Bìoball air-loidhne

Rŏma 15 - Geba Roman New Testament

Dèmèmò Bija Atha

¹ Wa akhoaă ò tòcò nu, mò khòthad́ò̆i akhoaă tò ò ńò tòcò nu. Wa gŏ abwè mè gomohtani akè̆dîkè̆dè tòcò,

² kî mèzo cè cab́ô̆htè zi gî̄ phî̆htabò̄ Krĭstupho akhob́ăădo tòcò nu.

³ Krĭstu nu Zo do gomoi Zi nikhĭ lò ńò, cab́ô̆ Cè Tcahtĭ d́ò, “Bija adègòsè̆lèwè̄ thĭ ladē Jò lò.”

⁴ Dè gŏ amo d́ŏ Cè Tcahtĭ abu nu ḿî ab́èhwela d́ŏ dèthèhlô̆ wa anikhĭ, cab́ô̆htè wò kò òbò̄ dèsascĭi d́ŏ Cè Tcahtĭ adèi wa dèthozôthazô kî dèikhoiă acè̆ nu.

⁵ Kî Kib́ĭcè, htè aḿî dèthozôthazô kî dèikhoiă akokhwi dèbwè gè̄ mèzo d́ò̆è thĭ cab́ô̆htè thĭ kò̄ ò thôḿô̆plo d́ŏ dèjīdèd́wă abu d́ŏ dètcahlô̆tcad́ò̆ Jezŭ Krĭstu,

⁶ cab́ô̆htè thĭ lŏcăcè kò kòihtăi Dèado kî wî B́ĭcè Jezŭ Krĭstu Apa, d́ŏ thĭ tha dèmè̆ lò abu nu.

Vanzĕlō d́ŏ Bwèthŭkupho Anikhĭ

⁷ Mègōnu d́ō, mèihlèbò̄ lōwa dèbwè kî dèbwè d́ŏ Kib́ĭcè adòathe anikhĭ, acab́ô̆ Krĭstu mèigè thĭ akhò̆ nu tîkî.

⁸ Manè̄ d́ō, Krĭstu kèhta Jŭdapho tòcò akhî̆abwè cab́ô̆htè Zè gè̄ d́è̆lî̄hta Kib́ĭcè ḿî aòi adèjî̄b́è, cab́ô̆htè Zè gè̄ mèhmemèglo dè htè Kib́ĭcè d́ò̆sadòlò wi phĭ wu phŭ hlemo tòcò,

⁹ kî Zè gè̄ mèzo bwèthŭkupho tòcò agā htăhtai Kib́ĭcè d́ŏ Zè dèthakhòwè acè̆ nu. Acab́ô̆ dèhwela ò, “Ajo akhoacè̆, Ja gā htăhtaikò̆ Nè d́ŏ bwèthŭkupho tòcò ahlò̆mò̄ kî thăbô̄ikò̆ Ni mi,” nu.

¹⁰ D́ŏ alewe dokhlo ad́òwe, “Thalōthalaplobò̄ Kib́ĭcè abijakhwĭpho tòcò nu!”

¹¹ Kid́ò̆ thŏgla dagla d́òwe; “Bwèthŭkupho lŏcăcè gā htăhtai d́ò̆è; B́ĭcè kî bija lŏcăcè gā thăbô̄i d́ò̆è Zi mi!”

¹² Izaĭah d́òwe gō do; “Jè̆sse akhawi gò̄ phò̆htakò̆, agè̄ wè̄hto ŭikò̆ bwèthŭkupho tòcò gā sascĭikò̆ Cè.”

¹³ Dèsascĭi Ab́ĭcè gē lei d́ò̆è thĭ dèthaganāi kî dècodèmò d́ŏ thĭ dèb́u abu cab́ô̆htè Spirito Tcahtĭ gî̄ phîkè̆ b́è dè acŏglo thĭ dèsascĭi tòcò nu.

Păulu Adèhwe Hlî̆htaphlò̆hta

¹⁴ Jè thè̆buthè̆we tòcò, ju tu b́u thĭ ńò tè b́è ńò, ḿî jî thîhè̆ ladîlase htè thĭ dèthaèni ḿî aèzî̄èzô̄ dòkhò̆, thĭ nib́è dèthîd́ôthîhè̆ kî thĭ ikŏikja za zî̄ lōwa nu.

¹⁵ Je hweni thĭ cè kî d́ò̆sa sôgè thĭ taplapla ḿî agè̄ mèthè̆htage thĭ dègomo d́ŏ Kib́ĭcè ilanigè jè ahô̆ajò akhoaă nu.

¹⁶ Zè lēhtagè jè Jezŭ Krĭstu aphŭgi kî jè gè̄ mèib́è ju phŭgi adèphîdèmè d́ŏ dèlle ilani bwèthŭkupho tòcò Kib́ĭcè Adèthalōthalai Awîakè̆ kî amèphî̆hta cè tòcò dèhluhtai amò phîni d́ŏ ab́è mètcahtĭ htŏ kî Spirito Tcahtĭ tòcò nu.

¹⁷ Ploplo kî Jezŭ Krĭstu jè mèkèhta htŏ Kib́ĭcè anikhĭ pwĕdimi akhoacè̆ jî phîdophîmu tèpwè je ne, jo gomo do.

¹⁸ Ja thaè d́ò ḿî cab́ô̆htè bwèthŭkupho tòcò gē genībò̄ wè klè̆ nu, Krĭstu mèigè jè dèd́òdèsa kî jè dèphîdèmè

¹⁹ d́ŏ Spirito Tcahtĭ acô̆thèlè̆ abu, dèbòdèba kî dècòklîcòhjè̆ tòcò akhoacè̆ nu. Tcahta d́ŏ Jerŭsalèm u htô̆do Illĭrikum nu, jò d́ò̆htôd́ò̆dèlè htŏ Vanzĕlō ab́èkja Krĭstu awîakè̆ pwĕ jè kèhta atherĕ nu.

²⁰ Jè bè̄htagè ja tha akò d́ò̆htôkò̆ Vanzĕlō adèthôdèthò̆ d́ŏ adî thîhè̆b́è Krĭstu ami ńò tòcò ò alleaklè nu. Anu ḿî ja da thaè prahta dè d́ŏ bija b́òhta hwăgè akăd́ò̆kho ńò acè̆ lò; jè dèthaèni ḿî agè̄ mè pĕhta

²¹ Ce Tcahtĭ adèd́ò; “Bija adî thîhè̆ Cè hnî̆ńò tòcò gā tcahtî Cè kî adò sòkhĕńeb́è Zî wî Zè kè̆ hnî̆ńò tòcò gî̄ thîhè̆kò̆ Cè,” nu.

Păulu Adèkŏdèkja

²² Awîakè̆ ajo akhoacè̆, je dè lepôd́ŏhtî thĭ ńò òjî̄òkjagè,

²³ ḿî ja thaè agē lehtî thĭ nu ògè ad́eahlè̆ pwĕdimi dòkhò̆. Ḿî khŏnujo jò mò mèdè b́ĕjo tò ò be dimĭ ńò akhoacè̆,

²⁴ ja sascĭi agā tcahtî thĭ b́ĕ je le d́ŏ Spain age nu, jò kò òkôkò̆ thĭ kă tod́odasa. Ja sascĭi je gē le jè klè htô̆ akŭdu d́ŏ thĭ dèthè̆le wîwîmòmò jè abu nu.

²⁵ Aŭsu dimi ḿî, je gē leib́è bija atcahtĭ d́ŏ Jerŭsalèm u bu nu tòcò pĭd́ŏpĭsa tîkî,

²⁶ manè̄ d́ō, Macedŏnia kî Akhaĭage b́è̆lă htŏ atha agè̄ thè̆le dèmèzo, d́ŏ bija tcahtĭ aklè̆, assègnè̆pho aò d́ŏ Jerŭsalèm u bu tòcò acè̆ nu.

²⁷ Aḿî hnèhnè dèthohlò̆thahlò̆ adèmèhlu, manè̄ d́ō, ci ḿî dèsăge acwĕ domo, bwèthŭkupho htè anib́èkôgè assègnè̆pho tòcò thotha adè tòcò nu mò mèzoge cè tòcò d́ŏ phehî adè dòkhò̆ nu.

²⁸ Mègōnu d́ō, b́ĕ je le ila hwă dèhtuplob́è̆plo tòcò nu d́ō, je gē lepôd́ŏhtîkò̆ thĭ d́ŏ je le Spain je ge akhî nu.

²⁹ Jî thîhè̆ tèpwè b́ĕ jo dohtî thĭ nu, je gē leikò̆ Krĭstu adèhôwîhômò òèòò d́o.

³⁰ Barasă ja damò thĭ, ŏ thè̆buwe tòcò, d́ŏ B́ĭcè Jezŭ Krĭstu kî Spirito Tcahtĭ adèb́ahlô̆ abu, mèzobò̄ jè d́ŏ dèb́èhjŏ aklè̆ d́ŏ dèthèb́è̆hta ji nikhĭ d́ŏ Kib́ĭcè ahlò̆mò̄ nu.

³¹ Thèb́è̆htabò̄ cab́ô̆htè jô gô̄ hlô̆htabò̄ d́ŏ atu b́udè ńò aò d́ŏ Judĕage acukhòbu nu kî dèmèzo je lei tòcò nu bija tcahtĭ aò Jerŭsalèm abu tòcò gī nib́èkò̆ nu.

³² Kib́ĭcè adèthaèni kò ò ma d́ō, jò gò̄ sò̆dūsòd́è̆ mòmòwîwî kô b́è tèpwè thĭ kă.

³³ Kib́ĭcè adècodèmò kò òkô d́ò̆è thĭ kă! Amèn.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan