Bìoball air-loidhne

Lŭka 20 - Geba Roman New Testament

Jezŭ Acô̆athèlè̆
( Mattĕo 21.23-27 ; Mărko 11.27-33 )

¹ Dinitèthè̆ b́ĕ Jezŭ thôithò̆i bija d́ŏ Zarādo abu, kî d́ò̆htôd́ò̆dèlèi Vanzĕlō akhî nu, Phŭgido tòcò kî Skrĭbāpho tòcò kî athobwethabwe tòcò lehtî Jezŭ kî cò d́ò lōwa,

² “D́ò̆sabò̄ wa, nè mè dè ajo tòcò ḿî ni nib́è akhwè d́òlè̄? Bò̄bwè ila nè dè dècô̆thèlè̆ bwè?” cè tòcò dè̆gè lōwa do.

³ Jezŭ d́òscĭge cè tòcò gōjo, “Jè kè d́è̆ d́ò̆ thĭ, d́ò̆sa tca ma jè dèdè̆.

⁴ Zowănnī adèŭsab́ăhtĭ ḿî Kib́ĭcè icè dècô̆thèlè̆ ā? Bija icè dècô̆thèlè̆ ā?” Cè d́è̆gè lōwa tòcò do.

⁵ Cè tòcò d́òsahlè lōwa, “Wò kò d́ò ma ‘Kib́ĭcè icè dècô̆thèlè̆,’ d́ō ‘Thĭ tu b́u ma cè ńò nè?’ Cè kè d́è̆ wa do.

⁶ Wò kò d́ò ma ‘Bija icè dècô̆thèlè̆,’ d́ō, bija ge hwĕ tèpwè wa lo. Manè̄, bija b́ugè htè Zowănnī ḿî Prò̆fèt dèbwè akhoacè̆ nu,” cò d́òhlègè lōwa do.

⁷ Kî cè tòcò d́ògè, “Ai cè dècô̆thèlè̆ ḿî bò̄bwè nu wî dî thîhè̆ ńò.”

⁸ Mègōnu Jezŭ d́òscĭge cè tòcò, “Jè ḿî ḿî Jè mè dè ajo tòcò ḿî da acô̆thèlè̆ abu nè nu, jò tò d́ò̆sa thĭ ńò ńò,” Cò d́òscĭge lōwa tòcò d́o.

Akhwèi Thobiscimu Agèlè
( Mattĕo 21.33-46 ; Mărko 12.1-12 )

⁹ Jezŭ d́ò̆sagè bija dègèlè dèdè̆, “Bija dèbwè solaigè thobiscimu dege, kî htŭngāgè bija akhwèi cè è̆ tòcò. Mèhwă ze legè d́ŏ htĭlegejî nu òjî̄òkja d́o.

¹⁰ B́ĕ dèthèdèphò̆ b́èhta akhî nu, zo thodŏlegè zô zôpho dèbwè d́ŏ akhwèi thobiscige tòcò ò nu, cab́ô̆htè zi gī nib́ège thobiscithè klămôklăḿè̆ nu. Ḿî cè tòcò de bo hwă cè, hnage thèd́è̆gè lōwa.

¹¹ Geb́îcè thodŏle zôpho alewe dèbwè be; barasă cè tòcò de bo hwă cè, hnage hlôthô̆ lōwa lò lò.

¹² Geb́îcè thodŏle kòd́ò̆ zôpho thŏbwè dèbwè be; barasă cè tòcò mèkĕmèbrô hwă cè, htîphlòḿĭ lōwa d́ŏ htărā akhlŏ nu.

¹³ Geb́îcè gomogè, ‘Jè gè̄ mèb́è danè̄? Jo gō thodŏle jo pho thè̆ne dòkhò̆. Cè tòcò ka j́ab́è bò̄d́ò̆ lōwa lòmò̄!’ cò d́ògè do.

¹⁴ Barasă b́ĕ akhwèi thobiscimu tòcò tcahtî cè nu, zò d́ò za sa hlè lōwa, ‘Ajo ḿî agī nib́è apa aculekhakho dèbwè nu. Gè̄ mèthĭ cè cab́ô̆htè wi gī nib́è ca pa aculekhakho nu!’ cò d́òhlè lōwa do.

¹⁵ Mèhwă d́ō cè tòcò htîphlòḿĭ hwă lōwa d́ŏ htărā akhlŏ nu, zè mèthĭgè lōwa. “Mègōnu akhoacè̆, thobiscige B́ĭcè gè̄ mèkò̆ cè tòcò cadè̄?

¹⁶ Ze gē le mèthĭmèhlè̆mè̄kò̆ akhwèi thobiscige tòcò nu, kî ci ki ikò̆ bija alewe co thobiscige,” Cò d́ò̆sagè lōwa tòcò do. Cè tòcò thîhè̆b́è dè ajo d́ō, cò d́ò lōwa, “Adèmèb́è bò̄dò̆è do ńò!” cò d́ò do.

¹⁷ Jezŭ tcawè̄ hwă cè tòcò, Cò d́ò, “Dèhwela ajo dèdè̆ ḿî danè̄? ‘Lo htè apradè tòcò htî phlòḿĭkè̆ dèmè̆ kèhtagè hi anebu akăd́ò̆.’

¹⁸ Gajă bija aladē lo anu tod́ŏ akho tòcò nu, zè htè iklôîklè tèpwè. Ḿî lo gā ladē ma zo kho d́ō, zu gū hmu gî̄ i tèpwè,” Cò d́ògè lōwa do.

Dèd́è̆ Ab́èkja Caĕsarè Adèhmŭ
( Mattĕo 22.15-22 ; Mărko 12.13-17 )

¹⁹ Phŭgido kî bija Skrĭbāpho tòcò thaè phò cŏ danā Jezŭ b́ĕnu lò. Manè̄, zi thîhè̆ Jezŭ thaè d́ò cè tòcò akhoacè̆ nu, ḿî zi scisăni bija tòcò ale.

²⁰ Mègōnu d́ō, cè tòcò dôi akhîagla. Zo thodŏle bija atcahui dè htè ad́òla ane adî̄ahma tòcò gē lehtî Cè, cab́ô̆htè zî gî̄ phî dèkèḿè d́ŏ lōwa adèjî̄b́èdòdò aklè̆, kî ci ki ilaphlòḿĭ lōwa d́ŏ Mādo atcai htĭge tòcò acukhòbu nu.

²¹ Bija atcahui dè tòcò d́è̆ Cè, “Sara, wi thîhè̆ tèpwè nî jî̄b́èdòdò thôithò̆i bija d́ŏ ab́èklèthòò̆ abu lò. Kî na da tca bija amūkă dèbwè̆ ńò, ḿî nò thôithò̆i tèpwè dè d́ŏ Kib́ĭcè adèdî̄dèhma aklèthòò̆ abu lò.

²² Wi kī i Caĕsarè dèhmŭ nu ab́èklèbò̄ ā? ńò ā?” ce d́è̆ lōwa do.

²³ Jezŭ thîhè̆ co b́o tho b́otha lōwa acè̆ d́ō, Cò d́òge lōwa tòcò,

²⁴ “D́è̆lî̄bò̄ jè denărio tèb́e. D́ŏ alò nu bò̄bwè ajò kî alleaklè ò bwè?” Cè d́è̆ge lōwa tòcò do. Cè tòcò d́òscĭge, “Caĕsarè è̆,” cò d́ò lōwa do.

²⁵ Cò dò lōwa tòcò, “Mègōnu d́ō, ibò̄ Caĕsarè htè ab́èkja Caĕsarè nu kî ibò̄ Kib́ĭcè htè ab́èkja Kib́ĭcè nu,” Cò d́ògè lōwa tòcò do.

²⁶ Cè tòcò dî phîni Zè dèjî̄b́è akèḿè d́ŏ bija ahlò̆mò̄ ńò, zè htèdômô̄dahmă d́ŏ lōwa adèd́òscĭge d́ō, zô bôlab́igè zò lòmò tòcò.

Saducè̆pho tòcò kî Dètaboge
( Mattĕo 22.23-33 ; Mărko 12.18-27 )

²⁷ Hwă d́ō Saducè̆pho htè atu b́u dèhtaboge ńò tòcò lehtî Jezŭ kî d́è̆gè Cè,

²⁸ “Sara, Mŏzè hwelanigè wi nikhĭ htè amikhŏ dèbwè phî hwă ahmè̆ dèbwè, zi gī thĭ sò̆dopho ma d́ō, zî gî̄ phîgeb́è ahmugèmè khŏnu dèbwè kî lakhwĭ niblô zè mè̄ anikhĭ, zè hwela do.

²⁹ Khŏnujo athè̆buwe ò thăthô dèbwè. Adobwe dèbwè phî hwă ahmè̆ thĭ sò̆dophogè.

³⁰ Gībwè dèbwè phîge cè, barasă cè ḿî ḿî thĭ sò̆dophogè gè.

³¹ Thŏbwè dèbwè phî cè; gōnu akhò̆, thăthô dèbwè lōlō thĭ sò̆dophogè.

³² Agudulă amihmu ḿî ḿî thĭgè gè.

³³ Mègōnu, b́ĕ dèhtaboge amuni nu, zî gî̄ ḿîgè d́òlè̄ dèbwèbwè ahmè̆ bwè? Manè̄ d́ō thăthô dèbwè lōlō phîgè cè acab́ô̆ zè hmè̆ nu,” cè d́è̆gè Jezŭ do.

³⁴ Jezŭ d́òscĭge cè tòcò, “Lākhopho tòcò phîcu kî isanihlè lōwa aphoahmè̆,

³⁵ barasă bija atani dèò alākho kî dèhtaboge tòcò nu dî phîpho phîhmè̆ tèpwè ńò.

³⁶ Manè̄, za jăthô mò̄khobwèzo lò kî zi di thĭ b́è be ńò. Kî zî ḿî Kib́ĭcè apho, htè dèhtaboge apho tòcò nu.

³⁷ D́ŏ Mŏzè adèhwela abu ògè hlî̆hlî̆plăplă d́ŏ bija athĭ tòcò b́è b́awè̄htoge nu. Mŏzè kèhtî hmîgè̄hòa zòzwi akhè̆ nu, Dèado d́ògè ‘Jè ḿî Abraham Ab́ĭcè, Izăko Ab́ĭcè kî Jăkòb Ab́ĭcè.’

³⁸ Mègōnu, Kib́ĭcè dî ḿî athĭ tòcò Ab́ĭcè ńò, ḿî aò tòcò Ab́ĭcè. Manè̄ d́ō, bija lŏcăcè òkô cè akhoacè̆ lò,” Cò d́ògè lōwa tòcò do.

³⁹ Skrĭbāpho tòcò d́òge Jezŭ, “Sara, ńò d́ò za zî̄ hŏ!”

⁴⁰ Mèhwă bija tè d́è̆ b́u be Cè dè dèbwè̆ ńò.

Dèd́è̆ Ab́èkja Dăvid Apho
( Mattĕo 22.41-46 ; Mărko 12.35-37 )

⁴¹ Barasă Jezŭ d́ògè cè tòcò, “Bija tòcò d́ò za Krĭstu ḿî Dăvid apho cadè̄?

⁴² Manè̄ d́ō d́ŏ Psălmo acè abu nu Dăvid thè̆ne d́ògè; ‘Dèado d́òge jî B́ĭcè, Sańăbò̄ d́ŏ Ju cudèhtwè dòkhò̆,

⁴³ htô̆ Jè mèni Ne d́ĕd́òròkhè tòcò Ja khajāla nu.’

⁴⁴ Dăvid jogè Cè ‘B́ĭcè’; mègōnu d́ō Zî gî̄ ḿî za lōwa apho cadè̄?” Cò dè̆gè lōwa tòcò do.

Skrĭbāpho tòcò Adèmèbarasa
( Mattĕo 23.1-36 ; Mărko 12.38-40 )

⁴⁵ Kîd́ò̆ bija aboahò sòkhĕńe phătha cè akhî nu, Jezŭ d́ògè abōhmubicè tòcò,

⁴⁶ “Thidĭibò̄ Skrĭbāpho tòcò nu htè ab́èlò̄ thò hwă scid́ŏdò̄dô, ahè bija ahlò̆mò̄, athaèni bija adèd́ŏdèj́a d́ŏ bija aboahò ahlò̆mò̄, athagolō sańăò d́ŏ ale gudŭhta d́ŏ sinagŏgā abu kî hibu pwè̆bu tòcò nu.

⁴⁷ Htè ahjŭnīa ahmugèmè ahiaphă, kî athèb́è̆ òjî̄òkja brasa tòcò nu! Bija ajo tòcò kè b́èkò̆ dècirra a sô̆!” Cò d́ò̆sagè lōwa tòcò do.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan