Bìoball air-loidhne

Mărko 10 - Geba Roman New Testament

Dèphîcu Adèlaphra
( Mattĕo 19.1-12 ; Lŭka 16.18 )

¹ Zè hèhta hwă lenīgè Judĕage d́ŏ Jòrdăno lò̄wē dòkhò̆, kî bija aboahò le b́òkhlogè cè. Acab́ô̆ zè mè nènò nu, zô thôithò̆i tèpwè bija.

² Pharizè̆pho tòcò le b́okhob́olè̄gè cè, cò d́ò, “Amikhŏ dèbwè gā bāphlòmĭ zè hmè̆ nu, ab́ènibò̄ dèhmèla ā?”

³ Cè d́è̆ge lōwa, cò d́ò, “Mŏzè htulahmèlagè thĭ cadè̄?”

⁴ Cè tòcò d́ò, “Mŏzè i tèpwè wa akhwè agē hwehwă dè htophra acè d́ō, agè̄ lè̄dakè̆ cè.”

⁵ Jezŭ d́òge cè tòcò, “D́ŏ thĭ thosathasa acè̆, ze hwela nikò̆ thĭ dèhmèla.

⁶ Barasă hlĕ akhahtîkhab́ò̆ nu, ‘Kib́ĭcè b́òlagè bija amikhŏ kî amihmu.’

⁷ ‘Mègōnu akhoacè̆ amikhŏ dèbwè gè hèbā hwă zo mo za pa d́ō cò kò òplokò̆ zè hmè̆,

⁸ cè gībwè gî̄ phî̆htakò̆ dèphedèhî dèdè̆ lò.’ Mègōnu, zi di ḿîbe dèphedèhî gīdè̆ ńò, ḿî dèdè̆ lò.

⁹ Mègōnu, Kib́ĭcè lè̄plo nu, bija tè b́è htobā b́è ńò.”

¹⁰ B́ĕ cè tòcò doge hibu nu, Zo bōhmubicè tòcò d́è̆gè cè ab́èkja dèwîdèkè̆ ajo nu,

¹¹ kî cò d́ògè lōwa tòcò, “Gaj́ă bija ab́è̆lădakè̆ hwă ahmè̆ ale phîcu alewe dèbwè nu, za lakèḿèkô lōwa lò.

¹² Ahmè̆ dèbwè gè b́è̆lăda hwă awa, ze le phî alewe dèbwè ḿî ḿî za lakèḿè lò lò.”

Jezŭ Hôwî Abĭsèpho
( Mattĕo 19.13-15 ; Lŭka 18.15-17 )

¹³ Bija tòcò lei abĭsèpho d́ŏ Jezŭ ò cab́ô̆htè zô gô̄ hôwî lōwa nu. Barasă bōhmubicè tòcò hò̆ tèpwè alei abĭsèpho tòcò nu.

¹⁴ Jezŭ tcahtî d́ō Ca tha d́òmò tèpwè ńò kî Cò d́ò lōwa, “Abĭsèpho tòcò gē lehtî d́ò̆è jè. Mèd́îd́ă ḿè cè ḿè. Manè̄, Mò̄kho ahtĭage ḿî cè è̆.

¹⁵ Jò d́ò̆sa thĭ adî̄ahma, bija gî̄ dî phî ma Mò̄kho Ahtĭage acab́ô̆ abĭsèpho ńò nu, de lenīb́è abu ńò.”

¹⁶ Zò phòglŏi hwă lōwa, htèla Zu cu lōwa akho kî hôwîgè cè tòcò.

Dèniò̆jòa Adèb́èhjŏ
( Mattĕo 19.16-30 ; Lŭka 18.18-30 )

¹⁷ B́ĕ Jezŭ hèkô klè nu, bija dèbwè cwèlehtî Cè, dōhnŏla Cò hlò̆mò̄ kî dè̆gè lōwa, “Sara aè, cab́ô̆htè ji gī nib́è dèthôḿô̆ lahtŭlablo nu, jè kè̄ b́è mè danè̄?”

¹⁸ Jezŭ d́ò cè, “Ńò d́ò ma Jè aè nè? Aè ḿî B́ĭcè dèbwè lò.

¹⁹ Ni thîhè̆ tèpwè Kib́ĭcè adèhmèla ā? ‘Mèthĭ ḿè bija ḿè. Mèlakèḿè ḿè. A hu ḿè dè ḿè. Dè dîdî̄dahma ńò kha ḿè ne ne thè̆thî ḿè. Hlòhlî̆hlòplè ḿè. D́ŏb́èj́ab́è no mo na pa.’”

²⁰ Cò d́ògegè Jezŭ, “Sara, dè ajo tòcò jo nu jò dòni hlĕ ji bĭsèpho we nu.”

²¹ Jezŭ tcawè̄ cè d́ŏ dèb́èlò̄ abu kî d́ògè lōwa, “Ńò mò mè òwe dèdè̆ b́ĕ. Gebò̄, sè̆kè̆ lŏ ni dî̄ nè dè kî ibò̄ assègnè̆pho tòcò. Ni gī nib́èkò̆ dî̄dodèdo d́ŏ mò̄kho nu. Hwă d́ō lôkôbò̄ Je le,” cò d́ò lōwa do.

²² Za tcalathôj́ô kî hèphlòḿĭgè, manè̄, zî dî̄ zè dè aòèòcaragè akhoacè̆ nu.

²³ Jezŭ tca khwè̆b́a hwă, d́ògè Zo bōhmubicè tòcò, “Bija aniò̆jòa tòcò gē lenīb́è Kib́ĭcè Ahtĭage bu nu abakò̆ pwedè̄?”

²⁴ Mègōnu d́ō, Zo bōhmubicè tòcò htèdômô̄dahmă sôgè d́ŏ Zè dèjî̄b́è acè̆. Barasă Jezŭ d́ò cè tapla be, “Pholi tòcò, bija asascĭi adî̄adè tòcò gē lenīb́è Kib́ĭcè Ahtĭage abu nu abakò̆ pwedè̄!

²⁵ Gòlaŭ to d́ŏ gē lenī hnăd́è akazè̆ bu dòkhò̆ d́ō, agō hjŏ d́olĭ tèpwè aniò̆jòa dèbwè gē lenī Kib́ĭcè Ahtĭage abu nu khò̆.”

²⁶ Cè tòcò htèdômô̄dahmă d́okhlŏ we tèpwè. Za la d́ò la sa lōwa kî d́ògè, “Bò̄bwè gī nib́è za d́ò̆ dèhlô̆htage bwè?”

²⁷ Jezŭ tcawè̄ hwă cè tòcò, cò d́ò, “Bija anikhĭ ada za ńò hŏ. Barasă Kib́ĭcè anikhĭ dèda za ńò tò ò dimĭ ńò. Manè̄, Kib́ĭcè za dèlŏcăcè lò.”

²⁸ Petru d́ò cè, “Tcabò̄, wa bāphlòmĭ dè gŏmimi kî lôkô htŏ ne le!”

²⁹ Jezŭ d́òge cè, “Jò d́ò̆sa thĭ adî̄ahma, bija htè ab́è̆lădakè̆ ahiaphă, ḿî̆dîḿî ńò athè̆buwe, amo apa, aphoali, alākhodoklè̆ d́ŏ Jo kho Jè cè̆ kî Vanzĕlō akhoacè̆ dèbwè nu,

³⁰ di nib́ège òèhta apla dègèjè d́ŏ khŏnujo, hiphă, thè̆buthè̆we, mo pa pholi, lākhodoklè̆, ploplo kî dèlômèssègnè̆ kîd́ò̆ ahlò̆mò̄ anikhĭ dèthôḿô̆ lahtŭlablo ńò nu tò òb́è ńò.

³¹ Aŭlūlū alekă, alekăkă aŭlū, dè gè̄ mèkò̆ ane d́o.”

Dèd́ò̆sadòlò Dèssègnè̆bòdò Thŏplatapla
( Mattĕo 20.17-19 ; Lŭka 18.31-34 )

³² Cè tòcò lehtakô klè d́ŏ ale Jerŭsalèm u nu, kî Jezŭ legè d́ŏ cè tòcò ahlò̆mò̄, d́ō zè htèdômô̄dahmă lōgè tòcò, bija alekô Ze le tòcò ḿî scisăgègè. Jezŭ jo hwă Zo bōhmubicè scigībwè tapla be, kî d́ŏsagè lōwa da gî̄ phî̆htani Cè nè nu.

³³ Cò d́ò, “Tcabò̄, wa hta Jerŭsalèm u. Bija Apho jo, kè̄ b́è hô̆lăkò̆ Phŭgido kî Skrĭbāpho tòcò acukhòbu, ci ki cirrathĭkò̆ lōwa, ălănikò̆ Cè bwèthŭkupho tòcò acukhòbu.

³⁴ Zè gè̄ mèjomèhnăkò̆ lōwa, htwîb́ĭhtwîb́òkò̆ Cè, mūhta hwă Cè, zè gè̄ mèthĭkò̆ lōwa. Kî thŏni dini Za gā htabogekò̆.”

Zăkomo kî Zowănnī Adèthaèni
( Mattĕo 20.20-28 )

³⁵ Zăkomo kî Zowănnī, htè Zebedi apho nu lehtîgè Jezŭ kî d́ò, “Sara, wa thaèni Nè agè̄ mèni wa htè wa da Nè atherĕ nu.”

³⁶ Jezŭ d́òge cè tòcò, “Thĭ thaèni jè gè̄ mèni thĭ danè̄?”

³⁷ Cè tòcò d́ò, “Mèbò̄ cab́ô̆htè wa gā sańăbè Nu cutîcî dèbwè, Nu cudèhtwè dèbwè d́ŏ Ńò dò Ne the abu nu.”

³⁸ Jezŭ d́òge cè tòcò, “Thĭ dagè danè̄ nu thĭ di thîhè̆ mè ńò. Thĭ ò̆ kèhtabò̄ phală htè jò ò̆ nu kî thĭ khakèhtabò̄ dèŭsab́ăhtĭ htè Ja khaŭsab́ă nu ā?”

³⁹ Cò d́òge lōwa tòcò, “Wa kèhta tèpwè.” Jezŭ d́òge cè tòcò, “Phală htè Jò ò̆ nu thĭ kò ò̆b́è tèpwè, dè ŭsab́ăhtî̆ Ja kha nu ḿî ḿî thĭ gā khab́è tèpwè,

⁴⁰ barasă agā sańăb́è d́ŏ Ju cutîcî kî Ju cudèhtwè nu tè b́è Ji kī i thĭ ńò. Ab́èkja d́ŏ ab́èpradòlò hwă htŏ anikhĭ tòcò nu lò.”

⁴¹ Bōhmubicè alewe abwèsci thîhè̆b́è dè ajo d́ō, cè tòcò atha dòmògè Zăkomo kî Zowănnī akho ńò.

⁴² Jezŭ jo hwă cè tòcò cò d́ò lōwa, “Thĭ thîhè̆b́è tèpwè htè d́ŏ bwèthŭkupho tòcò aklè̆ akhoane tòcò ŭicai cè acab́ô̆ cî b́icèklèhtò nu, kî bija adoamu tòcò d́è̆lî̄htagè aphlŭathere.

⁴³ Barasă dè tè b́è mè ane kî thĭ gōnu ńò. Ḿî d́ŏ thĭ klè̆ bija athaè phî̆hta akhoane dèbwè nu, zi gî̄ ḿî thĭ zô thĭ bwè dòkhò̆,

⁴⁴ kî gajă bija athaè phî̆hta aŭsu dèbwè nu, zi gî̄ ḿîb́è lŏcăcè azô lò.

⁴⁵ Manè̄ kòd́òdo dō, Bija Apho lela d́ŏ lākho jo ḿî tè b́è bija gā khazô Cè anikhĭ ńò, ḿî Zā khazô bija dòkhò̆, kî Ci ilaphlòḿĭgè Ca tha cab́ô̆htè Zî gī bwîgebò̄ bija òè̆bwè nu.”

Agādŭkhi Bartimĕo
( Mattĕo 20.29-34 ; Lŭka 18.35-43 )

⁴⁶ Kî cè tòcò dolegè d́ŏ Jĕrikho u nu, kîd́ò̆ b́ĕ Jezŭ hèhta Jĕrikho u ploplo kî Zo bōhmubicè tòcò kî bija aboahò tòcò akhî nu, agādŭkhi dèbwè htè Timĕo apho, Bartimĕo sańălăògè d́ŏ klèwōlò kî daagè dè.

⁴⁷ B́ĕ zi thîhè̆b́è aḿî Jezŭ bija Nazarè̆thpho nu d́ō, cè kèwohta kî d́ò, “Jezŭ, Dăvid apho, khòwèbò̄ jè tîkî.”

⁴⁸ Bija tòcò hò̆ cè kî hna òzògè cè. Barasă cè kèwohtasô d́okhlŏgè, “Dăvid apho, khòwèbò̄ jè tîkî.”

⁴⁹ Jezŭ sò̆hto ò hwă za hnagè bija gē lei cè. Bija ajole agādŭkhi d́ŏ Jezŭ ò tòcò d́ò cè, “Lè̄khŭbò̄ na tha. Wè̄hto, Zo jo nè.”

⁵⁰ Za bāladēkè̆ hwă zi scid́ŏkhlŏ, hwî̆caka zè wè̄hto kî lehtîgè Jezŭ.

⁵¹ Jezŭ d́ò cè, “Na thaèni jè gè̄ mèni nè danè̄?” Agādŭkhi dèbwè d́òge Cè, “Sara, cab́ô̆htè ja gā tcahtîzage dè nu.”

⁵² Jezŭ d́òge cè, “Ge d́ò̆è, nè dèb́u mèhlô̆htage htŏ nè.” Taplakhă lò, za gādŭ hlî̆htage kî zè hèkôgè Jezŭ akă d́ŏ klèlò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan