Bìoball air-loidhne

Thodŏpho 10 - Geba Roman New Testament

Petru kî Kòrnè̆lio

¹ Hlĕnu d́ŏ Caesăria u nu, bija ami ḿî Kòrnè̆lio ògè dèbwè. Zî ḿî Rŏmapho aklĭpho dègèjè akho, htè klĭ ami ḿî “Itălia Klĭdo,” nu.

² Cè kî zi hiphophăpho ḿî aòi dèthub́uthèb́è̆ kî ascisăni Kib́ĭcè ale lò. Ci igetcage Jŭdapho assègnè̆ tòcò pwĕdimi kî thèb́è̆ thèjô̆ lò.

³ B́ĕ lumuhtikhlèb́a thŏnare akhî nu za tcahtî Kib́ĭcè Abwèzo dèbwè lehtî cè kî zo jo lōwa, “Kòrnè̆lio!”

⁴ Za tcawè̄ dîgrî̄nî̄ hwă lōwa d́ŏ dèthaganā abu d́ō, cò d́ò, “Ḿî danè̄, Ŏ B́ĭcè,” cè d́è̆ lōwa do. Ḿî Kib́ĭcè Abwèzo d́ò̆sa cè, “Nè dèthèb́è̆ tòcò kî dèihluită tòcò b́ahtagè d́ŏ Mò̄kho kî ab́èhmăi d́ŏ B́ĭcè ahlò̆mò̄ nu.

⁵ Khŏnujo thodŏlebò̄ bija d́ŏ Jŏppa u kî jolebò̄ Simŏnè htè ami ḿî Petru nu.

⁶ Zi ḿî aòkô Simŏnè asadèphe htè ahi òb́ôhtî pèllèwe nu,” cò d́ò lōwa do.

⁷ B́ĕ Kib́ĭcè Abwèzo ajî̄b́èhtî cè dèbwè hèhta hwă nu, zo jogè zô zôpho gībwè, htè d́ŏ ci klĭpho aklè ascisăni Kib́ĭcè ale dèbwè nu,

⁸ cò d́ò̆sa lŏ hwă lōwa dèwîdèkè̆ tòcò nu d́ō, zo thodŏlegè lōwa d́ŏ Jŏppa u nu.

⁹ Alekă dini b́ĕ cè tòcò hèkôwe klè ḿî ado b́ôhtî htŏ Jŏppa u nu, b́ĕ lumuhtihta akhî Petru hta thèb́è̆gè d́ŏ hikhotòcò̆ nu.

¹⁰ Ca thaẃithaò̆ kî ca thaè agè dè dimimi. B́ĕ bija tòcò pradòlògè dèa akhî nu, Petru nib́ègè dètcahtî acòklî.

¹¹ Za tcahtî Mò̄kho ò atab́ă, kî tîkî̆jā adoakhò̆ tòkò̆lā, anebu ò lwīne, ò azèla d́ŏ Mò̄kho do d́ŏ lākho nu.

¹² Kî dèphodèwe akhakhò ò lwīkhò̆ kî ahèwè̄ tòcò ò pĕhtagè abu kî htŏphojōli tòcò papa.

¹³ Dèlē thèhtagè dèdè̆, ad́ò cè, “Wè̄hto, Petru, mèthĭ hwă abò̄!” ad́ò cè do.

¹⁴ Barasă Petru d́òscĭge, “Adòbò kî jè, Ŏ B́ĭcè! Manè̄ ja ta agè dè adu rŭ ńò kî athŭthèḿè̆ dakha ńò,” cò d́ò do.

¹⁵ Dèlē thèhta tapla be kî ad́ò cè, “Dè htè Kib́ĭcè mèplî̆mètcă hwă nu, d́òbò̄ ḿè ada tcahtĭ ńò ḿè,” adò cè do.

¹⁶ Dè mègè ane gōnu thŏpla, Hwă d́ō tîkî̆jā b́ècwihtagegè d́ŏ Mò̄kho nu.

¹⁷ B́ĕ Petru htèdômô̄dahmă kî gomoca ze dètcahtî ahtabohtab́ă akhî nu, Kòrnè̆lio thodŏle abija tòcò wāhlè Simŏnè ahi kî sò̆hto ò d́ŏ khaglè̄htî,

¹⁸ d́è̆tcagè bija htè “Simŏnè bija jo ami Petru dèbwè nu ògè b́ĕnu ā?” nu.

¹⁹ B́ĕ Petru gomohlè thebĕ zè dètcahtî akhî nu, Spirito Tcahtĭ d́ògè cè, “Tcabò̄, bija wāhlè nè thŏbwè.

²⁰ Wè̄hto kî lahtî plaplăbò̄ cè. Wèzè ḿè ne ne agē lekô ca kă ḿè, manè̄ jè thè̆legè cè tòcò,” ad́ò cè do.

²¹ Mègōnu Petru gelahtîgè bija tòcò kî cò d́ò, “Tcabò̄, ji ḿî bija htè thĭ wāhlè dèbwè nu. Thĭ dèdole ḿî da acè̆ nè?” cè d́è̆ lōwa tòcò do.

²² Kî cè tòcò d́ò, “Klĭpho dègèjè akho Kòrnè̆lio thè̆le wa d́ŏ ńò ò lò. Zi ḿî bija adî̄ahma, ascisăni Kib́ĭcè ale kî Jŭdapho thèd́è̆khwĭ d́ŏb́èj́ab́è dèbwè nu. Mò̄khobwèzo Tcahtĭ dèbwè adèd́ò̆sa acè̆ jo nè agē le d́ŏ zi hi nu kî agò̄ sòkhĕńe nè dèjî̄b́è nu,” cò d́ò̆sa lōwa do.

²³ Petru jonī hwă cè tòcò hibu, ci i lōwa sòḿĭ anu dè nè b́ĕnu. Alekă dini Petru wè̄hto kî lekôgè lōwa tòcò akă kî thè̆buthè̆we ab́udè aò Jŏppa u tòcò ḿî ḿî lekôgè ca kă.

²⁴ Athè̆ dini be cè tòcò dolegè d́ŏ Caesăria u nu. Kòrnè̆lio jo ladēplo hwă akhwĭakhò̆, athòad́e tòcò d́ō, cò òsô̆wô̄ dôigè lōwa.

²⁵ B́ĕ Petru dole nu, Kòrnè̆lio lescĭ cè klè, dōhnŏla hwă d́ŏ cò hlò̆mò̄ d́ō d́ŏb́èj́ab́ègè cè.

²⁶ Petru cwiwè̄hto hwă cè, cò d́ò lōwa, “Wè̄htobò̄, jè ḿî tèpwè bija dèbwè lò,” cò d́ò lōwa do.

²⁷ Zò dòdò̄majahtî lōwa kî lenī hibu d́ō, za tcahtîgè bija òèòò ladēplo lōwa.

²⁸ Kî Petru d́ò cè tòcò, “Thĭ thîhè̆ tèpwè htè Jŭdapho dèbwè nu, cò òplosò̆jī kî lehtî gehtî htĭgepho alewe akhwè tò ò ńò nu; barasă Kib́ĭcè d́è̆lî̄ htŏ jè htè jo gō do job́è bija adu rŭ ńò kî ada tcahtĭ ńò dèbwè̆ ńò nu.

²⁹ Mègōnu akhoacè̆, jè b́è jole nu je le plaplă tèpwè. Jè d́è̆ thĭ, thĭ hmèle ma jè nè?” cò d́ògè lōwa tòcò do.

³⁰ Kòrnè̆lio d́ò̆sa cè, “Hlĕ aŭsu thŏthè̆ gōjo akhî nu, jè thèb́è̆htagè b́ĕ ji hibu b́ĕ lumuhtikhlèb́a thŏnare akhî nu. Bija adèkô̆dèthò gèhlè̆tîd́î dèbwè sò̆htoògè jò hlò̆mò̄,

³¹ kî cò d́ògè jè, ‘Kòrnè̆lio, nè dèthèb́è̆ tòcò kî dèihluită tòcò b́ahtagè d́ŏ Mò̄kho kî ab́èhmăi d́ŏ B́ĭcè ahlò̆mò̄ nu.

³² Khŏnujo thodŏlebò̄ bija d́ŏ Jŏppa u kî jolebò̄ Simŏnè, htè ami ḿî Petru nu. Khŏnujo cò ò sò̆dūsòd́è̆ d́ŏ asadèphe Simŏnè, htè ahi òb́ôhtî pèllèwe nu,’ cò d́ò jè do.

³³ Taplakhă lò, jè hmèle nè kî ne lehtî tèpwè jè d́ŏ dèthowîthamò abu dòkhò̆. Khŏnujo wa ladēplo lŏ lōwa d́ŏ ńò hlò̆mò̄ agò̄ sòkhĕńe dè htè Kib́ĭcè hmèlagè nè tòcò nu,” cò d́ògè lōwa do.

Petru Adèd́ò̆htô

³⁴ Petru d́ògè gōjo, “Khŏnujo jî thîhè̆ htŏ Kib́ĭcè ta tca bija amūkă ńò.

³⁵ Ḿî Za tca gajă bijakhwĭpho htè ascisăni ze le kî amè dèdî̄dèhma lŏcăcè tòcò amūkă lò nu.

³⁶ Zè dèjî̄b́èla d́ŏ Israè̆lpho tòcò ò, Zô thôithò̆i dècodèkhli d́ŏ Jezŭ Krĭstu, htè aḿî bija lŏcăcè Ab́ĭcè dèbwè alòmò bu nu.

³⁷ Thĭ thîhè̆ tèpwè dèphî̆hta ane d́ŏ Israè̆l thèd́è̆ge abu nu, manè̄ Zo gohta zè dèmè b́ĕ Zowănnī Baptĭsta d́ò̆htôla hwă Dèŭsab́ăhtĭ awîakè̆ tcahta d́ŏ Galilĕage nu.

³⁸ Kib́ĭcè htôrôgè Jezŭ Nazarè̆thpho kî Spirito Tcahtĭ adèkhodèă cadè̄ nu kî Zè hè dalā b́è dalā, mèhmage bija aladēnī Mod́èlî acukhòbu tòcò cadè̄ nu. Manè̄, Kib́ĭcè òkô ca kă.

³⁹ Wî ḿî akhathè̆thî d́ŏ zè dèphîdèmè zè mègè tcahta b́ĕ Jerŭsalèm u kî Judĕage tòcò nu. Bija tòcò hlîhta thĭ cè d́ŏ Krusu alò nu.

⁴⁰ Barasă thŏni dini Kib́ĭcè b́awè̄hto Cè, kî d́è̆lî̄gè Cè,

⁴¹ tè b́è bija gŏ abwè ńò, ḿî htĕ Kib́ĭcè rôhlègè bija htè akhathè̆thî tòcò, ḿîgè wa, a a plo ò̆ plo b́è cè b́ĕ Za htaboge hwă dèthĭ aklè̆ nu.

⁴² Kî Za hnagè wa akò d́òŭd́ò̆sa bija kî agā kha thè̆thî d́ŏ zî ḿî Kib́ĭcè ila aphlŭathere agī cirra bija aòthôḿô̆ kî athĭ dèbwè nu.

⁴³ Prò̆fèt lŏcăcè kha htŏ Zi nikhĭ thè̆thî cab́ô̆htè bija ab́u Cè tòcò gī nib́èbò̄ dèkhòwè adèb́ăplè d́ŏ Zi mi aphlŭathere abu nu,” cò d́ò̆sagè lōwa tòcò do.

Bwèthŭkupho tòcò Nib́è Spirito Tcahtĭ

⁴⁴ B́ĕ Petru d́ò thebĕ dèjî̄b́è ajo tòcò nu, Spirito Tcahtĭ lelagè bija asòkhĕńe zè dèthôdèthò̆ tòcò akho.

⁴⁵ Bwèthŭkupho tòcò nu ḿî ḿî Spirito Tcahtĭ b́è hlòlagè zo kho tòcò akhoacè̆, Jŭdapho ab́udè htè aò d́ŏ Jò̆ppa alekô Petru akă tòcò htèdômô̄dahmă lōgè.

⁴⁶ Manè̄ kò̄ d́òdo dō, cî thîhè̆b́è Bwèthŭkupho tòcò jî̄b́è dèlēdèhwè amŏamo kî bè̄dòbè̄thegè Kib́ĭcè akhoacè̆ nu. Petru d́òscĭge cè tòcò,

⁴⁷ “Bija ajo tòcò nib́è Spirito Tcahtĭ acab́ô̆ wi nib́ègè akhò̆ nu. Mègōnu d́ō, bija mèd́îd́ă kèhtabò̄ aku ŭsab́ă cè tòcò htĭ dèbwèbwè ā?” cè d́è̆ bija do.

⁴⁸ Mèhwă, ze hmèla bija aku ŭsab́ă cè tòcò htĭ d́ŏ Jezŭ Krĭstu ami abu nu, Hwă d́ō cè tòcò bòi cè akò òkô ca kă munimuthè̆ tòcò adābu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan