Bìoball air-loidhne

Mărko 4 - Geba Roman New Testament

Bija Bā dèkhwĭ Agèlè
( Mattĕo 13.1-9 ; Lŭka 8.4-8 )

¹ Jezŭ d́ò̆htô kòd́ò̆ d́ŏ Pèllèwe tapla be, bija aboahò b́òkhlogè Cè d́ō Jezŭ htanī hwă khlĭbu, Za sańăla ògè. Bija tòcò ògè d́ŏ khò̆kho kî d́ab́agè amūkă d́ŏ Pèllè ò dòkhò̆.

² Kîd́ò̆ Cô thôithò̆igè bija tòcò d́ŏ dègèlè abu nu kî d́ŏ Zè dèthôithò̆i abu nu, Cò d́ò:

³ “Sòkhĕńebò̄, bija abā dèkhwĭ dèbwè le bālagè dèkhwĭ.

⁴ Kîd́ò̆ b́ĕ za bā dèkhwĭ akhè̆ nu, dèkhwĭ tòcò cò ladē klèkhoklèzawa d́ō, htŏpho tòcò còakè̆ tèpwè cè.

⁵ Dèkhwĭ ò tòcò ladēgè losò akho, hahî tò ò dodo ńò aklè̆. Akèhta plă tèpwè, ḿî hahî di dĭ ńò.

⁶ Lumu golab́è nu, akhawi da lajò̄ ńò akhoacè̆, ahtahwĕhtakra lō tèpwè.

⁷ Dèkhwĭ tòcò cò ladēnī dèscudèphî̆ aklè̆ d́ō, aohtathĭ lŏ tèpwè. Athèaphò̆ tò ò za be ńò.

⁸ Dèkhwĭ tòcò cò ladē tèpwè hahî awî akho d́ō, athèhtaphò̆hta apla sŏscĭ ò ò, apla ascĭthăthô ò ò, tòcò cò ḿîgè apla dègèjè dòkhò̆.”

⁹ Mèhwă cò d́ò, “Bija anigunîgî̄ ò tòcò gî̄ thîhè̆ d́ò̆è.”

Dègèlè Ahtabohtab́ă
( Mattĕo 13.10-17 ; Lŭka 8.9 , 10 )

¹⁰ Kîd́ò̆ b́ĕ Cò ò Cè è̆ dèbwè lò akhî nu, bija aòkô Ca kă kî bōhmubicè scigībwè d́è̆gè Cè dègèlè ahtabohtab́ă.

¹¹ Kî Cò d́ògè lōwa tòcò, “Dèilani tèpwè thĭ akî thîhè̆b́è Kib́ĭcè Ahtĭage adèòhu; barasă bija aò akhlŏathăba tòcò, kò d́ò̆sab́è cè kî dègèlè.

¹² Manè̄, dèd́ò ò: ‘Za tca tèpwè, Cè tè kèhtî ńò; Ahŏnī tèpwè zi nigubu, barasă zi di thîhè̆ ńò. Di ḿî ńò d́ō, cè tòcò gī nib́è tèpwè dèb́ăkhlètha, kî dèkhòwè adèb́ahlô̆ nu.’”

Jezŭ D́ò̆sa Bwèbādèkhwĭ Ahtabohtab́ă
( Mattĕo 13.18-23 ; Lŭka 8.11-15 )

¹³ Kî cò d́ògè lōwa tòcò, “Thĭ di thîhè̆ dègèlè ajo ńò ā? Mègōnu d́ō, thĭ gî̄ thîhè̆ d́ò̆ dègèlè alewe tòcò cadè̄?

¹⁴ Abāla dèkhwĭ dèbwè bāla Kib́ĭcè alēahwè lò.

¹⁵ Aladē klèlò tòcò kèhta tèpwè b́ĕ bija tòcò thîhè̆b́è akhî nu, Sătana le kî phîkè̆thĭwīdanā tèpwè cè d́ŏ ca tha abu nu.

¹⁶ Bija tòcò cò ḿîgè acab́ô̆ dèkhwĭ aladē losò akho nu. Cî thîhè̆b́è Kib́ĭcè alēahwè d́ō zî phînidanā tèpwè d́ŏ dèthalōthalai abu nu.

¹⁷ Barasă akhawi da lajò̄ halè̄ ńò akhoacè̆, tò òjî̄ ńò athĭ tèpwè. B́ĕ dèbadèsè̆ kî dèlômèssègnè̆ b́ègè cè d́ŏ Kib́ĭcè alēahwè acè̆ nu, ca thahèkè̆danā taplakhă lò.

¹⁸ Dèkhwĭ aladēnī dèscudèphî̆ aklè̆ tòcò ḿî bija asòkhĕńe Kib́ĭcè alēahwè, barasă,

¹⁹ lākho adèb́èhjŏb́èma, ŭcalèkhjă adèhlòhlî̆hlòplè, kî dè thaèni lākho adî̄adè akhoacè̆, dè ajo tòcò lenī za tha abu, amèîhta Kib́ĭcè alēahwè d́ō atè thè dò phò̆ za tèpwè ńò.

²⁰ Dèkhwĭ aladēnī hahî awî akho tòcò ḿî bija aphîni hwă Kib́ĭcè alēahwè d́ō athèhtaphò̆hta apla sŏscĭ, apla ascĭthăthô kî apla dègèjè tòcò nu.”

Hmîŭd́ŏ d́ŏ Pahlu Alè̄
( Lŭka 8.16-18 )

²¹ Cò d́ògè lōwa tòcò, “Bija dola hwă hmîŭd́ŏ d́ō za plalab́i ṕahlu, b́è̆lă zòmò̄lè̄ ā? Ḿî bija b́è̆hta cè d́ŏ ahtajî dòkhò̆ tè b́è ńò ā?

²² Manè̄, dè ahuazò tò òb́è ńò kî dè ab́è lè̄hu tòcò gî̄ hlî̆htaphlò̆hta b́è.

²³ Bija anigu ò tòcò gî̄ thîhè̆b́è d́ò̆è.”

²⁴ Kî Cò d́ògè lōwa tòcò, “Hmăibò̄ dè htè thĭ thîhè̆b́è tòcò nu. Acab́ô̆ thĭ gôcahtè̆ca dè akhò̆pha, thĭ kè̄ b́è gôcahtè̆cakò̆.

²⁵ Manè̄, bija adèò tòcò gī nib́è d́okhlŏkò̆ kî adè tò ò ńò tòcò d́ō, cè è̆ ò tîkîtòkò̆ nu, akè b́è phîkè̆ thĭwīkò̆ cè.”

Dèkhwĭ D́òhta Agèlè

²⁶ Jezŭ d́òwe, “Kib́ĭcè Ahtĭage ḿî amè acab́ô̆ bija ahtò b́u dèbwè nu.

²⁷ B́ĕ zò sòḿĭ kî zè wè̄hto, lumunè kî lumuse akhî b́uphlo tòcò thè̆mè̄hta kî akèhta zi di thîhè̆khlu tèpwè ńò.

²⁸ Mèhwă ad́òhta dò̆ aè̆, aŭsu ḿî ahlèaphă, Hwă d́ō adrô aphò̆ kî athè zè lè̄lakò̆.

²⁹ B́u hmĭ tapla d́ō, ze lei dèzè kî kègè. Manè̄, bija kèb́u akhîb́ègè akhoacè̆ nu.”

Thèplèphlo Agèlè
( Mattĕo 13.31 , 32 , 34 ; Lŭka 13.18 , 19 )

³⁰ Alekă cò d́ò, “Jò kô d́ôthòdrò dò̆ Kib́ĭcè Ahtĭage kî danè̄? Jò kò d́òib́è da agèlè nè?

³¹ Ḿî amè ane acab́ô̆ thèplè aphlo htè bija bāla d́ŏ hahî akho nu, dèkhwĭdèlā lŏcăcè aklè̆ zî ḿî nòthò̆ ascipho khlŏ hnò̆nu,

³² ab́è bāla hwă, akèhta tapla ado d́olĭgè mihnè alewe tòcò kî amēaphă jô pwĕ acab́ô̆ htŏpho tòcò le khoib́è alè̄ kî mè abi nu.”

³³ Kî cò d́ògè dègèlè amŏamo pwĕ acab́ô̆ bija tòcò phînidòni za akròbu nu; dègèlè tò ò ńò; zô dô thô dò thò̆ tèpwè ńò.

³⁴ Barasă dègèlè tòcò ahtabohtab́ă nu, cò d́ò̆sa ladūlahwè tèpwè zo bōhmubicè tòcò nu.

Jezŭ Hnaòzò Gīllimob́ĭ
( Mattĕo 8.23-27 ; Lŭka 8.22-25 )

³⁵ B́ĕnu dini, lumula nu, Jezŭ d́ògè zo bōhmubicè tòcò, “We gē lewè̄ d́ŏ Pèllèwe alewe dòkhòwō nu.”

³⁶ Za hnage hwă bija aboahò d́ō, zo bōhmubicè tòcò jonīgè cè d́ŏ khlĭbu nu kî khlĭ alewe ògè tòcò cò.

³⁷ Gīlli dobōsôgè d́ō, htĭ papipapò̆ acè̆ adoblîb́anīgè khlĭbu kî athaḿò̆ laprugè.

³⁸ Jezŭ ò d́ŏ khlĭ akă, bò̄la ako d́ŏ hlutŏko to d́ŏ akho kî sòḿĭnigè. Cè tòcò htowè̄ Jezŭ kî d́ògè lōwa, “Ŏ Sara, wi gī thĭgè hlè̆mè̄ dîdî̄gè jo nu, nè tè b́èhjŏgè ńò ā?”

³⁹ Jezŭ wè̄hto hwă hò̆b́èhtègô̄gè gīllimob́ĭ kî d́ògè Pèllè, “Òzòlò! Sò̆tab́a!” Gīllimob́ĭ sò̆tab́agè kî, pwè, Pèllè lapwège, Hwă d́ō amòamagegè.

⁴⁰ Jezŭ d́ògè cè tòcò, “Thĭ scisăthabo manè̄? Thĭ dèb́u tò ò hnî̆ńò ā?”

⁴¹ Zo bōhmubicè tòcò scisăsôgè d́ō, cò d́òhlè lōwa, “Ajo ḿî bò̄bwè nu bwè? Gīlli kî Pèllè hnò̆nu sòkhĕńe ma ze lē nè?”

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan