Bìoball air-loidhne

Hebrè̆u 5 - Geba Roman New Testament

¹ Phŭgima gŏ abwè ḿî ab́èrôhta d́ŏ bija Lākhopho aklè̆ agē le gē ge cè tòcò anikhĭ d́ŏ Kib́ĭcè ahlò̆mò̄ nu, agū hluhtai dèhlu kî dèkhòwè adèplehlô̆ge anikhĭ lò.

² D́ŏ cè thè̆ne adèthò̆jò̄bò̄la acè̆, zò khòwèhmòb́è kèhtakò̆ bija adî thî dè ńò kî amèkèḿèdè tòcò nu.

³ Mègōnu akhoacè̆, zu hluhtaib́è zè dèkhòwè adèplehlô̆ge anikhĭ khĭ, bija tòcò anikhĭ khĭ.

⁴ Bija dî phî dò̆ za dèhĭdèhtè̆ ajo dèbwè̆ ńò, ḿî Kib́ĭcè jo thè̆ne acab́ô̆ Aaròn nu lò.

⁵ Krĭstu dî phîdò̆gè Phŭgima adòathe ńò, ḿî Zî phîgè d́ŏ ad́ò Cè; “Nî ḿî Jo Pho; kî khŏdini Jî phî̆htagè Na Pa,” dèbwè ò nu.

⁶ Kîd́ò̆ d́ŏ Cè Tcahtĭ alewe dagla abu ad́ò; “Nî ḿî phŭgi alahtŭlablo, acab́ô̆ Mèlkĭzèdèk nu.”

⁷ B́ĕ Cò òwe Lākho akhè̆ nu, Ci ihta dèthèb́è̆ kî dèdahta d́ŏ dèlēsô kî dègādŭhtĭ aklè̆ nu d́ŏ aphlŭathere ò agè̄ mèhlô̆hta Cè dèthĭklè̆ dèbwè ò nu. D́ŏ dèbè̄b́ôla ane kî dèscisă d́ògòdòi ane akhoacè̆, Zè dèthèb́è̆ b́èsòkhĕńe lagè.

⁸ Zi ḿî nòthò̆ Kib́ĭcè Pho hnò̆nu, Zò sòkhĕńegè dè d́ŏ dèssègnè̆bòdò abu nu.

⁹ D́ŏ Cè b́è mè pĕhtazòhtagè acè̆ Zî phî̆htagè asòkhĕńe Ze lē tòcò anikhĭ dèhlô̆htage lahtŭlablo,

¹⁰ kî Kib́ĭcè ilanigè Cè Mèlkĭzèdèk aphŭgima ahtŭaja.

Dèithidĭ ahtad́ĕd́ò Dèbāphlòḿĭ Dèb́udènè

¹¹ Ab́èkja dè awîakè̆ jo nu, amò d́ò ò pwĕdimi kî kò d́ò̆sab́è nu abad́owĕ d́o, manè̄ d́ō thĭ niguhtogè akhoacè̆ nu.

¹² Athĕbwe nu, thĭ mò phî̆hta htŏ sara tòcò, ḿî thĭ mò nib́è bija gè thèihŭ thè̆khrô d́ò̆ thĭ dèbwè be akò d́ò̆sa thĭ Kib́ĭcè adèd́òdòlò tòcò nu. Thĭ geb́agè thĭ lekă akò ò̆ nu, tè b́è akā a dè asa hnî̆ńò nu.

¹³ Athĕbwe ḿî aò̆ gōnu dèbwè nu, ca ta aza dèdî̄dèhma adèthôdèthò̆ hnî̆ńò, manè̄ d́ō, zî ḿîwe aòladēthè̆ acè̆ nu.

¹⁴ Dèa asa ḿî bija adègomo pĕhta htŏ d́ŏ dèbēpha za dè aè kî akî̆kkè amēzo tòcò nu lò.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan