Bìoball air-loidhne

Lŭka 14 - Geba Roman New Testament

Bwèsè̆ Ahjòhtĭ Dèbwè

¹ Dinitèthè̆ htè b́ĕ Munisòd́è̆ nu, Jezŭ lenīgè d́ŏ Pharizè̆pho akhoane dèbwè ahibu ḿî cab́ô̆htè ca kā abò̄ dèa nu d́ō, cè tòcò tcahugè Cè.

² D́ŏ Zò hlò̆mò̄ nu amikhŏ ahjòhtĭ ògè dèbwè.

³ Kî Jezŭ dè̆gè Skrĭbāpho kî Pharizè̆pho tòcò, ki Cò d́ò, “Munisòd́è̆ nu gè mèhlè̆mè̄ dèsè̆ aza tèpwè ā?” Cè d́è̆gè lōwa tòcò do.

⁴ Barasă cè tòcò tab́ab́a ò do lò. Jezŭ mèhmage hwă cè d́ō Za hnagegè lōwa.

⁵ Mèhwă Cò d́ògè lōwa tòcò, “D́ŏ thĭ klè̆ nu bija dèbwèbwè apho dèbwè ḿĭdîḿî ńò abo tod́ŏ gā ladēnima bòbu b́ĕ Munisòd́è̆ d́ō, agē de le cwihtaphlòkè̆ge cè taplakhă lò ńò nu òbò̄ dèbwèbwè ā?” Cè dè̆gè lōwa do.

⁶ Ḿî cè tòcò tò d́òscĭge zagè dèbwè̆ ńò.

Dèsalatha kî Dèmèi Tî̆tèḿè̆

⁷ Jezŭ d́ò̆sa we dègèlè dèdè̆ be htè ab́èkja bija ale pwè̆bu tòcò le ăwū lōwa alleaklè aŭsu akhoacè̆ nu kî Cò d́ò,

⁸ “B́ĕ nè kèb́è jole dèphîcu apwè̆bu akhî nu, le ò ḿè d́ŏ ale ahlò̆mò̄ ḿè. B́eḿĕ bija adokhlŏ nè gē ledo ma d́ō,

⁹ hib́icè kò d́ò nè, ‘Dothophlòḿĭ tîkî hwă ibò̄ bija ajo dèbwè ale tîkî!’ d́ō ne ge le òb́èkò̆ d́ŏ ale agudulă d́ŏ dèthăwā abu nu.

¹⁰ Ḿî ne gē le ò d́ŏ ale agudulă nu d́ō hib́icè kò d́ò nè, ‘Athò htabò̄ ahlò̆mò̄ tîkî!’ nu, ni gī nib́èkò̆ dètcamūkă d́ŏ aletcaplo nè pwè̆ tòcò ahlò̆mò̄ nu.

¹¹ Manè̄ kòd́òdo dō, gajă bija abè̄htahtô̆ ane tòcò nu kè̄ b́è bè̄b́ôlakò̆, kî gajă bija abè̄b́ôla ane tòcò nu kè̄ b́è bè̄htajîkò̆,” Cò d́ògè lōwa do.

¹² Jezŭ d́òwe hi B́ĭcè ajo Cè hi dèbwè gōjo, “B́ĕ no jo hi jo phă, b́oab́oò̆ bija akhî nu, jobò̄ ḿè htĕ ńò thò ne d́e, nè thè̆buthè̆we, ni khwĭ ńò khò̆ kî bija aòb́ôhtî nè tòcò lò ḿè. B́eḿĕ cè tòcò gō jo hi jo phăge nè alī d́ō, ni gī nib́ège tèpwè ni lī nè khè.

¹³ Ḿî b́ĕ na kha pwè̆ kha la akhî nu, jo kè bò̄ assègnè̆pho, acuhtè̆dū khadege, akhed́ekhigād́ŭkhi tòcò nu dòkhò̆.

¹⁴ Nè kè̄ b́è dèhôwî, manè̄ d́ō cè tòcò ti igetcage za nè dimĭ ńò. Ḿî dè ki igekò̆ nè alīakhè b́ĕ adî̄ahma tòcò adèhtaboge ani nu!” Cò d́ògè lōwa tòcò do.

Lumuhè adèa Pwè̆do Agèlè
( Mattĕo 22.1-10 )

¹⁵ B́ĕnu aòplo Cè d́î̆wāhtî dèbwè d́ò, “Ab́èhôwî ḿî bija akhapwè̆khala d́ŏ Kib́ĭcè ahtĭage abu dèbwè nu!” cò d́ògè Jezŭ do.

¹⁶ Jezŭ d́òscĭge cè, “Bija dèbwè mègè lumuhè adèa pwè̆do kî zo jo cè kègè bija òèòò do.

¹⁷ Zo thodŏlegè zô zô zè bwè agē le d́ò̆sa bija ab́èjob́èkè tòcò nu htè dèò apradòlò htŏ gŏmihtĭda nu.

¹⁸ Ḿî cè tòcò htohlô̆ ane dèbwè hwă dèbwè lò. Aŭsu dèbwè d́ò, ‘Jî bwîgè lākho taklaẃa kî je gē le tcahub́è cè, khòthad́ò̆bò̄ jè tîkî.’

¹⁹ Kî alewe dèbwè d́ò, ‘Jî bwîgè bo jè̄dwè kî je gē le thèihŭ b́è cè tòcò, ja damò nè, khòthad́ò̆bò̄ jè tîkî.’

²⁰ Kî alewe dèbwè d́ò, ‘Jî phîgè ju cukhò, mègōnu d́ō, je de le za tèpwè nè pwè̆bu ńò.’

²¹ Zôbwè ge d́ò̆sage hi B́ĭcè dè awîakè̆ tòcò jo nu. Hib́icè thèhtègè kî cò d́ògè zô zô zè bwè, ‘Le plaplă d́ŏ klèdo klèpho tòcò abu kî ge joi assègnè̆pho, acudegēkhatòkò, agādŭkhî kî akhad́e tòcò nu,’ cò d́ò lōwa tòcò do.

²² Tò òjî̄ ńò, zôbwè doge d́ò cè, ‘Sara, wè mèkô htŏ nè dèhmèla akă hŏ, barasă alleaklè òwe tèpwè,’ cò d́ò̆sa lōwa do.

²³ Mègōnu d́ō hib́icè d́ògè zôbwè, ‘Hèkô klèdo, klèpho kî htărā we, thĭ kèhtî bija arră hna lenī cè tòcò pwè̆bu cab́ô̆htè ji hi ge pĕhtabò̄ nu.

²⁴ Jò d́ò̆sa thĭ gajă bija ab́èjob́èkè ŭsu tòcò nu, ka ta ab́è ju lumuhè adèa ńò,’ cò d́ògè lōwa do.”

Dèlôkô Krĭstu Ale
( Mattĕo 10.37 , 38 )

²⁵ Tapla b́ĕ bija aboahò lôkôgè Jezŭ akă akhè̆ nu, Ca tcab́a lōwa tòcò kî d́ò,

²⁶ “Bija alôkô Je le tòcò gè̄ tè b́èlò̄ Jè d́olĭ kî ma ca pa, zo mo, zè hmè̆, zo pho zi li, zè thè̆buthè̆we kî ze neb́î̆cè hnò̆nu ńò nu, zî dî phî̆hta za Jo bōhmubicè ńò.

²⁷ Kî bija ata j́a hwă aKrusu ńò kî dô lôkô Je le ńò dèbwè nu zî dî phî̆hta za Jo bōhmubicè ńò.

²⁸ Manè̄ d́o d́ŏ thĭ klè̆ nu bija htè athaè prahta hi htajî dèbwè nu, dukhlŭkî ca prahta hnî̆ńò nu, za da sańă kî d́ôtca ŭsu alīabwî ńò nu òbò̄ dèbwèbwè ā?

²⁹ Dî ḿî ma ńò d́ō, zo gohta hwă akhahtî ada hwă ni ze le ńò nu bija atcahtî tòcò kò d́òjod́òlè̄ cè kî kò d́ò,

³⁰ ‘Bija ajo dèbwè prahta hwă hi ajo dawa ada hwă ni ze le ńò,’ cò kò d́ò tèpwè lōwa do!

³¹ Saphra athaè htad́ĕd́ògè saphra alewe dèbwè nu gā da sańă kî d́ôtca ŭsu zi klĭ zè bwè abwè tòthò̆ gā khascĭ kèhtabò̄ ce d́ĕd́ò klĭ abwè gīthò̆ nu ā?

³² Agî̄ dî ḿî gōnu ńò d́ō, b́ĕ saphra alewe dèbwè òwe d́ŏ ajî nu za gā hna le tèpwè zè bwèzo tòcò agè̄ mèthĭ so tè b́è ńò ā?

³³ Cab́ô̆ gōnu akhò̆, d́ŏ thĭ klè̆ nu bija htè adè lè̄dakè̆ adî̄adè ńò dèbwè nu zî dî phî̆hta za mèjo bōhmubicè ńò.

D́ithè Agèlè
( Mattĕo 5.13 ; Mărko 9.50 )

³⁴ “D́ithè ḿî aè hŏ. Barasă agò̄ phŏ ma d́ō gè̄ mèscĭ i d́ò̆ cè danè̄ be?

³⁵ Ada wanè be gè mèi lākho ahtoatcă hnò̆nu be ńò. Ga bāphlòḿĭb́è cè be lò. Bija anigu ò dèbwè gî̄ thîhè̆ d́ò̆è!” Cò d́ògè lōwa tòcò d́o.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan