Bìoball air-loidhne

Jŭda 1 - Geba Roman New Testament

¹ Jŭdas, Jezŭ Krĭstu azôpho kî Zăkomo apîkò̆, hnŭsè thĭ htè ab́èjo tòcò, thĭ htè Kib́ĭcè Pa b́èlò̄ kî Jezŭ Krĭstu adèwoikhai tòcò.

² Dèkhòwèhmòb́è kî dèjīdèd́wă kî dèb́èlò̄ gē pĕhtazòhta d́ò̆è thĭ nikhĭ.

Sara Ajòaja

³ B́èlò̄ thĭ jò thò tòcò, ja thaè d́ò̆sa thĭ wè dènib́èplo dèhlô̆htage awîakè̆ òjî̄ htŏ, dèhnanohnabègè jè agā damò thĭ akō d́o gā phja dèb́udènè anikhĭ htè Kib́ĭcè ilani htŏ thĭ kî Zi bijakhwĭpho tòcò anikhĭ nu.

⁴ Manè̄ d́ō, bija htè ato d́ŏ ta ja Kib́ĭcè ńò tòcò nu wî̄nīsanī htŏ wo kho wè klè̆, kî cè tòcò ḿî bija htè ab́ahtèkhlè dèwîdèkè̆ ab́èkja wî Kib́ĭcè adèhludètă cab́ô̆htè akò d́òhlô̆ ane d́ŏ zè dèòthôḿô̆ akhorokhara abu kî abāphlòḿĭ wa Sara kî wî B́ĭcè Jezŭ Krĭstu, htè wo kho htĕ dèbwè lô nu. Hlĕ mocè̆kho nu Cè Tcahtĭ d́ò̆sadòlò htŏ thĭ htè cè tòcò ḿî ab́ècirragè awîakè̆ nu.

⁵ Thĭ thîhè̆b́è htŏgè dè ajo tòcò lŏcăcè hnò̆nu, Ja thaè d́òthîhè̆ thĭ htè hlĕ aŭsu nu, Kib́ĭcè mèhlô̆hta Israè̆lpho d́ŏ Izî̆t htĭge nu, ḿî alekă Zè mèkè̆ mèhlè̆mè̄gè atu b́u Cè ńò tòcò nu.

⁶ Gomohtanibò̄ Mò̄khobwèzo htè anib́è acô̆thèlè̆ ahtajî, ḿî ato ò d́ŏ alleaklè d́è̆ aè̆ lò ńò, kî ahèhtaphlòḿĭ alleaklè tòcò nu, Kib́ĭcè lè̄lagè cè tòcò d́ŏ dèlajò̄ akhithurŭ alle nu, cè tòcò b́ècŏglogè kî lahtŭlablo ahtalabi, kî agī cirrakò̆ lōwa d́ŏ muni agudulă dini nu.

⁷ Gomohtanibò̄ Sò̆doma, Gòmò̆rra kî d́ŏphă aòb́ôhtîb́ôzò cè tòcò, bija upho tòcò mègè acab́ô̆ Mò̄khobwèzo anu tòcò mè nu, kî ilagè ane d́ŏ amihmu mikhŏ dèmè akî̆kkèmèhlò̆ abu kî adèlathulakèḿè ḿî atè b́è anènò ńò abu nu. Cè tòcò khab́ègè dècirra d́ŏ hmî alahtŭlablo aklè̆, cab́ô̆htè agî̄ ḿî dèithidĭ kî ahlî̆aplă d́ŏ bija gŏ abwè anikhĭ nu.

⁸ Gōnu akhò̆, bija ajo tòcò mègōnu lò lò; d́ŏ zè dègomo kèḿè abu nu, zè mè cîb́î̆còb́ò zî neb́î̆cè kî htèkè̆htèô akhoane akhlŏ, co to d́ŏ ta jagè Mò̄khobwèzo adòdothedo tòcò nu ńò dòkhò̆.

⁹ Mò̄khobwèzodo Mikĕlè̄ hnò̆nu, b́ĕ ca ăwū Mod́èlî Mŏzè aco akhè̆ nu, cò tò d́ògè dèhôdèhò̆ ńò; agudulă cò d́ò lōwa ḿî, “B́ĭcè gò̄ hò̆ d́ò̆è nè!” dôhmô̆ lò.

¹⁰ Agî̄ ḿî d́ò̆ bija ajo tòcò jo, zî dî thîhè̆ ńò d́ō zô hô zò hò̆ kî d́òkè̆d́òô darază dè arră za tcahtîgè nu. Cè tòcò ḿî acab́ô̆ dèphodèwe amiama ado gomogamā za dè ńò tòcò akhoacè̆ agî̄ ḿîkò̆ zi nikhĭ dèthĭdèhlè̆mè̄.

¹¹ Amò scisăthabogè pwedè̄ lò! Zô lôkôgè klè htè Kaĭnō legè tòb́ò̆ nu. D́ŏ hô̆htè̆ acè̆ ci ilagè ze ne agè̄ mè dèkèḿè acab́ô̆ Balaăm mègè nu; za htad́ĕd́ògè dè acab́ô̆ Korah mè nu kî khab́ègè dèmèkè̆mèô acab́ô̆ lōwa nu.

¹² Cè tòcò adèthăwāthablè̄ tò ògè ńò, ḿî legè d́ŏ dèadèò̆ apwè̆ kî ca a cò ò̆ d́ò̆ zi nikhĭ, kî aḿîgè dè apèèpaa adèa apwè̆ nu. Cè tòcò ḿî atca htĕ anikhĭ lò. Zî ḿî acab́ô̆ dè̄tob́o ahèb́ĭ kî adu zulai hwè dehtĕ ńò dokhlo nu, mè acab́ô̆ tho htè adèthèhtaphò̆hta d́ŏ asŏakhè̆ ńò kî ab́è hjaphlòhtakè̆ d́ŏ akhawi kî athĭ hwă ahwĕakra tèpwè,

¹³ Zî ḿî acab́ô̆ pèllè papipapò̆, kî adèmè amò thăwā tòcò d́è̆lî̄hta acab́ô̆ htĭthob́o nu. Zi ḿî acab́ô̆ sèhwi tòcò htè Kib́ĭcè pradòlò alleaklè d́ŏ dèkhi alahtŭlablo aklè̆ tòcò nu.

¹⁴ Ĕnòk, htè Adam hwă patriăka thăthô dèbwè nu, cò d́ò̆sadòlò òjî̄òkjagè ab́èkja cè tòcò awîakè̆ acab́ô̆ gōjo, “B́ĭcè gā la ploplo kî Zò Mò̄khobwèzo Tcahtĭ ahtò kî ahtò,

¹⁵ kî gī cirrakò̆ bija lŏcăcè kî zi cirrathĭkò̆ bwèkî̆kkè tòcò d́ŏ zè dè tò òi ab́icèklèhtò ńò abu, kî dèkhòwèpho htè ato d́ŏ ta j́a Kib́ĭcè ńò lŏcăcè d́ŏ zè dèd́òkè̆d́òô kî htad́ĕd́ògè Kib́ĭcè acè̆ nu.”

¹⁶ Bija ajo tòcò ḿî ad́òdî̄d́òdè, alôkô adèthaèni akî̆kkè akă; za htăikòi ze ne, kî za htăi brasa bija ḿî cab́ô̆htè zè dèthaèni gē pĕhtabò̄ nu lò.

Dèithidĭ kî Dèhtônāi

¹⁷ Ḿî gomohtanibò̄, jè b́èlò̄ athò tòcò, htè wî B́ĭcè Jezŭ Krĭstu abwè Thodŏpho tòcò d́ò̆sagè thĭ hlĕ aŭsu tòcò nu.

¹⁸ Cè tòcò d́ò̆sagè thĭ, “B́ĕ muniledū ledo nu, bija htè agè̄ htèkè̆htèô thĭ kò pòhtakò̆ kî cè htè ab́icèklèhtò tò ò ńò tòcò nu gô̄ lôkôkò̆ adèthaèni akî̆kkè akă lò,” nu.

¹⁹ Bija ajo tòcò ḿî amèlamulapha dè, bija htè adèthaèni pôglogè tòcò kî atò òi Spirito Tcahtĭ ńò tòcò nu.

²⁰ Ḿî thĭ nu, jè b́èlò̄ athò tòcò, thĭ gè̄ mèib́è thĭ dèb́u atcahtĭ acab́ô̆ hikăd́ò̆ kî prahtabò̄ thĭ ne d́ŏ akho nu. Thèb́è̆htabò̄ d́ŏ Spirito Tcahtĭ acô̆thèlè̆ abu nu,

²¹ kî òbò̄ d́ŏ Kib́ĭcè adèb́èlò̄ abu, b́ĕ thĭ òsô̆wô̄we B́ĭcè Jezŭ Krĭstu adèkhòwèhmòb́è aki i thĭ dèòthôḿô̆ alahtŭlablo akhè̆ nu.

²² D́è̆lî̄bò̄ bija ahtèniwĭniwa tòcò dèthakhòwè;

²³ mèlô̆htagebò̄ bija alewe tòcò d́ŏ dèhjahtaphlòkè̆ cè hmî aklè̆ nu, kî d́è̆lî̄bò̄ bija alewe tòcò dèkhòwèhmòb́è aciklè̆d́ò dèscisă nu; kî òdòbòkîbò̄ cè tòcò adèkô̆dèthò htè ab́ò kî dèkî̆kkèmèhlò̆ tòcò nu nu.

Dèhtăhtai Adèthèb́è̆

²⁴ Cè htè apôglo thĭ cab́ô̆htè thĭ gā da lakhubò̄ ńò kî aleigè thĭ d́ŏ adèdòdèthe ahlò̆mò̄ d́ŏ dèplî̆dètcă kî dèthalōthala abu dèbwè nu.

²⁵ Kib́ĭcè dèbwè lò htè Amèhlô̆htage wa d́ŏ wî B́ĭcè Jezŭ Krĭstu abu dèbwè nu gī nib́è d́ò̆è dèdòdèthe, dèphlŭdèthere, dèkhodèă kî dècô̆thèlè̆ htè aḿî Cè è̆ hlĕ akăhtî nu, khŏnujo kî alahtŭlablo. Amèn.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan