Bìoball air-loidhne

Lŭka 6 - Geba Roman New Testament

Dèd́è̆ Ab́èkja Munisòd́è̆
( Mattĕo 12.1-8 ; Mărko 2.23-28 )

¹ B́ĕ Munisòd́è̆ nu Jezŭ hèkô klè d́ŏ b́u amu tòcò aklè̆ kî Zo bōhmubicè tòcò phwe b́uzèlè̄ kî htîhtô̆ hwă d́ŏ zu cuĭthabu kî agè hŭ aphlo.

² Pharizè̆pho tòcò d́ò cè, “Thĭ mè ma dè htè dèhmèlad́îd́ă ò adò mò mè d́ŏ Munisòd́è̆ ńò nu nè?”

³ Jezŭ d́òscĭge cè tòcò, “Thĭ da phab́è htè Dăvid mègè cadè̄ b́ĕ ca thaẃi nu ńò ā?

⁴ Ze lenī Kib́ĭcè ahibu, phî kî agè kî ikôgè zi bija aòkô ca kă tòcò nu, htè a ab́è ḿî phŭgi tòcò lò nu ńò ā?”

⁵ Mèhwă Cò d́òwe lōwa, “Bija Apho ḿî Munisòd́è̆ Ab́icè lò.”

Bija Acuthĭwi Dòkhò̆ Dèbwè
( Mattĕo 12.9-14 ; Mărko 3.1-6 )

⁶ B́ĕ Munisòd́è̆ nu, Jezŭ lenīgè d́ŏ Sinagŏgā abu kî thôithò̆igè bija. D́ŏnu bija acudèhtwè dòkhò̆ thĭwi ògè dèbwè.

⁷ Skrĭbāpho kî Pharizè̆pho tòcò tcahuigè cab́ô̆htè za gā sajòkò̆ Jezŭ htè Zè gè̄ mèhmage bija b́ĕ Munisòd́è̆ nu ā? Ńò ā?

⁸ Barasă Zî thîhè̆ lōwa tòcò adègomo d́ō, cò d́ògè bija acuthĭwi dèbwè gōjo, “Wè̄hto kî sò̆hto òbò̄ d́ŏ athaklăḿè̆bŭ bu jo.”

⁹ Anu dèbwè wè̄hto kî sò̆hto ò tèpwè. Jezŭ d́è̆gè cè tòcò, “Jè d́è̆tca thĭ, Munisòd́è̆ nu ge mè za tèpwè dè aè ā? Ḿî dè akî̆kkè ā? Gè mèhlô̆htage dètha ā? Ḿî gè mèkè̆mèô cè ā?”

¹⁰ Za tca khwè̆b́a hwă bija, Cò d́ògè anu dèbwè gōjo, “Wehtabò̄ nu cukhò.” Ze wehta cu cukhò kî aèzènègegè.

¹¹ Barasă cè tòcò ò pĕhtakî dèthèhtè kî za la htôtcadè̆tcahlè lōwa htè zè gè̄ mèb́è Jezŭ cadè̄ nu.

Jezŭ Rôhta Bōhmubicè Scigībwè
( Mattĕo 10.1-4 ; Mărko 3.13-19 )

¹² B́ĕnu Jezŭ hta thèb́è̆gè d́ŏ khòlò̆kho nu kî Cè thèb́è̆htagè Kib́ĭcè thèd́è̆nè̆ adābu.

¹³ B́ĕ dèhlî̆hta nu Zo jo ladēplogè Zo bōhmubicè tòcò kîd́ò̆ cè tòcò aklè̆ nu Zô rôhlègè scigībwè (htè Zo jogè bōhmubicè tòcò nu)

¹⁴ Simŏnè, Za htăgè ami Petru kî zè mè̄ Andrĕa, Zăkomo kî Zowănnī, Philĭpo kî Bartolomĕo,

¹⁵ Mattĕo kî Tomăzo, Zăkomo (Alphĕu apho) kî Simŏnè (htè bija jo Zelò̆ta dèbwè nu),

¹⁶ Jŭda htè Zăkomo apîkò̆ nu, kî Jŭdas Iskariŏta htè ahô̆lăgè Cè dèbwè nu.

Dèd́ò̆htô d́ŏ Khòlò̆kho
( Mattĕo 4.23-25 )

¹⁷ Jezŭ gelaplo hwă cè tòcò d́ŏ khòlò̆kă Zò sò̆htoògè d́ŏ ad́ô̆kho taklaẃa nu d́ō Zo bōhmubicè tòcò kî bija aboahò aò d́ŏ Judĕage kî Jerŭsalèm u tòcò, kî d́ŏ Tĭro kî Sidŏna,

¹⁸ pèllèwe tòcò ò khwè̆b́a Cè cab́ô̆htè zò gò̄ sòkhĕńebò̄ lōwa adèd́ò̆htô kî agī nib́èbò̄ Zè dèmèhmage nu. Bija htè dèscidèhnè mèd́îd́ă tòcò lehtî kôkô Cè d́ō hmagegè gè.

¹⁹ Bija aboahò thaè tòb́è Cè, manè̄ kò̄ d́òdo dō, dècô̆dèthèlè̆ hèhta d́ŏ Cò ò kî Zè mèhmage lŏ bija akhoacè̆ nu.

Dèhôwî kî Dèhôd́ă
( Mattĕo 5.1-12 )

²⁰ Jezŭ tcawè̄ hwă Zo bōhmubicè tòcò kî Cò d́ò; “Ab́èhôwî ḿî thĭ assègnè̆ tòcò, manè̄ d́ō Kib́ĭcè Ahtĭage ḿî thĭ è̆!

²¹ Ab́èhôwî ḿî thĭ athaẃithaò̆ khŏnujo tòcò, manè̄ d́ō, thĭ kā a sô̆ a sô̆ ò̆b́èkò̆! Ab́èhôwî ḿî thĭ ajoaha khŏnujo tòcò, manè̄ d́ō thĭ gè̄ jè̄ b́èkò̆!

²² “Ab́èhôwî ḿî thĭ htè bija dè wè̄ dè sè̆ ńò, bija lè̄dakè̆, hô hò̆, kî d́òkè̆d́òô thĭ d́ŏ Bija Apho akhoacè̆ nu.

²³ D́ŏ muni anu dini nu, thaganāi kî thalōthalaibò̄, manè̄ d́ō, thĭ sô thĭ hlè̆ ḿî ado d́ŏ Mò̄kho nu. Manè̄, zi phĭ zu phŭ tòcò mè htŏgè Prò̆fèt tòcò gōnu lò lò.

²⁴ Dèba gā lab́èkò̆ thĭ pwedè̄ lò, thĭ aniò̆jòa khŏnujo tòcò, manè̄ d́ō, thĭ òb́èmòòb́èma tèpwè!

²⁵ Dèba gā lab́èkò̆ pwedè̄ lò, thĭ aò̆b́è ko ab́èko khŏnujo tòcò, manè̄ d́ō, thĭ gā thaẃithaò̆kò̆! Dèba gā lab́èkò̆ thĭ pwedè̄ lò, thĭ ajè̄ khŏnujo tòcò, manè̄ d́ō, thĭ gō koŏgajā kî gō jo gā hab́èkò̆.

²⁶ “Dèba gā lab́èkò̆ thĭ pwedè̄ lò, thĭ htè bija htăikòi khŏnujo tòcò; manè̄ d́ō zi phĭ zu phŭ hlemo tòcò mègè Prò̆fèt aplè tòcò gōnu lò lò.

Dèb́èlò̄ D́ĕd́òròkhè
( Mattĕo 5.38-48 ; 7.12a )

²⁷ “Barasă jò d́ò̆sa thĭ htè asòkhĕńe jè tòcò jo; B́èlò̄bò̄ thĭ d́ĕd́òròkhè. Mèbò̄ adèwè̄dèsè̆ thĭ ńò tòcò anikhĭ dè aè lò.

²⁸ Hôwîbò̄ bija ahôkî̆kkè thĭ tòcò nu, kî thèb́è̆htabò̄ bija amèjūlakăkè thĭ tòcò anikhĭ.

²⁹ Bija kè d́è thĭ nèhtî dòkhò̆ d́ō d́ab́a ni dò̆ cè alewe dòkhò̆; bija gī phîthĭwī thĭ scid́ŏ akhlŏ d́ō, thĭ scid́ŏ abu ḿî ḿî id́òbò̄ cè cè.

³⁰ Bija gā da thĭ dè dimimi d́ō ibò̄ cè, bija gî̄ phîthĭwī thĭ dè domomo d́ō, dagebò̄ ḿè cè ḿè.

³¹ Mèbò̄ bija acab́ô̆ thĭ thaèni bija mèni thĭ atherĕ nu.

³² “Thĭ kè̄ b́èlò̄ ma htĕ bija ab́èlò̄ thĭ tòcò lò d́ō, akhlŏhtamame ḿîbò̄ danè̄? Manè̄ d́ō dèkhòwèpho tòcò ḿî ḿî b́èlò̄ bija htè ab́èlò̄ cè lò lò.

³³ Thĭ ḿî mèni dè aè htĕ bija htè amèni thĭ dè aè tòcò lò d́ō, thĭ gī nib́è za d́ò̆ dèhôwî cadè̄? Manè̄, dèkhòwèpho tòcò ḿî ḿî mè tèpwè we gōnu.

³⁴ D́ŏ dèthaènige alīabwî akhoacè̆ thĭ ki iphîilò ma bija d́ō, thĭ nikhĭ akhlŏhtamame gī ḿîbò̄ danè̄? Manè̄ d́ō, dèkhòwèpho tòcò mèthè̆ gōnu lò nî̄. Dèkhòwèpho tòcò hnò̆nu iphîilò we dèkhòwèpho alewe tòcò nu cab́ô̆htè zi gī nigebò̄ pwĕ ci igè nu.

³⁵ B́èlò̄bò̄ thĭ d́ĕd́òròkhè kî mèni cè tòcò dè è dè ò̆; ilòiphîbò̄, barasă gomoi ḿè alīabwî ḿè. Thĭ gî̄ nib́èkò̆ asôahlè̆ adoamu, kî thĭ gî̄ ḿîkò̆ B́ĭcè Ahtajîgudŭ aphoali. Manè̄ d́ō Zî ḿî akhòwèhmòb́è adî thîhè̆ dèhludètă ńò kî akî̆kkèmèhlò̆ tòcò nu.

³⁶ Khòwèhmòb́èbò̄ dè acab́ô̆ thĭ Pa khòwèhmòb́è dè akhò̆ nu.

Dècirraphame Bija
( Mattĕo 7.1-5 )

³⁷ “Cirraphame ḿè dè ḿè; thĭ kè tè b́èbò̄ dècirraphame ńò. Cirra ḿè bija ḿè, thĭ kè tè b́èbò̄ dècirra thĭ ńò. B́ăplèbò̄ bija adèkèḿè. Kî thĭ dèkèḿè kè̄ b́è b́ăplèkò̆.

³⁸ Ibò̄ bija dè kî dè ki ikò̆ thĭ. Tònī, sanī, htodijī nī lablîlablôbò̄. Acab́ô̆ thĭ gô thĭ htè̆tca dè atherĕ nu dè gô̄gô gè̄htè̆gekò̆ thĭ.”

³⁹ Kî Cò d́ò̆sagè lōwa tòcò dègèlè dèdè̆, “Agādŭkhi hèihŭ zabò̄ agādŭkhi klè ā? Gībwè lōlō da ladēnimè rò bu ńò ā?

⁴⁰ Bōhmubicè do dokhlŏlĭ asara ńò, barasă ab́è thèhlô̆ hwă tapla nu, bò̄bwè̆ lò̆ jāthô za tèpwè asara.

⁴¹ “No do gomopani ńòthò̆ zegle aò na gādŭbu ńò hnò̆nu, na tcahtî ma dèkîńîkôńô d́ŏ nè thè̆buwe agādŭ bu nè?

⁴² Kî ńò kò d́ò za nè thè̆buwe, ‘Thè̆buwe, ji gî̄ phîhtakè̆ d́ò̆è dèkîńîkôńô dŏ na gādŭbu nu.’ Ḿî na da tcahtî ma zegle aò na gādŭbu tòb́ò̆ ńò nè? Nè, bwètòṕòkho, cwihtaphlòkè̆ ŭsu mò̄kô zegle aò d́ŏ na gādŭbu nu, kî na gā tcahtî thoŏthèèkò̆ dèkîńîkôńô d́ŏ nè thè̆buwe agādŭ bu, cab́ô̆htè ne gè̄ khwèhtaphlòkè̆ zabò̄ nu.

Tho Tòb́ò̆ kî Athè
( Mattĕo 7.16-20 ; 12.33-35 )

⁴³ “Manè̄ d́ō tho awî dè thèhtai kèhta athè adî wî ńò, kî tho adî wî ńò dè thèhtai kèhta athè awî ńò.

⁴⁴ Manè̄ kòd́òdo dō, wi thîhè̆ thokî athè lò nu. Manè̄ d́ō, bija te d́ea thod́ohtĭthè d́ŏ dèscudèphî̆ alò kî thobiscithè d́ŏ zòzwizòbrè̄ alò dakha ńò.

⁴⁵ Bija awî dèbwè phî̆hta tèpwè dè aè d́ŏ dèlīdobwîthè̆ aò lè̄plo ca thaobu nu, kî bija akî̆kkè dèbwè phî̆hta dè atè è ńò tòcò d́ŏ zè dè lè̄ge ca thaobu nu. Manè̄ kòd́òdo dō, d́ŏ dèòpĕhta bija athaobu tòcò aklè̆ bija alòmò jî̄b́è phlò̆hta kò̆.”

Aprahi Gībwè
( Mattĕo 7.24-27 )

⁴⁶ “Thĭ jo hwă Jè, ‘B́ĭcè, B́ĭcè,’ d́ō thĭ dè mèkô ma Jè dèhtulahmèla akă ńò nè?

⁴⁷ Gajă bija alehtî Jè, asòkhĕńe Jè dèjî̄b́è kî alôkômèkô akă tòcò nu, Jè kè d́è̆lî̄kò̆ thĭ, za lakî danè̄ nu.

⁴⁸ Zî ḿî bija htè aprahi dawa, akhu lajò̄ akăd́ò̆ abu kî asòthŏi akăd́ò̆ kî lo alò dèbwè nu. Htĭdoblîb́a kî htĭlò̄ papipapò̆ plè̆wè̄ nòthò̆ hi alò hnò̆nu, ade gleglā ńò. Manè̄ d́ō, akăd́ŏla d́ŏ lo akho akhoacè̆ lò.

⁴⁹ Barasă bija htè asòkhĕńe hwă Jè dèjî̄b́è kî adèmèkô akă ńò dèbwè nu, zi ḿî acab́ô̆ bija htè aprahi d́ŏ hazekho kî hi akăd́ò̆ tò ò ńò dèbwè nu, htĭlò̄ doblîb́a kî awū d́ō hi gephlò laphra kè̆ô tèpwè azî̄azô̄ d́o!”

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan