtani cè khaglè̄.

¹⁴ Barasă b́ĕ cî thîhè̆ kî hmăigè ḿî Petru alē nu, cè cwèb́age hibu kî d́ò̆sagè bija, htè Petru sò̆htoògè d́ŏ khaglè̄htî nu.

¹⁵ Ḿî bija d́ò cè, “Nu blu htŏ!” Barasă cò d́ò dîkhînagè gōnu lò. Mègōnu d́ō, bija tòcò d́ò, “Aḿî zè Mò̄khobwèzo!”

¹⁶ Petru tòklò wed́ò̆ khaglè̄ d́ō, cè tòcò le b́ăhtagè kî tcahtîgè lōwa d́ō, zè htèdômô̄dahmă lōgè.

¹⁷ Petru hna òzòlò hwă cè tòcò d́ō, cò d́ò̆sagè lōwa B́ĭcè hèhtaihŭgè cè d́ŏ dèkî̆dî̄ abu cadè̄ nu. Mèhwă cò d́ò, “Dò̆sabò̄ Zăkomo kî thè̆buwe tòcò nu,” cò d́ò lōwa tòcò do. Kîd́ò̆ zè hèhta kî legè d́ŏ ale alewe dokhlo nu.

¹⁸ B́ĕ lumusehtagè nu, d́ŏ klĭpho tòcò aklè̆ dèbogalā òhtagè ab́èkja Petru sèphlòhtagè acè̆ nu.

¹⁹ Èrŏdè hna bija wāhlè Petru, zè tè kèhtî lōwa ńò d́ō, zô htôtcad́è̆tca hwă bija atcai cè tòcò d́ō, za hnagè bija mèthĭ lōwa tòcò. Alekă Èrŏdè lagè d́ŏ Judĕage kî la ògè d́ŏ Caesăria u bu nu.

Èrŏdè Adèthĭ

²⁰ Èrŏdè thèhtèb́ègè Tĭropho kî Sidŏnapho tòcò nu azî̄azô̄; d́ō cè tòcò leploplogè d́ŏ lōwa tòcò ò nu. Aŭsu nu zo joni hwă Blastus, Saphra amādo dèbwè d́ō, za dagè dècodèkhli. Manè̄, cè tòcò òthôḿô̆i dèadèò̆ d́ŏ Èrŏdè ahtĭage ò akhoacè̆ lò nu.

²¹ Mègōnu cè tòcò ò pradòlò b́ĕ muni dini nu b́ĕ Èrŏdè gō grōhtab́ŭhta Saphra adègrōdèb́ŭ kî gā sańăla hwă d́ŏ ana bu agī cirraphame dè nu.

²² Kî bija tòcò htŏhta alē kî cò d́ò, “Ajo ḿî B́ĭcè alē, tèb́è bija ale ńò!” cò d́ò do.

²³ Zè dè bè̄dòbè̄the Kib́ĭcè ńò, ḿî zî phîdophîmu ze ne akhoacè̆ Mò̄kho Abwèzo plè̆ cè d́ō, zo hlo wēhta hwă zi thĭgè.

²⁴ Kib́ĭcè Alēahwè dohtakhò̆hta kî d́èlò̄d́èkhò̆gè.

²⁵ Barnăbas kî Saŭlu mè pĕhta hwă missio adèmè d́ō, ze geb́agè d́ŏ Jerŭsalèm u nu kî ze gejoigè Zowănnī Mărko dèbwè nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan