Mattĕo 1 - Geba Roman New Testament

B́ĭcè Jezŭ Krĭstu Akhwĭathèlè̆
( Lŭka 3.23-38 )

¹ Jezŭ Krĭstu, Dăvid apho, Abraham apho adèòla akhwĭthèlè̆ Acè:

² Abraham apho la Izăko, Izăko apho la Jăkòb, Jăkòb apho la Jŭda, kî athè̆buwe tòcò.

³ Jŭda apho la Phărès kî Zara, htè amo ḿîgè Tamar nu. Phărès apho la Èsròm, Èsròm apho la Aram.

⁴ Aram apho la Amĭnadab, Amĭnadab apho la Naăsson, Naăsson apho la Psălmo .

⁵ Psălmo apho la Bŏaz, htè amo ḿî Rahab nu. Bŏaz apho la Obèd, htè amo ḿî Rŭtha nu. Obèd apho la Jè̆sse,

⁶ Jè̆sse apho la Dăvid, htè aḿî Saphra dèbwè nu. Saphra Dăvid Apho la Sòlòmòn, htè Ŭria ahmè̆ phozelani cè dèbwè nu.

⁷ Sòlòmòn apho la Rò̆boam, Rò̆boam apho la Abbĭa, Abbĭa apho la Asa,

⁸ Asa apho la Zò̆zaphat, Zò̆zaphat apho la Jŏram, Jŏram apho la Ozĭa,

⁹ Ozĭa apho la Jotham, Jotham apho la Akhaz, Akhaz apho la Èzèkĭa,

¹⁰ Èzèkĭa apho la Manăssè, Manăssè apho la Amòn. Amòn apho la Josĭas,

¹¹ Josĭas apho la Jekò̆nia kî zè thè̆buwe tòcò hlĕ zè hèdothob́è d́ŏ Babilŏniage akhî nu.

¹² Kîd́ò̆ b́ĕ zè hèdotho hwă Babilŏniage nu, Jekò̆nia apho la Salathièl, Salathièl apho la Zorò̆babè̆l,

¹³ Zorò̆babè̆l apho la Abĭud, Abĭud apho la Eliăkim, Eliăkim apho la Azòr,

¹⁴ Azòr apho la Sadòk, Sadòk apho la Akim, Akim apho la Elĭud,

¹⁵ Elĭud apho la Eleăzar, Eleăzar apho la Matthan, Matthan apho la Jăkòb,

¹⁶ Jăkòb apho la Zŏzè htè Marĭa awa nu, kî Jezŭ htè ab́èjo Krĭstu nu, òlagè kî Marĭa.

¹⁷ Mègōnu, hlĕ Abraham htô̆ dola Dăvid azôkhè̆ nu bija lŏcăcè ògè scilwī zô, kîd́ò̆ b́ĕ Dăvid htô̆do dèòladēda d́ŏ Babilŏniage nu bija ògè scilwī zô, kîd́ò̆ b́ĕ bija hèhta Babilŏniage htô̆do Krĭstu azôakhè̆ nu bija ògè scilwī zô.

B́ĭcè Jezŭ Krĭstu Adèòla
( Lŭka 2.1-7 )

¹⁸ Jezŭ Krĭstu adèòla ḿîgè gōjo. Hlĕ Zo mo Marĭa b́èisani hwă Zŏzè nu, zu dukhlŭ òplo lōwa hnî̆ńò nu, ahlî̆htagè zu muthèd́ŏi htŏ zo pho d́ŏ Spirito Tcahtĭ acè̆ nu.

¹⁹ Mègōnu d́ō, Za wa Zŏzè nu, zî ḿî bija adî̄ahma kî za da thaè d́òphlò̆hta lōwa awîakè̆ bija ahlò̆mò̄ ńò acè̆, zè gè̄ lè̄dakè̆ huzò lōwa, zo gomogè do.

²⁰ Barasă b́ĕ zo gomoi dè ajo tòcò nu, tcabò̄, B́ĭcè Amò̄khobwèzo pòhtahtî cè d́ŏ dèsoḿîb́a abu kî cò d́ò, “Zŏzè, Dăvid Apho, scisă ḿè akò òi Marĭa nè hmè̆ ḿè. Manè̄ kòd́òdo dō, htè aòhta zu phŭbu nu, ḿî Spirito Tcahtĭ mèphî̆hta lò.

²¹ Zo gō phozelaikò̆ zo phokhŏ dèbwè; kî zo gō jokò̆ lōwa ami Jezŭ, manè̄ kòd́òdo dō, zè gè̄ mèhlô̆htagekò̆ zi bija tòcò d́ŏ lōwa adèkhòwè aklè̆ nu.”

²² Dè ajo tòcò phî̆hta lŏ tèpwè, cab́ô̆htè dèjî̄b́è htè Kib́ĭcè d́òdòlò htŏ d́ŏ Prò̆fèt alòmò bu dôhmô̆ gē pĕhtabò̄ nu.

²³ Cò d́ò, “Tcabò̄, aphôthèmo dèbwè gū muthèd́ŏkò̆, kî zo gō phozelaikò̆ zo phokhŏ dèbwè; kîd́ò̆ bija gō jokò̆ zi mi Emmanuĕlè,” ahtabohtab́ă ḿî “Kib́ĭcè òkô wa kă,” nu.

²⁴ Kîd́ò̆ Zŏzè phôthèńè d́ō, zè mè tèpwè acab́ô̆ Kib́ĭcè Amò̄khobwèzo hmèlagè cè nu, kî zî phî tèpwè lōwa cab́ô̆ zè hmè̆ nu.

²⁵ Htô̆do Marĭa phozelai apho adobwe dèbwè nu, zi di thîhè̆gè lōwa ńò; kîd́ò̆ za htăgè lōwa ami Jezŭ.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan