Bìoball air-loidhne

Philemòn 1 - Geba Roman New Testament

¹ Păulu, dèkî̆dî̄pho d́ŏ Jezŭ Krĭstu anikhĭ kî wè thè̆buwe Timò̆theo thè̆le cèborŏ d́ŏ wò thò kî amèplodè Philemòn,

² kî dèòplo aladēplo d́ŏ ni hibu, kî wî ṕîkò̆ Aphî̆a kî wò khò̆golō klĭpho Arkhipŭs:

³ Kib́ĭcè wa Pa kî B́ĭcè Jezŭ Krĭstu kī ilani d́ò̆è thĭ dèhôwîhômò kî dèjīdèd́wă.

Philemòn Adèb́èlò̄ kî Adèb́udènè

⁴ Thè̆buwe Philemòn, b́ĕ jè thèb́è̆hta gŏ apla nu, jo gomohtani nè kî htăigè Kib́ĭcè.

⁵ Manè̄ d́ō, jî thîhè̆ htè nè b́èlò̄gè Kib́ĭcè abija lŏcăcè kî nè dèb́u htè ńò òi d́ŏ B́ĭcè Jezŭ abu nu.

⁶ Jè thèb́è̆dahta ḿî wè dè b́èkjakî nè acab́ô̆ bija ab́udè dèbwè akhò̆ nu, gè̄ mè dohtamuhtabò̄ dèthîhè̆nigu dè aè lŏcăcè htè aòni wa d́ŏ dèthôḿô̆ ploplo kî Krĭstu nu.

⁷ B́èlò̄ thè̆buwe, nè dèb́èlò̄ leigè jè dèthalōthala kî mèsôhta ja tha pwĕdimi lò. Manè̄ d́ō, nè mèkhŭmèmògè bija tcahtĭ lŏcăcè tòcò atha.

Dèdamò d́ŏ Ònecĭmo Anikhĭ

⁸ D́ŏ dè ajo akhoacè̆ jò mò bè̄khŭhta je ne, acab́ô̆ nè thè̆buwe d́ŏ Krĭstu abu, acab́ô̆ jò kò hmèla nè agè̄ mè dè amò mè nu.

⁹ Barasă d́ŏ dèb́èlò̄gè nè abu, jè Păulu, jî gî̄ ḿî nòthò̆ Jezŭ Krĭstu abwèblô d́ŏ aladēnī dèkî̆dî̄ abu dèbwè hnò̆nu, ja damò tèpwègè nè.

¹⁰ Mègōnu d́ō, ja damò nè d́ŏ Ònecĭmo anikhĭ, htè aḿî jo pho d́ŏ Krĭstu abu htè jo b́oiphoge cè kî jè kèhtagè ca pa ab́èkja thotha b́ĕ jî ḿîwe dèkî̆dî̄pho asŏakhè̆ nu.

¹¹ Hlĕ aŭsu nu, zî dî ḿî bija akhlŏhtamame ni nikhĭ dèbwè ńò, barasă khŏnujo zi ḿîgè akhlŏhtamame ni nikhĭ kî ji nikhĭ khĭ.

¹² Khŏnujo jè hnagegè cè d́ŏ ńò ò nu, kî ja tha lejīplogè cè.

¹³ Ja thaèni cò òkô ja kă b́ĕjo, b́ĕ jò òwe dèkî̆dî̄ abu jo d́ŏ Vanzĕlō anikhĭ, cab́ô̆htè zè gè̄ mèzobò̄ jè d́ŏ ne lle nu.

¹⁴ Mè nòthò̆ d́ō hnò̆nu, ja da thaè mèsômèhma tèpwè dè htè no to ŏlăkô ńò dimĭ ńò; ḿî ja thaèni d́ŏ agî̄ ḿî acab́ô̆ nè dèthaèni ò adĕ nu dòkhò̆. Mègōnu d́ō, jè dè mègè dè atè b́è na tha ńò dimi ńò.

¹⁵ B́ètèb́èńò Ònecĭmo adèhèbā nè tod́odasa nu ḿî cab́ô̆htè ni gī nib́ège thèjô̆ cè anikhĭ nu dòkhò̆,

¹⁶ htè tè b́è be nò zô ńò, ḿî acab́ô̆ thè̆buwe d́ŏ Krĭstu abu, htè atanib́è dèb́èlò̄ dèbwè akhò̆ nu, lasădè̆è d́ŏ ji nikhĭ kî d́olĭ kî anu ḿî ni nikhĭ, manè̄ d́ō ni nib́ège cè acab́ô̆ phehî abu nò zô dèbwè akhò̆. Ḿî d́ŏ B́ĭcè abu acab́ô̆ thè̆buwe dèbwè acè̆ nu.

¹⁷ Mègōnu d́ō, nè gè̄ b́è̆lă tèpwè jè acab́ô̆ ńò thò ńò khò̆ dèbwè nu d́ō, scĭibò̄ cè acab́ô̆ ni scĭi jè akhò̆ nu.

¹⁸ Zè gè̄ mèkèḿè b́è nè kî zò mò ige ne cwĕ kò ò ma d́ō, lè̄bò̄ acab́ô̆ ne cwĕ b́è jè akhò̆ nu.

¹⁹ Je hweni nè cè ajo d́ŏ ju cukhò thĕne lò. Jè, Păulu gē pleged́ò̆è nè è̆. (Ab́èkja ne cwĕ b́è jè htè aḿî na tha thè̆ne nu, ja da bahta be tèpwè ńò.)

²⁰ Ab́èhŏ! Ŏ thè̆buwe, khòthad́ò̆ mènibò̄ jè dè ajo d́ŏ Kib́ĭcè amūkă nu tîkî. Acab́ô̆ ni ḿî jè thè̆buwe d́ŏ Krĭstu abu dèbwè akhò̆ nu, mèmòbò̄ ja tha tîkî.

²¹ B́ĕ je hwe cèborŏ ajo nu, ju b́u tèpwè d́ŏ ńò gò̄ sòkhĕńe jè è̆ kî jî thîhè̆ tèpwè d́ŏ nè gè̄ mè d́olĭ kî anu dòkhò̆.

²² Taplakhă lò nu, prahnèdòlòbò̄ hid́o ji nikhĭ, manè̄ d́ō ja sascĭ d́ŏ Kib́ĭcè kò̄ d́òscĭ thĭ lŏcăcè adèthèb́è̆dahta kî Cè gè̄ thè̆ge jè d́ŏ thĭ ò nu.

Dèhnŭsè Agudulă

²³ Epaphras, htè aḿî jò khò̆ jò thò aladēplo jè dèkî̆dî̄ abu d́ŏ Jezŭ Krĭstu acè̆ dèbwè hnŭsè tèpwè nè.

²⁴ Cab́ô̆ gōnu akhò̆ jò khò̆ amèplo jè dè Mărko, Arĭstakus, Dĕmas kî Lŭka hnŭsè le tèpwè nè nè.

²⁵ B́ĭcè Jezŭ Krĭstu adèhludètă kò òkô d́ò̆è thĭ kă.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan