Bìoball air-loidhne

Hebrè̆u 6 - Geba Roman New Testament

¹ Khŏnujo gè lè̄dakè̆ Mò̄kô Krĭstu adèthôdèthò̆ akăhtî kî tcadîgrînî̄ mò̄kôbò̄ d́ŏ akŭdu nu. Gè lè̄dakè̆ Mò̄kô dèthôdèthò̆ aglobu kî gomoca Mò̄kô dèb́u Kib́ĭcè nu,

² dèthôdèthò̆ ab́èkja dèŭsab́ăhtĭ, dèhtèla cukhò bija kho, dèthôdèthò̆ ab́èkja dèhtaboge dèthĭ aklè̆ kî dècirra alahtŭlablo nu.

³ Kib́ĭcè kī i ma kè akhwè d́ō, gē le ahlò̆mò̄ dòkhò̆!

⁴ Manè̄ d́ō, bija htè abāladē adèb́u tòcò nu wè gè̄ thè̆ge cè tòcò d́ŏ dèbajalage ane anikhĭ da za tèpwè ńò. Bija htè anib́è hwă dèhlî̆, adî̄tcab́ègè Mò̄kho adèzwî̄dèè kî Spirito Tcahtĭ tòcò nu,

⁵ phîni thalōthalagè Kib́ĭcè adèaḿăkhai dèphlŭdèthere alekă lahtŭlablo nu,

⁶ hwădō, bija htè abāladē adèb́u tòcò nu, zu su za pa za we tèpwè, ḿî dè ti ilani cè tòcò agū htukhohtuă tapla be ńò. Manè̄ d́ō, za htalaglo hwă Kib́ĭcè Apho Krusu alò tapla be kî zò sòlŭsò̆jè̄ akhoacè̆ d́ō, za da bajalage za ze ne ńò.

⁷ Lākho htè hwèhtĭ b́è thuŭthèè nu, aphò̆htathèhtai b́uhŭ htè lākho B́ĭcè solabāla zo kho tòcò nu, htè Kib́ĭcè adèhôwîhômò nu.

⁸ Ḿî agò̄ d́òhtai ma dèscudèphî̆ kî mihnè d́ō, agā lakra hwă dèhôkî̆kkè lab́è cè acè̆, akè b́è scwigè̄hò kîd́ò̆ hmî.

⁹ Barasă b́èlò̄ thĭ thè̆buwe tòcò, dè mè nòthò̆ ane acab́ô̆ wò d́ò kăkòlò̆ nu d́ŏ dèhlô̆htage abu nu, thĭ nikhĭ ḿî aè dosè.

¹⁰ Kib́ĭcè dò sòthô̆bô̄hnè mèthĭ dèphîdèmè tòcò, thĭ dèb́èlò̄ Zi mi tcahtĭ anikhĭ tòcò nu ńò.

¹¹ Wè dèthaèni adozî̄ ḿî thĭ gŏ abwè kè d́è̆lî̄bò̄ dèthosôthasô htô̆ agudŭ nu pwĕ acab́ô̆ dè mèkô pĕhta wè dèsascĭi tòcò nu.

¹² Thò̆jò̄bò̄labò̄ ḿè taplă mè, ḿî dòniphînibò̄ bija adèb́u ò kî akhòthad́ò̆ dè tòcò nu htô̆ thĭ nib́è dèaḿăkhai tòcò nu.

Kib́ĭcè Adèaḿăkhai Ladîlase

¹³ Hlĕ Kib́ĭcè aḿăkhai Abraham dè nu, Zô hôd́ălage dò̆ Ze ne, manè̄ dè amò hôd́ăi dolĭ Cè tò ògè dimĭ ńò acè̆ nu.

¹⁴ “Jò kò tòlakò̆ dèhôwî d́ŏ no kho kî Ji ki ilanikò̆ nè ni khwĭ nè thèlè̆ òèòcara,” Kib́ĭcè d́ò cè do.

¹⁵ Anu akhoacè̆ Abraham khòthad́ò̆ wīthazô htô̆ za tcahtîb́è dèaḿăkhai pĕhtazòhta nu.

¹⁶ Bija nu zô hôd́ăi dè adolĭ cè tòcò nu, kîd́ò̆ d́ŏ bija dèbwè kî dèbwè azo nu, d́ŏ zè dèhôd́ă abu, phrakè̆ tèpwè dèdara tòcò nu.

¹⁷ Gōnu akhò̆ b́ĕ Kib́ĭcè thaè mèphî̆hta bija agī nib́è Zè dèila tòcò nu, Zè dèthaèni ḿî ata b́ăkhlè za ńò d́ŏ Zè dèhôd́ă abu nu.

¹⁸ Gōnu acè̆ Ci ila lōwa dè amò rôhlè gīmo, ad́è̆lî̄ Kib́ĭcè tò d́òplè za ńò kî wa tcahtîb́è dè ahmeaglo akhoacè̆ aikhoiă wa agî̄ phî gô̄ pôglo hmetekle dèsascĭi htè aò d́ŏ wò hlò̆mò̄ nu.

¹⁹ B́ĕjo wè dèsascĭi ḿî acab́ô̆ wa thathôḿô̆ alosu akhò̆ nu, aò ladîlase, hmetekle kî aphlòtôlô dèthèd́od́îd́ă, alenī do d́ŏ dèlletcahtĭ nu.

²⁰ D́ŏ wô blô nu, Jezŭ lenī ŭsugè kî kèhta Phŭgima alahtŭlablo, acab́ô̆ Mèlkĭzèdèk ò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan