Bìoball air-loidhne

Galatiăno 3 - Geba Roman New Testament

Dèthôdèthò̆ kî Dèb́u

¹ Thĭ aò Galătiage bu tòcò thĭ blugè ā? Bò̄bwè mèdebe thĭ gādŭ bwè? Thĭ b́è mèthîhè̆ hlî̆hta htŏ thĭ Jezŭ Krĭstu b́è kha dèhtalaglothĭ d́ŏ Krusu alò nu htŏ.

² Jè kè d́è̆tca ma thĭ; thĭ lôkômèkô Dèhmèla akhoacè̆ thĭ nib́èkò̆ Spirito Tcahtĭ ā? Ḿî̆dîḿî ńò thĭ b́ugè dèd́ò̆htô tòcò nu ā?

³ Thĭ gudunapă ma pwĕ gōnu nè? Thĭ gohta hwă d́ŏ Spirito Tcahtĭ abu, thĭ gè̄mèkŭdui d́ŏ thĭ dèkhodèă abu be lò nu ā?

⁴ Thĭ kèhtîb́è thè̆ne tòcò akèhta ahnahnă be lò ā? Ahnèhnè nu tè b́è ahnahnă ńò.

⁵ D́ŏ thĭ lôkômèkô Dèhmèla akă akhoacè̆, Kib́ĭcè i hnahnăgè Spirito Tcahtĭ nu ā? Ḿî̆dîḿî ńò thĭ thîhè̆gè kî b́ugè Vanzĕlō akhoacè̆ ā?

⁶ Tcabò̄ Abraham nu. Acab́ô̆ Cè Tcahtĭ d́ò, “Cu b́u Kib́ĭcè, kî zè dèb́u acè̆ Kib́ĭcè mèwîmètcăgè cè.”

⁷ Gōnu akhoacè̆, thĭ ḿî bija aòi dèb́u tòcò nu acè̆ thĭ b́è thîhè̆kò̆ htè Abraham akhwĭ hnèhnè nu.

⁸ Cè Tcahtĭ d́òdòlògè htè Kib́ĭcè gè̄ mèi dèb́u agè̄ mèwîmètcă bwèthŭkupho tòcò d́ŏ Vanzĕlō adèthôdèthò̆ abu b́ĕ Cò d́ò̆sa Abraham, “No kho nè cè̆ bijakhwĭpho lŏcăcè kè b́èhôwîkò̆,” nu.

⁹ Acab́ô̆ Abraham òi dèb́u d́ō zi nib́è dèhôwî akhò̆ nu, bija aòi dèb́u tòcò gī nib́èkôkò̆ dèhôwî ajāthô cè nu.

¹⁰ Aòi dèhmèla tòcò ḿî cò ò dèhôkî̆kkè akălè̄, manè̄ d́ō Cè Tcahtĭ d́ò, “Gajă bija adè mèkô pĕhtazòhta Dèhmèla akă ńò tòcò nu kè̄ b́è d́ò̆è dèhôkî̆kkè!” ad́ò do.

¹¹ Dèhmèla dè mèwîmètcă bija d́ŏ Kib́ĭcè ahlò̆mò̄ ńò. Manè̄ d́ō Cè Tcahtĭ d́ò, “Bija adî̄ahma dèbwè nib́è dèòthôḿô̆ d́ŏ dèb́u abu lò,” ad́ò do.

¹² Dèhmèla ḿî atò ò thagò̆ dèb́u alò ńò, manè̄ d́ō dè ad́ò̆sa wa ò, “Bija dèbwèbwè htè alôkômèkô dèhmèla akă tòcò nu zi nib́è dèò d́ŏ abu lò,” ad́òwe do.

¹³ Krĭstu mèhlô̆htage wa d́ŏ dèhmèla adèhôkî̆kkè aklè̆ d́ŏ Cè thè̆ne khab́ègè dèhôkî̆kkè wi nikhĭ akhoacè̆ nu. Manè̄ d́ō Cè Tcahtĭ d́ò, “Ab́èhôkî̆kkè ḿî ab́è cohtathĭ d́ŏ tho alò dèbwè nu,” ad́ò do.

¹⁴ Ajo ḿî Abraham adèhôwî d́ŏ Jezŭ Krĭstu alò nu gî̄ ḿîbò̄ bwèthŭkupho tòcò anikhĭ khĭ, kî cab́ô̆htè d́ŏ dèb́u abu wi gī nib́èbò̄ Spirito Tcahtĭ adèaḿăkhai nu.

Dèhmèla kî Dèaḿăkhai

¹⁵ Thè̆buwe tòcò; ji i thĭ dè ad́ô̆ dèdè̆ htè dèphî̆hta wè dèò dini dini nu. Htô̆ḿî bija gībwè adèŏlăphlala lōwa dèwîdèkè̆ dimimi kî selagè ami nu, bija ta tcatôĺô za ńò ńò, tò plòhtŭ za ńò ńò.

¹⁶ Khŏnujo dèd́òdòlò tòcò ḿî alab́è Abraham kî zi khwĭthèlè̆. Hmăibò̄, d́ŏ dèd́òdòlò abu nu, Cè Tcahtĭ dè mèi dèjî̄b́è ad́è̆lî̄ zi khwĭthèlè̆ òèòò nu ńò, ḿî zi khwĭthèlè̆ dèbwè, htè Krĭstu lò nu.

¹⁷ Ja thaè d́ò̆sa thĭ ḿî Kib́ĭcè ŏlăphlala hwă Abraham kî aḿăkhaigè agè̄ mè pĕhtazòhta zè dèŏlăphlala nu. Dèhmèla aòhta d́ŏ alekă ad́e lwīgèjè kî sŏscĭ adābu nu, adè mèkè̆ mèhlè̆mè̄ kèhta dèŏlăphlala kî Kib́ĭcè adèd́òdòlò ńò.

¹⁸ B́eḿĕ Kib́ĭcè adèila gî̄ ḿî ma aòhta d́ŏ Dèhmèla lò nu d́ō, tè b́è akò òhtakô za d́ŏ Zè dèd́òdòlò be ńò. Barasă d́ŏ Zè dèd́òdòlò acè̆ Kib́ĭcè mènigè dèhôwî d́ŏ Abraham anikhĭ nu.

¹⁹ Mègōnu d́ō, dèhmèla ḿî da anikhĭ nè? Dèhmèla b́è ilani cab́ô̆htè akè d́è̆lî̄ dèmèkèḿè ḿî danè̄ nu. Ajo ḿî dèd́ò̆sa ladîlase dèkèḿè htô̆ Abraham akhwĭthèlè̆ ab́è d́òdòlò dèbwè gō dole nu. Mò̄khobwèzo tòcò ḿî aila Dèhmèla, kî bwèd́ò̆bā ḿî aò bija gīpho amēzo lò.

²⁰ Barasă b́ĕ bija dèbwè ògè nu, ado loba be bwèd́ò̆bā ńò. Kib́ĭcè ḿî dèbwè lò.

Dèhmèla Adèthaèni

²¹ Mègōnu d́ō Dèhmèla kî Kib́ĭcè adèd́òdòlò htakhokă lōwa ā? Tè b́è ńò! Dèhmèla ki i za ma wa dèòthôḿô̆ d́ō, bija gŏ abwè kè̄ b́è mèwîmètcă d́ŏ dèsòkhĕńe Dèhmèla lò.

²² Mègōnu Cè Tcahtĭ d́òkò̆; Lākho thèd́è̆b́è ògè d́ŏ dèkhòwè adèŭi alè̄ lò. Gōnu akhoacè̆ dèŏlăphlala b́è ilanikò̆ wa d́ŏ dèb́u Jezŭ Krĭstu nu, kî adèb́u ò tòcò nib́èkò̆ dè ajo nu.

²³ Dukhlŭkî dèb́u dole hnî̆ńò nu, Dèhmèla ti igè wa dèòhlô̆òla ńò, wè b́è d́owè̄gloigè htô̆ dèb́u d́è̆lî̄hta nu.

²⁴ Dèhmèla ḿî atcai wa htô̆ Krĭstu dole kî wè b́è mèwîmètcăikî dèb́u nu.

²⁵ Khŏnujo akhîb́è htŏ dèb́u anikhĭ d́ō, wò tò ò be dètcaiŭi akălè̄ dimĭ ńò.

²⁶ Kî thĭ gŏ abwè ḿî Kib́ĭcè apho d́ŏ dèb́u kî dèòjīòd́wă d́ŏ Jezŭ Krĭstu abu nu.

²⁷ Thĭ b́è ŭsab́ăhtî̆ d́ŏ Krĭstu abu nu, kî khŏnujo thĭ grōhtab́ŭhta htŏ Krĭstu.

²⁸ Akhoacè̆ d́ō dèbēpha ane d́ŏ Jŭdapho kî Grĭspho, zôbwè kî bwèòhlô̆, amikhŏ kî amihmu azo tò ò be ńò. Wî ḿî lŏ bija dèbwè lò d́ŏ Jezŭ Krĭstu abu nu.

²⁹ Thĭ b́èkja Krĭstu d́ō thĭ phî̆htagè Abraham akhwĭthèlè̆ atanib́è Dèd́òdòlò tòcò nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan