Lŭka 21 - Geba Roman New Testament

Ahmugèmè Adèhlu
( Mărko 12.41-44 )

¹ Jezŭ tcahta d́ō Cè kèhtî bija ajèdā tòcò le hlònī adèhlu d́ŏ Zarādo adèhlu akŏ bu nu,

² kî Ca tcahtîkô ahmugèmè assègnè̆ dèbwè le bè̆nī krelî gībe lò.

³ Jezŭ d́ò, “Jò d́ò̆sa thĭ adî̄ahma, ahmugèmè dèbwè jo b́è̆nī adèhlu òè d́olĭ kî bija alewe tòcò nu.

⁴ Manè̄ d́ō, cè tòcò ila adèhlu d́ŏ cè è̆ pĭd́ŏpĭsa akholakăsè tòcò aklè̆ lò. Ḿî cè jo, zè ssègnè̆ nòthò̆ hnò̆nu, dè htè aòni cè lŏcăcè nu ci ila htŏ,” Cò d́ò̆sa lōwa tòcò do.

Zarādo Adèlaphra
( Mattĕo 24.1 , 2 ; Mărko 13.1 , 2 )

⁵ Bōhmubicè tòcò dòdò̄i lo htè bija prai Zarādo kî dè ab́èhluhtai B́ĭcè tòcò wî zî̄ mò zî̄ awîakè̆ lò.

⁶ Jezŭ d́ò cè tòcò, “Dè htè thĭ tcahtî tòcò jo lŏcăcè ka lamulaphra lōkò̆ kî lo dèmè̆ tò òdab́è be allele ńò, b́ĕ akhî kè̄ b́è nu,” Cò d́ò̆sagè lōwa tòcò do.

Dèbadèsè̆ kî Dèlômèssègnè̆ tòcò
( Mattĕo 24.3-14 ; Mărko 13.3-13 )

⁷ Cè tòcò d́è̆tca Jezŭ, “Sara, dè gè̄ mèd́ò̆ ane gōnu htôdè̄? Agî̄ phî̆htab́è htôdè̄? Kî ahô̆agèlè kè d́è̆lî̄hta ane htè dè gî̄ phî̆hta nu cadè̄?” cè d́è̆tca lōwa do.

⁸ Jezŭ d́ò cè tòcò, “Sòiwāibò̄ thĭ ne; i ḿè bija hlòniplèni thĭ ḿè. Bija òè̆bwè gē le hlòniplèni thĭ kî d́òla ane ‘Zî ḿî Jè!’ kî ‘Asŏakhè̆ b́è htŏ!’ Barasă d́ō, lôkôbò̄ ḿè ze le ḿè.

⁹ Thĭ gî̄ thîhè̆ dèd́odèphja kî dèkòthò̆gòrò ad́ĕad́ò d́ō scisăthabobò̄ ḿè. Dè ajo tòcò lŏcăcè gî̄ phî̆hta ŭsu b́è tèpwè. Nòthò̆ hnò̆nu tè b́è dè akŭdu b́ôhtî hnî̆ńò.”

¹⁰ Hwă d́ō Jezŭ d́òwe, “Bija dikhwĭ kî dikhwĭ, htĭge dege kî dege, ko d́ohlèphjahlè lōwa.

¹¹ Dè ale dagwālè̄ lākho gō bo sô, dèthaẃilad́ò, dèscwidèsè̆ awe kò òhta dagwālè̄ d́o. Dèscisăthabo adoamu kè d́è̆lî̄hta ane d́ŏ Mò̄kholè̄ nu.

¹² Barasă d́ō, dè ajo tòcò dè sè̆ phî̆hta ńò nu, bija kô phò gō cŏ thĭ, mèssègnè̆ thĭ, kî dè gè̄ sè̆lă thĭ, gô̄ htô gè̄ d́è̆kò̆ thĭ d́ŏ sinagŏgā Hwă d́ō gî̄ htînī thĭ d́ŏ dèkî̆dî̄ bu nu. D́ŏ Ji mi akhoacè̆, thĭ kè̄ b́è jolekò̆ d́ŏ sophrŏsaphra tòcò kî aŭidè tòcò ahlò̆mò̄ nu

¹³ D́ŏ dèjo akhoacè̆, thĭ gī nib́èkò̆ akhwè d́ŏ thĭ kò d́ò̆sab́è Dèthaganāi Awîakè̆.

¹⁴ Gōnu acè̆, b́èhjŏb́èma kî prahnèsèhnè dòlòbò̄ ḿè thĭ ne d́ŏ thĭ kò d́òscĭb́è danè̄ nu ḿè.

¹⁵ Manè̄ d́o, Ji ki ila thĭ dèjî̄b́è kî dèthîd́ôthîhè̆ htè thĭ d́ĕd́ò tòcò tò d́òscĭge kî htakhokă kèhta thĭ dèbwè̆ ńò nu.

¹⁶ Thĭ mo thĭ pa, thĭ thè̆buthè̆we, thĭ khwĭ thĭ khò̆ kî thĭ khò̆golō tòcò gô̄ hô̆lăkò̆ thĭ; kî d́ŏ thĭ klè̆ kè̄ b́è dèmèthĭkò̆ tòcò cò.

¹⁷ Jo kho jè cè̆, bija gè̄ dèwè̄dèsè̆kò̆ thĭ ńò.

¹⁸ Nòthò̆ hnò̆nu thĭ khulŭ tòb́ò̆ tè b́è hlè̆mè̄ b́è ńò.

¹⁹ Òsò̆hto hmeglobò̄, kî thĭ gī nib́èkò̆ dèhlô̆htage.

Jerŭsalèm Adèlaphra
( Mattĕo 24.15-21 ; Mărko 13.14-19 )

²⁰ “Thĭ gā tcahtî klĭpho tòcò we khwè̆b́a Jerŭsalèm u d́ō, thîhè̆bò̄ tò òjî̄ ńò agā laphrab́è b́ôhtîgè nu.

²¹ Anu tapla bija htè aò d́ŏ Judĕage tòcò b́è cwèhtaphlòḿĭ d́ŏ khò̆mukhòlò̆ alò nu. Bija aò u abu tòcò b́è cwèhta d́ŏ u akhlŏ lò. Bija aò d́ŏ u akhlŏ tòcò tè b́è lenī u abu ńò.

²² Manè̄ kòd́òdo dō, dè ajo tòcò ḿî dècirra amunimuthè̆ htè Cè Tcahtĭ hwela gē pĕhtazòhtab́è akhî nu.

²³ B́ĕ aniathè̆ tòcò nu, amihmu amuthèd́ŏ kî ab́oò̆ apho nu tòcò gā khab́èkò̆ dèssègnè̆ pwedè̄ lò? Dèbassègnè̆ adoamu gē lehtîkò̆ htĭge tèb́è jo, kî Kib́ĭcè adècirra gā lab́èkò̆ bija dikhwĭ jo.

²⁴ Bija tòcò cò kè̄ b́è mèthĭikò̆ d́asĕ, kî tòcò cò kè b́èphòb́ècŏ kî jolei d́ŏ htĭge tòcò; kî bwèthŭkupho tòcò gā jālakò̆ Jerŭsalèm u akho htô̆do zo sŏ zè khè̆ kŭdu nu.

Bija Apho Adèlela
( Mattĕo 24.29-31 ; Mărko 13.24-27 )

²⁵ “Dègèlè kè d́è̆lî̄htakò̆ d́ŏ lumu, hlè̆ kî sè tòcò abu nu. Htĭge lŏcăcè d́ŏ Lākho akho, atha gè̄ hèwî̄hèkè̆kò̆ kî gī scisăthabokò̆, htĭ pèllè gè̄ kèwo kî htĭ khlodo gè̄ htèpapò̆kò̆.

²⁶ Bija gī thĭmūklèkò̆ d́ŏ dèscisăthabo akhoacè̆, b́ĕ cè tòcò òsô̆wô̄i dè gè̄ mè ane Lākho thèd́è̆b́è akhî nu. Manè̄, dècô̆thèlè̆ aò d́ŏ Mò̄kholè̄ tòcò gò̄ phlòhtakè̆kò̆ akròabe abu.

²⁷ Anu tapla Bija Apho kò d́ò hwă dè̄tob́o d́ŏ dèdòdothedo kî dècô̆dothèlè̆htô̆ abu nu.

²⁸ B́ĕ dè ajo tòcò tcahta mè ane nu, wè̄sò̆hto jehtabò̄ thĭko, manè̄, dèhlô̆htage b́ôhtî htŏ.”

Thod́ohtĭthè Agèlè
( Mattĕo 24.32-35 ; Mărko 13.28-31 )

²⁹ Hwă d́ō Jezŭ d́ò̆sagè cè tòcò dègèlè gōjo, “Tcabò̄, thod́ohtĭmu kî tho alewe kô̆ akho nu.

³⁰ B́ĕ thĭ tcahtî ahlè d́òzehta nu, thĭ thîhè̆ tèpwè htè thathîkhè̆ b́ôhtî htŏ nu.

³¹ Acab́ô̆ gōnu akhò̆, b́ĕ thĭ tcahtî dè ajo tòcò mè ane nu, thîhè̆bò̄ Kib́ĭcè Ahtĭage b́ôhtî htŏ nu.

³² “Jò d́ò̆sa thĭ adî̄ahma, dè ajo tòcò dèsè̆ phî̆hta hnî̆ńò nu, bija ajo durū de le phlòtôlô b́è ńò.

³³ Mò̄kho kî Lākho gē le phlòtôlô tèpwè, barasă Je lē Jè hwè de le phlòtôlô b́è ńò.

Dèsòiwoi

³⁴ “Sòiwōibò̄ thĭ ne cab́ô̆htè thĭ dè mè lōsŏlōkhè̆bò̄ thĭ ne d́ŏ dèò̆hmuapò kî dèb́èhjŏb́èma lākho adèò anikhĭ nu ḿè. Tè b́è ńò d́ō Muni anu dini gō dohtî gôlô̄gele thĭ lò.

³⁵ Manè̄ d́ō agò̄ dohtî bija Lākhopho gŏ abwè acab́ô̆ dēkha nu.

³⁶ Dôi kî thèb́è̆htabò̄ cab́ô̆htè thĭ gī nib́è dèkhodèă, kî thĭ gē le phlòtôlô thuŭthèè zabò̄, kî sò̆htob́èbò̄ d́ŏ Bija Apho ahlò̆mò̄ nu.”

³⁷ Jezŭ thôlathò̆la dè d́ŏ Zarādo abu b́ĕ lumusèkhè̆ nu, Hwă d́ō b́ĕ lumuhè akhî nu, Za htagè d́ŏ Òlĭvo Khòlò̆ alò nu.

³⁸ B́ĕ lumuwòthab́ĭ akhî nu, bija aboahò lŏcăcè le d́ŏ Zarādo, cab́ô̆htè cò kò sòkhĕńe Zè dèthôlathò̆la nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan