Bìoball air-loidhne

Mărko 9 - Geba Roman New Testament

¹ Cò d́òwe lōwa tòcò, “Jò d́ò̆sa thĭ adî̄ahma, d́ŏ asò̆hto ò b́ĕjo tòcò aklè̆ nu, tòcò cò gi dî dî̄tcab́èkò̆ dèthĭ ńò htô̆ za gā tcahtîb́è Kib́ĭcè Ahtĭage d́ŏ zè dèlela dèdòdèthe aklè̆ nu.”

Jezŭ B́ăklèhta Ahô̆ajò
( Mattĕo 17.1-13 ; Lŭka 9.28-36 )

² B́ĕ anithăthô hwă d́ō, Jezŭ jo Petru, Zăkomo kî Zowănnī kî htaihŭgè cè tòcò d́ŏ khòlò̆ ahtajî dèmè̆ akho kî Ca b́ăkhlèhtagè Zô hô̆ Zò jò d́ŏ lōwa tòcò ahlò̆mò̄ nu.

³ Zè dèkô̆dèthò gè̄gòbrò, ab́ôthă d́olĭ kî dèscihtĭphò̆, pwĕ acab́ô̆ lākhokhlŏ ascî̆bô̄dè tòcò mè b́ôthă tè kèhta ńò nu.

⁴ B́ĕnu Elĭjah kî Mŏzè pòhtahtî Cè tòcò kî dòdò̄htîgè Jezŭ.

⁵ Petru johta Jezŭ kî cò d́ò, “Sara, kò ò b́ĕjo ḿî amò hŏ. Kā prahta hipho thŏwă dòkhò̆, ḿî ni nikhĭ dawa, Mŏzè anikhĭ dawa kî Elĭjah anikhĭ dawa nā?”

⁶ Zi scisăsô tòcò akhoacè̆, cò d́ò danè̄ nu zi dî thîhè̆lage cè è̆ ńò.

⁷ B́ĕnu dè̄tob́o lagābigè cè tòcò kî dè alē thèhta d́ŏ dè̄tob́o aklè̆, ad́ò, “Ajo dèbwè ḿî Jo Phokhŏ Jè b́èlò̄, sòkhĕńebò̄ Ze lē.”

⁸ Taplakhă lò, za tca dîwî̄dewe d́ō ta tcahtî bija alewe dèbwè̆ ńò, ḿî Jezŭ dèbwè lò.

⁹ B́ĕ ze gela khòlò̆ akhî, Jezŭ htulahmèla cè tòcò dè htè za tcahtîb́è tòcò nu agò̄ tò d́ò̆sabò̄ bija dèbwè̆ ńò htô̆ zi thĭ hwă Bija Apho gā htaboge dèthĭklè̆ akhî nu.

¹⁰ Cè tòcò òi aolāthabu kî htôca d́è̆tca hlè lōwa zè dèjî̄b́è ad́ò, “Za gā htaboge hwă dè thĭ,” ḿî danè̄ nu.

¹¹ Cè d́è̆tcagè Jezŭ, cò d́ò, “Pharizè̆pho kî Skrĭbāpho tòcò d́ò ma Elĭjah gā lab́è ŭsu manè̄?”

¹² Jezŭ d́òge cè tòcò, “Elĭjah gā lab́è ŭsugè, kî b́è̆ploge dè gŏmimi. Manè̄, Bija Apho nu gā khab́è dèssègnè̆ pwĕdimi kî kè̄ b́è htèkè̆htèôkò̆ ahwela ma d́o nè?

¹³ Barasă Jò d́ò̆sa thĭ Elĭjah la hwă htŏ. Ḿî bija tòcò mè cè acab́ô̆ ca tha alō, acab́ô̆ ahwelagè dèd́òdòlò abu nu.”

Abĭsèpho Dèhnèmèjo Dèbwè
( Mattĕo 17.14-21 ; Lŭka 9.37-43a )

¹⁴ B́ĕ Jezŭ gelahtî Zo bōhmubicè alewe tòcò akhî nu, Za tcahtîgè bija òèòò wekhwè̆b́a Cè tòcò, kî Skrĭbāpho tòcò d́òhlèsahlègè cè tòcò.

¹⁵ Bija aboahò tcahtîge Jezŭ d́ō, htèdômô̄dahmă scisăthabo, cwèlehtî kî hnŭsègè Cè.

¹⁶ Cò d́ògè lōwa tòcò, “Thĭ dòdò̄dòthò̆igè da awîakè̆ nè?”

¹⁷ D́ŏ bija aboahò aklè̆ dèbwè d́ò, “Sara, je lei jo phokhŏ d́ŏ ńò ò nu. Dèhnè akhèglo phîb́è dèbwè nu.

¹⁸ Dèhnè phîb́è cè kô̆ apla nu, ahtîlakhu cè, zò hòbŭ thob́ohta kî ce edithô̆edithè̆, mèhwă zè wè̄la dere dere. Jò d́ò̆sa No bōhmubicè tòcò agā hna hèphlòḿĭ dèhnè barasă cè tòcò tè kèhta tèpwè ńò.”

¹⁹ Jezŭ d́òge cè tòcò, “Ŏ bija adèb́udènè tò ò ńò dikhwĭ, jò kò̄ òkôb́è thĭ kă dādè̄? Jè b́è khòthad́ò̆ thĭ htôdè̄? Lei cè d́ŏ Jò ò jo.”

²⁰ Cè tòcò lei lōwa d́ŏ Jezŭ ò nu. Dèhnè tcahtî Jezŭ d́ō, ahtîladē abĭsèpho htô̆ zi thĭmūklègè nu. Za ladē lākho, zò phlòtoklŏ kî zò hòbŭ thob́ohtagè.

²¹ Jezŭ d́ògè ca pa, “Dèphî̆htani cè gōjo ò htŏ dādè̄ htŏ?” Cò d́ò, “Hlĕ zi sciphowe nu.

²² Òè̆pla ahtîladē cè hmîklè̆, htĭklè̆, d́ŏ akī thĭ kò̄ ò akròbu nu. Nè mèkèhta b́eḿĕ d́ō, khòwèhmòb́èbò̄ wa kî mèzobò̄ wa.”

²³ Jezŭ d́òge cè, “Nu b́u kèhta ma d́ō, dèphî̆htani za tèpwè cè gŏmimi htè ab́u cè dèbwè nu!”

²⁴ B́ĕnu abĭsèpho ca pa htŏhta alē, za gādŭhtĭ la kî cò d́ògè, “Ju b́u tèpwè; mèzobò̄ jè d́ŏ jè dèb́u tò ò ńò abu!”

²⁵ Jezŭ tcahtî bija cwèle b́òkhlogè Cè d́ō, Zò hò̆gè dèhnè kî Cò d́ò, “Nè, dèhnè anigu toŏ kî ablîglo, Jè hmèla nè, hèhtakè̆bò̄ kî geb́a be ḿè taplă be ḿè.”

²⁶ Dèhnè kèwohta kî htîlakhu hwă abĭsèpho, hèhtagè. Abĭsèpho mègè acab́ô̆ athĭ nu. Mègōnu bija òè̆bwè d́ò, “Zi thĭ htŏ.”

²⁷ Barasă Jezŭ pôgè zu cukhò, cwiwè̄hto lōwa d́ō zò sò̆hto ò tèpwègè.

²⁸ B́ĕ Jezŭ genī hibu tapla, Zo bōhmubicè tòcò d́è̆tca huzògè Cè, “Wa da hna hèhta za ma dèscidèhnè ńò nè?”

²⁹ Cò d́òge lōwa, “Dèhnè ajo domo nu, gā hna hèhta kèhta cè kî dèthèb́è̆ kî dèd́u dèadèò̆ lò.”

Dèd́ò̆sadòlò Dèssègnè̆bòdò Gīpla tapla
( Mattĕo 17.22 , 23 ; Lŭka 9.43b-45 )

³⁰ Jezŭ hèhta hwă Ze lekôgè Galilĕage kî Za da thaènigè bija gî̄ thîhè̆kô dèbwè̆ ńò.

³¹ Manè̄, Zô thôithò̆i Zo bōhmubicè kî Cò d́ò, “Bija Apho nu, kè̄ b́è hô̆lăkò̆ d́ŏ bija tòcò acukhòbu, d́ō zè gè̄ mèthĭkò̆ lōwa, Ci thĭ hwă thŏni dini nu, Za gā htabogekò̆.”

³² Barasă cè tòcò di thîhè̆ lōwa aè̆ ńò. Ḿî cè tè d́è̆tca b́ugè lōwa ńò.

Adoamu khlŏ ḿî Bò̄bwè?
( Mattĕo 18.1-5 ; Lŭka 9.46-48 )

³³ Alekă cè tòcò legè d́ŏ Kapèrnaum u nu. B́ĕ Cò ò hibu, Jezŭ d́è̆gè Zo bōhmubicè tòcò, “D́ŏ klèlò nu, thĭ darahlègè lōwa da awîakè̆ nè?”

³⁴ Cò òzòlògè tòcò. Manè̄, d́ŏ klèlò nu za darahlè lōwa htè d́ŏ cè klè̆ nu, adoamu khlŏ ḿî bò̄bwè nu.

³⁵ Za sańă, jo ladēplo hwă bōhmubicè scigībwè kî d́ògè cè tòcò, “Agā thaè phî̆hta aŭsu dèbwèbwè nu, zi gi ḿîb́è agudulă kî lŏcăcè azôabwè.”

³⁶ Zo jo hwă abĭsèpho dèbwè, cè b́è̆lă lōwa b́ĕ athaklăḿè̆bŭ nu. Za zāglo hwă lōwa d́ō, cò d́ò lōwa,

³⁷ “Ji mi abu aphîni abĭsèpho dèbwè nu, zi phîni tèpwè Jè. Kî gajă bija aphîni Jè dèbwè nu, zi phîni tèpwè athodŏle Jè dèbwè nu.”

D́ŏ Jezŭ Dòkhò̆b́è
( Lŭka 9.49 , 50 )

³⁸ Zowănnī d́òge cè, “Sara, Wa tcahtîgè bija dèbwè, htè adî ḿî wè klè̆ ńò nu hna hèhtaphlòḿĭ dèscidèhnè d́ŏ Ni mi abu nu d́ō, wè mèd́îd́ăgè cè.”

³⁹ Jezŭ d́ò, “Mèd́îd́ă ḿè cè ḿè. Manè̄, bija amè dèbòdèba d́ŏ Ji mi abu dèbwè nu, tò d́òmēsepwè hjŏkakî za tèpwè Jè ńò.

⁴⁰ Bija htè ada htad́ĕd́ò thĭ ńò tòcò nu ḿî aò d́ŏ thĭ ò dòkhò̆.

⁴¹ Bija dèbwèbwè ki iò̆ thĭ htĭ d́ŏ Ji mi abu nu, d́ŏ thĭ ḿî bija ab́èkja Krĭstu acè̆ nu d́ō, Jò d́ò̆sa thĭ adî̄ahma, zi di nib́è zô sô zè hlè̆ ńò tò ò ńò.

Dèsèkô̆ni Dèd́è̆lî̄ klè Atè è ńò Alle
( Mattĕo 18.6-9 ; Lŭka 17.1 , 2 )

⁴² “Gaj́ă bija ahna abĭsèpho ab́u Jè tòcò mè dèkhòwè nu, amò phlawè̄ zò gò̄lò scisolo, saladēnī cè d́ŏ pèllèbu dòkhò̆.

⁴³ Nu cukhò gi ḿî b́eḿĕ dè aphî̆hta ni nikhĭ dèkhòwè d́ō, d́adūkè̆;

⁴⁴ Ne lenī Mò̄kho Htĭge kî cukhò dòkhò̆ lò nu aè d́olĭkî na la Larrā kî nu cukhò gīkhò̆ lōlō nu, ‘htè d́ŏ dè ahloathara di thĭ ńò kî hmî da labî̄ ńò alle nu.’

⁴⁵ Na khakhò gi ḿî b́eḿĕ dè aphî̆hta ni nikhĭ dèkhòwè d́ō, d́adūkè̆;

⁴⁶ Ne lenī Mò̄kho Htĭge kî na khakhò dòkhò̆ lò nu aè d́olĭkî na la Larrā kî na khakhò gīkhò̆ lōlō nu, ‘htè d́ŏ dè ahloathara di thĭ ńò kî hmî da labî̄ ńò alle nu.’

⁴⁷ Na gādŭ gī ḿî b́eḿĕ dè aphî̆hta ni nikhĭ dèkhòwè d́ō, cîẃî̆phlòhtakè̆ kî hwĕphlòḿĭ cè. Ne lenī Mò̄kho Htĭge kî na gādŭ ò dòkhò̆ lò nu aè d́olĭkî na la Larrā kî na gādŭ gīphlo lōlō nu,

⁴⁸ ‘htè d́ŏ dè ahloathara di thĭ ńò kî hmî da labî̄ ńò alle nu.’

⁴⁹ “Bija gŏ abwè kè̄ b́è mèwîmètcăikî hmî acab́ô̆ dèhluhtai b́è mèwîmètcăikî d́ithè akhò̆ nu.

⁵⁰ “D́ithè ḿî dè aè tèpwè, barasă d́ithè gī di scĭ ma ńò d́ō, gè̄ mèscĭ i d́ò̆ danè̄? “Òibò̄ d́ithè ascĭ thĭ klè̆, d́ŏ thĭ dèòplosò̆jī abu nu,” cò d́ò lōwa do.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan