Mărko 5 - Geba Roman New Testament

Jezŭ hmòphlòḿĭ Dèscidèhnè
( Mattĕo 8.28-34 ; Lŭka 8.26-39 )

¹ Cè tòcò legè d́ŏ pèllèwe alewe dòkhò̆b́è htè Gerasĕne agebu nu.

² B́ĕ zè khè̆ladē khlĭbu lò nu, bija ahnèò kî aò d́ŏ lūkho dèbwè lescĭgè cè.

³ Bija dèbwè nu cò ò d́ŏ lūkho nu kî bija do cŏglogjî̄glokèhtagè cè dèbwè̆ ńò, pwĕ acab́ô̆ htaĺabi hnò̆nu adini tèpwè ńò.

⁴ Bija glòglo zu cu za kha kî cŏwè̄glogè cè dèjwèjwè dèjwèjwè, kî htaĺabi hnò̆nu gā tca, ca d́ahtohtè̆dūkè̆, ca b́ahtè̆dū htaglò ò za khakhò lò. Bija dè mèb́î kèhta cè dèbwè̆ ńò.

⁵ Thè̆musè̆munè cò ò lūkho kî khò̆mukhòlò̆kho, cè kèohtŏphu kî cu d́udūd́uhtăgè ze neb́î̆cè kî lo athabră tòcò nu.

⁶ B́ĕ za tcahtî Jezŭ d́ŏ adòbò lò nu, zè cwèle kî gò̄la thèb́è̆htagè lōwa kî htŏhta ze lē kî d́ò,

⁷ “Jezŭ, B́ĭcè Ahtajîgudŭ dèbwè Apho, Nè kî jè kè b́èkjahlè lōwa danè̄? D́ŏ B́ĭcè ami abu ja damòhta nè, mèssègnè̆bò̄ ḿè jè ḿè.”

⁸ Manè̄ Jezŭ d́ògè cè, “Dèhnè acîpô, hèhtakè̆ d́ŏ bija ajo dèbwè ò nu.”

⁹ Hwă d́ō Jezŭ d́è̆tcagè cè, “Ni mi ḿî danè̄?” Kî cò d́ògegè lōwa, “Ji mi ḿî ‘Legiŏnè,’ manè̄, wò òèòcara d́o.”

¹⁰ Mèhwă d́ō, za damògè Jezŭ azî̄azô̄ cab́ô̆htè za da hnahèhtabò̄ lōwa d́ŏ htĭge akhlŏ ńò nu.

¹¹ B́ĕnu akhè̆ htòhò dobo agè asè d́ŏ khòlò̆lò nu.

¹² Kî dèhnè dalā da dîgrî̄nî̄ Jezŭ kî cò d́ò, “Hna lenībò̄ wa d́ŏ htò dalā abu nu.”

¹³ Jezŭ hna lenī danā tèpwè cè tòcò. Mègōnu d́ō dèhnè acîpô tòcò hèhta hwă lenīgè htò abu. Mègōnu d́ō htòhò aò ad́ŏ gīhtò nu cwè ladēkô khò̆tăplajātîlî̆ kî ladēnī pèllèbu, laothĭlōgè.

¹⁴ Bija atcai htò dalā cwèle d́ŏ u bu kî d́ò̆sakôgè bija aò d́ŏwēd́ŏwă tòcò d́ō, ruru bija le tcagè dè mè ane tòcò nu.

¹⁵ B́ĕ cè tòcò dolehtî Jezŭ kî tcahtîgè bija htè dèhnè legiŏnè mèjo dèbwè sanălăò thăbrācwi, kô̆thò tèpwègè d́ō cè tòcò scisăgè.

¹⁶ Atcahtîb́è dè ajo tòcò d́ò̆sagè bija dè htè aphî̆htagè hnè mèjo dèbwè cadè̄ kîd́ò̆ htò tòcò mègè cadè̄ awîakè̆ nu.

¹⁷ Cè tòcò damògè Jezŭ agè̄ hèhta ze ge akhlŏ.

¹⁸ B́ĕ Jezŭ khè̆htanī khlĭ abu nu. Bija htè hnè mèjo dèbwè damògè Cè cab́ô̆htè Cò kò̄ òkôb́èbò̄ lōwa akă nu.

¹⁹ Ci ti i lōwa akhwè ńò. Ḿî cò d́ò lōwa, “Gehtî ni khwĭ ńò khò̆ kî d́ò̆sa lŏbò̄ cè Kib́ĭcè mèni nè dè è dè ò̆ pwedè̄ kî zò khòwèhmòb́ègè nè cadè̄ nu.”

²⁰ Ze ge tèpwè kî zò bò̄igè dè ajo d́ŏ Dekăpoli abu htè Jezŭ mènigè cè dè tòcò nu. Bija lŏcăcè htèdômô̄dahmă lōgè.

Jaĭrus Aphohmu Kî Amihmu Athwihtèhlò Dèbwè
( Mattĕo 9.18-26 ; Lŭka 8.40-56 )

²¹ B́ĕ Jezŭ hwădū hwă Galilĕa Pèllè kî dowè̄ d́ŏ alewe dòkhòwō nu, bija aboahò ladēplogè lōwa d́ŏ zò hlò̆mò̄ nu kî zò sò̆htoògè d́ŏ pèllèwe nu.

²² B́ĕnu Sinagŏgā akhoane dèbwè htè ami ḿî Jaĭrus nu lehtîgè Cè. Za tcahtî Jezŭ d́ō zò gò̄la b́îtèd́è lōwa akhahtî.

²³ Kî za damò zî̄ lōwa, cò d́ò, “Jo phohmu dèbwè gī thĭdèdè̄gè. Ja damòb́è nè d́ŏ Ne gē le kî htèlabò̄ Nu cukhò zo kho cab́ô̆htè za gā hmage kî ò thôḿô̆b́èbò̄ nu.”

²⁴ Jezŭ lekô ze le kî bija aboahò lekô ca kă kă kî sathîńîgè cè.

²⁵ B́ĕnu amihmu htè athwihtèhlògè scigīd́e adābu ògè dèbwè.

²⁶ Za pragè ze ne dihwi sara tòcò acukhòbu òè̆bwègè, zî dî̄ zè dè lŏklikli d́ogè, barasă ado khlŏhtamamegè ńò ḿî d́î̆ zî̄zî̄ dòkhò̆.

²⁷ Zî thîhè̆b́è Jezŭ le d́ō, zî plînī bija aboklè̆ kî le tòb́ègè zi scid́ŏkhlŏ;

²⁸ manè̄, cò d́ò, “Jo gò̄ tòb́è ma Zi scid́ŏkhlŏ lò hnò̆nu, jè dèsè̆ gè̄ hlè̆mè̄ tèpwè.”

²⁹ Taplakhă ci thwihtèhlò sò̆tab́adanā kî zî thîhè̆ d́ŏ Zò lò dèsè̆ hlè̆mè̄ htŏ nu.

³⁰ Jezŭ thîhè̆danāgè htè dèphlŭdèthere hèhta d́ŏ Zò lò d́ō, Ca tcab́a hwă bija aboahò d́ō Cò d́ò, “Bò̄bwè tòb́è Ji scid́ŏkhlŏ bwè?”

³¹ Bōhmubicè tòcò d́òge Cè, “Bija aboahò tòcò sanīwî̄nī Ńò lò nu Na tcahtî tèpwè. Bò̄bwè tòb́è Jè bwè? Nè gè d́è̆ zawe tèpwè d́ò̆ ā?”

³² Jezŭ tca dîwî̄dewe d́ō Ca tcahtîgè amihmu atòb́è Cè dèbwè nu.

³³ Barasă amihmu nu scisă ganādîzî le kî dōhnŏlăgè d́ŏ Jezŭ ahlò̆mò̄ kî d́ò̆sagè dè aphî̆hta thĕbwegè lŏlōcăcè tòcò nu.

³⁴ Kî Jezŭ d́ògè cè, “Phohmu, nè dèb́u mèhmage htŏ nè. Ge mòmò. Nè kè̄ b́è hmage d́ò̆è.”

³⁵ B́ĕ zî jî̄b́è phătha we akhî nu, Sinagŏgā akhoane dèbwè ahibu bija tòcò lehtî cè kî d́ò, “No phohmu thĭ htŏ. Nè gè̄ mèd́îd́od́îd́ă hnahnăwe ma Sara nè?”

³⁶ Barasă Jezŭ nu, b́ĕ zi thîhè̆b́è bija tòcò adèjî̄b́è d́ō, cò d́ògè Sinagŏgā akhoane dèbwè gōjo, “Scisă ḿè. Òibò̄ dèb́u.”

³⁷ Jezŭ do jogè bija alewe lekô dèbwè̆ ńò. Zo jo ḿî Petru, Zăkomo kî cî ṕîkò̆ Zowănnī lò.

³⁸ B́ĕ cè tòcò dole Sinagŏgā akhoane dèbwè ahi akhè̆, za tcahtîgè dègolōèŭ, bija tòcò jo kî ha, haphuhasirigè.

³⁹ Jezŭ lenī hwă hibu, Cò d́ò lōwa tòcò, “Thĭ bogalā kî joha manè̄? Amihmupho sòḿĭ, tè b́è zi thĭ ńò.”

⁴⁰ D́ō cè tòcò jè karai tèpwè Cè lò. Za hna hèhta hwă bija hikhlŏ, zo jolenīgè amo apa kî bija alekô Ca kă tòcò d́ŏ amihmupho ò nu.

⁴¹ Jezŭ phîglo hwă amihmupho acukhò d́ō Cò d́ò, “Talitha kŭmi.” Ahtabohtab́ă ḿî, “Amihmupho, Jò d́ò nè, Wè̄hto kha!”

⁴² Hwî̆caka zè wè̄hto kî khè̆lekhè̆gegè. Cò òkò̆ scigīd́e kòlò̆. Kî cè tòcò htèdômô̄dahmă sôgè.

⁴³ Zè hmèla grî̄pîńî lōwa tòcò cab́ô̆htè zi gī ti ithîhè̆bò̄ bija dèwîdèkè̆ ajo dèbwè̆ ńò, kî zo thodŏ lōwa akō b́oa amihmupho dèa dimimi lò.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan