Bìoball air-loidhne

Hebrè̆u 7 - Geba Roman New Testament

Mèlkĭzèdèk

¹ Thĭ gomohtani tèpwè htè Mèlkĭzèdèk, Sălèm asaphra, Kib́ĭcè ahtajîgudŭ aphŭgi lehtîgè Abraham b́ĕ zo no zè b́è hwă saphra tòcò ze ge akhî nu, kî zô hôwî lōwa.

² Kîd́ò̆ Abraham igè cè zè dèhtò̆dèla athwèsci tèthwè nu. (D́ŏ zi mi zè khè̆ abu lò nu wî thîhè̆b́ègè htè aŭsu zî ḿî “Dèdî̄dèhma Asaphra” kî Sălèm u asaphra, htè “Dèdî̄dèhma Asaphra” nu.)

³ Zo mo ca pa kî zi khwĭ cè thèlè̆ tò ò ńò, zè dèò bija akăhtî kî akŭdu tò ò ńò. Zî ḿî cab́ô̆ Kib́ĭcè Apho nu; Zî ḿî phŭgi alahtŭlablo.

⁴ Khŏnujo gomocabò̄ bija ajo dèbwè gō do gū mukò̆ pwedè̄ lò, pwĕ Patriăka Abraham ib́è cè dèhtò̆dèla athwèsci tèthwè nu.

⁵ Wî thîhè̆ tèpwè htè Lĕvi akhwĭ, htè akhè̆nī phŭgi adèmè abu tòcò, acab́ô̆ dèhmèla ò adĕ nu, phîb́è tèpwè dèhlu athwèsci tèthwè d́ŏ bija ò htè zî ḿî nòthò̆ Abraham akhwĭthèlè̆ dèzè̄ lò hnò̆nu.

⁶ Ḿî bija ajo dèbwè, zî dî ḿî nòthò̆ Lĕvi akhwĭ ńò hnò̆nu, phî tèpwè Abraham ò dèhlu athwèsci tèthwè kî ci i tèpwè anib́è dèaḿăkhai dèbwè zè dèhôwîhômò.

⁷ Bwèdo ila bwèpho dèhôwîhômò nu amò d́ò cè tò ò tèpwè ńò.

⁸ Kîd́ò̆ (ab́èkja phŭgido tòcò nu, bija anib́è za dèhlu athwèsci tèthwè ḿî bija athĭ za tòcò) bija atèpwèpho phîni dèhlu d́ŏ bija aòthôḿô̆we dèbwè acukhòbu ḿî dè amògomoca dimi hŏ.

⁹ Agî̄ ḿî d́ò̆ Lĕvi aphî dèhlu athwèsci tèthwè tòcò nu ila d́ŏ Abraham acukhòbu nu.

¹⁰ Manè̄ d́o, b́ĕ Mèlkĭzèdèk lehtî Abraham akhî nu Lĕvi tò òla hnî̆ńò, zî ḿî htè aòwe d́ŏ za jadēlò nu.

¹¹ Israè̆lpho nib́è Dèhmèla ḿî ab́èkja phŭgi Lĕvi lò. Khŏnujo, b́eḿĕ wi gī nib́è dèpĕhtazòhta d́ŏ Lĕvi aphŭgi adèphîdèmè abu d́ŏ Dèhmèla acè̆ nu d́ō, phŭgi htè atè b́èkja Aaròn ńò ahtŭaja acab́ô̆ Mèlkĭzèdèk è̆ loba we manè̄?

¹² Dèb́ăkhlè phŭgi adèmè ḿî dèb́ăkhlè Dèhmèla akhoacè̆ nu lò.

¹³ Mègōnu wî B́ĭcè, acab́ô̆ dèd́ò̆sa ò adĕ nu, Zî ḿî akhwĭathèlè̆ alewe, htè Adèmèb́è dèthèb́è̆kho adèmè dakhă ńò nu.

¹⁴ Bija gŏ abwè thîhè̆ tèpwè htè Cò òla d́ŏ Jŭda akhwĭ htè d́ŏ Mŏzè d́ò̆sa bija phŭgi tòcò awîakè̆ nu, za da bahta thagò̆ ami taplă ńò dikhwĭ nu.

Phŭgi ajāthô Melkî̆sèdèk Dèbwè

¹⁵ Ahlî̆htaphlò̆hta d́okhlŏ ḿîkò̆ b́ĕ phŭgi alewe dèbwè acab́ô̆ Mèlkĭzèdèk pòhtagè nu.

¹⁶ Zî dî ḿî phŭgi d́ŏ dè akhwĭthèlè̆ acè̆ ńò, ḿî d́ŏ dèò atè kè̆ dè hlè̆mè̄ za ńò aphlŭathere acè̆ nu.

¹⁷ Dèd́òdòlò ògè Zî wî Cè kè̆ gōjo, “Nî ḿî phŭgi alahtŭlablo acab́ô̆ Mèlkĭzèdèk nu.”

¹⁸ Dèhmèla aŭsu b́è mè hèkè̆gè, manè̄ d́ō, ado khlŏhtamame be ńò, kî ada wanè be ńò ńò acè̆ lò.

¹⁹ Manè̄ kò̄ d́òdo dō, Mŏzè Adèhmèla dè mèwîmètcă kèhtagè bija dèbwè ńò; ḿî dèsascĭi adokhlŏ òhtablôgè, aḿî dèsascĭi htè aleihŭ wa b́ôhtî d́okhlŏ kî Kib́ĭcè nu.

²⁰ D́ŏ phŭgi adèmè jo abu nu, dèaḿăkhai dèhôd́ă tò ò ńò.

²¹ Barasă b́ĕ Jezŭ kèhta phŭgi nu, anikhĭ dèhôd́ă tò ò nòthò̆ dimĭ ńò hnò̆nu, Zî phîb́è dèhmèla dèhôd́ă ala Zo kho tòcò nu “Kib́ĭcè hôd́ă htŏ kî Zî gî̄ dî phîkè̆kò̆ Zè dèhôd́ă; ‘Ni gî̄ ḿî phŭgi alahtŭlablo,’ nu ńò.”

²² Aḿîgè dèlaglai ado htè Jezŭ phî̆htagè wi nikhĭ dèaḿăkhai nu.

²³ Phŭgi alewe tòcò òèòcara ḿî d́ŏ dèthĭ mèkè̆ mèhlè̆mè̄gè cè tòcò dèbwè hwă dèbwè lò.

²⁴ Ḿî Jezŭ nu Cò ò thèjô̆ lahtŭlablo kî Cî ḿî acab́ô̆ Phŭgi dè hlè̆mè̄gè taplă be ńò.

²⁵ Zè dèmèhlô̆htage ḿî aladilase, manè̄ Cò ò thôḿô̆ thèjô̆ kî Cè thèbè̆thèjô̆ bija alehtî Kib́ĭcè d́ŏ Cò ò tòcò anikhĭ akhoacè̆ nu.

²⁶ Phŭgima gî̄ ḿîb́è awîatcahtĭ, adèkèḿè tò ò ńò kî aplî̆atcă. Cò kò òb́è d́ŏ dèkhòwèpho tòcò akho kî Cè kè̄ b́è zāhtajî dŏ Mò̄kho akho nu.

²⁷ Zî ḿî bija htè ado loba Zu hluhtaib́è dèhlu gŏ ani ńò, acab́ô̆ phŭgima ahluhtai dè gŏ ani d́ŏ cè thè̆ne dèkhòwè adèplehlô̆ge kî bija alewe tòcò adèkhòwè anikhĭ tòcò mè nu.

²⁸ Dèhmèla lè̄hta phŭgima tòcò htè adèmèkèḿè ò, ḿî anib́è dèhmèla adèaḿăkhai dèbwè htè Kib́ĭcè Apho nu pĕhtazòhta lahtŭlablo.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan