Bìoball air-loidhne

Mărko 11 - Geba Roman New Testament

Jezŭ lenī Jerŭsalèm Dèdòdèthe Aklè̆
( Mattĕo 18.6-9 ; Lŭka 17.1 , 2 )

¹ B́ĕ zo do b́ôhtî Jerŭsalèm u kî d́ŏ Bèthphage kî Bèthăniad́ŏ akăhtî Òlĭvo Khòlò̆ nu, Jezŭ thodŏle abōhmubicè gībwè,

² kî d́ò cè tòcò, “Lenī d́ŏ d́ŏ htè ad́awè̄ thĭ ò tod́osò̆ nu, thĭ gā tcahtîkò̆ thîrîd́ŏpho htè bija tò d́òib́è akho dakhă hnî̆ńò to d́ŏ b́è cŏwè̄glo. B́ăplèkè̆ abi d́ō ge hmòibò̄ d́ŏ jò ò.

³ B́eḿĕ bija kè d́è̆ thĭ dèbwèbwè, ‘Thĭ mègè danè̄?’ d́ō d́ò cè, ‘B́ĭcè thaè mèi, Hwă d́ō zè kè̄ thè̆ge plaplă tèpwè b́ĕ jo.’”

⁴ B́ĕ zo bōhmubicè gībwè donī d́ŏbu nu, za tcahtîgè bija cŏwè̄glo thîrîd́ŏpho d́ŏ klèwōlò khaglè̄htî tod́ŏ, d́ō ca b́ăplègè thòròbi.

⁵ Bija aò ca kăhtî tòcò d́ògè, “Thĭ b́ăplè ma thîrîd́ŏ abi nè?”

⁶ Cò d́ò̆sa lōwa acab́ô̆ Jezŭ hmèla nu d́ō bija hna hèi tèpwè cè tòcò.

⁷ Mèhwă ze gehmòi thîrîd́ŏpho d́ŏ Jezŭ ò nu kî d́è̆hta scid́ŏ akho, hwad́ō Jezŭ htad́ògè.

⁸ Bija òè̆bwè d́è̆lă ascid́ŏ b́ĕ klèlò, alewe tòcò bē thophăpho kî d́è̆lă klèbu.

⁹ Bija lôkô Ca kă, ahè Zò hlò̆mò̄ tòcò cò, ahè Ze lekă tòcò cò, kèwo htŏhta alē kî d́ò; “Hozăna! Ab́èhôwî ḿî ale d́ŏ B́ĭcè ami abu dèbwè nu!

¹⁰ Ab́èhôwî ḿî wa pa Dăvid ahtĭage d́ŏ ale jo nu! Hozăna d́ŏ ahtajîgudŭ nu!”

¹¹ Mèhwă Jezŭ lenīgè Jerŭsalèm u bu, kî d́ŏ Zarādo abu nu. Za tcakwè̆b́a dèlŏcăcè Hwă d́ō, lumulathulab́ăgè, Cè kî bōhmubicè scigībwè legè d́ŏ Bèthăniad́ŏ nu.

Jezŭ Hôkî̆kkè Thod́ohtĭmu
( Mattĕo 21.18 , 19 )

¹² Alekă dini zè hèhta hwă Bèthăniad́ŏ d́ō, athaẃihtagè cè.

¹³ D́ŏ adòbò nu zè kèhtî thod́ohtĭthè amu ò pĕhtagè ahlèaphò̆ tòb́ò̆, d́ō za ka tcahtî thè̆lèthòlò̆ aphò̆athè ā? nu ze le tcagè. Barasă b́ĕ zo dowè̄ alò nu, za da tcahtîgè athè dèmè̆ ńò, ḿî htĕ ahlè lò. Manè̄, tè b́è thod́ohtĭthè b́èhta akhî hnî̆ńò acè̆ nu.

¹⁴ Zi jî̄b́èhtîgè tho anu tòb́ò̆ kî cò d́ò, “Khŭnujo phlò̆ ahlò̆mò̄ bija gā ta ab́è d́ò̆è nè thè ńò phò̆ dakhă ńò.” Kî zo bōhmubicè tòcò thîhè̆kô b́è tèpwè.

Dèmèplî̆mètcăge Zarādo
( Mattĕo 21.12-17 ; Lŭka 19.45-48 ; Zowănnī 2.13-22 )

¹⁵ Mèhwă za htagè d́ŏ Jerŭsalèm u nu. Ze lenīgè Zarādo abu kî Za hna hèhtaphlòḿĭgè adūò̆sè̆adè d́ŏ Zarādo abu tòcò nu. Kî Ca b́atòkòladēgè bija ab́ăkhlè hô̆ tòcò acud́èkho kî asè̆ thokŏdru ad́ŏ tòcò akătò.

¹⁶ Ci ti igè bija agè̄ hèzāi dèhtò̆dèla d́ŏ Zarādo abu dèbwè̆ ńò.

¹⁷ Cò d́ò̆htô lōwa tòcò, Cò d́ò, “D́ŏ Cè Tcahtĭ abu nu, ‘Ji hi kè b́èjokò̆ Bijakhwĭpho lŏcăcè adèthèb́è̆htai ahi,’ ahwela d́o tè b́è ńò ā? Ḿî thĭ nu, thĭ mèi tèpwè cè bija ahumèkè̆dè òkhoi ale dòkhò̆.”

¹⁸ Phŭgido tòcò kî Skrĭbāpho tòcò thîhè̆b́è d́ō, za wāhlègè klèthòò̆ cab́ô̆htè ze gè mèthĭ lōwa nu. Manè̄, zi scisăni lōwa ale. Bija lŏcăcè htèdômô̄dahmă ni Zè dèthôdèthò̆ ale akhoacè̆ nu.

¹⁹ Htô̆ḿî lumuhèlagè nu Zè hèhtagè u akhlŏ.

Thod́ohtĭthè Amu Hnò̆gè
( Mattĕo 21.20-22 )

²⁰ Lumuwò Zo dole b́ĕ Ze lekô aŭsu dini nu d́ō, Ca tcahtîgè thod́ohtĭmu tòb́ò̆ ahwĕakra lō do d́ŏ akhawi nu.

²¹ Petru gomohtani d́ō cò d́ò lōwa, “Sara, Thod́ohtĭmu nò hôkî̆kkè tòb́ò̆ hwĕkra lōgè.”

²² Jezŭ d́òge cè tòcò, “B́ubò̄ Kib́ĭcè.

²³ Jò d́ò̆sa thĭ adî̄ahma, bija dèbwèbwè kò d́ò ma khòlò̆ ajo dèmè̆ jo, ‘Wè̄hto kî cŭlădē ne ne d́ŏ pèllèbu,’ kî zè dè htèniwĭniwa ńò, zu b́u thĕbwe d́ŏ agè̄ mè ane d́ō, cò d́ò atherĕ agī phî̆hta tèpwè.

²⁴ Mègōnu d́ō, Jò d́ò thĭ, gajă thî dadè d́ŏ dèthèb́è̆ abu nu, b́ubò̄ thĭ gī nib́è tèpwè kî agî̄ phî̆htanikò̆ thĭ.

²⁵ B́ĕ thĭ sò̆hto òda thèb́è̆hta akhî nu, b́ăplèbò̄ bija gajă amèkèḿèb́è thĭ tòcò nu, cab́ô̆htè thĭ Pa aò d́ŏ Mò̄kho dèbwè gā b́ăplèbò̄ thĭ dèkèḿè nu.

²⁶ Thĭ gā ta b́ăplè b́eḿĕ dè ńò d́ō, thĭ Pa aò Mò̄kho dèbwè ḿî ḿî gā ta b́ăplè tèpwè thĭ dè mèkèḿè ńò ńò.”

Jezŭ Aphlŭathere
( Mattĕo 21.23-27 ; Lŭka 20.1-8 )

²⁷ Jezŭ geb́a d́ŏ Jerŭsalèm u bu, Zè hèpôĺôgè d́ŏ Zarādo abu nu. B́ĕnu Phŭgido, Skrĭbāpho kî anedothabwe tòcò lehtî cè kî cò d́ò lōwa,

²⁸ “Bò̄bwè i Nè aphlŭathere agè̄ mè dè ajo tòcò bwè? Kî bò̄bwè thodŏ Nè d́ŏ agè̄ mè dè ajo tòcò bwè?”

²⁹ Jezŭ d́òge cè tòcò, “Jè ḿî ḿî Jè gè̄ d́è̆ thĭ dèd́è̆, d́ō d́ò̆sagebò̄ Jè, khaĺè jò kò̄ d́ò̆sakò̆ thĭ da aphlŭthere akhoacè̆ Jè mègè dè ajo nè nu.

³⁰ Zowănnī adèŭsab́ăhtĭ ḿî ab́èkja Mò̄kho ā? Ḿî ab́èkja bija ā? D́ò̆sabò̄ jè.”

³¹ Cè tòcò d́òb́èsab́ègè lōwa gōjo, “ ‘Aò d́ŏ mò̄kho nu,’ wò kò̄ d́ò ma d́ō, ‘Thĭ tu b́u ma cè ńò nè?’ Cò kò̄ d́ò wa do.

³² ‘Ab́èkja bija lò,’ kò d́ò ma d́o dō,” zi scisăni bija ale. Manè̄, bija tòcò b́ugè htè Zowănnī Baptĭsta ḿî Prò̆fèt ahnè dèbwè acè̆ nu.

³³ Cò d́òge Jezŭ, “Wî dî thîhè̆ ńò.” Jezŭ dò cè tòcò, “Jè mè dè ajo tòcò ḿî da aphlŭthere abu nè nu mîmî Jò tò d́ò̆sa za thĭ ńò ńò.”

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan