Bìoball air-loidhne

Hebrè̆u 9 - Geba Roman New Testament

Dèthèb́è̆ d́ŏ Lākho kî Mò̄kho

¹ Dèŏlăphlala aŭsu dèdè̆ ò kî dèhmèla d́ŏ dèthub́uthèb́è̆ anikhĭ kî dèlletcahtĭ d́ŏ Lākho anikhĭ khĭ.

² Dèprahta Hipho Tcahtĭ kî d́ŏ akhlŏ, htè gō jo Dètcahtĭ Alle nu, aò ḿî hmîŭd́ŏ akhahtu, dadākho dèdè̆ kî toko htè ab́èhluhtai Kib́ĭcè nu.

³ Mèhwă d́ŏ dèthèd́od́îd́ă gīgla dagla alekă nu Dèlle Tcahtĭ gudu òkò̆.

⁴ D́ŏnu aò ḿî dèhnŭẃi adèthèb́è̆kho htè̆, thè̆thî atî̆ta htè aḿî htè̆ lò nu. D́ŏ Thè̆thî Atî̆ta bu nu aò ḿî hmwethĭpho htè̆ htè aòi mănna toko nu. Aaròn ahnèhtò, htè aphò̆drôhta tòb́ò̆ nu, kî Kib́ĭcè Adèhmèla Alob́e gīb́è nu.

⁵ D́ŏ akho nu dèhĭdèhtè̆ akèrubĭno tòcò ò, kî ahò̆dògòlab́i Dèkhòwèhmòb́è Ana alò kî ad́e nu. Khŏnujo tè b́è kò d́ò̆sakhrîd́ò̆sakhrô dè awîakè̆ ajo tòcò hnî̆ńò.

⁶ Dè ajo tòcò b́è prala cab́ô̆ gōjo hwă, phŭgi tòcò le dèjwè b́è d́ŏ Hipho Tcahtĭ aŭsu tèkèplè abu, mè adèmè acab́ô̆ anuad́ò̆ ò nu.

⁷ Ḿî ted́e tapla lò kîd́ò̆ phŭgima lenī d́ŏ Hipho Tcahtĭ gīkèplè tèkèplè abu kî phî dèthwi kî hluhtai zè dèkhòwè acè̆ kî bija tòcò dèkhòwè acè̆ cè̆.

⁸ Ajo ḿî Spirito Tcahtĭ d́è̆lî̄hta htè Hipho Tcahtĭ akhlŏ tèkèplè òwe athŭtherĕ bija de lenīb́è Dètcahtĭ Alle dèbwè̆ ńò nu.

⁹ Kî zî ḿî akhîagla khŏnujo ahô̆agèlè. Dèihta kî dèhlu tòcò dè mèwîmètcă za bija aolāthabu dimĭ ńò,

¹⁰ zî ḿî dèhmèla ab́èkja bija anebî̆cè anikhĭ lò htè ab́èkja dèadèò̆ kî dèŭsab́ă còkhlecòlò htô̆do dè ka b́ăkhlèhta ane akhîagla nu lò.

¹¹ Barasă khŏnujo Krĭstu dole htŏ acab́ô̆ dèhôwî lŏcăcè aphŭgima dole nu. Ze lenīkô htŏ Hipho apĕhtazòhta kî ado d́olĭ Hipho bija prai acukhò, htè atè b́èkja cukhò adèb́òla ńò nu.

¹² B́ĕ Krĭstu lenī Hipho bu nu Ze lenī bija lŏcăcè anikhĭ taplakhă lò d́ŏ Alle Tcahtĭ gudŭ abu, kî Ze de leigè bègôlè kî bophè̆ athwi ńò, ḿî Cè thè̆ne athwi d́ŏ Zè mènigè wa dèhlô̆htage alahtŭlablo lò.

¹³ Bègôlè athwi, bophè̆ athwi kî bomopho ab́èphoŭ aphèpo nu ab́èphruwè̄ d́ŏ bija ab́ò pèèpaakî dèkhòwèkhòkha tòcò gī nib́ège za ma zè dèwîdètcahtĭ nu d́ō,

¹⁴ Krĭstu htè ahluhta aneb́î̆cè d́ŏ Spirito Tcahtĭ alahtŭlablo dèbwè athwi nu, agè̄ mèwîmètcă d́okhlŏkò̆ wa pwedè̄ lò! D́ŏ Spirito Tcahtĭ htè athôḿô̆ lahtŭlablo nu, Zu hluhtai Ze ne acab́ô̆ dèhluhta apĕazò d́ŏ Kib́ĭcè nu. D́ŏ nud́ò̆ adèphîdèmè tòcò ḿî ada wanè ńò acè̆, Ci thwi gè̄ mèwîmètcăkò̆ wa tha adèthîhè̆, kî wè gè̄ mè zakò̆ Kib́ĭcè aòthôḿô̆ dèbwè adèmè nu.

¹⁵ Ze leigè thè̆thî athè̆ acab́ô̆ bwèzo dèbwè nu, cab́ô̆htè bija ab́èjole d́ŏ dèò lahtŭlablo adèila tòcò gī nib́èbò̄ Zè dèaḿăkhai tòcò nu. Zè dèthĭ mèkè̆gè dèkhòwè, amèkè̆mèô thè̆thî aŭsu dèdè̆ nu.

¹⁶ Gajă dèilage adèthaèni nu, thè̆thî dèbwè kè d́è̆lî̄ kèhtab́è athĭ dèbwè adèthaèni nu.

¹⁷ Ailage dèbwè adèthĭ gā ladîlase htŏ dakhaĺè, ahmeaglo kò̆ acè̆ nu.

¹⁸ Mègōnu d́ō, d́ŏ thè̆thî aŭsu abu nu dè kè̄ b́è mèthĭb́è domomo cab́ô̆htè agō khlŏhtamamebò̄ nu.

¹⁹ Aŭsu nu, Mŏzè d́ò̆sab́èkò̆ bija Dèhmèla gŏ ahmô̆ awîakè̆. Zî phî bophè̆ athwi, bègôlè athwi kî htĭphrucò Cè kî bija d́ŏ cu trŭlă cò hwă thŏsô alî kî hèsopo aphă aklè̆ nu,

²⁰ kî cò d́ò, “Ajo ḿî thwi htè Kib́ĭcè Adèlagla Cè b́è̆lă htŏ thĭ kho dèdè̆ nu.”

²¹ Mèhwă zu phrucò Hipho Tcahtĭ kî còkhlelaba kî thwi acab́ô̆ zè mè agò̄hta gōnu nu.

²² Acab́ô̆ Dèhmèla ò adĕ nu, dè gŏmimi b́è mèplî̆mètcă i thwi, kî dèhlòla thwi kò tò ò ma ńò d́ō, dèkhòwè adèb́ăplè kò tò ò ńò.

Krĭstu Athwi Phîkè̆ Dèkhòwè

²³ Ajo tòcò ḿî dèd́è̆lî̄ ab́èkja Mò̄kho agèlè, htè ab́è mèwîmètcăb́ègè cadè̄ nu. Ḿî dèhlu ahtajî d́okhlŏ domo htè Cè thè̆ne lenī Kib́ĭcè ahlò̆mò̄ wi nikhĭ nu.

²⁴ Ajo ḿî dî mîbò̄ acab́ô̆ Krĭstu lenī dèthèb́è̆ ale htè bija prahta ală kî Mò̄kho cab́ô̆htè Ze gē lenībò d́ŏ Kib́ĭcè ahlò̆mò̄ wi nikhĭ ńò ā?

²⁵ Kî Cu tu hluhtai Ze ne tapla hwă tapla acab́ô̆ phŭgima lenī dètcahtĭgudŭ ale ted́e hwă ted́e agū hluhtai dèthwi adî ḿî Ci thwi ńò nu.

²⁶ Dî ḿî ńò d́ō, Cu kū hluhtaib́è Ze ne aplă kî apla hlĕ Lākho òhta nu. Ḿî khŏnujo b́ĕ dè akhî kŭdu b́ôhtîhtagè jo nu, Cè d́è̆lî̄hta Ze ne bija lŏcăcè anikhĭ tapla lò, cab́ô̆htè Zî gî̄ phîkè̆ dèkhòwè d́ŏ Zè dèhluhta Ze ne nu.

²⁷ Manè̄ d́ō, bija thĭ b́è tapla lò, kî za khab́è Kib́ĭcè adècirra.

²⁸ Gōnu akhò̆ Krĭstu hluhtai ane tapla lò, agī phîhtagloi bija òèòò adèkèḿè d́ŏ Zò lò, kî b́ĕ Ze lela tapla be nu, tè b́è dèkhòwè acè̆ ńò, ḿî aki isôihlè̆ bija asòmò̆dôi Cè klè tòcò dèhlô̆htage nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan