Bìoball air-loidhne

Rŏma 8 - Geba Roman New Testament

Dèòthôḿô̆ d́ŏ Spirito Tcahtĭ abu

¹ Mègōnu d́ō, bija aòthôḿô̆ d́ŏ Jezŭ Krĭstu abu tè b́è Kib́ĭcè adècirra ńò.

² Manè̄ d́o, Kib́ĭcè Atha Adèhmèla adèò d́ŏ Jezŭ Krĭstu nu b́ahlô̆htagè thĭ d́ŏ dèkhòwè kî dèthĭ adèhmèla abu nu.

³ Dè d́ŏ phehî adèhmèla adèmè kèhta ńò nu, Kib́ĭcè mègè. Kib́ĭcè thodŏlegè Zo Pho agî̄ phînigè dèneb́î̆cè htè dèkhòwè phîgloi nu akhoacè̆, Zi cirrathĭgè dèkhòwè.

⁴ Zè mègōnu cab́ô̆htè Dèhmèla adèda tòcò kò ònībò̄ wa phehî adèmè tòcò gî̄ phî̆htabò̄ wi nikhĭ thotha adèmè nu.

⁵ Bija atò òi thotha adèmè ńò tòcò tè b́èlò̄ dè ab́èkja thotha ńò, ḿî aòi thotha adèphîdèmè tòcò b́èlò̄ dè ab́èkja thotha lò.

⁶ Bija dèbwè gè̄ mèi ma phehî adèmè lò d́ō, zè mèni zi nikhĭ dèthĭ lò, ḿî bija dèbwèbwè gè̄ mè ma thotha adèmè d́ō, zè mèni tèpwè zi nikhĭ dèòthôḿô̆ kî dècodèkhli dòkhò̆.

⁷ Manè̄ kòd́òdo dō, bija dèbwèbwè gè̄ mè ma htĕ phehî anikhĭ lò d́ō, mè cab́ô̆ zè mè ze ne Kib́ĭcè athè̆d́ĕd́ò akhò̆ nu, ḿî acab́ô̆ za htad́ĕd́ò Kib́ĭcè Adèhmèla akhoacè̆ nu.

⁸ Bija htè akhaŭi ane kî Lākho adèò tòcò nu, dè mè b́ètha za Kib́ĭcè ńò.

⁹ Thĭ dègomo tè b́è tèpwè phehî anikhĭ lò ńò, ḿî thotha anikhĭ dòkhò̆. Manè̄, d́ŏ Kib́ĭcè aSpirito Tcahtĭ òkôgè thĭ kă. Thĭ kò tò òi ma Krĭstu Adètha ńò d́ō, thĭgè tè b́èkja tèpwè Cè ńò.

¹⁰ Barasă Krĭstu aSpirito Tcahtĭ gî̄ phîni ma thĭ, kî dèkhòwè acè̆ thĭ neb́î̆cè gī thĭ nòthò̆ hnò̆nu, Kib́ĭcè aSpirito Tcahtĭ ḿî dèthôḿô̆ thĭ nikhĭ, manè̄ thĭ b́è lè̄dî̄lè̄hma htŏ akhoacè̆ nu.

¹¹ Kib́ĭcè aSpirito, htè amè htaboge Jezŭ Krĭstu d́ŏ dèthĭ nu ḿî ò ma thĭ bu d́ō, thĭ tha ḿî aòthôḿô̆ d́ŏ thĭ b́è mètcahtĭge akhoacè̆ nu.

¹² Mègōnu akhoacè̆ thè̆buthè̆we tòcò, dè lab́è kè d́ŏ gò dò mò sòkhĕńe we phe wî hî alē ńò, kî wò dò mò òkî phehî adèò lò ńò.

¹³ Thĭ kò ò ma gōnu d́ō, thĭ gī thĭ b́è tèpwè, ḿî Spirito Tcahtĭ gè̄ mèkè̆ mèhlè̆mè̄ ma thĭ phehî adèmè d́ō, thĭ kò ò thôḿô̆b́è tèpwè.

¹⁴ Gajă bija ab́è htogeme d́ŏ Kib́ĭcè Aspirito dèbwèbwè nu, zî ḿî Kib́ĭcè apho.

¹⁵ Spirito Tcahtĭ htè thĭ nib́ègè nu, di ḿî zôbwè aspirito htè agē lei thĭ dèscisă be ńò, ḿî Kib́ĭcè aSpirito Tcahtĭ mènigè wa agî̄ ḿî Kib́ĭcè aphoali kî d́ŏ Spirito Tcahtĭ acô̆thèlè̆ abu wo johtab́è, “Abba Apa,” nu.

¹⁶ Kib́ĭcè Aspirito Tcahtĭ thĕne kî wa tha khaplo lōwa thè̆thî htè wî ḿî Kib́ĭcè aphoali nu.

¹⁷ Kî wî gî̄ ḿî ma Kib́ĭcè aphoali d́ō, wi gī nib́è tèpwè dèilage, Kib́ĭcè kî Krĭstu adèilage apho tòcò nu. Manè̄, wa khaplob́è Krĭstu Zè dèssègnè̆bòdò kî wi nib́èplo Zò dò Ze the.

Dèdòdèthe ḿî Wè dèò Agudulă

¹⁸ Jo gomo ḿî dèba wa khab́è khŏnujo tòcò nu, wô tô d́ôthò̆drò za kî dèdòdèthe aòsô̆wô̄i wa htè wè tè b́è d́è̆lî̄ hnî̆ńò dèdè̆ nu.

¹⁹ Dèòb́òla lŏcăcè sòmò̆dôi Kib́ĭcè akè d́è̆lî̄ Zo pho tòcò nu.

²⁰ Dèòb́òla lŏcăcè di nib́è dè htè Kib́ĭcè mèni wa hnî̆ńò nu, tè b́è bakho mè zè dèkèḿè ńò, ḿî asascĭi we tèpwè acab́ô̆ wa nu,

²¹ akò òhlô̆òlakî zôbwè adèò nu kî agī nib́èkô dèòhlô̆òla kî Kib́ĭcè aphoali tòcò adòathe nu.

²² Hlĕ akăhtî htô̆ dola khŏnujo dèòb́òla lŏcăcè nu, acab́ô̆ wî thîhè̆ atherĕ, koŏgajāgè d́ŏ dèphozelai adèssègnè̆ abu nu,

²³ kî tè b́è htĕ dèòb́òla lò ńò, wa gŏ abwè htè Spirito Tcahtĭ aphò̆athè alabū nu. Wo koŏgajāgè b́ĕ wò sòmò̆dôiwe we neb́î̆cè adèòhlô̆òla akhî nu.

²⁴ Manè̄, wò mò b́èthai htŏ d́ŏ dèsascĭi akè b́è mèhlô̆mèlai nu lò. Wa da tcahtîb́è wè dèhlô̆htage hnî̆ńò, wò dò mò sascĭi do hnî̆ńò hŏ.

²⁵ Barasă wa gā sascĭi ma dè htè wa da tcahtî ńò d́ō, aḿî dè amò sòmò̆dôi d́ŏ dèthazô abu lò.

²⁶ Spirito Tcahtĭ lahtî wa agè̄ mèzo wa d́ŏ wè dèkhodèă tò ò ńò aklè̆ nu. B́ĕ wa wāhlè dèjî̄b́è akè thèb́è̆ thoŏthèè nu, Spirito Tcahtĭ thè̆ne damò Kib́ĭcè wi nikhĭ d́ŏ dèkoŏgajā scô abu htè wò tò d́ò za ńò nu.

²⁷ Kib́ĭcè htè awāhlè thîhè̆ wa tha dèbwè nu thîhè̆ tèpwè Spirito Tcahtĭ thaè d́ògè tòcò nu, kî d́ŏ Spirito Tcahtĭ adèda d́ŏ bija tcahtĭ tòcò adèthaèni htĕ ab́è Kib́ĭcè atha tòcò nu.

²⁸ Wî thîhè̆ htè d́ŏ dèlŏcăcè abu, Kib́ĭcè mègè dè awîaè, ploplo kî bija htè ab́èlò̄ Cè tòcò nu, d́ŏ Zo jogè lōwa acab́ô̆ Zè dèthaèni ò adĕ nu.

²⁹ Cè tòcò nu ḿî bija htè Kib́ĭcè rôhlègè hlĕ hlemo agī phî̆htab́è Zo Pho ahô̆agèlè, cab́ô̆htè Zo Pho gî̄ ḿîbò̄ thè̆buwe òèòò aklè̆ Adobwe dèbwè nu.

³⁰ Zo jogè Ca tha ò tòcò, htè Zè mèwîmètcăgè lōwa agī nikôb́è Ca kă Zò dò Ce the tòcò nu.

Kib́ĭcè Adèb́èlò̄ d́ŏ Jezŭ Krĭstu abu

³¹ Dè ajo tòcò hwă amò d́ò khlŏ ḿî danè̄? Kib́ĭcè kò ò ma d́ŏ wò ò dòkhò̆b́è d́ō, bò̄bwè gā htakhokă za wa bwè?

³² Kib́ĭcè dè lè̄dakè̆ Zo pho ńò, ḿî Ci ilaphlòḿĭ lōwa wi nikhĭ d́ō, gajă Ci i za wa tòcò nu Ci ti kĭwīi ńò, ḿî i lŏtholŏtha wa nu wò d́ò za htŏ tèpwè.

³³ Bija gā sawè̄ zabò̄ Kib́ĭcè rôhlè hwă htŏ tòcò alò dèkèḿè dèbwèbwè ā? Ḿî Kib́ĭcè htè abăhlôgè wa dèbwè nu lò.

³⁴ Bija cirra za wa dèbwèbwè ā? Ńò! Tè b́è Jezŭ Krĭstu htè athĭ hwă ab́è mèthôḿô̆htage Ci thĭ nikhĭ wa, da hwă hnî̆ńò, Za htaboge dèthĭ aklè̆, Hwă d́ō Cò ò d́ŏ Kib́ĭcè acudèhtwè nu kî Cò d́ònikhĭsanikhĭ we wa dòkhò̆.

³⁵ Da dimĭ dè mèbā kèhta wa kî Krĭstu adèb́èlò̄ azo ńò. Wa khab́è nòthò̆ dèssègnè̆ kî dèb́èhjŏb́èma hnò̆nu, wè b́è nòthò̆ dèlômèssègnè̆ hnò̆nu, wò sò̆taabatòò̆, dô kô̆ dò thò b́è nòthò̆ hnò̆nu, wè b́è mèjomèhnă, b́èmūb́èhta nòthò̆ hnò̆nu, da dimĭ dî htîbā kèhta wa ńò.

³⁶ Acab́ô̆ Cè Tcahtĭ aḿăkhaigè nu; “No kho Nè cè̆, wè b́è mèthĭ gŏ ani lò; Bija htegè wa cab́ô̆htè thŏ akè b́è mèthĭ tòcò nu.”

³⁷ Ajo ḿî dèb́ètha htè wo no wè bèkô akholè̄kălè̄, d́ŏ ab́èlò̄ wa dèbwè abu nu.

³⁸ Ji nikhĭ ḿî aladilase htè dèthĭ ḿîwî, dèò ḿîwî, Mò̄khobwèzo ḿîwî, saphrapho ḿîwî, dè aò khŏnujo tòcò ḿîwî, akò òkò̆ d́ŏ alekă tòcò ḿîwî, dècô̆dèthèlè̆ ḿîwî,

³⁹ d́ŏ dèhtajî ḿîwî, dèlajò̄codibi ḿîwî, dèòb́òla ḿîwî de lenī za wa kî Kib́ĭcè adèb́èlò̄ htè gā tcahtî za d́ŏ Jezŭ Krĭstu azo dimĭ ńò.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan