Bìoball air-loidhne

Mărko 1 - Geba Roman New Testament

Zowănnī Baptĭsta Prahnèdòlò Klèthòò̆
( Mattĕo 3.1-12 ; Lŭka 3.1-18 ; Zowănnī 1.19-28 )

¹ Jezŭ Krĭstu, B́ĭcè apho Vanzĕlō akhahtî,

² acab́ô̆ Prò̆fèt Izaĭah hwelagè akhò̆ nu; “Tcabò̄, Jo thodŏle Jè bwèzo d́ŏ Ńò hlò̆mò̄, htè agā pradòlò Nè klè Ńò thòò̆,

³ dèlē thèhta d́ŏ dèkralle, ad́ò, ‘Pradòlòbò̄ B́ĭcè aklè, mè danābò̄ Cè klè tòcò nu.’”

⁴ Zowănnī le d́ŏ dèkralle, ŭsab́ă bija htĭ kî d́òŭd́ò̆sagè dèŭsab́ăhtĭ d́ŏ dèjale kî dèkhòwè adèb́ăplè awîakè̆.

⁵ Bija aò d́ŏ Judĕage thèdè̆ge tòcò kî Jerŭsalèm upho tòcò lehtî cè, d́òla adèkhòwè, kha dèŭsab́ăhtĭ d́ŏ cò ò, b́ĕ Jòrdăno Gòllò̄ bu nu.

⁶ Zowănnī kô̆thò gòlaŭ a sô̆, ca păb́a hnî̆jābi dèphe za jadēlò, ca a d́è̆bāhmu kî gînîtcă lò.

⁷ Kî cò d́ò̆htôla, cò d́ò, “Ado d́olĭ jè dèbwè gē lekò̆ je lekă, ja da ta mè pwĕ agō dōhnŏlă kî b́ăplè za khatòkò abi ńò.

⁸ Ju ŭsab́ă htŏ thĭ kî htĭ, Cò kò̄ ŭsab́ăkò̆ thĭ kî Spirito Tcahtĭ.”

Jezŭ Adèŭsab́ăhtĭ
( Mattĕo 10.1-4 ; Lŭka 6.12-16 )

⁹ Hlĕnu Jezŭ hèhtagè Nazarè̆th u, Galilĕage bu kî khagè dèŭsab́ăhtĭ d́ŏ Zowănnī ò, b́ĕ Jòrdăno gòllò̄ bu nu.

¹⁰ B́ĕ zè hèhta hwă htĭklè̆ lò nu, Za tcahtîgè Mò̄kho b́ăhta kî Spirito Tcahtĭ, acab́ô̆ thokŏdru tèb́è la kî sò̆lăgè Zo kho.

¹¹ Kî dè alē thèhta d́ŏ Mò̄kho dèdè̆ ad́ò, “Nî ḿî Jo phokhŏ htè Jè b́èlò̄, ab́ètha Jè dèbwè nu.”

¹² Taplakhă Spirito Tcahtĭ hmòle danā Cè d́ŏ dèkralle nu.

¹³ Kî Cò ògè d́ŏ dèkralle ani lwīscĭ, anè lwīscĭ, kî khab́ègè Sătana adèhnakă. Cò òb́è dèmidèma tòcò aklè̆, kî Mò̄khobwèzo tòcò tcaikhwèi tèpwè Cè.

Bōhmubicè Ab́èjo Ŭsu Tòcò
( Mattĕo 10.1-4 ; Lŭka 6.12-16 )

¹⁴ Zowănnī b́èphòb́ècŏ hwă, Jezŭ legè d́ŏ Galilĕage nu, Cò d́òŭd́ò̆sagè Kib́ĭcè Ahtĭage Vanzĕlō, kî d́ògè,

¹⁵ “Akhîagla b́è htŏ, kî Kib́ĭcè Ahtĭage b́ôhtî htŏ. Bajalage thĭ ne kî b́ubò̄ Vanzĕlō adèthôdèthò̆ dakha.”

¹⁶ B́ĕ Jezŭ hèkô Galilĕa pèllèwe akhî nu, Za tcahtîgè Simŏnè kî zè mè̄ Andrĕa, bāla dwī d́ŏ pèllèbu nu. (Manè̄ kò̄ d́òdo dō zî ḿî bija apôa dāpho tòcò.)

¹⁷ Kî Jezŭ d́ògè cè tòcò, “Lôkôbò̄ Je le. Jè gè̄ mèphî̆htakò̆ thĭ bwèpôdapho apô bija tòcò nu.”

¹⁸ B́ĕnu lò za bāladē dwī tòcò kî lôkôgè Ze le.

¹⁹ Mèhwă Ze le ahlò̆mò̄, Za tcahtîgè Zebedi apho Zăkomo kî zi ṕîkò̆ Zowănnī, cè tòcò ò d́ŏ akhlĭ bu, bòd́ège adwī tòcò nu.

²⁰ Zo jodanā lōwa lò. Cè tòcò bāladē apa Zebedi d́ŏ khlĭbu, ploplo kî bija amèhlè̆adè tòcò nu, kî zô lôkôgè Jezŭ ale.

Jezŭ Hna hèhta Dèscidèhnè
( Lŭka 4.31-37 )

²¹ Kî Ze lenīgè Kapèrnaum U bu. B́ĕ Munisòd́è̆ nu, Za htanīgè Sinagŏgā abu kî d́òŭd́ò̆sagè dè.

²² Cè tòcò htèdômô̄dahmă tèpwè Zè dèthôdèthò̆ akholè̄kălè̄. Manè̄ kòd́òdo dō, zô thôithò̆idè acab́ô̆ bija aphlŭthere ò dèbwè akhò̆pha nu, dî ḿî acab́ô̆ Skrĭbāpho tòcò nu ńò.

²³ D́ŏ Sinagŏgā abu nu dèhnè akî̆kkè ògè bija dèbwè alò d́ō zè kèwohta, cò d́ò,

²⁴ “Wè b́èkja kî nè danè̄, Jezŭ Nazarè̆thpho? Ne gē le mèkè̆mèô tèpwègè wa ā? Ji thîhè̆ tèpwè htè Nî ḿî Kib́ĭcè abija tcahtĭ dèbwè nu.”

²⁵ Kîd́ò̆ Jezŭ hò̆ cè, Cò d́ò, “Òzòlò! Hèhtaphlòmĭ d́ŏ bija anu dèbwè ò nu.”

²⁶ Dèhnè akî̆kkè nu mè thĭmūklè hwă cè d́ō, za haphu sôtèklè hwă hèhta tèpwègè.

²⁷ Bija tòcò htèdômô̄dahmă kî la d́òhlè lōwa, “Ajo ḿî danè̄? Dèthôdèthò̆ athè̆ jo ḿî danè̄? Manè̄, d́ŏ Zu phlŭ Ze there akhoacè̆, dèhnè akî̆kkè hnò̆nu sòkhĕńe tèpwè Ze lē.”

²⁸ Dèwîdèkè̆ jo hwĕlò̄hwĕkhò̆ danāgè d́ŏ Galilĕage thèd́è̆ge abu nu.

Jezŭ Mèhmage Bija Òèòò
( Mattĕo 8.14-17 ; Lŭka 4.38-41 )

²⁹ Jezŭ hèhta hwă Sinagŏgā abu d́ō, ploplo kî Zăkomo kî Zowănnī Ze legè d́ŏ Simŏnè kî Andrĕa ahibu nu.

³⁰ Simŏnè amubwē dèbwè ò leḿĭkho, zi scwisôgè, kî cè tòcò d́ò̆sagè Jezŭ.

³¹ Jezŭ leb́ôhtî cè, phî zu cukhò kî cwiwè̄htogè cè, kî dèscwidèsè̆ sèdòbòdanāgè cè, kî ze wè̄hto mèò̆thò̆a nigè bija dòkhò̆.

³² Anu da la, lumu ladēnī akhî, bija tòcò leigè ascwiasè̆ kî dèscidèhnè phîb́è tòcò d́ŏ Jezŭ ò nu.

³³ Bija thè̆d́ŏthè̆ge ladēplogè lōwa d́ŏ khaglè̄htî nu.

³⁴ Kî Zè mèhmagegè ab́èscwib́èsè̆ amŏamo lò, kî hna hèhta òèòògè dèscidèhnè tòcò, kî ci ti igè dèscidèhnè tòcò gî̄ jî̄b́èhta ńò, manè̄ athîhè̆gè Cè akhoacè̆ nu.

Dèbòdèba Alewe Tòcò
( Lŭka 4.42-44 )

³⁵ Mèhwă lumuwò dè dî hlî̆hta hnî̆ńò, Zè wè̄hto kî legè d́ŏ dèlle aladūlahwè dokhlo kî thèb́è̆htagè.

³⁶ Simŏnè kî zò khò̆ tòcò hèhta lô wāhlègegè cè.

³⁷ Kîd́ò̆ b́ĕ za tcahtî lōwa nu, cò d́ò, “Bija tòcò wācăhlègè Nè.”

³⁸ Kî cò d́ògegè lōwa tòcò, “Lĕ gē le d́ŏ d́ŏphă aòb́ôhtîb́ôwa tòcò nu, cab́ô̆htè wò kò d́òŭd́ò̆sabò̄ dè d́ŏ nu. Manè̄ kòd́òdo dō, Je lela d́ŏ dèjo anikhĭ lò.”

³⁹ Mèhwă Cò d́ò̆htôd́ò̆dèlègè dè d́ŏ lōwa tòcò asinagŏgā abu, htè aò d́ŏ Galilĕage thèd́è̆ge abu kî hmòphlòḿĭgè dèscidèhnè tòcò nu.

Bija Akaĺaki Dèbwè
( Mattĕo 8.1-4 ; Lŭka 5.12-16 )

⁴⁰ Mèhwă akaĺaki dèbwè lehtî Cè, damò Cè, dōhnŏla Zò hlò̆mò̄ kî d́ò, “Nè dèthaèni kò̄ ò b́eḿĕ d́ō, Nè mètcăge za tèpwè jè.”

⁴¹ Jezŭ khòwègè cè, tad́ăhta Cu cukhò, tòb́è cè kî d́ò, “Jè dèthaèni ò hŏ! Nî gî̄ plî̆ gā tcăge d́ò̆è.”

⁴² Kîd́ò̆ b́ĕ Cò d́ò gōnu lò nu, dè akaĺaki hèhtagè kî cè b́è mèplî̆mètcăgegè.

⁴³ Mèhwă Zu htulahmèla grî̄pîńî hwă lōwa kî Za hna hègè lōwa;

⁴⁴ kî cò d́ò, “Sòkhĕńebò̄, d́ò̆sabò̄ ḿè bija dèbwè̆ ḿè. Barasă d́ō, le d́è̆lî̄bò̄ ne ne d́ŏ phŭgi kî hluhtaibò̄ dè nè dèwîdètcă anikhĭ acab́ô̆ Mŏzè adèhmèla ò nu, cab́ô̆htè agī ḿîbò̄ cè tòcò anikhĭ thè̆thî nu.”

⁴⁵ Barasă zè hè kî bò̄igè dè awîakè̆ ajo d́ō, Jezŭ de lenī thuŭthèè zagè d́ŏ cè tòcò au bu nu ńò, ḿî cò òb́ègè d́ŏ d́ŏwēd́ŏwă nu be lò. Barasă bija tòcò ò d́ŏ dè ale dagwālè̄ lelegege tèpwè d́ŏ Jezŭ ò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan