Bìoball air-loidhne

Mărko 6 - Geba Roman New Testament

Jezŭ d́ŏ Nazarè̆th U nu
( Mattĕo 13.53-58 ; Lŭka 4.16-30 )

¹ Jezŭ hèhta hwă ukhlŏ Ze legè d́ŏ Co d́ŏ Za phă nu kî Zo bōhmubicè tòcò lôkôgè Ze le.

² B́ĕ Munisòd́è̆ nu, Cò d́òŭd́ò̆sagè dè d́ŏ Sinagŏgā abu nu. Bija òè̆bwè thîhè̆ Zè dèd́ò̆htô d́ō cè tòcò htèdômô̄dahmă kî d́è̆hlègè lōwa, “Zi phînigè dè ajo tòcò d́òlè̄? Kî dèilani Cè dèthîhè̆ ajo ḿî danè̄? Zè mè za dèbòdèba pwe pwe gōjo ḿî Zi nib́è d́òlè̄?

³ Zî ḿî amè cubōkhajòpho, Marĭa apho, Zăkomo, Zŏzè, Jŭdas kî Simŏnè athè̆buwe tè b́è ńò ā? Zu bu Ze cè amihmu tòcò òthè̆ wè klè̆ tè b́è ńò ā?” Kî za tha d́òmò b́è be lōwa akho ńò.

⁴ Jezŭ d́ò, “Prò̆fèt tòcò di nib́è tèpwè ahĭahtè̆ d́ŏ co d́ŏlaphăbu, zi khwĭ zò khò̆ tòcò aklè̆ kî zi hibuphăbu ńò.”

⁵ Zè dè mèkèhta zî̆ tèpwè dèbòdèba b́ĕnu ńò, ḿî Zè mèhmage bija ab́èscwib́èsè̆ tîkîpho lò d́ŏ dèhtèla Cu cukhò lōwa tòcò akho lò.

⁶ Zè htèdômô̄dahmăgè d́ŏ bija tòcò adèb́u tò ò ńò acè̆ nu. Jezŭ hègè d́ŏ d́ŏwēd́ŏwa tòcò kî thôithò̆igè bija.

Bōhmubicè Scigībwè Adèb́èthodŏ
( Mattĕo 10.5-15 ; Lŭka 9.1-6 )

⁷ Zo jo ladēplo hwă Zo bōhmubicè scigībwè d́ō, gībwè dalā, gībwè dalā, Zo thodŏlegè lōwa, Ci ilanigè lōwa dè aphlŭathere d́ŏ dèhnè tòcò akho.

⁸ Zô htulahmèla lōwa agè̄ dè hèi klèkhoklèlò dimĭ ńò, ḿî hnèhtò tòbò̆ lò. Dè hèib́è hlŭthikĭ ńò, toko ńò, pĭd́ŏpĭsa ńò.

⁹ Ḿî zò kò kòb́è khatòkò, barasă zò dò thòthokŏb́è scid́ŏ gīb́è ńò nu.

¹⁰ Cò d́ò lōwa tòcò, “Thĭ gā htanī hi dawawa abu d́ō, ò b́ĕnu htô̆ thĭ khè̆ladē nu.

¹¹ Bija gō do jo thĭ ńò, dò sòkhĕńe thĭ lē ńò d́ō, hèphlòḿĭ kî blab́ă haphĭhmu d́ŏ thĭ khakhò lò mè cab́ô̆ dèkhathè̆thî ahtad́ĕd́ò cè tòcò nu.”

¹² Bōhmubicè tòcò hèhta hwă cò d́òŭd́ò̆sa bija agā bajalage ane.

¹³ Kî cè tòcò hna hèhtaphlòḿĭ dèscidèhnè òèòò, kî zo htôrô hwă bija ascwiasè̆ tòcò si tcahtĭ, zè mèhmagegè lōwa tòcò.

Zowănnī Baptĭsta Adèthĭ
( Mattĕo 14.1-12 ; Lŭka 9.7-9 )

¹⁴ Saphra Èrŏdè thîhè̆b́ègè Jezŭ awîakè̆, manè̄, zi mi hŏtòthò̆ lōgè, kî cò d́ò tèpwègè “Aŭsab́ăhtĭ Zowănnī htaboge d́ŏ dèthĭ aklè̆ akhoacè̆ zè mèzakò̆ dèbòdèba.”

¹⁵ Barasă bija alewe tòcò d́òwe, “Zi ḿî Elĭjah dòkhò̆.” Alewe tòcò cò d́òwe d́ò̆, “Cè ḿî Prò̆fèt acab́ô̆ prò̆fèt alewe tòcò nu dèbwè dòkhò̆.”

¹⁶ Ḿî Èrŏdè thîhè̆b́è dè ajo d́ō, cò d́ò, “Zi ḿî Zowănnī htè je bēhtè̆dū agò̄ dèbwè nu. Za htaboge htŏ dè thĭ aklè̆.”

¹⁷ Manè̄, Èrŏdè le phò hwă Zowănnī, zi htînī lōwa dèkî̆dî̄ bu, ajo ḿî Herŏdea cî ṕîkò̆ Philĭpo ahmè̆ htè zi phîcugè dèbwè akhoacè̆ nu.

¹⁸ Manè̄ kòd́òdo dō, Zowănnī d́ògè Èrŏdè, “Ni phîcugè nî ṕîkò̆ ahmè̆ nu, atè b́èklè ńò.”

¹⁹ Gōnu akhoacè̆ Herŏdea sè dēkha zi nikhĭ cab́ô̆htè zè gè̄ mèthĭ lōwa nu, barasă za da tăne mè ńò.

²⁰ Manè̄, Èrŏdè scisăni Zowănnī ale. Zi thîhè̆ htè zi ḿî bija adî̄ahma kî atcahtĭ dèbwè nu kî zo woikèi lōwa kîd́ò̆ b́ĕ zi thîhè̆b́è zi jî̄b́èdòdò kî mèdè pwĕdimi nu, za thaè sòkhĕńe lōwa adèd́òŭsaŭ d́ŏ dèthalōthalai abu.

²¹ Ab́ènibònigè muni dini htè d́ŏ zè dèòla amuni scige alle nu, Èrŏdè b́oab́oò̆ klĭpho akhoane tòcò kî Galilĕage akhoane kî codomādo tòcò nu.

²² D́ŏ scilāpwèbu nu, Herŏdea aphohmu gecugekha ni bija d́ō ab́èthasôgè Èrŏdè kî atî̆tèḿè̆ tòcò nu. Saphra d́ògè amihmupho gōjo, “Na thaèni dè arră nu d́òbò̄ jè kî ji ki i tèpwè nè.”

²³ Zô hôd́ăgè ze ne pwĕ acab́ô̆ cò d́ò lōwa, “Na gā da jè danè̆ lò̆ ji kī i nè lò. Ji htĭ je ge klăḿè̆ hnò̆nu, ji ki i tèpwè nè.”

²⁴ Amihmupho cwèlehtî zo mo kî d́è̆gè cè, “Ja gā da b́ègè danè̄?” Zo mo d́òge Cè, “Zowănnī Baptĭsta ako.”

²⁵ Zè cwè geb́ahtî plaplăgè saphra kî za da lōwa, cò d́ò, “Khŭnujo lò ja thaèni Zowănnī Baptĭsta ako d́ŏ laba tèb́è abu nu.”

²⁶ Saphra athoothao zî̄gè. Barasă zô hôd́ănigè ze ne d́ŏ tî̆dotî̆tèḿè̆ tòcò ahlò̆mò̄ nu ḿî dimi, za da thaèni amihmupho atha kè b́èd́ô̆ ńò ḿî dimi,

²⁷ d́ō taplakhă za hnagè klĭpho dèbwè gē gei Zowănnī ako d́ŏ laba abu nu. Klĭpho le bēhtè̆dūgè Zowănnī agò̄ d́ŏ dèkî̆dî̄ bu

²⁸ kî geb́a igè co ko d́ŏ laba abu, kî ci igè amihmupho, d́ō ci igè zo mo.

²⁹ Zowănnī akhî̆abwè tòcò thîhè̆b́è d́ō ze lephîge lōwa aco kî b́ŭlăge tèpwè cè lò.

Jezŭ B́oa Bija Abwè Jè̄htò
( Mattĕo 14.13-21 ; Lŭka 9.10-17 ; Zowănnī 6.1-14 )

³⁰ Bōhmubicè tòcò geb́ahtî Jezŭ kî d́ò̆sa Cè htè zè mègè bija anikhĭ danè̄ kî cò d́òŭd́ò̆sa bija tòcò cadè̄ cadè̄ nu.

³¹ Cò d́ògè lōwa tòcò, “Le, gē ledò̆ d́ŏ dèlle dokhlo htè bija dèbwè̆ tò ò ńò ale kî ò sò̆dūsòd́è̆ Mò̄kô b́ĕnu tod́odasa.” Manè̄, bija òèòò lelegegehtîgè Cè akhoacè̆, pwĕ ca kā a b́è ò̆b́è anikhĭ hnò̆nu, akhî tò ò zi nikhĭ tòcò ńò.

³² D́ō za htanī khlĭbu kî legè d́ŏ hmîlè̄klè̆ dèthutucu alle nu.

³³ Bija òèòò tcahtîkô kî hmăi tèpwè Jezŭ, kî bija aò d́ŏ u bu tòcò hè khakhò kî le pă cè klè, dole ŭsugè Jezŭ dòkhò̆.

³⁴ Jezŭ hèhta khakhò̆, zè kèhtî bija aboahò òsô̆wô̄igè cè tòcò d́ō, Zò khòwèhmòb́ègè lōwa. Manè̄, zè mè acab́ô̆ thŏ htè ab́icè tò ò ńò tòcò akhò̆ nu. Mègōnu d́ō, Cô thôithò̆igè lōwa dè amŏamo lò.

³⁵ D́ō htô̆ḿî akhînare phlòtôlô d́owĕgè nu, bōhmubicè tòcò lehtî Cè, d́ò Cè, “Dè ale b́ĕjo ḿî hmîlè̄klè̆, akhî phlòtôlôgè gè.

³⁶ B́ăhlôkè̆bò̄ bija tòcò jo, cab́ô̆htè ze gē le d́ŏ d́ŏphă aòb́ôhtîb́ôwa khwè̆khwè b́ĕjo tòcò abu kî zi gī bwî abò̄ zi nikhĭ dèa dimimi. Manè̄, b́ĕjo dèa tò ò dimĭ dimi ńò.”

³⁷ D́ō cò d́ògè lōwa tòcò, “Thĭ ibò̄ ca a tòcò nā?” D́ō cè tòcò d́òscĭge lōwa, “Wa gē lebwî toko hô̆ ab́e gīgèjè bu kî kī i ca a tòcò ā?”

³⁸ Cè d́è̆tcagè lōwa, “Tca caḿa, thĭ toko ò bwīkhlo?” Za tca Hwă d́ō cò d́ò, “Toko jè̄khlo kî dāpho gīb́ò̆ lò.”

³⁹ Za hna lōwa tòcò lŏcăcè gā sańălăò d́ŏ mi thĭthuḿŭ akho, dopho, dopho.

⁴⁰ D́ō za sańăla dewe dewe dègèjè ò, jè̄scĭ ò ò.

⁴¹ D́ō Jezŭ phî̆hta toko jè̄khlo kî dāpho gīb́ò̆ nu, Ca tcahta d́ŏ mò̄kho, Zô hôwî Hwă d́ō Zi b́îpha toko, Ci ila bōhmubicè tòcò cab́ô̆htè agè̄ b́è̆lă d́ŏ lōwa tòcò ahlò̆mò̄ nu. Kîd́ò̆ dāpho gīb́ò̆ nu ze be a kò̆ bija lŏcăcè.

⁴² Bija gŏ abwè a sô̆abaò̆gè.

⁴³ Ahèkô Ca kă tòcò htuploge toko kî dāpho akholakăsè d́ō, ani pĕhta scigīṕahlu.

⁴⁴ A a dè htĕ amikhŏ lò ḿî aògè bija jè̄htò.

Jezŭ Hè Htĭkho
( Mattĕo 14.22-33 ; Zowănnī 6.15-21 )

⁴⁵ Taplakhă lò Za hna bōhmubicè tòcò ge lenī d́ŏ khlĭ abu, le ŭsu d́ŏ pèllè alewe dòkhòwō, d́ŏ Bèthsaĭda, b́ĕ Cè thè̆ne Cò òda hwă Ca b́ăhlôge bija aboahò akhî nu lò.

⁴⁶ Za b́ăhlôge hwă bija d́ō, Za hta thèb́è̆htagè d́ŏ khòlò̆ dèmè̆ alò.

⁴⁷ Lumuhèlagè d́ō khlĭ ògè d́ŏ pèllè athaklăḿè̆bŭ, d́ō Cè nu, Cò ò d́ŏ khakhò̆ dèbwè lò.

⁴⁸ Zè kèhtî lōwa tòcò wa khlĭ lab́uladāsôgè. Manè̄, Gīlli akrò ad́ă tè b́è ńò akhoacè̆ lò. B́ĕ bija dôidè akhî lwīdò dòdò nu, Zè hè d́ŏ pèllè akho, Ze lehtî lōwa kî Zè mè cab́ô̆htè Ze gē le phlòtôlô lōwa tòcò,

⁴⁹ ḿî cè tòcò kèhtî lōwa hè d́ŏ pèllè htĭkho, za hmăkî ḿî lūhnè agèlè d́ō, za haphuhasirigè tòcò.

⁵⁰ Manè̄, bija lŏcăcè tcahtî Cè kî thaphuthaganāgè. Taplakhă cò d́ògè lōwa tòcò, “Lè̄khŭbò̄ thĭ tha. Ḿî Jè lò. Scisă ḿè.”

⁵¹ Kî Za htahtî lōwa tòcò d́ŏ khlĭbu d́ō Gīlli òzògè. Zo bōhmubicè tòcò htèdômô̄dahmă lōgè,

⁵² Manè̄, zo thohtothaba kî zo do gomohtani be dècòklî htè dèb́oa bija toko abwè jè̄htò ahtabohtab́ă ńò, ḿî d́ŏ zè dègomo ta b́ahta ńò akhoacè̆ nu.

Dèbòdèba Zèmè Alewe tòcò
( Mattĕo 14.34-36 )

⁵³ Za hwădū pèllè, Ze ledo d́ŏ alewe dòkhòwō d́ŏ Genesarè̆t age kî Zò sò̆hta khlĭ b́ĕnu lò.

⁵⁴ B́ĕ Zè khè̆ladē khlĭbu lò nu, bija hnè̆igè Cè taplakhă lò.

⁵⁵ Bija aò d́ŏ ge nu abu dagwālè̄ cwèlegè, kî bija leigè adô mô̄ da hma ńò tòcò d́ŏ leḿĭ bu d́ŏ dè ale htè zi thîhè̆b́è lōwa ò nu.

⁵⁶ Kîd́ò̆ b́ĕ Ze lenī d́ŏbu hwahwă u bu hwahwă, hmîlè̄klè̆ hwahwă, bija b́è̆lă adô mô̄ da hma ńò tòcò b́ĕ klè wōkhowōlò, damò Cè d́ŏ agò̄ tòb́è htè htĕ Zi scid́ŏ akăwī nu lò hnò̆nu. D́ō gajă bija atòb́è Cè tòcò mô̄gehmage lŏ tèpwè.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan