Bìoball air-loidhne

Hebrè̆u 11 - Geba Roman New Testament

Dèb́udènè

¹ A aḿăkhai kèhta wa dèhôwî htè wa sascĭi ḿî dèbwè lò, kî dèd́è̆lî̄ dè aò thĕbwe tòcò ḿî kè tè kèhtîb́è hnî̆ńò.

² D́ŏ zè dèb́u akhoacè̆, wi phĭ wu phŭ tòcò b́ègè Kib́ĭcè adèhtăhtai.

³ D́ŏ dèb́u abu, wî thîhè̆b́è Kib́ĭcè adèb́òla Lākho kî dèjî̄b́è dôhmô̆ lò. Mègōnu d́ō, dè htè wa tcahtîb́è jo b́èmè kèhta d́ŏ dè htè wa da tcahtî ńò nu.

⁴ D́ŏ dèb́u akhoacè̆ Abĕlè̄ hluhtaigè dè aè d́olĭ Kaĭnō è̆ nu, kî ajo akhoacè̆, cè b́èjogè bija adî̄ahma kî Kib́ĭcè phîni wîwîmòmòkò̆ ze dèhlu. Zi thĭ hwă nòthò̆ zî jî̄b́è i we tèpwè dèb́u.

⁵ Zè dèb́u akhoacè̆, Ĕnòk b́è zāhtage Mò̄kho, zi di thĭ b́ègè ńò. Kib́ĭcè phîhtage cè akhoacè̆, bija dè kèhtî be cè ńò. Cè tcahtĭ d́ò̆sagè d́ŏ Ĕnòk dukhlŭ gehta hnî̆ńò nu, zè mèb́ègè Kib́ĭcè atha nu.

⁶ Dèb́u kò tò ò ma ńò d́ō, gè dè mè b́ètha za Kib́ĭcè ńò, manè̄ d́ō, bija alehtî Kib́ĭcè gŏ abwè nu ku b́u b́è Kib́ĭcè ò kî Ci isôihlè̆ bija awāhlè Cè tòcò nu.

⁷ Aḿî d́ŏ zè dèb́u nu Nŏah b́è d́ò̆sa Kib́ĭcè adèithidĭ dè gè mè ane d́ŏ ca ta tcahtîb́è taplă ńò tòcò nu. D́ŏ dèsòkhĕne Kib́ĭcè alē kî dèscisăthabo abu, ca prahtagè thè̆bò dokho htè amèhlô̆htagè cè kî zè bwè thèd́è̆gumu nu. Mèhwă d́ō, Lākho b́è cirra, kî d́ŏ zè dèb́u acè̆, Nŏah nib́è Kib́ĭcè adèbè̄dî̄bè̄hma nu.

⁸ D́ŏ zè dèb́u acè̆, Abraham sòkhĕńegè Kib́ĭcè alē b́ĕ cè b́è jo agè̄ hèhtakè̆ kî le d́ŏ htĭge htè Kib́ĭcè amăkha aki icè tè b́è nu. Zî dî thîhè̆ nòthò̆ cè kè b́èle d́òlè̄ d́òlè̄ ńò hnò̆nu, d́ŏ dèb́u abu za bāladē zi htĭ ze ge kî hèhta tèpwè.

⁹ D́ŏ dèb́u acè̆ zo dolegè d́ŏ dèaḿăkhai alākho nu acab́ô̆ tî̆tèmè̆ dèbwè, kî cò ògè d́ŏ hipho abu nu acab́ô̆ tî̆tèḿè̆ akhò̆, ploplo kî Izăko kî Jăkòb, anib́è dèaḿăkhai tòcò nu.

¹⁰ Manè̄ kòd́òdo dō, Abraham mulè̄sascĭi Kib́ĭcè pradòlò ni cè u htè akăd́ò̆ òhmeòglo tu u nu.

¹¹ Gōnu akhò̆, Sărah nu pholi kŭdugè nòthò̆ zu muthèd́ŏhtai tèpwè zo pho d́ŏ cu b́u Kib́ĭcè adèaḿăkhai gē pĕhtazòhtab́è akhoacè̆ nu.

¹² Gōnu akhoacè̆ bija htè mè acab́ô̆ athĭ htŏ dèbwè nu apho lakwălajā pwĕ kô tô d́ô za ńò, kî sè aò d́ŏ Mò̄kholè̄ kî lothĭḿi aò d́ŏ pèllèwe tòcò akhò̆ nu.

¹³ Bija ajo tòcò thĭ lŏ htŏ d́ŏ dèb́u abu nu kî nib́è htŏ dèaḿăkhai tòcò nu, barasă za tcahtî d́ŏ adòbò lò kî lèkha lōwa acab́ô̆ tî̆tèmè̆ kî bija ahèkôklè tòcò akhò̆ nu.

¹⁴ Bija ajo tòcò ḿî ad́è̆lî̄ awāhlè ahtĭage tòcò nu.

¹⁵ Tè b́è zo gomoi zi htĭ ze ge alila d́ō ca thaè geb́a ze lekă tòcò ńò. Agî̄ ḿî ma gōnu d́ō, akhwèaj́a d́ŏ zi nikhĭ kò ò tèpwè.

¹⁶ Ḿî cè tòcò thaèni htĭge aè khlŏlĭ, amò khlŏlĭ ajo, htè aḿî Mò̄kho htĭge nu. Kib́ĭcè mèhtani cè u, d́ŏ akhoacè̆, Cè b́è jo lōwa cî B́ĭcè nu, Ca ta thăwāi tèpwè ńò.

¹⁷ D́ŏ dèb́u abu Kib́ĭcè khwèthagè Abraham agū hluhtai apho Izăko. Zi nib́è nòthò̆ dèaḿăkhai hnò̆nu, zò thamò̆ hluhtai tèpwè zo pho dèbwè lò,

¹⁸ ḿî Kib́ĭcè d́ò̆sagè cè, “No pho ni li gā larūlazèbrèkò̆ d́ŏ Izăko alò nu, ni mi nè khè̆ gā lakò̆ dôzô hwă dôzô.”

¹⁹ Za sascĭi Kib́ĭcè ab́awè̄htoge za athĭ tòcò htè Zè gè̄ mèhtaboge Izăko nu.

²⁰ D́ŏ dèb́u abu, Izăko ilanigè Jăkòb kî Izău dèhôwî d́ŏ alekholekă anikhĭ nu.

²¹ D́ŏ dèb́u acè̆ Jăkòb, b́ĕ cò thòmò̆ thĭ nu, hôwîgè Zŏzè apho gībwè lō lō. Cò d́ògòdò ze ne hnèhtò alò kî thub́uhtathèb́è̆hta Kib́ĭcè lò.

²² D́ŏ dèb́u abu, Zŏzè thaḿò̆ thĭgè nu, zè mè gomohtani hwă Israè̆lpho tòcò d́ō, zu htulahmèlagè lōwa aku b́ŭlăd́ăhta cè anikhĭ.

²³ D́ŏ dèb́u abu, Mŏzè, b́ĕ cò òla hwă nu, zo mo ca pa lè̄hugè cè thŏhlè̆ adābu d́ŏ dèhtad́ĕd́ò saphra adèhmèla abu nu.

²⁴ D́ŏ dèb́u abu, zo dohta tapla nu, Mŏzè tò d́òlage ze ne Pharaŏnè aphohmu apho ńò.

²⁵ Kî zô rôgè agā khab́è dèssègnè̆ tod́odasa ploplo kî Kib́ĭcè abija tòcò nu.

²⁶ Zo gomo htè bwè ab́èrô tòcò adèb́èmèjomèhnă Krĭstu anikhĭ ḿî alīdobwîthè̆ d́olĭ kî Izî̆tge aŭcalèkhjă tòcò nu, manè̄ d́ō, ca tca dîgrînî d́ŏ dèsôdèhlè̆ tòcò akhoacè̆ nu.

²⁷ D́ŏ dèb́u abu, Mŏzè hèhta Izî̆tge kî di scisănigè saphra adèthèhtè ale ńò, cô pôglo hmeteklegè zè dèthaèni mè acab́ô̆ bija atcahtî dè kè̄ tè kèhtî za ńò dèbwè nu.

²⁸ D́ŏ dèb́u abu, za kha Păskwa Pwè̆ kî hwecògè Israè̆lpho tòcò kî thwi agè̄ mèd́îd́ă dèthĭ Abwèzo d́ŏ amèthĭ adobwe dèbwè acukhòbu nu.

²⁹ D́ŏ dèb́u abu, za hwădūgè Pèllèlî acab́ô̆ bija hè khò̆kho athô̆d́èkhrè akho ḿî Izî̆tpho tòcò lapruthĭ lŏ abu nu.

³⁰ D́ŏ dèb́u abu, Jĕrikho au htărā ladēpha b́ĕ bija tòcò hè phô̆dewe cè thăthôtèthè̆ abu nu.

³¹ D́ŏ dèb́u abu, momarè Rahab lè̄hu bwètcahudè tòcò d́ō, zô hlô̆htakò̆ dèthĭ d́ŏ adèb́u tò ò ńò tòcò aklè̆ nu.

³² Dè amò d́ò òwe ā? Kò d́ò̆sa Zedeŏnè, Bărak, Samsŏnè, Jèphatha, Dăvid, Samuĕlè̄ kî Prò̆fèt tòcò awîakè̆ anikhĭ jè è̆ akhî tò ò ńò.

³³ Bija ajo tòcò ḿî d́ŏ adèb́u acè̆, aphîni htĭge, mèdè ab́èklè kî nib́ègè dèaḿăkhai tòcò nu. Cè tòcò mèhme kèhta glādo akhèkle,

³⁴ mèlabî̄ hmî ablî kî tè b́èhtîb́èd́ô̆ b́è d́ŏ dèd́odèphja aklè̆ ńò. Zî ḿî bija akhoaă tò ò ńò, ḿî anib́è dèkhodèă tòcò htè akhŭahè̆ pwĕ ahmò phlòḿĭ kèhta d́ĕd́òròkhè alenī tòcò nu.

³⁵ D́ŏ dèb́u abu amihmu tòcò nib́ège akhwĭakhò̆ athĭ hwă htŏ tòcò adèhtaboge nu. Tòcò cò kha dèssègnè̆ htô̆ thĭ htô̆ ò cab́ô̆htè za gā htabogebò̄ d́ŏ dèò awîamò abu nu.

³⁶ Tòcò cò b́èdeb́èbo kî b́è cŏglogjî̄glogè d́ŏ dèkî̆dî̄ alle nu.

³⁷ Tòcò cò b́è hwĕ kî lo, b́èd́uhtè̆dū gīklè, b́è bēhtè̆dū agò̄; zò sò̆dihidaphă, b́è kô̆nīthònī kî thŏphe, bègôlèphe; pĭd́ŏpĭsa tò òni cè ńò d́ō, bija ti icè dimĭ ńò akhlŏ mèbamèsè̆ wed́ò̆ cè dòkhò̆.

³⁸ Ca ta tani akò ò Lākho ajo tèb́è akho ńò d́ō, ze le ò d́ŏ lothĭḿizekho, khò̆mukhòlò̆kho, lobusòbu kî zulablakŏ bu nu.

³⁹ Bija ajo tòcò ḿî dèb́u abwèkhŭbwèhè̆, barasă zi di nib́ègè dèaḿăkhai ńò, manè̄ d́ō, Kib́ĭcè pradòlògè wi nikhĭ dè aè d́okhlŏ tòcò nu,

⁴⁰ Manè̄ d́ō, Kib́ĭcè pradòlògè wi nikhĭ dè aè d́okhlŏ tòcò nu, kî dukhlŭkî wa ńò nu zi di nib́è za dèpĕhtazòhta ńò acè̆ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan