Bìoball air-loidhne

Hebrè̆u 2 - Geba Roman New Testament

Dèigetcage Ado

¹ Wo gomoib́è dèthôdèthò̆ wi nib́è htŏ tòcò nu cab́ô̆htè wò dò phlòjîbò̄ ńò nu.

² Dèaḿăkhai htè Mò̄khobwèzo d́ò̆sa wa tòcò hnò̆nu akè b́è gō bò ma pwĕ gōnu d́ō, dèkhè̆b́a kî dè dò sòkhĕńelēthèhô̆ ńò gè̄ mènikò̆ wa dècirra.

³ B́ĕnu, wa gè̄ htèkè̆htèô ma wè dèhlô̆htage anikhĭ dèaḿăkhai tòcò nu d́ō, wè kè̄ b́è cirra hmahmakò̆. Dèado thè̆ne d́ò̆sa wa dèaḿăkhai kî athîhè̆b́è tòcò thô̆htô tèpwègè Cè.

⁴ Kib́ĭcè mèhmemèglogè cè tòcò adèthô̆htô d́ŏ dè agèlè, dècòklîcòhjè̆ kî dèbòdèba amŏamo abu, kî d́ŏ Spirito Tcahtĭ adèila abu nu.

Amèhlô̆htagedè Dèbwè

⁵ Kib́ĭcè dèlè̄htagè Mò̄khobwèzo aku ŭicai Lākho htè wò d́òigè awîakè̆ tèb́è nu.

⁶ D́ŏ Cè Tcahtĭ abu nu, ad́ò̆sa wa gōjo ògè dagla; “Pwĕ acab́ô̆ no gō gomoi lōwa nu, bija ḿîbò̄gè danè̄? Na gā tca gè̄ khwèi ma bija ḿîbò̄gè danè̄?

⁷ Nè bè̄b́ôlagè cè tòcò Mò̄khobwèzo akălè̄ tod́odasa lò. Nò plônigè cè tòcò dèplŭdèthere kî dèdòdèthe akhocò̆.

⁸ Nè mègè cè tòcò aku ŭicai dèlŏcăcè.” Mègōnu d́ō, b́eḿĕ Za gā hna lōwa ŭicai dèlŏcăcè d́ō, dè atò ò ca kălè̄ ńò tò ò dimĭ be ńò. Khŏnujo wa da tcahtî za dèlŏcăcè ò ca kălè̄ ńò hŏ.

⁹ Ḿî wa tcahtî tèpwè Jezŭ htè ab́è bè̄b́ôlagè Mò̄khobwèzo akălè̄ tod́odasa dèbwè b́è plônīgè khocò̆ d́ŏ dèplŭdèthere kî dèdòdèthe abu d́ŏ Kib́ĭcè adèhludètă acè̆ Za khagè dèthĭ bija lŏcăcè anikhĭ nu.

¹⁰ Zè dè thaèni ḿî agē lei Zo pho Zi li òèòcara d́ŏ dèdòdèthe abu nu, dè ab́ènibòni d́ŏ Kib́ĭcè nu, dèlŏcăcè òhtakô kî Cè kî Zi nikhĭ akhoacè̆ agî̄ wî gā tcă lŏbò̄ d́ŏ Zè dèssègnè̆bòdò acab́ô̆ akokhwi dèbwè akhò̆ Zè gè̄ mèhlô̆htagebò̄ lōwa tòcò nu.

¹¹ Manè̄, amè tcahtĭ dè dèbwè kî ab́è mèwîmètcă tòcò ḿî zî ḿî lŏ dikhwĭ lò d́ō, Zo jogè lōwa tòcò, “thè̆buwe” akhoacè̆,

¹² acab́ô̆ Cè Tcahtĭ d́ò; “Jò kò d́ò̆sakò̆ jè thè̆buwe tòcò Ni Mi Tcahtĭ Htăikò̆ Nè d́ŏ zè dèladēplo abu nu.”

¹³ Kî alewe dagla d́ògè, “Ja sascĭi Cè;” kî alewe dagla be, “Jò òkô pholi htè Kib́ĭcè ilagè jè tòcò akă,” nu.

¹⁴ Pholi tòcò nib́è thwihtĭ domo lò akhoacè̆, cab́ô̆htè Cè htè aphlŭathere ò Mod́èlî akho d́ŏ Zè dèthĭ acè̆, Zî gî̄ phîkè̆bò̄ Mod́èlî aphlŭathere,

¹⁵ kî b́ăsèplèkè̆bò̄ bija htè ab́ècŏb́ègjî̄gè dôzôbwè d́ŏ dèscisă ni dèthĭ ale tòcò nu.

¹⁶ Manè̄ d́ō, Zè dè mèphî̆hta Ze ne Mò̄khobwèzo ńò, ḿî Zè mèphî̆hta Ze ne d́ŏ Abraham akhwĭthèlè̆ bu akhoacè̆ nu.

¹⁷ Ḿî Zè gè̄ kèhtabò̄ lōwa tòcò athè̆buwe d́ŏ dè gŏmihtĭda abu, agî̄ ḿî Kib́ĭcè aphŭgima adî̄ahma, akhòwèhmòb́èdè kî Ce ke plehlô̆kèhtabò̄ bija adèkhòwè nu.

¹⁸ Anu ḿî d́ŏ Zè b́è dèhnakă thè̆ne kî zè dèkhab́è dèssègnè̆ akhoacè̆, Zè gè̄ mèzo kèhtabò̄ ab́è dèhnakă tòcò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan