Bìoball air-loidhne

Hebrè̆u 12 - Geba Roman New Testament

Wa Pa B́ĭcè

¹ D́ŏ akhathè̆thî òèòcara aò khwè̆b́a wa tòcò aklè̆ wa ḿî ḿî wò mò bāphlòmĭ dè gŏ amo amèd́îd́ă wa, d́okhlŏ ḿî dèkhòwè htè ajăwè̄ hjŏkakî wò lò tòcò nu kî wè gè̄ cwèlebò̄ ahlò̆mò̄.

² Jezŭ htè aleihŭ wa ahlò̆mò̄ d́ŏ dèb́u adèpĕhtazòhta dèbwè nu gè̄ dè hlè̆mè̄ thĭwī d́ò̆è wa ńò cab́ô̆htè Zu Krusu kî Zè dèssègnè̆bòdò acè̆ wi gī nib́èbò̄ dèthaganāi alahtŭlablo htè Zè mènigè wa d́ŏ Za kha hwă dèthăwā d́ŏ Krusulò, khŏnujo Ze gehta sańălăògè d́ŏ Kib́ĭcè Allesańă adèhtwè dòkhò̆ nu.

³ Gomoibò̄ dèkhòwèpho tòcò htad́ĕd́ò Cè pwĕ gōnu d́ō, ibò̄ ḿè thĭ tha scilazela kî òbò̄ ḿè dèlab́oladā mè.

⁴ Ab́èkja dèd́odèphja dèkhòwè nu thĭ da khab́è dèthĭ hnî̆ńò dòkhò̆.

⁵ Thĭ sòthô̆bô̄hnègè dèikhoiă thĭ d́ŏ dèjo thĭ “Pholi” tòcò nu ā? Aphokhŏ, b́ĕ Dèado prazòge nè nu, ò tib́ĭtab́abò̄ ḿè; b́ĕ zò hò̆ nè nu, thablè̄bò̄ ḿè.

⁶ Manè̄ d́ō, Kib́ĭcè nu Cô thôithò̆i bija Cè b́èlò̄ tòcò nu, kî Zu sumakîlôi bija aḿî Zo pho tòcò acè̆ nu.

⁷ Dèssègnè̆ ḿî thĭ nikhĭ dèthôdèthò̆ domo, anu ḿî Kib́ĭcè mèpho thĭ adèmè domo. Pho htè apa dô thôithò̆i ńò òbò̄ dèbwèbwè ā?

⁸ Thĭ gī di nib́è ma dèthôdèthò̆ ajo ńò d́ō, thĭ gî̄ dî ḿî tèpwèpho ńò, ḿî bwèzòbrò̄pho lò.

⁹ Alewe domo ḿî wa pa bija nu, zu mū wa d́ō, wo d́ŏb́èj́ab́è cè dòkhò̆; wò mò ila d́okhlŏ we ne d́ŏ thotha apa htè ai wa dèòthôḿô̆ dèbwè nu.

¹⁰ Wa bija apa suma wa ḿî dèò tod́odasa anikhĭ lò, kî zè mè pwĕ cè kèhta lò; ḿî Kib́ĭcè mèni wa lŏ dè è dè ò̆ anikhĭ lò. Cab́ô̆htè wi gī nib́èkôbò̄ Ca kă Zè dèwîdètcă nu.

¹¹ B́ĕ wè b́è dèsuma akhî nu, ḿî wi nikhĭ dèthablè̄thajô, tè b́è dèthaganāi ńò. Nòthò̆ hnò̆nu, alekă bija htè akhab́è nènò dèsuma tòcò nu, thèhta tèpwè dèdî̄dèhma adèthè ab́èkja dècodèkhli nu.

Dèhmèla kî Dèithidĭ tòcò

¹² Wehtabò̄ thĭ cukhò abehe tòcò, kî mèhmegebò̄ thĭ khalemē aganādîzî tòcò nu.

¹³ Lekôbò̄ klèdanā, cab́ô̆htè akhad́e gè khè̆ za, kî kè̄ b́è mèhmagebò̄ nu.

¹⁴ Òjīòd́wăkôbò̄ bija gŏ akhwĭthèlè̆, òibò̄ dèwîdètcă, dî̄ ḿî ma ńò d́o bija tè kèhtî za B́ĭcè Dèado dèbwè̆ ńò dèdè̆ nu.

¹⁵ Thidĭibò̄ cab́ô̆htè thĭ gū du su ta pabò̄ Kib́ĭcè ahluată dèbwè̆ ńò nu, kî dèthèhtèd́òd́è̆ akhawi tò d́òlabò̄ d́ŏ thĭ thabu ńò nu; htè akèhta bija thèd́è̆gumu anikhĭ aciabè nu.

¹⁶ Kîd́ò̆ thidĭibò̄ cab́ô̆htè dèlakèḿè ḿî̆dîḿî ńò acab́ô̆ Izău htè asè̆a adèdobwe alle kî dî̆ tò d́ò̆a lò nu ḿè.

¹⁷ Acab́ô̆ thĭ thîhè̆ atherĕ nu, alekă ca thaèni nòthò̆ dèhôwî pwĕ zo jo za hai hnò̆nu, dè ti igè cè ńò nu.

¹⁸ Manè̄ d́ō, thĭ de le acab́ô̆ Israè̆lpho tòcò legè dŏ khòlò̆ bija bōwè̄bāwè̄ za ńò, dŏ Sĭnai htè hmîgè̄gòbrò kî dè̄tob́okhi ńò, atè b́è gīllimob́ĭ ńò ńò,

¹⁹ kî atè b́è khaja alē kî dèlēdèhwè athèhta ńò ńò. Dè alē jo b́ĕ bija thîhè̆b́è nu, bija damò acab́ô̆ zî gî̄ dî thîhè̆b́èbò̄ ńò nu.

²⁰ Cî ḿî dèhmèla htè ad́ò; “Dèphodèwe agā hta khòlò̆lò to d́ŏ d́ŏ kè̄ b́è hwĕthĭ kî lo,” kî cè tòcò da khakèhta ńò akhoacè̆ lò.

²¹ Dè ajo ḿî asôgudu pwĕ Mŏzè d́ò, “Ascisă jè! kî za ganādîzîgè d́ŏ dèthaphuthaganā abu,” nu.

²² Khŏnujo thĭ do htŏ d́ŏ Zion khòlò̆kho kî Kib́ĭcè Au Tcahtĭ ò nu. Thĭ do htŏ d́ŏ Mò̄kho aJerŭsalèm htè Mò̄khobwèzo ò d́ŏ ahtò nu.

²³ Thĭ do htŏ d́ŏ aḿî Kib́ĭcè aphodobwe aò kî dèthalōthala tòcò adèladēplo htè ami b́è hwela d́ŏ Mò̄kho tòcò aò, kî d́ŏ Kib́ĭcè acirra bija lŏcăcè aò, kî d́ŏ bija adî̄ahma atha htè ab́è mè pĕhtazòhta tòcò ò nu,

²⁴ kî d́ŏ Jezŭ bwèd́ò̆bā ab́èkja Thè̆thî Athè̆ aò, kîd́ò̆ Ci thwi b́èprula htè adamò Kib́ĭcè d́olĭ kî Abĕlè̄ è̆ dèbwè ahlò̆mò̄ nu.

²⁵ Sòkhĕńe ladilasebò̄ b́ĕ Zî jî̄b́èhta nu. Bija adò sòkhĕńe Ze lē thè d́ŏ Lākho jo ńò tòcò nu dô hlô̆htab́è tèpwè dècirra ńò. D́okhlŏ ḿî wò dò sòkhĕńe ma dèlē thè d́ŏ Mò̄kho nu ńò d́ō, wô gô̄ hlô̆hta zabò̄ dècirra cadè̄?

²⁶ B́ĕnu akhî Ze lē gō htogleglākò̆ Lākho, barasă khŏnujo Ci iwa dèaḿăkhai, “Jo gō htogleglākò̆ Lākho kî Mò̄kho papa.”

²⁷ Dèjî̄b́è, “Tapla be,” nu ad́è̆lî̄hta hlî̆hlî̆plăplă d́ŏ dèb́èb́òla tòcò nu kè̄ b́è htogleglā kî b́è phîkè̆kò̆, ḿî dè atè b́è htogleglā ńò kò òwe tèpwè.

²⁸ Wè b́è ilani htŏ htĭge ade gleglā za ńò. Mègōnu wî gî̄ phîgloi hme d́ò̆è ahluată ab́èila tòcò d́ŏ dègōla thèb́è̆hta Kib́ĭcè d́ŏ dèd́ŏdèj́a kî dèscisă abu.

²⁹ Manè̄ Kib́ĭcè ḿî hmî agè̄hò dèphè akhoacè̆ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan