Bìoball air-loidhne

Kòlò̆ssia 2 - Geba Roman New Testament

¹ Ja thaèni thĭ gî̄ thîhè̆ htè ju wuthè̆dèba thĕbwethîlî̆ d́ŏ thĭ nikhĭ, bija aò d́ŏ Laodĭsea tòcò anikhĭ kî bija htè adè kèhtî dî thîhè̆ jè ńò tòcò anikhĭ khĭ nu.

² Jè mè dè ajo ḿî acab́ô̆ cè tòcò kò ò pĕhtazòhta kî dèthakhŭthahè̆, kò òbò̄ dèthalajīplo d́ŏ dèb́èlò̄thòklè̆ abu, kî gī nib́è dèlīdobwîthè̆ adèaḿăkhai apĕazò, htè dèhtî̆nigô̄ni adî̄ahma lei nu. D́ŏ dèjo abu, cè tòcò gî̄ thîhè̆kò̆ Kib́ĭcè adèhudèb́i, htè aḿî Krĭstu thè̆ne nu.

³ Krĭstu ḿî hnèwî̄kă, htè ab́ătab́ăkè̆ Kib́ĭcè adèhtî̆nigô̄ni kî adèthîd́ôthîhè̆ lŏcăcè, htè aḿî dèlīdobwîthè̆ aòhuòb́igè nu.

⁴ Mègōnu d́ō, jò d́ò̆sa thĭ, ibò̄ ḿè bija hlònicwini thĭ d́ŏ dèhtadohtara akèḿè tòcò, htè ală kî cè tòcò è̆ ḿî ab́èabò nu ḿè.

⁵ Manè̄ kòd́òdo dō, jò tò òkô nòthò̆ thĭ kă ńò hnò̆nu, ja tha ḿî aòkô tèpwè thĭ kă. Jè kèhtî thĭ òjīòd́wă, thĭ òhmeòglo d́ŏ dèb́u Krĭstu abu acè̆, athaganāi tèpwè jè.

Dèpĕdèzò d́ŏ Krĭstu Abu

⁶ Tcahta b́ĕ thĭ phînigè Jezŭ Krĭstu acab́ô̆ Kib́ĭcè nu, ò thôḿô̆bò̄ d́ŏ Zu bu nu.

⁷ Solajò̄bò̄ thĭ khawi d́ŏ Zu bu, b́òhtaprahtabò̄ thĭ dèòthôḿô̆ d́ŏ Zò lò, mèhmemèglobò̄ thĭ dèb́u acab́ô̆ Cè thèhlô̆gè thĭ nu. Ò pĕhtakîbò̄ dèkòihtăi Zu hlu Ca tă.

⁸ Cab́ô̆htè thĭ kè tè b́è pônihjani thĭ d́ŏ Lākhopho adèhtî̆nigô̄ni ahnahnă hnahnă tòcò ńò anikhĭ nu, sòiwoibò̄ thĭ ne. Dèthèhlô̆ ajo tòcò ḿî bija è̆ anuad́ò̆ kî Lākho ab́icèklèhtò atha adèila, tè b́è Krĭstu ila aè̆ ńò.

⁹ Kib́ĭcè agujū apĕazò b́è d́è̆lî̄htagè d́ŏ Krĭstu anebî̆cè alò, b́ĕ Cò ò thôḿô̆we acab́ô̆ bija akhè̆ nu.

¹⁰ Thĭ òthôḿô̆gè d́ŏ Krĭstu, htè ahtakho d́olĭ dèŭi ab́èkja tha adècô̆thèlè̆ lŏcăcè akho dèbwè abu akhoacè̆, thĭ nib́è Spirito Tcahtĭ adèila apĕazò lò.

¹¹ Thĭ òthôḿô̆gè d́ŏ Krĭstu abu akhoacè̆, thĭ nib́ègè dèhô̆rîkî̆, tè b́è d́ŏ bija mèni thĭ neb́î̆cè alò ńò. Ḿî dèhô̆rîkî̆ ab́èkjakî Krĭstu, htè amèhlô̆htage thĭ d́ŏ dèkhòwèkhòkha dòkhò̆ nu.

¹² Manè̄ d́ō, b́ĕ thĭ ŭsab́ă htĭ akhè̆ nu, thĭ b́è b́ŭlă ploplogè Krĭstu kî thĭ b́è b́awè̄htoge ploplo kî Krĭstu d́ŏ dèthĭ aklè̆ d́ŏ thĭ dèb́u Kib́ĭcè acô̆thèlè̆ htè ab́awè̄htoge Krĭstu d́ŏ dèthĭ aklè̆ acè̆ nu.

¹³ Hlĕ aŭsu nu, d́ŏ thĭ dèkhòwè acè̆ kî thĭ ḿî bwèthŭkupho htè adèthôdèthò̆ tò ò ńò acè̆, thĭ ḿî bija athĭgè d́ŏ Spirito Tcahtĭ nu. Barasă khŏnujo, Kib́ĭcè b́awè̄htoge thĭ ploplo kî Krĭstu d́ŏ dèthĭklè̆ nu.

¹⁴ Zè mèkè̆mèôgè dèb́èplege dèkhòwèkhòkha acè̆ lŏcăcè, kî dèhmèlad́îd́ă adèthôdèthò̆ tòcò d́ŏ dèhtalawè̄ Krusu alò nu.

¹⁵ D́ŏ Krusu alò nu Krĭstu b́ăplèkè̆ kî hwĕphlòḿĭgè dètha B́ĭcè tòcò kî aŭidè tòcò acô̆thèlè̆, Za hna kèhtagè lōwa tòcò dètcai alle, acab́ô̆ dèhmòle bija ab́èphòb́ècŏ tòcò d́ŏ dèmèbè asciapwè̆ bu akhò̆ nu.

¹⁶ Mègōnu akhoacè̆, ibò̄ ḿè bija cirra nè ab́èkja dè htè na a ńò ò̆ ḿîwî, munimuthè̆ aladū asciapwè̆ ḿîwî, hlè̆htaze asciapwè̆ ḿîwî, Munisòd́è̆ ḿîwî nu dèbwè̆ ḿè.

¹⁷ Dè ajo lŏcăcè ḿî agè̄ mèkò̆ ane d́ŏ alekă d́òbĕ tòcò ahô̆agèlè lò. Ḿî ḿî dè ahnèhnè ḿî Krĭstu lò.

¹⁸ Ibò̄ ḿè bija htè ad́òla ane adoamu d́ŏ adètcahtî còklî acè̆, asala mômā ane, athèb́è̆ Mò̄khobwèzo tòcò d́òkè̆d́òô thĭ ḿè. Bija acab́ô̆ ajo tòcò gomohtajîlage hnahnă hnahnă ane lò.

¹⁹ Cè tòcò tò d́ògòdòi Krĭstu cab́ô̆ aḿî zè dèneb́î̆cè ako, htè ahtôimāi neb́î̆cè thèd́è̆bwè phod́ògloi amē kî awiahtrô tòcò, kî amè dohta dèneb́î̆cè acab́ô̆ Kib́ĭcè adèthaèni ò adĕ be ńò.

Dèthĭ kî Dèthôḿô̆ Ploplo kî Krĭstu

²⁰ Thĭ thĭplogè Krĭstu kî thĭ b́è dèmèhlô̆htagegè d́ŏ Lākho ab́icè tòcò adèŭi alè̄ nu htŏ. Mègōnu d́ō, thĭ ò thôḿô̆we ma acab́ô̆ bija ab́èkja Lākho tòcò akhò̆ nu nè? Thĭ phîgloi we ma dèmèd́u tòcò,

²¹ htè ad́ò, “Bōwè̄ ḿè ajo alò ḿè. Dîtca ḿè dè ajo ḿè. Tòb́è tab́è ḿè ajo ḿè,” nu nè?

²² Dè ajo dalā ḿî dè htè bija sòthŏi hwăgè kî ada wanè be ńò, ḿî bija mèhta adèthôdèthò̆ kî bija adèhmèla tòcò lò.

²³ Dèthôdèthò̆ ajo tòcò d́è̆lî̄hta tèpwè dèhnasô agè̄ thèb́è̆ Mò̄khobwèzo, dèsala mômā ane, dèmèzômèsè̆ lage ane lò. Barasă, ḿî d́ŏ dèwoi anebî̆cè adèthaèni anikhĭ ahtanilani tò ò tèpwè dimĭ ńò.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan