Bìoball air-loidhne

« Roimhe

Air adhart »

Lŭka 22 - Geba Roman New Testament

Dèhô̆lă Jezŭ
( Mattĕo 26.1-5 ; Mărko 14.1 , 2 ; Zowănnī 11.45-53 )

¹ Akhî b́ôhtîgè Toko Gimi Ta pa ńò Apwè̆do htè bija jo Păskwa nu.

² Phŭgido tòcò kî Skrĭbāpho tòcò kŏhtakjalagè agè̄ mèthĭ Jezŭ, ḿî zi scisănigè bija aboahò ale.

Jŭda Hô̆lă Jezŭ
( Mattĕo 26.14-16 ; Mărko 14.10 , 11 )

³ Sătana lenīgè Jŭdas htè ami ḿî Iskariŏta kî aḿî bōhmubicè scigībwè aklè̆ dèbwè nu abu.

⁴ Zè hèhta kî jî̄b́èdòdòhtîgè Phŭgido tòcò kî adôi Zarādo klĭpho akhoane tòcò cab́ô̆htè ci ki ila phlòḿĭbò̄ Jezŭ d́ŏ lōwa tòcò acukhòbu nu.

⁵ Cè tòcò thaganāi kî laglahlè lōwa akî icè hô̆ lò.

⁶ Jŭda ḿî ḿî ŏlăgè lōwa tòcò agā wāhlè huzò akròabe cab́ô̆htè agī ila Jezŭ anikhĭ dè ad́îd́ăkaklè tò òbò̄ ńò nu.

Dèpradòlò Păskwa Adèa
( Mattĕo 26.17-25 ; Mărko 14.12-21 ; Zowănnī 13.21-30 )

⁷ B́ĕ Toko Gimi Ta pa ńò Apwè̆do b́è nu, Păskwa adèa anikhĭ thŏ kè̄ b́è dè mèthĭgè.

⁸ Jezŭ thodŏle Petru kî Zowănnī, Cò d́ò, “Le kî pradòlòbò̄ wi nikhĭ cab́ô̆htè wa ka abò̄ Păskwa adèa nu,” Cò d́ò lōwa do.

⁹ Cè tòcò d́ò, “Na thaèni dè ale d́òlè̄?” cè d́è̆ lōwa tòcò do.

¹⁰ Ḿî Cò d́ò lōwa tòcò, “Tcabò̄, b́ĕ thĭ lenī u bu akhî nu, thĭgè htèglè̄ni bija ahèj́ai htĭgobo dèbwè, hèkô ze le htô̆ thĭ dole hi d́ŏ ze lenī abu dawa nu.

¹¹ Mèhwă thĭ kò d́òb́è hib́icè gōjo, ‘Sara thaè thîhè̆ hid́o htè Ca kā a plo Zo bōhmubicè tòcò Păskwa adèa ò d́òlè̄ nu,’ Zè hmèla lōwa tòcò do.

¹² Hib́icè gè d́è̆lî̄kò̆ thĭ d́ŏ hi agò̄hta dòdò hiò̆bu aò pradòlò, d́ŏnu pradòlòbò̄ dèa pwè̆ anikhĭ,” Cò d́ò lōwa tòcò do.

¹³ Cè tòcò le kî tcahtîgè acab́ô̆ Jezŭ d́ò̆sa cè tòcò atherĕ nu lò. Kî cè tòcò pradòlògè Păskwa adèa anikhĭ.

Eukaristĭa Tcahtĭ
( Mattĕo 26.26-30 ; Mărko 14.22-26 ; 1 Kòrĭn 11.23-25 )

¹⁴ B́ĕ akhîb́è nu, Jezŭ phîgè ale d́ŏ cud́èkho nu kî Co bōhmubicè tòcò òkôgè Ca kă.

¹⁵ Cò d́ògè lōwa tòcò, “Dukhlŭkî Ja khab́è dèssègnè̆bòdò hnî̆ńò nu, Ja thaè akô sôgè thĭ kă Păskwa adèa ajo.

¹⁶ Jò d́ò̆sa thĭ, dè ajo gî̄ dî phî̆hta d́ŏ Kib́ĭcè Ahtĭage abu ńò athŭtherĕ, Ja ka ta ab́èkò̆ dèa ajo taplă be ńò,” Cò d́ò lōwa tòcò do.

¹⁷ Mèhwă Zî phî phală, Za htăhtai Kib́ĭcè, Cò d́ò, “Phîbò̄ phală ajo, belanihlèbò̄ lōwa kî ò̆bò̄.

¹⁸ Jò d́ò̆sa thĭ, cahta khŏnujo htô̆do Kib́ĭcè Ahtĭage abu dè gî̄ dî phî̆hta hnî̆ńò nu, Jò tò ò̆bekò̆ thobiscihtĭ ajo ńò.”

¹⁹ Mèhwă Zî phî toko, Za htăhtai Kib́ĭcè, Ca b́apha kî Ci igè lōwa tòcò kî Cò d́ò, “Ajo ḿî Je neb́î̆cè htè akè b́è ila thĭ nikhĭ. Mèbò̄ dè ajo dègomohtani Jè anikhĭ,” Cò d́ògè lōwa do.

²⁰ Cab́ô̆ gōnu akhò̆, Ca a hwă toko d́ō, Zî phî phală, Cò d́ò, “Phală ajo ḿî dèlagla athè̆ d́ŏ ji thwi abu nu, htè akè b́è hlòlakò̆ thĭ nikhĭ dèdè̆ nu.

²¹ “Tcabò̄, ahô̆lă Jè dèbwè òkôwe Ja kă b́ĕ cud́èkho nu.

²² Bija Apho nu zô gô̄ lôkô dèhtulahmèla ni Cè klè ale kî gī thĭ b́è tèpwè. Barasă dè gā bakò̆ bija ahô̆lă Cè dèbwè anikhĭ!” Cò d́ò do.

²³ Mègōnu d́ō, cè tòcò d́è̆cahlègè lōwa htè agè̄ mè dè anu d́ŏ cè klè̆ gî̄ ḿîgè bò̄bwè nu.

Dèdara Ab́èkja Adogudŭ

²⁴ Bōhmubicè tòcò darahlègè lōwa htè d́ŏ cè tòcò aklè̆ adogudŭ ḿî bò̄bwè nu.

²⁵ D́ō Jezŭ d́ògè cè tòcò, “Bwèthŭkupho asaphra tòcò ŭicai tèpwè cè tòcò acab́ô̆ cî b́icèklèhtò nu, kî bija ad́è̆lî̄hta ahĭahtè̆ tòcò nu mè tèpwè acab́ô̆ aigetcage dè tòcò akhò̆ nu.

²⁶ Barasă thĭ dî ḿîb́è gōnu ńò. Ḿî d́ŏ thĭ klè̆ adogudŭ dèbwè gî̄ ḿîb́è acab́ô̆ asciphogudu nu, kî akhoane dèbwè nu gî̄ ḿîb́è acab́ô̆ zôbwè nu dòkhò̆.

²⁷ Asańălăò d́î̆wāhtî dèbwè kî amèamèò̆ ni cè dèbwè azo nu ado d́osè ḿî d́òlè̄ dèbwèbwè? Asańăla a dè dèbwè tè b́è ńò ā? Barasă d́ŏ thĭ klè̆ nu jî ḿî acab́ô̆ amèamèò̆ ni bija dèbwè lò.

²⁸ “Thĭ ḿîwe tèpwè acab́ô̆ bija akhab́èplo jè dèhtodèba tòcò nu.

²⁹ Acab́ô̆ ja Pa ilani jè akhò̆ nu, jî ilani thĭ htĭge, cab́ô̆htè thĭ ka akò ò̆plobò̄ jè d́ŏ ji htĭ je ge abu nu.

³⁰ Kî thĭ ka a kòò̆kôb́è d́ŏ Ji htĭ je ge acud́èkho, kî thĭ gā sańăla ò d́ŏ Ja Kăsană tòcò akho kî cirra b́èkò̆ Israè̆lpho scigīkhwĭ nu,” Cò d́ògè lōwa tòcò do.

Petru Adèjab́i
( Mattĕo 26.31-35 ; Mărko 14.27-31 ; Zowănnī 13.36-38 )

³¹ Jezŭ d́ògè, “Simŏnè, Simŏnè! Sòkhĕńebò̄! Sătana nib́è akhwè cab́ô̆htè agè̄ mèca thĭ gŏ abwè kî hwèb́ă thĭ cab́ô̆ b́u nu.

³² Mègōnu d́ō, Jè thèb́è̆ hwă htŏ ni nikhĭ cab́ô̆htè nè dèb́u gē hmebò̄ nu. Nè dòkhò̆ ḿî ḿî nè b́è mèhmege ńò khò̆ tòcò nu,” Cò d́ògè lōwa do.

³³ Petru d́òscĭge Cè, “B́ĭcè, jò ò dòlò htô̆ agā ladēnīplo Nè dèkî̆dī abu kî thĭplo Nè htŏ,” cò d́òscĭge lōwa do.

³⁴ Jezŭ d́òge cè, “Petru, Jò d́ò̆sa nè, khô̆dèhèjo dukhlŭkî scî̆phè̆ ôhta hnî̆ńò nu, ńò gò̄ sòthô̆bô̄hnèb́i jè, htè ni dî thîhè̆ jè ńò nu thŏpla,” Cò d́ò̆sa lōwa do.

Pĭsa, Hlŭthikĭ kî D́asĕ

³⁵ Hwă d́ō, Cè d́è̆tcagè lōwa, “Hlĕ Ja b́ăhlôle thĭ agè̄ hè d́ò̆htôla dè kî Jò d́ò thĭ htè thĭ dè hèib́è pĭd́ŏpĭsa, hlŭthikĭ kî khatòkò ńò nu, dè aloba thĭ nikhĭ òbò̄ domomo ā?” Cè d́è̆ do. “Dè do lobagè dimĭ ńò,” cè tòcò d́òscĭge lōwa do.

³⁶ “Barasă khŏnujo thĭgè hèib́è pĭsa, hlŭthikĭ, kîd́ò̆ ad́asĕ tò ò ńò dèbwèbwè nu, zè sè̆kè̆b́è hwă zi scid́ŏ d́ō, zî gî̄ bwî b́è d́asĕ tèb́è.

³⁷ Manè̄, dèhwela ò tèpwè d́ŏ Cè Tcahtĭ abu gōjo, ‘Bija b́è̆lăni Cè acab́ô̆ bija akî̆kkè dèbwèbwè nu,’ kî Jò d́ò thĭ, dè ajo gē pĕhtazòhtakò̆ d́ŏ jò lò nu,” Cò d́ò̆sagè lōwa tòcò do.

³⁸ Bōhmubicè tòcò d́ò cè, “B́ĭcè, tcabò̄, d́asĕ ò tèpwè b́ĕjo gīb́è,” cò d́ò lōwa do. “Tahŏ!” Cò d́òge lōwa do.

Jezŭ Adèssègnè̆bòdò kî Adèthĭ
( Mattĕo 26.36-46 ; Mărko 14.32-42 )

³⁹ Mèhwă Jezŭ leb́agè d́ŏ Ze lenènò ale, htè aḿî Òlĭvo khòlò̆ ò nu. Bōhmubicè tòcò lekôgè Ca kă.

⁴⁰ B́ĕ Zo dolegè alleaklè nu, Cò d́ògè lōwa tòcò, “Thèb́è̆htabò̄ cab́ô̆htè thĭ gā da lakhunibò̄ dèhnakă aklè̆ ńò nu.”

⁴¹ Mèhwă d́ō Jezŭ le d́ŏ ahlò̆mò̄ dehwĕlo kî dōhnŏla thèb́è̆gè gōjo,

⁴² “Ŏ Apa, akè b́è b́eḿĕ Na tha d́ō, phîkè̆nibò̄ jè phală ajo, barasă tè b́è jè dèthaèni ò adĕ ńò, ḿî agî̄ ḿî d́ò̆è htĕ ab́è Na tha lò,” Cò d́ò do.

⁴³ Mò̄khobwèzo aò d́ŏ Mò̄kho dèbwè pòhtahtî Cè kî d́òkhŭd́òmògè Cè.

⁴⁴ D́ŏ dèthoscilathazela azî̄azô̄ abu, Cè thèb́è̆hta lŏtholŏthagè kî Zi htĭ Co tho phî̆htagè athwi ahte tòcò, acô̆hlôla d́ŏ Lākho nu.

⁴⁵ Zè wè̄hto leb́a kètca Co bōhmubicè tòcò nu, ḿî cè tòcò sòḿĭthebĕgè dèothootha abu.

⁴⁶ Cò d́ògè lōwa tòcò, “Thĭ sòḿĭthebĕ manè̄? Wè̄hto kî thèb́è̆htabò̄ cab́ô̆htè thĭ da khab́èbò̄ dèhnakă ńò nu,” Cò d́ò lōwa do.

Dèphò Jezŭ
( Mattĕo 26.47-56 ; Mărko 14.43-50 ; Zowănnī 18.3-11 )

⁴⁷ B́ĕ Cò d́ò thebĕ gōnu, Jŭdas htè aḿî bōhmubicè scigībwè aklè̆ dèbwè nu, leihŭgè bija aboahò dopho d́ŏ Cò ò nu. Jŭda leb́ôhtî Jezŭ kî zò phòb́a hnŭẃigè lōwa.

⁴⁸ Jezŭ d́ògè cè, “Jŭdas, ne lehô̆lă Bija Apho kî dèhnŭẃi dikhli lò ā?” Cè d́ògè lōwa do.

⁴⁹ B́ĕ Jezŭ akhò̆ tòcò tcahtîb́ègè dè thamò̆ phî̆hta dimimi d́ō, cè tòcò d́ò Jezŭ, “B́ĭcè, wa gè̄ mèib́è d́asĕ ā?” cò dò do.

⁵⁰ Cè tòcò aklè̆ dèbwè hlò̆wè̄ bēgè Phŭgima azôpho dèbwè anigu adèhtwè dòkhò̆ nu.

⁵¹ Jezŭ d́ògè cè tòcò, “Tahŏ!” Mèhwă d́o Jezŭ phôd́òwè̄ge anu dèbwè anigu.

⁵² Kî Jezŭ d́ògè Phŭgido kî Zarādo anedothabwe tòcò gōjo, “Thĭ phî d́asĕ, hnèmū kî lehtî ma jè acab́ô̆ jî ḿî bija akî̆kkè dèbwè nè?

⁵³ Jò òkôwe thĭ kă dini hwă dini d́ŏ Zarādo abu nu, thĭ de jehta ma thĭ cukhò jo kho dèbwè̆ ńò. Barasă khŏnujo ḿîgè thĭ è̆ akhîagla, kî dèkhi adènodèbè,” Cò d́ò lōwa do.

Petru Adèjab́i
( Mattĕo 26.57 , 58 , 69-75 ; Mărko 14.53 , 54 , 66-72 ; Zowănnī 18.12-18 , 25-27 )

⁵⁴ Bija phò Jezŭ kî hèi phlòḿĭgè Cè d́ŏ Phŭgima ahi nu, kî Petru lôkô ze le d́ŏ adòbò lò.

⁵⁵ Bija b́ô̆gèhta hmî d́ŏ hi ad́ŏdaglā nu kî sańăgè hmî akhahtî kî Petru sańăla òkôgè bija akă.

⁵⁶ Zômo dèbwè tcahtîgè cè d́ŏ hmî ahlî̆klè̆ nu. Za tcawè̄ dîgrî̄nî̄ hwă lōwa d́ō, cò d́ògè, “Ajo dèbwè òkôthè̆ Jezŭ akă nī!” cò d́ò do.

⁵⁷ Petru jab́i kî cò d́ò, “Amihmu! Jî dî thîhè̆ Cè ńò,” Cò d́ògè do.

⁵⁸ Alekă tod́o be, alewe dèbwè tcahtî cè kî cò d́ò, “Nî ḿîthè̆ Cè klè̆ dèbwè lò nî̄!” Petru d́òscĭge cè, “Athò! Tè b́è jè ńò!” cò d́ò do.

⁵⁹ Mèhwă ò d́ò̆ danare be d́ō, alewe dèbwè d́òsôd́òhmagè, “Ajo dèbwè ḿî bija aòkô hnèhnè Ca kă hŏ! Manè̄, zî ḿî Galilĕapho!” cò d́ò do.

⁶⁰ Petru d́ògè cè, “Athò, ńò d́ò danè̄ ḿî jî dî thîhè̆ nè è̆ ńò,” cò d́ògè do. B́ĕ cò d́ò thebĕ gōnu, scî̆phè̆ tèb́è ôhtagè.

⁶¹ Kîd́ò̆ b́ĕnu, Jezŭ d́ab́a kî tcawè̄gè Petru, kî Petru gomohtanigè B́ĭcè adèjî̄b́è, “Khŏdènè jo dukhlŭkî scî̆phè̆ ôhta hnî̆ńò nu, na gā jab́ikò̆ jè thŏpla,” nu.

⁶² Petru cwèhta akhlŏ kî za ha thĕbwethîlî̆gè.

Jezŭ B́è mèjomèlè̄ kî B́èdeb́èbo
( Mattĕo 26.67-68 ; Mărko 14.65 )

⁶³ Bija adôi Jezŭ tòcò mèjomèlè̄ kî mūhtagè Cè.

⁶⁴ Cè tòcò b́ò̆b́i hwă lōwa agādŭ tîkî̆jā kî cè d́è̆gè lōwa, “D́ò caḿa, amū nè ḿî bò̄bwè?”

⁶⁵ Kî cò d́ò jūlakăkè we lōwa pwĕdimi be.

Jezŭ B́èhtôb́èd́è̆
( Mattĕo 26.59-66 ; Mărko 14.55-64 ; Zowănnī 18.19-24 )

⁶⁶ Alekă dòwò, anedothabwe, Phŭgido kî Skrĭbāpho tòcò leigè Jezŭ d́ŏ Dèladēplo ale kî cò d́ò lōwa,

⁶⁷ “D́ò̆sabò̄ wa, Nè nu, ni ḿî Mèssĭah hŏ ā?” Jezŭ d́òge cè tòcò, “Jò kò d́ò̆sa thĭ ḿî tè b́è thĭ kū b́u jè ńò.

⁶⁸ Jè kè d́è̆ thĭ ḿî tè b́è thĭ kò d́òscĭ ńò ńò.

⁶⁹ Khŏnujo phlò̆ ahlò̆mò̄ nu, Bija Apho dèbwè nu Za gā sańălakò̆ d́ŏ B́ĭcè Dèdòdothedo acudèhtwè dòkhò̆b́è nu,” Cò d́ò lōwa do.

⁷⁰ “Mègōnu Nî ḿî Kib́ĭcè Apho ā?” Cè tòcò d́è̆tca ploplogè lōwa do. Cò d́òscĭge lōwa tòcò, “Thĭ d́ò tèpwè thè̆ jî ḿî hŏnî̄,” Cò d́ò lōwa tòcò do.

⁷¹ Cè tòcò d́ògè, “Alobawed́ò̆ da thè̆thî be nè? Wi thîhè̆b́è htŏ Cè thè̆ne alòmò bu,” cè tòcò d́ògè do.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan