Bìoball air-loidhne

Lŭka 3 - Geba Roman New Testament

Zowănnī Baptĭsta
( Mattĕo 3.1-12 ; Mărko 1.1-8 ; Zowănnī 1.19-28 )

¹ B́ĕ Tibĕrio Caĕsarè ŭidè pĕhta scijèd́e ted́e, b́ĕ Pò̆nsio Pilăto ḿî Judĕage Amādo, kî Èrŏdè ḿî Galilĕage Amādo kî zè thè̆buwe Philĭpo ḿî Itŭria kî Trakonĭti Amādo, kî Lisănias ḿî Abilĕne Amādo akhî nu,

² kî Ănna kî Kaĭphas ḿî Phŭgido tòcò lò. Kib́ĭcè alē dohtî Zakarĭa apho Zowănnī b́ĕ cò ò d́ŏ lothĭḿizekho nu.

³ Kî ze legè dŏ Jòrdăno gòlò̄wē dòkhò̆b́è kî d́òŭd́ò̆sagè bija, “Bajalage thĭ ne kî khanibò̄ dèŭsab́ăhtĭ, kî Kib́ĭcè ka b́ăplèkò̆ thĭ dèkhòwè tòcò nu.”

⁴ Acab́ô̆ ahwelagè dŏ Prò̆fèt Izaĭah alòmò bu nu ad́ò: “Bija kèwohta d́ŏ lothĭḿizekho nu dèbwè d́ògè: ‘Pradòlòbò̄ Kib́ĭcè aklèthòò̆; mè danābò̄ Cè klè!

⁵ Rò gŏ arò nu kèb́è plohtagei d́ò̆è loha, khò̆mukhòlò̆ tòcò kè̄ b́è khuladēpha d́ò̆è, klè adegwe tòcò kè̄ b́è mè danāge d́ò̆è, klè ahtad́ĕlazò̄ tòcò kè̄ b́è mè d́ô̆dijī ge d́ò̆è.

⁶ Kî bija lŏcăcè gā tcahtîb́èkò̆ Kib́ĭcè adèmèhlô̆htage!’”

⁷ Cò d́ògè bija aboahò ale kha dèŭsab́ăhtĭ d́ŏ cò ò nu tòcò, “Thĭ galapumo tòcò, bò̄bwè d́ò̆sagè thĭ agè̄ sèkô̆ni Kib́ĭcè adèthèhtè ale cadè̄ bwè?

⁸ Mèbò̄ dè ajo tòcò cab́ô̆htè akè d́è̆lî̄hta thĭ dèbajalage ane d́ŏ dèkhòwè acè̆, d́òbò̄ ḿè thĭ ḿî Abraham akhwĭthèlè̆ ḿè. Jò d́ò̆sa thĭ htè Kib́ĭcè phî lo ajo tòcò kî hna kèhta za tèpwè Abraham akhwĭathèlè̆.

⁹ Manè̄, b́ĕ khŏnujo lò tîḿa b́è b́è̆lă htŏ d́ŏ thokhawilò nu; mègōnu d́ō, tho gŏ ab́ò̆ htè atè thè dò phò̆ ńò nu, kè̄ b́è gô̄ge kî kè̄ b́è htîhtanīkò̆ hmî aklè̆.”

¹⁰ Bija aboahò tòcò d́è̆ Cè, “Wè gè̄ mèb́è danè̄?”

¹¹ Cò d́òscĭge lōwa tòcò, “Bija htè ascid́ŏkhlŏ kò ò gīb́è dèbwè nu, ithòbò̄ aè̆ tò ò ńò nu tèb́è; kî adèadèò̆ ò tòcò nu, be abò̄ asò̆ta a ba tò ò̆ tòcò nu.”

¹² Adadèhmŭ tòcò nu ḿî ḿî le khagè dèŭsab́ăhtĭ kî d́è̆tcagè cè, “Sara, wè gè̄ mèb́è danè̄?”

¹³ Zowănnī d́òscĭge cè tòcò, “Da lôkhlolôb́abò̄ ḿè bija dèhmŭ d́olĭ kî dèhmèla ò thĭ kho nu ḿè.”

¹⁴ Klĭpho tòcò ḿî ḿî d́è̆gè Cè, “Wa d́ò̆! Wè gè̄ mèb́è d́ò̆ cadè̄?” Cò d́òscĭge lōwa tòcò, “Ăwūăthèphlè ḿè bija dèbwè̆ ḿè, sawè̄ darază ḿè bija alò dèkèḿè dèbwè̆ ḿè, phîni wîwîmòmòbò̄ thĭ sô thĭ hlè̆.”

¹⁵ Bija sòmò̆dôi Amèhlô̆htagedè dèbwè akhî d́ō cè tòcò htèniwĭniwani Zowănnī ale, kî zo gomo tèpwè lōwa ḿî Krĭstu d́ō,

¹⁶ Zowănnī d́òscĭge bija lŏcăcè, “Ju ŭsab́ă thĭ kî htĭ hŏ. Barasă acô̆thèlè̆ do d́olĭ jè dèbwè gē lekò̆. Ja da ta pwe akā b́ăplè Za khatòkò abi hnò̆nu ńò. Cu ku ŭsab́ăikò̆ thĭ kî Spirito Tcahtĭ kî hmî.

¹⁷ Zî phîgloi b́ab́ĕ Cu cukhò bu kî Ca ka tharakò̆ b́u d́ŏ b́uthara alle nu, kî Cò kò tònīplogekò̆ b́u asa d́ŏ Zò gòlò abu nu. Ḿî athorothakhwa nu, Zi gī scwikè̆kò̆ d́ŏ hmî ada labî̄ za ńò aklè̆ nu,” Zowănnī d́ògè cè tòcò do.

¹⁸ D́ŏ dè d́òkhŭhta adèjî̄b́è abu nu, cò d́ò̆htôlani tèpwè bija tòcò Vanzĕlō Adèthôdèthò̆.

¹⁹ Barasă mādo Èrŏdè nu, d́ŏ zò hò̆ lōwa htè zî phîge cî ṕîkò̆ ahmè̆ Herŏdea kî dèphîdèmè akî̆kkèmèhlò̆ pwĕdimi akhoacè̆ nu.

²⁰ Anu Hwă d́ō, Èrŏdè mègè dèkèḿè adogudŭ ḿî b́ĕ co d́owè̄glo Zowănnī d́ŏ dèkî̆dî̄ abu nu.

Jezŭ Kha Dèŭsab́ăhtĭ
( Mattĕo 3.13-17 ; Mărko 1.9-11 )

²¹ Bija aboahò tòcò kha hwă dèŭsab́ăhtĭ, Jezŭ ḿî ḿî khagè dèŭsab́ăhtĭ. Kî b́ĕ Cè thèb́è̆hta akhî nu, Mò̄kho b́ăhtagè,

²² kî Spirito Tcahtĭ lela Zo kho acab́ô̆ thokŏdru tèb́è nu, dè alē thèhtagè d́ŏ Mò̄kho dèdè̆ ad́ò, “Ni ḿî Jo Phokhŏ htè Jè b́èlò̄, Jè b́ètha dèbwè nu.”

Jezŭ Akhwĭthèlè̆
( Mattĕo 1.1-17 )

²³ B́ĕ Jezŭ gohta Zè dèphîdèmè nu Cè d́eb́agè sŏscĭ kî bija tòcò gomo Cè ḿî Zŏzè apho, htè Hĕli apho dèbwè nu lò.

²⁴ Hĕli apa ḿî Maddhat, Maddhat apa ḿî Lĕvi, Lĕvi apa ḿî Mèlkĭi, Mèlkĭi apa ḿî Jănnes, Jănnes apa ḿî Zŏzè,

²⁵ Zŏzè apa ḿî Mathathĭas, Mathathĭas apa ḿî Ămòs, Ămòs apa ḿî Naŭm, Naŭm apa ḿî È̆sli, È̆sli apa ḿî Naggè̄,

²⁶ Naggè̄ apa ḿî Maăth, Maăth apa ḿî Mathathĭas, Mathathĭas apa ḿî Semĕi, Semĕi apa ḿî Josèk, Josèk apa ḿî Jŏda,

²⁷ Jŏda apa ḿî Zŏnnan, Zŏnnan apa ḿî Rĕza, Zorò̆babèl apa ḿî Salathièl, Salathièl apa ḿî Neri,

²⁸ Neri apa ḿî Mèlkĭi, Mèlkĭi apa ḿî Ăddi, Ăddi apa ḿî Kosam, Kosam apa ḿî Èlmadam, Èlmadam apa ḿî Hèr,

²⁹ Hèr apa ḿî Zò̆zwè̄, Zò̆zwè̄ apa ḿî Eliĕzèr, Eliĕzèr apa ḿî Jorĭm, Jorĭm apa ḿî Mathat, Mathaat apa ḿî Lĕvi,

³⁰ Lĕvi apa ḿî Simeŏnè, Simeŏnè apa ḿî Jŭda, Jŭda apa ḿî Zŏzè, Zŏzè apa ḿî Zŏnam, Zŏnam apa ḿî Eliăkim, Eliăkim apa ḿî Melĕa,

³¹ Melĕa apa ḿî Mè̆nna, Mè̆nna apa ḿî Matthăta, Matthăta apa ḿî Nathan, Nathan apa ḿî htè Dăvid nu.

³² Dăvid ḿî Jè̆sse, Jè̆sse apa ḿî Obèd, Obèd apa ḿî Bŏaz, Bŏaz apa ḿî Psălmo , Psălmo apa ḿî Naăsson,

³³ Naăsson apa ḿî Amĭnadab, Amĭnadab apa ḿî Amĭn, Amĭn apa ḿî Ărni, Ărni apa ḿî Èsròm, Èsròm apa ḿî Phărès, Phărès apa ḿî Jŭda,

³⁴ Jŭda apa ḿî Jăkòb, Jăkòb apa ḿî Izăko, Izăko apa ḿî Abraham, Abraham apa ḿî Thărè, Thărè apa ḿî Nakòr,

³⁵ Nakòr apa ḿî Sèrŭk, Sèrŭk apa ḿî Ragău, Ragău apa ḿî Phălèk, Phălèk apa ḿî Ĕbèr, Ĕbèr apa ḿî Săle,

³⁶ Săle apa ḿî Kainăn, Kainăn apa ḿî Arphazad, Arphazad apa ḿî Sèm, Sèm apa ḿî Nŏah, Nŏah apa ḿî Lamèk,

³⁷ Lamèk apa ḿî Mathŭzèlè, Mathŭzèlè apa ḿî Ĕnòk, Ĕnòk apa ḿî Jărèd, Jărèd apa ḿî Malalĕe, Malalĕe apa ḿî Kainăn,

³⁸ Kainăn apa ḿî Ĕnòs, Ĕnòs apa ḿî Sèth, Sèth apa ḿî Adam htè Kib́ĭcè thè̆ne b́òlagè dèbwè nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan