Bìoball air-loidhne

Kòlò̆ssia 1 - Geba Roman New Testament

¹ D́ŏ jè, Păulu kî wè thè̆buwe Timò̆theo, htè aḿî Krĭstu Jezŭ abija Thodŏpho tòcò aò, acab́ô̆ Kib́ĭcè adèthaèni akhò̆,

² hweni bija tcăhtĭ Kòlò̆ssiapho, htè wè thè̆buwe aò hmeglo d́ŏ Krĭstu abu tòcò cèborŏ: Kib́ĭcè ki ila d́ò̆bò̄è thĭ dèhôwîhômò kî dècodèkhli.

Dèd́òhlud́òtă Adèthèb́è̆

³ B́ĕ wè Thèb́è̆hta thĭ nikhĭ nu, wî thîhè̆htage Kib́ĭcè, htè B́ĭcè Jezŭ Krĭstu Apa thèjô̆ lò.

⁴ Manè̄, wî thîhè̆b́è thĭ dèb́udènè d́ŏ Krĭstu Jezŭ abu kî thĭ dèb́èlò̄ bija tcăhtĭ lŏcăcè akhoacè̆ nu.

⁵ B́ĕ dèwîdèkè̆ adî̄ahma htè Vanzĕlō dohtî thĭ aŭsugudŭ tapla nu, thĭ thîhè̆b́ègè dèsascĭi awîakè̆ lò. Mègōnu d́ō, thĭ dèb́udènè kî thĭ dèb́èlò̄ ad́ògòdòhtai ane d́ŏ thĭ dèsascĭi, htè ab́èprahnè thĭ nikhĭ d́ŏ Mò̄kho acè̆ nu.

⁶ Dèthalōthalai awîakè̆ lei kè dèhôwîhômò, ahèbrègè Lākho thèd́è̆b́è, acab́ô̆ thĭ thîhè̆b́è hwă Kib́ĭcè adèhôwî akăhtî gudŭ tapla nu, thĭ nib́è ahluată kî thîhè̆gè htè aḿî adî̄ahma akhò̆ nu.

⁷ Thĭ thîhè̆b́ègè d́ŏ bija htè Kib́ĭcè b́èlò̄ Epaphras ò nu. Cè ḿî wô blô, Krĭstu akhî̆abwè adî̄ahma dèbwè nu.

⁸ Cò d́ò̆sagè wa thĭ dèb́èlò̄ d́ŏ Kib́ĭcè atha ila thĭ awîakè̆ nu.

⁹ Mègōnu d́ō, hlĕ wa tcahta thîhè̆b́è thĭ wî thĭ kè̆ be be nu, wò dò sò̆tab́a thèb́è̆hta thĭ nikhĭ ńò. Wa da Thèb́è̆hta thĭ nikhĭ ḿî acab́ô̆ Kib́ĭcè gè̄ mè pĕhtabò̄ dèthîhè̆ Zè dèb́ètha, d́ŏ thĭ dèhtî̆nigô̄ni kî dèthîhè̆nigu lŏcăcè htè Kib́ĭcè Atha ilani thĭ nu.

¹⁰ Kî thĭ kò òthôḿô̆kò̆ acab́ô̆ Kib́ĭcè adèthaèni ò adĕ kî mèmòtha thèjô̆kò̆ Cè. Thĭ dèòthôḿô̆ ki ihtakò̆ dèmè awîaè gŏ amo, kî thĭ gō dohtakò̆ d́ŏ dèthîhè̆ Kib́ĭcè abu nu.

^11-12 Kî thĭ gī nib́è d́ò̆è dèikhoiă thĭ d́ŏ Kib́ĭcè acô̆thèlè̆ lŏcăcè htè apĕhtakî dèhĭdèhtè̆, cab́ô̆htè thĭ gā khakèhtabò̄ dè gŏmihtĭda d́ŏ dèthozôthazô abu nu. Kî d́ŏ dèthalōthala abu kòihtăi Pa, htè abelani thĭ nikhĭ dèila cab́ô̆htè thĭ gī nib́è plobò̄ bija tcahtĭ tòcò d́ŏ dèhlî̆ ahtĭage abu nu.

¹³ Zi cwihtaphlògè kè d́ŏ dèkhidènè adèŭi abu, Za zāhtage kè d́ŏ Zo Pho Cè b́èlò̄ dèbwè ahtĭage abu,

¹⁴ htè d́ŏ Zo kho Zè cè̆ kè̄ b́è dèbwîge, kî ajo ḿî, wè dèkhòwè b́è b́ăplègè nu.

Krĭstu kî Adèmè

¹⁵ Krĭstu ḿî Kib́ĭcè htè ka da tcahtî za ńò ahô̆ajò lò. Cè ḿî Kib́ĭcè Aphodobwe htè aò ŭsu kî adò htajî d́olĭ dèb́èb́òla alewesòsŭ lŏcăcè lò.

¹⁶ Manè̄, d́ŏ Krĭstu nu Kib́ĭcè b́òlagè dèlŏcăcè htè aò d́ŏ Mò̄kho kî Lākho, dè htè gā tcahtî za kî ka da tcahtî za ńò tòcò, dècô̆thèlè̆ ab́èkja tho kî tha tòcò, b́icè tòcò, aŭi htĭge tòcò, acô̆thèlè̆ ò tòcò nu. Kib́ĭcè b́òla Mò̄kho Lākho d́ŏ Krĭstu acè̆ kî Krĭstu anikhĭ lò.

¹⁷ Krĭstu òhta ŭsu d́olĭ dèlŏcăcè, kî dèlŏcăcè ò d́ŏ Zu cukhò bu lò.

¹⁸ Krĭstu ḿî dèòplo ako, kî dèòplo ḿî Krĭstu anebî̆cè lò. Cè ḿî dèneb́î̆cè adèthôḿô̆ akhahtîkhab́ò̆ lò. Cè ḿî Pho adobwe, htè ab́èb́awè̄htoge d́ŏ dèthĭklè̆, cab́ô̆htè Cè htĕ dèbwè lò gî̄ ḿîbò̄ dèlŏcăcè akho nu.

¹⁹ Manè̄ kòd́òdo d́ō, Kib́ĭcè b́èthagè d́ŏ Zô hô̆ Zè gèlè apĕazò kò ò d́ŏ Krĭstu abu,

²⁰ kî d́ŏ Zo Pho acè̆, Kib́ĭcè gō joge Mò̄kho kî Lākho dèlŏcăcè d́ŏ Cò ò, kî d́ŏ Zo Pho adèkhathĭ ane d́ŏ Krusu alò akhoacè̆, Zè mèjīmèd́wăge dè htè aò Mò̄kho kî Lākho lŏcăcè kî joge cè tòcò d́ŏ Cè thè̆ne aò nu.

²¹ Tapla nu thĭ òjîkî Kib́ĭcè, thĭ htad́ĕd́ògè Cè d́ŏ thĭ dègomogamā kî dèphîdèmè akî̆kkèmèhlò̆ tòcò abu lò.

²² Barasă Pho anebî̆cè thè̆ne adèthĭ acè̆, Kib́ĭcè mèthògegè thĭ, cab́ô̆htè Zo gō joge thĭ d́ŏ Cò ò, kî d́ŏ Cò hlò̆mò̄ nu thĭ kè̄ b́è mètcahtĭ. Mèwî mè è, mèhlô̆ dèkhòwèkhòkha kî òhlô̆òlakî dèkèḿè anikhĭ nu.

²³ Dè alobawe domo ḿî thĭ gò̄ bò̄kô b́è dèdî̄dèhma kî solahmeglobò̄ thĭ dèb́udènè, cab́ô̆htè dèsascĭi htè thĭ nib́ègè b́ĕ thĭ thîhè̆b́è Vanzĕlō nu dèdè̆ gē de gleglābò̄ ńò anikhĭ nu. Jè, Păulu, phî̆htagè dèkhî̆dèbwè ab́èkja Vanzĕlō htè ab́è d́ò̆htôlani htŏ bija gŏ abwè d́ŏ Lakho jo nu.

Dèòplo Akhî̆abwè Păulu Adèphîdèmè

²⁴ Khŏnujo d́ŏ thĭ nikhĭ ju dub́èkhab́è akhoacè̆, athaganāi jè lò. Manè̄, je neb́î̆cè adèdub́èkhab́è jo ḿî jè mè pĕhtazòhta dè alahlî̆laphlègè ab́èkja Krĭstu anebî̆cè adèdub́èkhab́è d́ŏ Zè dèòplo anikhĭ nu.

²⁵ Kib́ĭcè hna kèhtagè jè Zè dèkhî̆dèbwè htè agè̄ mèni thĭ dè è dè ò̆, cab́ô̆htè jò kò d́ò̆htôlai Za Vanzĕlō pĕhtazòhta nu.

²⁶ Ajo ḿî Kib́ĭcè d́è̆lî̄phlò̆htagè dè ahuab́i htè Zè lè̄hugè d́ŏ bija Lākhopho ahlò̆mò̄ aphlòtôlô hlĕ hlekadè̄, hlekadè̄ nu.

²⁷ Kib́ĭcè adèprahnèdòlò ḿî Cè gè̄ d́è̆lî̄phlò̆hta Za bijakhwĭpho tòcò Zè dè ahuab́i alīdobwîthè̆ kî Zi dèhĭdohtè̆do tòcò d́ŏ bija lŏcăcè anikhĭ nu. Kî dè ahuab́i ḿîgè Krĭstu ò thĭ bu acè̆ d́ō, thĭ gī nib́èplogè Kib́ĭcè adòathe nu.

²⁸ Mègōnu d́ō, wò d́ò̆htôlani bija gŏ abwè Krĭstu awîakè̆ lò. Bija gŏ abwè gē ledobò̄ d́ŏ Kib́ĭcè ahlò̆mò̄, d́ŏ dèdohtabwehta d́ŏ Krĭstu abu anikhĭ nu, acab́ô̆ wè dèhtî̆nigô̄ni ò atherĕ nu, wi ithidĭ kî thèhlô̆ cè tòcò lò.

²⁹ Cab́ô̆htè wè dèmè ajo gā hwăbò̄ anikhĭ nu, jè mèsòẃè̆b́è̆tha kî wuthè̆dèba, sòthŏi jè dèkhob́ăădo htè Krĭstu ila jè kî mègè d́ŏ ju bu nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan