Bìoball air-loidhne

Rŏma 9 - Geba Roman New Testament

Kib́ĭcè kî Abijakhwĭpho

¹ Ja da thaè d́ò brasa dè ńò, ḿî jò d́ò ab́è ploplo kî Krĭstu lò. Ḿî dèdî̄dèhma d́ŏ ja thaobu Spirito Tcahtĭ d́òb́ĭsa ladîlase jè.

^2-3 Ja thaè d́ò ḿî gōjo; jè dèothootha nu ḿî ado, jè dèthogothagè̄ ḿî adu kŭdu za ńò, pwĕ athaè b́è cirra, pwĕ akè b́è htobākè̆ b́è Krĭstu ò, ḿî jè gè̄ mèzo za ma jè thè̆buwe Israè̆lpho tòcò htè aḿî je phe jî hî, ji thwi ji htĭ tòcò nu.

⁴ Cè tòcò ḿî Kib́ĭcè abijakhwĭpho, Ci ilani lōwa pho ale, kî d́è̆lî̄ Zè dèdòdèthe kî dèlagla, Dèhmèla kî dèthub́uthèb́è̆ b́è mèhtagè cè tòcò anikhĭ kî dèaḿăkhai.

⁵ Cè tòcò ḿî Patriăka akhwĭathèlè̆ kî d́ŏ zi khwĭ abu nu, Krĭstu lelagè, Kib́ĭcè htè aŭidè lŏcăcè b́èhôwî lahtŭlablo! Amèn.

⁶ Ajo ḿî ad́è̆lî̄ Kib́ĭcè adèmèpĕhta adèaḿăkhai lò. Manè̄ kòd́òdo dō, Bija Israè̆l akhwĭpho tè b́è Kib́ĭcè abijakhwĭpho lŏcăcè ńò.

⁷ Bija aòla d́ŏ Israè̆l akhwĭ tòcò dî ḿî lŏ Israè̆lpho ńò. Abraham akhwĭ tòcò dî ḿî lŏ zo pho zi li ahnè ńò. Gomohtanibò̄, “Ni mi nè khè̆ gî̄ ḿîkò̆ d́ŏ Izăko ami abu nu.”

⁸ Ahtabohtab́ă ḿî amèphî̆hta wa Kib́ĭcè aphoali dî ḿî phehî akhwĭathèlè̆ ńò, ḿî dèaḿăkhai aphoali tòcò gî̄ ḿîkò̆ akhwĭathèlè̆ adî̄ahma nu.

⁹ Dèaḿăkhai adèjî̄b́è ahmô̆athè ḿî gōjo, “B́ĕnu akhîagla nu, je gē lehtîkò̆ thĭ kî Sărah aphokhŏ kò òkò̆ dèbwè,” nu.

¹⁰ Ab́ènibòni thĕbwethîlî̆ ḿî b́ĕ Rebè̆ka muthèd́ŏhtakô kî wu phŭ Izăko nu,

^11-12 d́okhlŏ ḿî aŭsu dukhlŭkî zo pho aòthokŏ gībwè dèmè za awî kî akî̆kkè akhî hnî̆ńò nu. Cab́ô̆htè Kib́ĭcè kè d́è̆lî̄htabò̄ Zè dèrôhta ḿî htĕ ab́è Ca tha nu lô d́ō adò; Dè ò lŏ d́ŏ ajo bija dèbwè acukhòbu lò, dè b́è bija adètani acè̆ ńò d́ō, Cò d́ògè Rebè̆ka, “Adobwe gā khazôkò̆ ascipho.”

¹³ Kî Cè Tcahtĭ d́òwe alewe dagla gōjo, “Jè d́è̆lî̄ jè dèb́èlò̄ Jăkòb akho kî jè dè wè̄ Izău ńò,” nu.

¹⁴ Mègōnu d́ō, Kib́ĭcè dî dî̄dahmagè ńò ā? Tè b́è do ńò!

¹⁵ Tcabò̄, Kib́ĭcè d́ò Mŏzè, “Jò khòwè bija ja tha ò tòcò, kî jè d́è̆lî̄ jè dèkhòwèhmòb́è gajă ja tha ò tòcò nu,” nu.

¹⁶ Alewe domo ḿî tèb́è d́ŏ bija athaèni kî athaò adĕ nu ńò, ḿî Kib́ĭcè adèkhòwèhmòb́è ò adĕ nu lò.

¹⁷ Manè̄, d́ŏ Cè Tcahtĭ abu Cò d́ògè Pharaŏnè, “Dè ajo anikhĭ jè lè̄htagè nè, agè̄ mèi nè cab́ô̆htè jè kè d́è̆lî̄bò̄ Jè dècô̆dèthèlè̆ kî agè̄ mèhŏhtathèlabò̄ Ji mi d́ŏ Lākho thèd́è̆b́è akho nu.”

¹⁸ Gōnu akhoacè̆, ḿî b́ĕ Kib́ĭcè thaè d́è̆lî̄ Zè dèthakhòwèhmòb́è nu kî Za thaè mèsa bija atha nu, Zè mè za tèpwè do.

Kib́ĭcè Adèthèhtè kî Adèkhòwèhmòb́è

¹⁹ Thĭ kò d́ò jè lòmò̄, “Mègōnu d́ō, bija dèbwè̆ da htakhokă za Kib́ĭcè adèthaèni ńò akhoacè̆, Zu gū hub́è za lōwa cadè̄?”

²⁰ Barasă thĭ nu thĭ gī cirraphame za Kib́ĭcè cadè̄? “Ńò b́ò ma jè gōjo nè?” gobo tò d́ò za ab́ògobo dèbwè do ńò.

²¹ Ab́ògobo dèbwè mèi za hapèè acab́ô̆ ca tha alō nu, kî cò b́òi gobo gīd́ŏ d́ŏ hapèè dokhlo lò, tod́ŏ ḿî dèramòi anikhĭ kî alewe tod́ŏ ḿî dèdeaphăai anikhĭ.

²² Gomohtani Kib́ĭcè kè d́è̆lî̄hta acô̆thèlè̆ d́ŏ dèthèhtè abu nu, ḿî Zò khòthad́ò̆i amèthèhtè cè pwĕ agā tani dèthĭdèhlè̆mè̄ tòcò nu.

²³ D́ŏ bija lewe htè Ca thaè d́è̆lî̄ Zè dèkhòwèhmòb́è, Ca thaè d́è̆lî̄ Cô dò Cè the, bija htè Ca pradòlò hlĕ hlekadè̄ nu tòcò akhoacè̆ Zò khòthad́ò̆gè lōwa.

²⁴ Wî ḿî Jŭdapho ḿîwî, bwèthŭkupho ḿîwî, wî ḿî lŏ Zo jo thè̆negè tòcò nu.

²⁵ Anu ḿî Kib́ĭcè d́ò htŏ d́ŏ Hozĕa Acèbu gōjo; “Bija htè atè b́è Ji bija ńò dikhwĭ nu, jo gō jokò̆ cè tòcò ‘Ja bijakhwĭpho.’ Bija htè Jè tè b́èlò̄gè tapla U ńò dikhwĭ nu, Jo gō jokò̆ cè tòcò ‘Jè b́èlò̄ thĭ.’

²⁶ Thôrô̆ Jò kò d́ò, ‘Thĭ dî ḿî Ji bija ńò nu,’ khŏnujo kè b́èjokò̆ Kib́ĭcè Aòthôḿô̆ aphoali.”

²⁷ Wa tcage d́ŏ Prò̆fèt Izaĭah Acèbu d́ō, ad́ò gōjo, “Israè̆l akhwĭathèlè̆ òèòò nòthò̆ pwĕ lothĭḿi aò pèllèwe hnò̆nu, agô̄ hlô̆htage ḿî akholakăsè tîkîpho lò.

²⁸ Manè̄ d́ō, Kib́ĭcè ḿî acirraphame plă dè d́ŏ Lākho akho jo dèbwè akhoacè̆ nu.”

²⁹ Acab́ô̆ Prò̆fèt Izaĭah adèd́òdòlò, “B́ĭcè Dèado gè̄ dè lè̄lagè ma wi khwĭ wè thèlè̆ tòcò ńò d́ō, khŏnujo wa gā la tèpwè Sò̆doma u kî Gòmò̆rra u tòcò nu lò.”

Israè̆lpho kî Dèthalōthala Awîakè̆

³⁰ Ajo ḿî ad́è̆lî̄ bwèthŭkupho ada wāhlè dèdî̄dèhma ńò tòcò hnò̆nu, pahtî tèpwè dèb́u dèdî̄dèhma tòcò nu;

³¹ ḿî Israè̆lpho awāhlè dèdî̄dèhma d́ŏ Dèhmèla abu tòcò nu dè mèkô tèpwè Dèhmèla akă ńò.

³² Cè tòcò supa manè̄? Ḿî d́ŏ cè tòcò da sascĭi dèb́u ńò, ḿî dèmè awîab́è lò akhoacè̆ nu.

³³ Ḿî acab́ô̆ Cè Tcahtĭ d́ò; “Cè tòcò htè̆thukŭ losò, kî tcabò̄, Jò d́ò̆lă lo d́ŏ Zion cab́ô̆htè bija gè htè̆thukŭ nu, Jò d́ò̆lă sò cab́ô̆htè bija gè htè̆thukŭ ladēbla anikhĭ nu, bija ab́u Cè tòcò anikhĭ amò thăwā acè̆ kò tò òkò̆ ńò,” nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan