Bìoball air-loidhne

Dèd́è̆lî̄ 2 - Geba Roman New Testament

Dèithîhè̆ Ephè̆sus Adèòplo

¹ “Hwenibò̄ Ephè̆sus Adèòplo abwèzo aò kî d́òbò̄ cè: “Ajo ḿî Cè htè apôgloi sè thăthôdèmè̆ d́ŏ acukhò adèhtwè dòkhò̆ abu kî hmîŭd́ŏhtè̆ thăthôtod́ŏ ò khwè̆b́a dèbwè aò nu.

² Jî thîhè̆ lŏ thĭ wî thĭ kè̆; thĭ mègè dèphîdèmè pwedè̄ kî thĭ sòwè̆b́è̆thagè pwedè̄ nu jî thîhè̆ tèpwè, Thĭ khasò̆hto b́ugè bija akî̆kkè tòcò kî thĭ b́othagè bija ad́òla ane Thod̆pho tòcò, mèhwă thĭ d́è̆lî̄htagè zî ḿî bwè aplèahlŭdè tòcò nu.

³ Thĭ thîhè̆ tèpwè pwĕ htè thĭ khòthad́ò̆wî̄thazô, khabèjab́ègè Ji Mi anikhĭ pwedè̄ nu.

⁴ Mè nòthò̆ do hnò̆nu, jò mò d́òmò sa thĭ ò dèdè̆; thĭ dèb́èlò̄ jòla d́olĭgè kî hlĕ akăhtî nu.

⁵ Gomohtanibò̄ hlĕ thĭ da ladē hnî̆ńò nu thĭ mègè cadè̄ nu. Bajalagebò̄ thĭ ne kî mègebò̄ acab́ô̆ thĭ mègè hlĕ aŭsu nu. Thĭ gā da bajalage ma thĭ ne ńò d́ō, Je gē lehtî hwă thĭ jî gî̄ phîkè̆ thĭwīkò̆ thĭ hmîŭd́ŏhtè̆ nu.

⁶ Barasă, dè aè dimi htè aòkî nè; htè nè dè wè̄ dè sè̆ Nikolaitanpho tòcò adèphîdèmè jāthôthôkî Jè dè dè wè̄ dè sè̆ ńò ńò nu.

⁷ “Anigu ò tòcò gî̄ thîhè̆ d́ò̆è dè htè Spirito Tcahtĭ d́ò dèòplo tòcò nu! “Bija anoabè dèd́o tòcò nu ji ki ikò̆ ca ab́è dèòthôḿô̆ athothè aò d́ŏ Kib́ĭcè Aparadĭzo abu nu.

Dèd́ò̆sa Smĭrna Adèòplo

⁸ “Hwenibò̄ Smĭrna Adèòplo abwèzo aò kî d́òbò̄ cè: “Ajo ḿî Cè htè aŭsu kî agudulă htè ahtaboge hwă dèthĭ aklè̆ kî aòthôḿô̆we dèbwè adèd́ò̆sa:

⁹ Jî thîhè̆ tèpwè thĭ dèhtodèba, thĭ niò̆jòa nòthò̆ thĭ ssègnè̆gè pwè̆dè̄ nu, kî thĭ khab́ègè dèsajò htè Jŭdapho tòcò d́ò; thĭ ḿî Sătana adèòplopho tòcò nu.

¹⁰ Scisăbò̄ ḿè d́ŏ thĭ gā khab́èjab́è dè tòcò nu ḿè. Sòkhĕńebò̄! Jò d́ò̆sa thĭ d́ŏ thĭ klè̆ nu, Mod́èlî gî̄ htîladēnīkò̆ dèkî̆dî̄ abu tòcò cò cab́ô̆htè co kō b́othabò̄ thĭ nu kî gākhab́èbò̄ dèmèjomèlè̄ athè̆sci adābu nu. B́èkhè̆ thĭ gè̄ b́è thĭ gè̄ b́è hlè̆mè̄ nu ḿî òhmeòglobò̄ kî ji ki ikò̆ thĭ sô thĭ hlè̆ htè aḿî dèòthôḿô̆ akhocò̆ nu.

¹¹ “Bija anigu ò tòcò sòkhĕńebò̄ htè Spirito Tcahtĭ d́ògè dèòplo tòcò cadè̄ nu; bija anoabè dèd́o tòcò nu, ci gī di scisănikò̆ dèthĭ gīpla tapla ale ńò.

Dèd́ò̆sa Pèrgamum Adèòplo

¹² “Hwenibò̄ Pèrgamum Adèòplo abwèzo aò kî d́òbò̄ cè: “Ajo ḿî bija aòi d́asĕ athô̆ ò gikhò̆b́è dèbwè adèd́ò̆sa,

¹³ Jî thîhè̆ tèpwè thĭ ò d́òlè̄ nu, d́ŏ Sătana sańăò ana bu alle nu, ḿî thĭ òhmeòglo we d́ŏ Ji Mi abu nu kî thĭ da bāphlòḿĭgè thĭ dèb́u ju bu ńò b́ĕ jè bwè akha ji nikhĭ thè̆thî Antipas b́è mèthĭgè thĭ ò htè Sătana ò alle nu.

¹⁴ Barasă d́ō, Jò mò d́ò̆sadè awîakè̆ atè è ńò d́ŏ thĭ klè̆ nu ò tîkî, d́ŏ thĭ klè̆ nu alôkômèkô Balaăm adèthôdèthò̆ htè Balak b́è̆lă thokhithokhŏ Israè̆lpho tòcò ahlò̆mò̄ agè̄ mè htè̆thukŭ cè tòcò nu, htè ca ka abò̄ dèa htè dèmèd́u bwèjò kî agā lathulakèḿè nu.

¹⁵ Gōnu akhò̆ bija òwe tòcò be htè alôkômèkô Nikolaitanpho tòcò adèthôdèthò̆ nu.

¹⁶ Mègōnu d́ō, hèhtaphlòḿĭbò̄ d́ŏ thĭ dèkhòwè aklè̆ nu. Dî ḿî ńò d́ō, je gē lehtî plaplă thĭ kî jo kō d́o gā phjakò̆ cè tòcò kî d́asĕ aò d́ŏ jò hòbu tèb́è nu.

¹⁷ “Bija anigu ò tòcò sòkhĕńebò̄ htè Spirito Tcahtĭ d́ògè dèòplo tòcò cadè̄ nu; bija anoabè dèd́o tòcò nu, ji gī ikò̆ cè mănna aòhu, kî ji kî ikò̆ cè lob́ô̆pho tod́ŏ htè amiakhè̆ athè̆ dèdè̆ hwela alò htè anib́è dèbwè akhlŏ bija dî thîhè̆ za dèbwè̆ ńò dimi nu.

Dèd́ò̆sa Thiatĭra Adèòplo

¹⁸ “Hwenibò̄ Thiatĭra Adèòplo abwèzo aò kî d́òbò̄ cè: “Ajo ḿî Kib́ĭcè Apho agādŭ gè̄ mè acab́ô̆ hmî ablî nu kî akhakhò mè acab́ô̆ kreb́ă ahlăsiri dèbwè adèd́ò̆sa:

¹⁹ Jî thîhè̆ lŏ nî wî nè kè̆ kî nè dèb́èlò̄hmòb́è dè nu; jî thîhè̆ tèpwè nè dèb́udènè kî nè dèphîdèmè kî nè dèkhòthad́ò̆wî̄thazô dohta d́okhlŏ kî d́okhlŏgè nu.

²⁰ Nòthò̆ hnò̆nu, jò mò d́ò̆sa nè ò domo be; thĭ ikhoiăgè Jezebè̆la htè ad́òla ane prò̆fètmo dèbwè kî zè dèthôdèthò̆ acè̆ zi cwinihtonigè jô zô jè bwè tòcò agā lathulakèḿè kî akā a sèa bija mèd́ui bwèjò tòcò nu.

²¹ Ji ilani htŏ tèpwè cè akhî agā bajalage ane, ḿî za da thaè bajalage ze ne agè̄ sèphlòḿĭ d́ŏ adèlathulakèḿè abu ńò.

²² Khŏnujo jè gè̄ plè̆lăkò̆ cè d́ŏ leḿĭkho kî amèkô cè tòcò d́ŏ zòmò̄kho agā khab́è dèssègnè̆ asôgudu htô̆ za bajalage ze ne d́ŏ zè dèphîdèmè atè è ńò acè̆ nu;

²³ kî ja gā tcakò̆ zo pho zi li tòcò thĭ hlè̆mè̄ cab́ô̆htè dèòplo tòcò gî̄ thîhè̆bò̄ d́ŏ aḿî jè htè ab́adèkhlè bija athoatha kî aila thĭ dèbwè dèbwè ladū acab́ô̆ thĭ dèphîdèmè tani adĕ nu.

^24-25 “Barasă bija alewe aòda d́ŏ Thiatĭra au bu tòcò aklè̆ adî phîni dè htè bija tòcò jo, “Sătana adè ahuazò adoajò̄” nu. Ji ti ila mè dèmè ahtoaba thĭ kho dimĭ ńò, ḿî thĭ kò òi hmehmececebò̄ dè htè thĭ nib́è htŏ tòcò htô̆ jo dole nu.

²⁶ Bija anoabè dèd́o kî amè ji nikhĭ dèmè htô̆ agudŭ tòcò nu, ji kī ikò̆ cè dèphlŭdèthere bwèthŭkupho tòcò akho,

²⁷ htè ja Pa ilanigè jè agā tcaiŭi cè tòcò kî hnèmūhtala kî agē deprî cè tòcò acab́ô̆ goboloha nu.

²⁸ Ji ki ikò̆ cè Sèdūwò.

²⁹ “Bija anigu ò tòcò gò̄ sòkhĕńe d́ò̆è Spirito Tcahtĭ d́ògè dèòplo tòcò cadè̄ nu!”

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan