Bìoball air-loidhne

Rŏma 4 - Geba Roman New Testament

Abraham Adèb́u Ahô̆agèlè

¹ D́ôthò̆dròtcabò̄ Abraham htè wi khwĭ wè thèlè̆ akhahtîkhab́ò̆ dèbwè nu. Zè dè kèhtîb́è ḿî danè̄?

² Abraham kè̄ b́è mèwîmètcahtĭ d́ŏ dèmè alewe domomo acè̆ d́ō, zò mò bè̄htahtô̆i ze ne akhoacè̆ nu. Barasă d́ŏ Kib́ĭcè ahlò̆mò̄ nu zè dè mè za tèpwè ńò.

³ Manè̄, Cè Tcahtĭ d́ò, “Abraham nu cu b́u Kib́ĭcè, d́ŏ zè dèb́u akhoacè̆ Kib́ĭcè bè̄gè cè acab́ô̆ bija adî̄ahma dèbwè lò,” ad́ò do.

⁴ Bija htè amèdè dèbwè nu mò nib́è asôahlè̆ lò. Tè b́è bija ihlè̆ hnahnă cè ńò, ḿî zè mèdè akhoacè̆ za ta nib́è lò.

⁵ Ad́ògodòi ane dèb́u, tè b́è dèmè ńò, kî ab́u Kib́ĭcè htè ab́ăplè bija adèkèḿè nu, dèb́u ajo ḿî ajāthô dèdî̄dèhma lò.

⁶ Cab́ô̆ gōnu akhò̆, Dăvid d́ò̆sa bija htè anib́è dèthalōthala d́ŏ Kib́ĭcè lè̄dî̄lè̄hma dèbwè nu awîakè̆, cò d́ò;

⁷ “Ab́èhôwî ḿî bija htè adèkèḿè b́è b́ăplè, adèkhòwè b́è b́ahlô̆ tòcò nu.

⁸ Ab́èhôwî ḿî bija htè Kib́ĭcè gomo adèkèḿè tò ò ńò dèbwè nu.”

⁹ Dèthaganāi ajo ḿî anib́è dèhô̆rîkî̆ tòcò anikhĭ lò ā? Tè b́è ńò! Ḿî bija adi nib́è dèhô̆rîkî̆ ńò tòcò anikhĭ khĭ. Gomohtanibò̄ Abraham tapla be. Wò d́ò, “Abraham b́u Kib́ĭcè, d́ō zè dèb́u acè̆ Kib́ĭcè mèwîmètcahtĭ cè.”

¹⁰ Ḿî amèni cè hlekadè̄? B́ĕ zi nib́è hwă dèhô̆rîkî̆ nu ā? Ḿî hlĕ aŭsu nu ā? Aŭsu kî dèhô̆rîkî̆, tè b́è alekă ńò.

¹¹ Dèhô̆rîkî̆ ḿîkò̆ alekă. Zè dèhô̆rîkî̆ ḿî Kib́ĭcè adèaḿăkhai agèlè, htè d́ŏ zè dèb́u acè̆ Kib́ĭcè mèwîmètcă htŏ cè nu. Mègōnu d́ō, Abraham phî̆htagè ab́udè lŏcăcè tòcò apa.

¹² Cî ḿîkô anib́è dèhô̆rîkî̆ tòcò lŏcăcè apapa, kî tè b́è d́ŏ cè tòcò nib́è dèhô̆rîkî̆ akhoacè̆ ńò, ḿî d́ŏ zô lôkôgè Abraham akhale d́ŏ dèb́u aklèbu dukhlŭkî za kha dèhô̆rîkî̆ hnî̆ńò akhoacè̆ nu.

Dènib́è Dèaḿăkhai d́ŏ Dèb́u Acè̆

¹³ Dèaḿăkhai Abraham kî zo pho zi li tòcò agī nib́è Lākho ḿî tè b́è Dèhmèla acè̆ ńò, ḿî d́ŏ dèb́u kî adèdî̄dèhma acè̆ lò.

¹⁴ B́eḿĕ Kib́ĭcè adèaḿăkhai alākho ḿî aòi Dèhmèla tòcò anikhĭ lò d́ō, dèb́u ḿî ahnahnă kî Kib́ĭcè adèaḿăkhai ḿî ahnahnă lò.

¹⁵ Dèhmèla ḿî aòi dècirra d́ŏ dèkhè̆b́a Dèhmèla acè̆ nu, gōnu akhoacè̆ dèhmèla tò ò ńò khaĺè wè sèkô̆ni zakò̆ ale.

¹⁶ Mègōnu akhoacè̆ dèmèpĕhta dèaḿăkhai ḿî dèb́u, cab́ô̆htè agî̄ ḿîbò̄ dèila hnahnă htè Abraham akhwĭathèlè̆ gī nib́è zabò̄ nu, tèb́è htĕ bija aòi Dèhmèla tòcò lò ńò, ḿî lŏ bija anib́è dèb́u acab́ô̆ Abraham tòcò anikhĭ papa. Manè̄ Abraham ḿî wa lŏcăcè apa d́ŏ tho kî tha dèbwè nu.

¹⁷ Dŏ Cè Tcahtĭ abu, “Ja hna kèhtagè nè bija khwĭ òèòò apa,” dèhwela ò do. D́ŏ Kib́ĭcè ahlò̆mò̄ nu Abraham ḿî wa pa, cè htè Kib́ĭcè ilanigè dèb́u dèbwè nu. Zî ḿî ab́u Kib́ĭcè htè ab́awè̄htoge athĭ tòcò d́ŏ dèò athôḿô̆ abu, kî amèphî̆htagè dè atò ò hnî̆ńò dèbwè nu.

¹⁸ B́ĕ dèsascĭi ale tò ò ńò nu, Abraham ḿî bija ab́u kî sascĭi Kib́ĭcè akhoacè̆ zî phî̆htab́è bija khwĭ òèòò apa, acab́ô̆ Dèhwela ògè nu, “Ni khwĭ nè thèlè̆ gā larūlazèbrè òèòòkò̆ acab́ô̆ sè aò d́ŏ Mò̄kholè̄ nu.”

¹⁹ Ca thabwegè pwĕ ad́e dègèjègè, kî ze neb́î̆cè ḿî acab́ô̆ athĭgè nu, kî Sărah ḿî ḿî apho tò ò kèhta be ńò nu, dègomo ajo dè mèscilazela ze dèb́u ńò.

²⁰ Zè dèb́u de gleglā ńò, kî zè dè htèniwĭniwa d́ŏ Kib́ĭcè adèaḿăkhai cè nu ńò, ḿî zî phîni dèkhodèă d́ŏ Kib́ĭcè ò thîhè̆htage Kib́ĭcè lò.

²¹ Cu b́u thĕbwethîlî̆ d́ŏ Kib́ĭcè gè̄ mè pĕhtazòhta adèaḿăkhai cè nu.

²² Ajo ḿî dèb́u htè amèwîmètcahtĭgè cè domo nu.

²³ Dèjî̄b́è, “Kib́ĭcè mèwîmètcahtĭgè cè,” nu, Cè Tcahtĭ da thaè d́ò htĕ cè dèbwè lò ńò.

²⁴ Ḿî ad́ò wa nikhĭ papa. Manè̄ d́ō, d́ŏ wu b́u Cè htè ab́awè̄htoge B́ĭcè Jezŭ d́ŏ dèthĭklè̆ dèbwè nu akhoacè̆ lò.

²⁵ D́ŏ wè dèkhòwè tòcò akhoacè̆, Cè b́è ilakè̆ d́ŏ dèthĭ, kî Cè b́è b́awè̄hto thôḿô̆htage cab́ô̆htè Zè gè̄ mèwîmètcahtĭge wa anikhĭ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan