Bìoball air-loidhne

Rŏma 14 - Geba Roman New Testament

Cirra Ḿè Bija Ḿè

¹ Bija dèbwèbwè adèb́u gē hme ma d́ō, phîni mòmòwîwîbò̄ cè. Barasă d́ŏ cè tòcò adègomogamā acè̆ jî̄b́èkhokăbò̄ ḿè cè ḿè.

² Bija ò amŏamo lò pwĕ tòcò cò a dèhîdèb́a amŏamo, kî tòcò cò adèb́u gleglā pwĕ ca ta ab́u dèhîdèb́a dimĭ ńò, ḿî hăthub́ahlè lò nu.

³ A a dèhîdèb́a tòcò dò dòbijīla b́è bwèthaphŏ tòcò nu ńò, Alewe dòkhò̆ ḿî bwèthaphŏ tòcò di cirraphame b́è a a dèhîdèb́a tòcò nu ńò. Manè̄ d́ō, Kib́ĭcè lèkhahtŏgè cè tòcò.

⁴ Thĭ di cirra b́è bija alewe azôabwè ńò; cò òhmeòglo ḿî̆dîḿî ńò lakhuladē nu ḿî ab́èkja ci b́icè lò. Cò kò òhmeòglo tèpwè, manè̄ Kib́ĭcè mèsò̆hto za tèpwè cè.

⁵ Bija dèbwèbwè amuni gī wî gā tcă d́olĭ bija alewe è̆ kî alewe dèbwè adègomo abu nu ḿî lŏcăcè ḿî awîatcă jăthôthô lò d́ō, cò ò d́ò̆è cè tòcò acab́ô̆ zè dègomo adĕ nu.

⁶ Bija aòi ladū munitcahtĭ dèbwè ḿî mè tèpwè acab́ô̆ zè lè̄d́ŏlè̄j́a Kib́ĭcè nu. A a dèhîdèb́a dèbwè ḿî ḿî mègè gōnu lò lò. Manè̄ zî ḿî athîhè̆htage Kib́ĭcè dèbwèbwè nu, ad́u dèhîdèb́a dèbwè ḿî alè̄d́ŏlè̄j́a Kib́ĭcè kî athîhè̆htage Kib́ĭcè cè.

⁷ Wa dèbwè dèbwè ladū adèò kî adèthĭ mèni za bija alewe anikhĭ dè pwĕdimi,

⁸ “B́eḿĕ wò ò thôḿô̆ d́ō, wò ò B́ĭcè anikhĭ, kî b́eḿĕ wi thĭ d́ō, wi thĭ B́ĭcè anikhĭ, cab́ô̆htè wè dèò kî wè dèthĭ abu wi gī ḿîbò̄ Kib́ĭcè aè̆ nu.”

⁹ Ajo ḿî ad́è̆lî̄ Krĭstu thĭ kî Za htaboge cab́ô̆htè Zî gî̄ ḿîbò̄ bija athĭ kî aò tòcò Ab́ĭcè nu.

¹⁰ Mègōnu akhoacè̆, thĭ gī di cirra b́è thĭ thè̆buwe dèbwè̆ ńò, ḿî̆dîḿî ńò htèkè̆htèô b́è cè ńò acab́ô̆ thĭ mènènògè nu ńò. Wa gŏ abwè kò sò̆htoòb́èkò̆ d́ŏ Kib́ĭcè adècirra ana ahlò̆mò̄,

¹¹ cab́ô̆ Cè Tcahtĭ d́ò nu; “D́ŏ Jè ḿî Kib́ĭcè htè aòthôḿô̆, Bija gŏ abwè gō dōhnŏlăb́èkò̆ Jò hlò̆mò, Blî gŏ ab́ò̆ gā htăhtaikò̆ Kib́ĭcè nu.”

¹² Mègōnu d́ō, wa dèbwè dèbwè ladū kè d́è̆lî̄htab́èkò̆ ane d́ŏ Kib́ĭcè ahlò̆mò̄ nu.

Mèlakhu ḿè Nè thè̆buwe ḿè

¹³ Thôrô̆ thĭ gī cirra hlè lōwa cîcîhtwèhtwè nu, thĭ gō woib́è thĭ ne, thĭ dî ḿîb́è bija lewe anikhĭ dèhtè̆thukŭ kî dèlakhulatoklŏ ńò nu.

¹⁴ Ji thîhè̆ ladîlase tèpwè htè zî jî̄b́è B́ĭcè Jezŭ anikhĭ dè arră nu, aplî̆atcă lò. Ḿî bija dèbwèbwè adègomo abu, dèadèò̆ dimimi gū du rŭ ma ńò d́ō, aḿî tèpwè ji nikhĭ adî plî̆ da tcă ńò.

¹⁵ Thĭ dèadèò̆ gî̄ ḿî ma thĭ thè̆buwe anikhĭ thokè̆thakè̆ d́ō, dèb́èlò̄ gô̄ dô thô̆htô za tèpwè thĭ ńò. Thĭ dèadèò̆ gî̄ ḿî ma bija htè Krĭstu thĭ nikhĭgè dèbwèbwè adèlakhu d́ō, thĭ tò òhlô̆òla za mè dèbwè̆ ńò.

¹⁶ Thĭ dè mèi darază b́è dèilani thĭ tòcò ńò.

¹⁷ Manè̄ kò̄ d́òdo d́ō, Kib́ĭcè Htĭge tè b́è dèadèò̆ ńò, ḿî dèdî̄dèhma kî dèjīdèd́wă, dèthakhŭthaganāi htè Spirito Tcahtĭ ilagè wa nu.

¹⁸ Thĭ gā khazô ma Krĭstu gōjo d́ō, thĭ gè̄ mèkèhta Kib́ĭcè kî thĭ gī nib́èkò̆ bija adèd́ŏdèj́a.

¹⁹ Mègōnu akhoacè̆, wò kò ò d́ò̆è dè anuad́ò̆ htè aleihŭ wa d́ŏ dèjīdèd́wă kî dèdohtamuhta aklèbu nu;

²⁰ d́ŏ dèadèò̆ acè̆ mèkè̆bò̄ ḿè Kib́ĭcè adèphîdèmè ḿè. Dèadèò̆ ḿî aplî̆atcă lŏ lò, ḿî thĭ dèadèò̆ gè̄ mèlakhu ma bija d́ō, aphî̆hta tèpwègè dè atè è ńò.

²¹ B́ĕnu akhè̆ aègudŭ ḿî ku d́u dèhîdèb́a kî, thobiscihtĭ b́ĕ amè htè̆thukŭ kî amèphilajòla thĭ thè̆buwe dèbwèbwè akhè̆ nu.

²² Phògloibò̄ thĭ dèb́u d́ŏ thĭ kî Kib́ĭcè azo nu kî gomobò̄ bija ada htakhokă athaobu ńò dèbwè ḿî bija ab́èhôwî.

²³ Bija aò d́ŏ dè htèniwĭniwa abu dèbwè b́è cirra htŏ, manè̄, zè dèb́u de hmegè ńò kî dèmè arră ahtad́ĕd́ò dèb́u ḿî dèkhòwè lò.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan