Bìoball air-loidhne

« Roimhe

Air adhart »

Mattĕo 27 - Geba Roman New Testament

Jezŭ B́èlejoi D́ŏ Pilăto Ahlò̆mò̄
( Mărko 15.1 ; Lŭka 23.1 , 2 ; Zowănnī 18.28-32 )

¹ Alekă dòwò nu, Phŭgido lŏcăcè kî adoabwe tòcò laglagè dè cab́ô̆htè zi gī cirrathĭbò̄ Jezŭ nu.

² Zo cŏglo hwă lōwa d́ō, Ze leigè lōwa d́ŏ U Amādo Pilăto ò nu.

Jŭda Adèthĭ
( Thodŏpho 1.18 , 19 )

³ B́ĕnu akhî, Jŭdas htè ahô̆lăgè Cè dèbwè nu tcahtî bija cirrathĭgè Jezŭ d́ō, co othootha, zi phî hwă hô̆ thŏkhè̆ d́ō, ze leigegè d́ŏ Phŭgido ò kî adoabwe tòcò ò kî d́ògè,

⁴ “Jè mèkèḿègè, jô hô̆lă kèḿègè bija adî̄ahma dèbwè nu.” Ḿî cè tòcò d́ògè cè, “Ab́èkja wa danè̄? Tca mè d́ò̆è nè è̆.”

⁵ Ḿî cè nu, ze le hwĕlăge hwă hô̆ d́ŏ Zarādo bu nu d́ō, zè hèhta hwă ze le cŏhtathĭgè ze ne.

⁶ Phŭgido tòcò phî hwă hô̆ anu dèdè̆ d́ō, cò d́òhlègè lōwa, “Kè b́è̆nī cè d́ŏ dèhlu akŏ bu nu ḿî atè è ńò, manè̄, aḿî dèthwi abwî.”

⁷ Cè tòcò d́è̆hlè lōwa adèkŏdèkja d́ō, zî bwîgè Ab́ògobo alākho da klaẃa, cab́ô̆htè cu b́ŭlăibò̄ tî̆tèmè̆ athĭ tòcò anikhĭ nu.

⁸ Ajo akhoacè̆ dè ale anu da klaẃa nu bija jogè ami “Haceldama” htè ahtabohtab́ă ḿî “Dèthwi ale” htô̆do khŏnujo nu.

⁹ B́ĕnu dèjî̄b́è htè Prò̆fèt Jeremĭah d́òdòlò dèdè̆ phî̆htagè, htè ad́ò, “Cè tòcò phî hô̆ thŏkhè̆ htè ada bija dèbwè akhothĭ acab́ô̆ Israè̆lpho tòcò da nènò aè̆ adĕ nu,

¹⁰ kî zî bwîgè Ab́ògobo Alākho acab́ô̆ B́ĭcè hmèla jè nu.”

Pilăto Adèhtôdèd́è̆ Jezŭ
( Mărko 15.2-5 ; Lŭka 23.3-5 ; Zowănnī 18.33-38 )

¹¹ Bija hna sò̆htogè Jezŭ d́ŏ Mādo ahlò̆mò̄ nu, kîd́ò̆ Mādo d́è̆tcagè Cè, “Nè nu ni ḿî Jŭdapho Asaphra ā?” Jezŭ d́òge cè, “Ńò d́ò b́è tèpwè.”

¹² Phŭgido tòcò kî adoabwe tòcò sawè̄ nòthò̆ Zò lò dèkèḿè hnò̆nu, Cò tò d́ògegè alī dimĭ ńò.

¹³ B́ĕnu Pilăto d́ògè Cè, “Ni di thîhè̆ bija sawè̄ ńò lò dèkèḿè ńò ā?”

¹⁴ Jezŭ tò d́ògegè alī dôhmô̆ ńò, htô̆kî gā tca Mādo htèdômô̄dahmăgè azî̄azô̄ d́o.

Jezŭ B́ècirrathĭ
( Mărko 15.6-15 ; Lŭka 23.13-25 ; Zowănnī 18.39—19.16 )

¹⁵ B́ĕ pwè̆bu akhè̆ nu, Mādo b́ahlô̆hta nènò dehwĕpho dèbwè htè ab́ètha bija aboahò dèbwèbwè nu.

¹⁶ B́ĕnu akhî nu dehwĕpho amihŏhtathèla htè Jezŭ Barăba ògè dèbwè.

¹⁷ B́ĕ bija ladēplo lōwa akhè̆ nu, Pilăto d́è̆tcagè cè tòcò gōjo, “Thĭ thaèni ja ka b́ahlô̆htani thĭ ḿî bò̄bwè? Barăba ā? Ḿî Jezŭ htè bija jo Krĭstu dèbwè nu ā?”

¹⁸ Pilăto d́è̆ gōnu ḿî zi thîhè̆ htè bija phò Cè ḿî d́ŏ dèthakla acè̆ lò nu.

¹⁹ B́ĕ za sańăò agī cirradè akhè̆ nu, zè hmè̆ thodŏlegè bija dèbwè d́ŏ cò ò kî cò d́ògè, “Lenī darază kô ḿè bija adî̄ahma anu dèbwè adèhmŭ abu ḿè. Manè̄, khŏdini jò sòḿĭb́a Cè kî amèniwĭniwa sôgè jè.”

²⁰ Ḿî Phŭgido kî anedothabwe hnagè bija akă cab́ô̆htè agā da cè ca b́ăplèbò̄ Barăba kî zè gè̄ mèthĭbò̄ Jezŭ nu.

²¹ Mādo dèbwè d́ògè cè tòcò, “Ajo gībwè aklè̆ thĭ thaèni ja kā b́ahlô̆ni thĭ ḿî bò̄bwè?” Cè tòcò d́ògegè, “Barăba.”

²² Pilăto d́ògegè cè tòcò, “Mègōnu, jè gè̄ mèib́èd́ò̆ Jezŭ htè bija jo Krĭstu dèbwè cadè̄?” “Htalaglo thĭ Cè!” cè tòcò kèwo do.

²³ Ḿî Pilăto d́ògè cè tòcò, “Zè dèkèḿè ḿîgè danè̄?” Cè tòcò kèwohta d́okhlŏgè, “Htalaglo thĭ Cè!”

²⁴ Pilăto tcahtîgè dè akhlŏhtamame tò ò dimĭ ńò, ḿî bija bogalā d́okhlŏhtagè dòkhò̆ d́ō, za da hwă htĭ, cu ŭsab́ăgè cu cukhò d́ŏ bija ahlò̆mò̄ kî d́ògè, “Jè jo, jò òhlô̆òlakî tèpwè bija adî̄ahma ajo dèbwè athwi. Tca kî mèdò̆ d́ò̆è thĭ è̆.”

²⁵ Kîd́ò̆ bija aboahò lŏcăcè tòcò d́ògè, “Zi thwi gā la d́ò̆è wo kho kî d́ŏ wo pho wi li tòcò akho nu.”

²⁶ B́ĕnu Pilăto b́ahlô̆nigè dehwĕpho Barăba, ḿî Jezŭ nu zî hlî cè plè̆ hwă lōwa d́ō, Ci ilagè lōwa d́ŏ cè tòcò acukhòbu nu, cab́ô̆htè za gā htalaglothĭbò̄ lōwa nu.

Klĭpho Gòsè̆lèwè̄ Jezŭ
( Mărko 15.16-20 ; Zowănnī 19.2 , 3 )

²⁷ Mādo aklĭabwè tòcò phî hwă Jezŭ d́ō ze leigè lōwa d́ŏ hid́o abu nu kî klĭpho tòcò ò wekhwè̆b́a Cè.

²⁸ Co b́oladēkè̆ hwă lōwa ascid́ŏ d́ō, cò thònigè lōwa scid́ŏdò̄dô alî tèb́è.

²⁹ Mèhwă ze htĕ htògòjò̄ athagwă kî za phlalagè d́ŏ lōwa akokho nu, kîd́ò̆ za hna phògloigè lōwa gòbò tòb́ò̆ dŏ cu cukhò adèhtwè dòkhò̆ nu. Zò sòlŭsò̆jè̄ lōwa. Zo dōhnŏla lōwa ahlò̆mò̄ kî cò d́ò, “B́èmò, Jŭdapho Asaphra!”

³⁰ Zî htwîwè̄ lōwa alò zè pèèhtĭ kî zi phî gòbò kî plè̆gè lōwa ako.

³¹ Agudulă zè mèjomèlè̄ hwă lōwa d́ō, co b́oladēkè̆ lōwa ascid́ŏ kî cò thòhtanige lōwa Cè è̆ tòcò kîd́ò̆ zè hèphlòmĭigè lōwa cab́ô̆htè za gā htalaglothĭbò̄ lōwa Krusu alò nu.

Jezŭ B́èhlîhtathĭ Krusu Alò
( Mărko 15.21-32 ; Lŭka 23.26-43 ; Zowănnī 19.17-27 )

³² B́ĕ bija lei Cè klèlò akhè̆ nu, bija tcahtîgè Cirenĕapho htè ami ḿî Simŏnè dèbwè nu. Bija hnanohnabègè cè agā j́azo Jezŭ Krusu.

³³ B́ĕ bija dole dè ale Kalvărio khòlò̆kho htè bija jo ami Gò̆lgòtha, (ahtabohtab́ă ḿî Dèkokhwi Alle) dèmè̆ nu,

³⁴ bija igè Cò ò̆ thobiscihtĭ htè aòklè̆d́òkô dèthohtĭ dèdè̆ nu. Zî dî̄ tcatca lò, ḿî Cò tò ò̆gè ńò.

³⁵ Bija htalaglo hwă Cè Krusulò d́ō, bija b́ogè mè̆ kî belahlègè lōwa Zè dèkô̆dèthò. Acab́ô̆ Prò̆fèt adèd́òdòlò ò dèdè̆ gē pĕhtabò̄ nu. Dèd́òdòlò ḿîgè gōjo, “Ze belahlègè lōwa zi scid́ŏ d́ŏ dè b́o mè̆ abu nu.”

³⁶ Mèhwă d́o, cè tòcò sańăò kî dôigè lōwa.

³⁷ D́ŏ Co kokho nu, ze hwelagè zi wî cè kè̆ gōjo, “Ajo ḿî Jezŭ, Jŭdapho Asaphra.”

³⁸ Bija htalaglo plogè Cè kî dehwĕpho gībwè, aò Cu cudèhtwè dòkhò̆b́è dèbwè kî Cu cutîcî dòkhò̆b́è dèbwè.

³⁹ Bija leb́ôhtî Cè tòcò htodijī ako kî htèkè̆htèô Cè,

⁴⁰ kî d́ògè, “Nè htè ad́ò ane agè̄ mèkè̆ hwă Zarādo d́ō, agā prahtage d́ŏ thŏni adābu lò dèbwè nu, mèhlô̆htagebò̄ Ne ne kha nā? Ni gî̄ ḿî b́eḿĕ B́ĭcè Apho d́ō, khè̆ladēbò̄ Krusu alò!”

⁴¹ Phŭgido, Skrĭbāpho kî anedo tòcò ḿî ḿî htèkè̆htèô kôgè bija alewe tòcò akă gōnu kî cò d́ò,

⁴² “Zè mèhlô̆htage bija, ḿî Zè dèmèhlô̆htage za Ze ne ńò. Zi ḿî Israè̆l Asaphra cò d́ò do. Òsô̆wô̄ mò̄kô! Gā tcahtî b́eḿĕ Ze khè̆ladē Krusu alò khaĺè ku b́ukò̆ Cè.

⁴³ Za sascĭi Kib́ĭcè nî̄! Kib́ĭcè atha kò ò ma cè d́ō, Kib́ĭcè gè̄ mèhlô̆htage d́ò̆è Cè khŏnujo. Manè̄ kòd́òdo dō, ‘Jè ḿî Kib́ĭcè Apho,’ Cò d́ò do.”

⁴⁴ Dehwĕ ab́èhtalaglo plo Cè nu ḿî ḿî zò gòwè̄gè lōwa gōnu lò lò.

Jezŭ Adèthĭ
( Mărko 15.33-41 ; Lŭka 23.44-49 ; Zowănnī 19.28-30 )

⁴⁵ B́ĕ lumuhtihta htô̆do thŏnare nu, dèkhilagè d́ŏ lākho akho nu.

⁴⁶ Kîd́ò̆ b́ĕ thŏnare akhî nu, Jezŭ kèwohtasô kî Cò d́ò, “Eli, Eli, lama sabachthani?” Ahtabohtab́ă ḿî, “Ŏ B́ĭcè, Jî B́ĭcè, Na bāplòmĭ ma Jè nè?”

⁴⁷ Bija òb́ôhtî Cè tòcò thîhè̆b́è dè ajo d́ō, cò dòhlègè lōwa tòcò, “Zo johtagè Elĭjah.”

⁴⁸ Mèhwă d́ō, cè tòcò aklè̆ dèbwè cwèlephîgè gòbò tòb́ò̆. Cè b́è̆wè̄ alò pèllèthôô dokhlo htè zu trŭlă thobiscihtĭ ascî aklè̆ kî ci ihtagè lōwa ò̆.

⁴⁹ Ḿî alewe tòcò d́ògè cè, “Òsô̆wô̄ mò̄kô, b́ètèb́èńò Elĭjah gā la mèhlô̆htage bò̄d́ò̆ Cè lòmò̄.”

⁵⁰ B́ĕnu akhî Jezŭ kèwohtasô tapla be kî Ca tha hèhtagè.

⁵¹ B́ĕnu lò dèthèd́od́îd́ă htè aò cola d́ŏ Zarādo bu tèb́è nu htèlègè gīkò̆lā, cahta b́ĕ ako htô̆ dola akă nu. Lākho gleglā kî lo tòcò htè̆phagè.

⁵² Lūkho tòcò ò tab́ăgè kî bija tcahtîgè Kib́ĭcè abija tcahtĭ athĭ hwăgè tòcò htaboge òèòò.

⁵³ Kîd́ò̆ b́ĕ Jezŭ htaboge hwă nu, cè tòcò lenīgè d́ŏ U Tcahtĭ abu kî d́è̆lî̄gè ane d́ŏ bija òè̆bwè ahlò̆mò̄ nu.

⁵⁴ Atcai b́è klĭpho abwè dègèjè dèbwè kî klĭpho atcadôib́è Jezŭ tòcò thaphuthaganā lōgè d́ŏ za tcahtîb́ègè lākho gleglā kî dèphî̆htagè alewesòsŭ acè̆ nu. Kî cò d́ògè, “Bija ajo dèbwè ḿî hnèhnè Kib́ĭcè Apho hŏ!”

⁵⁵ Kîd́ò̆ amihmu htè aò Galilĕage alekô Jezŭ ale cab́ô̆htè agā tcaiôi Cè òè̆bwè ò tcadôi Cè d́ŏ adòbò lò.

⁵⁶ Marĭa Madalè̆nā, Zăkomo kî Zŏzè amo Marĭa, kî Zebedi aphokhŏ tòcò amo òkô ca kă kă.

Dèb́ŭlă Jezŭ
( Mărko 15.42-47 ; Lŭka 23.50-56 ; Zowănnī 19.38-42 )

⁵⁷ B́ĕ lumulagè nu, bija aniò̆jòa Arimattĕa Upho, ami ḿî Zŏzè dèbwè, htè aḿîgè Jezŭ abōhmubicè aklè̆ dèbwè nu,

⁵⁸ lehtîgè Pilăto kî za dagè lōwa Jezŭ aco. Pilăto i danā tèpwè cè akhwè gî̄ phîge Jezŭ aco.

⁵⁹ Mègōnu, Zŏzè phî hwă Jezŭ aco d́ō cò b́ò̆b́iigè kî tîkî̆jā ab́ôthă aplî̆atcă,

⁶⁰ Kîd́ò̆ cè b́è̆nīgè lōwa d́ŏ zu lūkho athè̆khrô, htè zu khu dòlògè zi nikhĭ d́ŏ lobu dubu nu. Kîd́ò̆ ze thereb́i hwă lodo thab́ab́î tod́ŏ acab́ô̆ khaglè̄ nu khaĺè ze gekò̆.

⁶¹ Ḿî Marĭa Madalè̆nā kî Marĭa alewe dèbwè sańăò tcakhokăgè lūkho b́ĕnu.

Adôidè b́ĕ Lūkho

⁶² Alekă dini, dèpradòlò Păskwa Pwè̆ anikhĭ hwă dini nu, Phŭgido kî Pharizè̆pho tòcò leplogè lōwa d́ŏ Pilăto ahlò̆mò̄

⁶³ kî cò d́ògè lōwa, “B́ĭcè, wa gomohtani tèpwè htè, bija ahlòplè dè ajo dèbwè nu, hlĕ Cò thôḿô̆we akhè̆ nu, cò d́ò, ‘Thŏni thŏthè̆ hwă nu Ja gā htabogekò̆.’

⁶⁴ Ajo akhoacè̆ nu, hnabò̄ bija gē ledôi lūkho htô̆ ab́ahta thŏni thŏthè̆ nu. Dî ḿî ńò d́ō, zo bōhmubicè tòcò gē le a hu hwă cè d́ō, ‘Za htaboge htŏ dèthĭ aklè̆,’ cò kò d́ò d́ò̆ bija do kî dèkèḿè agudulă dèdè̆ gi zî̄ d́olĭ kîd́ò̆ aŭsu dèdè̆ nu d́òbe.”

⁶⁵ Pilăto d́òge cè tòcò, “Thĭ bija adôidè tòcò ò tèpwè, hnabò̄ cè tòcò ledôi acab́ô̆ thĭ thîhè̆ aloba atherĕ nu.”

⁶⁶ Mègōnu, cè tòcò le zwî̄lagè dèhmăi lo alò kî b́è̆lăgè klĭpho adôidè dopho dôi lūkho.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan