Bìoball air-loidhne

Mărko 2 - Geba Roman New Testament

Bija Acuthĭkhathĭ d́ŏ Kapèrnaum U Dèbwè
( Mattĕo 9.1-8 ; Lŭka 5.17-26 )

¹ Tò òjî̄ ni òjî̄ thè̆ ńò, Jezŭ lenī d́ŏ Kapèrnaum U bu, kî cò ògè d́ŏ hi dawa abu nu.

² Bija tòcò thîhè̆b́è d́ō, bija òèòò ladēplo lōwa akhoacè̆, pwĕ acab́ô̆ khaglè̄htî hnò̆nu ale tò ò be ńò nu. Jezŭ d́ò̆htôlagè bija aboahò Kib́ĭcè alēahwè.

³ B́ĕnu bija lwībwè j́alegè bija acuthĭkhathĭ dèbwè.

⁴ Cè tòcò de lenī i zagè lōwa d́ŏ Jezŭ ò ńò d́ō, za hta b́aphlò̆ hwă hikho b́ĕ Jezŭ ò ale agò̄hta nu, zè zèladēgè acuthĭkhathĭ dèbwè kî aleḿĭ d́ŏ Jezŭ ahlò̆mò̄ nu.

⁵ Jezŭ tcahtîgè cè tòcò adèb́u d́ō, Cò d́ògè acuthĭkhathĭ dèbwè, “Aphokhŏ, nè dèkhòwè b́è b́ahlô̆ htŏ.”

⁶ B́ĕnu Skrĭbāpho asańălăò d́ŏnu ògè tòcò, kî gomogè d́ŏ athaobu gōjo,

⁷ “Bija ajo dèbwè Cò d́ò ma gōnu nè? Za htad́ĕd́ògè Kib́ĭcè! Kib́ĭcè gā hwă, bò̄bwè gā b́ăplè za d́ò̆ bija dèkhòwè bwè?”

⁸ D́ŏ ca thabu Jezŭ thîhè̆ danā ze dègomo nu d́ō, cò d́ògè lōwa tòcò, “Thĭ gomo dîwî̄dewe ma dè d́ŏ thĭ olāthabu nu nè?

⁹ Kò d́ò dèjî̄b́è nu ahjŏ d́osè ḿî d́òlè̄ domomo? ‘Nè dèkhòwè tòcò b́è b́ahlô̆ htŏ,’ ā? Ḿî ‘phîni scid́ŏ hwî̆jā kî hèbò̄,’ ā?

¹⁰ Barasă thî kî thîhè̆ d́ò̆è htè Bija Apho nu Zu phlŭ Ze there ò d́ŏ Lākho jo akā b́ăplè bija adèkhòwè nu,” Cò d́ògè acuthĭkhathĭ anu dèbwè nu gōjo,

¹¹ “Jò d́ò nè, wè̄hto, phî ne leḿĭ kî gebò̄ ni hi.”

¹² Hwî̆caka, zè wè̄hto phînigè ze leḿĭ kî ge tèpwègè d́ŏ bija lŏcăcè ahlò̆mò̄ nu. Bija tòcò htèdômô̄dahmă sôgè kî htăhtai Kib́ĭcè kî cò d́ò, “Wa da tcahtîgè dè gōjo dakhă ńò.”

Lĕvi Adèjo
( Mattĕo 9.9-13 ; Lŭka 5.27-32 )

¹³ Kîd́ò̆ Zè hèkôgè pèllèwe kî bija aboahò lehtîgè Cè d́ō Cô thôithò̆igè lōwa tòcò.

¹⁴ B́ĕ Ze lekô klè nu, Cè kèhtî Alphĕu apho Lĕvi sańăla ò d́ŏ bija dai dèhmŭ alle nu d́ō, Cò d́ò lōwa, “Lekôbò̄ Ja kă.” Zè wè̄hto kî lekôgè Ca kă.

¹⁵ Hwă d́ō b́ĕ Jezŭ a ò̆ d́ŏ Lĕvi ahibu akhî nu, bija adadèhmŭ kî dèkhòwèpho tòcò kî Jezŭ abōhmubicè tòcò a ò̆ jīplogè lōwa, manè̄ d́ō, bija lôkô Ze le òèòò akhoacè̆ nu.

¹⁶ Skrĭbāpho tòcò kî Pharizè̆pho tòcò tcahtî dè ajo d́ō, cò d́ògè bōhmubicè tòcò, “Thĭ Sara a plo ò̆ plo ma bija adai dèhmŭ kî dèkhòwèpho tòcò nè?”

¹⁷ Jezŭ thîhè̆b́è d́ō, Cò d́ògè lōwa tòcò, “Bija aòmô̄òhma tòcò do loba tèpwè dihwi sara ńò, ḿî ascwiasè̆ tòcò dòkhò̆. Manè̄, tè b́è Ja lajo adî̄ahma tòcò nu ńò. Ḿî dèkhòwèpho tòcò nu dòkhò̆,” Cò d́ògè lōwa do.

Dèd́uad́uò̆ Acè̆
( Mattĕo 9.14-17 ; Lŭka 5.33-39 )

¹⁸ Zowănnī akhî̆abwè kî Pharizè̆pho tòcò d́ugè dèadèò̆. Mègōnu d́ō, ze lehtî Jezŭ kî d́ò lōwa, “Zowănnī akhî̆abwè kî Pharizè̆pho akhî̆abwè tòcò d́u thè̆ dèadèò̆ nî̄, ḿî No bōhmubicè tòcò tu d́u ma ńò nè?”

¹⁹ Jezŭ d́òge cè tòcò, “Amikhŏ aphîcu dèbwè kò̄ òkôwe ca kă athŭtherĕ nu, ale pwè̆bu tòcò kū d́uad́uò̆ d́ò̆ cadè̄? Cò kò̄ òkôwe lōwa tòcò akă athŭtherĕ nu, cu tu d́u za mè cè ńò.

²⁰ Barasă muni kè̄ b́èkò̆ dini htè amikhŏ aphîcu dèbwè kè̄ b́è phîkè̆ thĭwīkò̆ cè. B́ĕ anu dini nu, cè tòcò kū d́ub́èkò̆.

²¹ “Bija dò bòd́èi scid́ŏhnî̆jā ali kî tîkî̆jā athè̆ da kha ńò. Tè b́è ńò d́ō, tîkî̆jā athè̆ gā d́ahto ma tîkî̆jā ali d́ō, agè̄ htèlè tèpwè.

²² Kî bija dò hlònī thobiscihtĭ athè̆ d́ŏ dèphe akŏ alila abu nu ńò. Dî ḿî ńò d́ō, thobiscihtĭ ka awū dèphe d́ō agā lagè̄lō tèpwè, kî dèphe akŏ ḿî ḿî gè̄ kè̆ gā pjă tèpwè. Thobiscihtĭ athè̆ nu kè b́è̆nī cè d́ŏ dèphe akŏ athè̆ abu dòkhò̆.”

Munisòd́è̆ Ab́icè
( Mattĕo 12.1-8 ; Lŭka 6.1-5 )

²³ Tapla b́ĕ Munisòd́è̆ nu, Jezŭ kî Zo bōhmubicè tòcò lenīkôgè d́ŏ huklè̆ dehle abu, d́ō Zî khî̆ Zè bwè tòcò lekô klè phweagè b́uzèlè̄.

²⁴ Pharizè̆pho tòcò d́ògè cè, “Tca caḿa nu, cè tòcò mègè ma dè adò mò mè ńò, b́ĕ Munisòd́è̆ nu nè?”

²⁵ Kî cò d́ògegè lōwa tòcò, “Thĭ da phab́ègè dè awîakè̆ htè Dăvid kî zò khò̆ zè khè tòcò mègè cadè̄ b́ĕ ca thaẃisôgè akhî nu ńò ā?

²⁶ Ze lenī Kib́ĭcè ahibu, b́ĕ Phŭgima Abĭathar alethîkhè̆ nu, kî agè dèhluhta atoko, htè a aza ḿî htĕ Phŭgido dèbwè lò dèdè̆ nu, kî igè zò khò̆golō tòcò a kôgè dòkhò̆.”

²⁷ Kî Cò d́òwe lōwa, “Munisòd́è̆ ḿî bija anikhĭ lò. Tè b́è bija ḿî Munisòd́è̆ anikhĭ ńò.

²⁸ Mègōnu d́ō, Bija Apho ḿî Munisòd́è̆ Ab́ĭcè cè.”

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan