Bìoball air-loidhne

Dèd́è̆lî̄ 1 - Geba Roman New Testament

¹ Ajo ḿî Kib́ĭcè adèd́è̆lî̄hta Jezŭ Krĭstu cab́ô̆htè Zô zô Zè bwè tòcò tò òjî̄òkja ńò dè agî̄ phî̆htagè tòcò nu; Zo thodŏlegè Zè Mò̄khobwèzo d́ŏ Zô zôpho Zowănnī ò kî

² Zowănnī hwelagè dè htè ca tcahtîgè tòcò kî cò d́òhlĭhta ḿî Kib́ĭcè adèjî̄b́è Jezŭ Krĭstu aḿăkhaigè tòcò nu.

³ Ab́èhôwî ḿî bija apha prò̆fèt adèd́òdòlò ajo, kîd́ò̆ ab́èhôwî ḿî bija asòkhĕńe cè tòcò nu, manè̄ d́ō dè ajo tòcò lŏcăcè gî̄ phî̆hta akhîagla b́ôhtî htŏ acè̆ nu.

Dèsŏwîsŏmò Dèòplo Thăthôtoplo

⁴ Zowănnī hnŭsè thĭ dèòplo thăthôtoplo aò d́ŏ Asĭa tòcò nu: Ahluată kî dèjīdèd́wă aò d́ŏ Cè aò khŏnujo, hlĕ akăhtî kî alekă b́ĕ dèbwè, Spirito Tcahtĭ thăthô dèbwè d́ŏ Za na ahlò̆mò̄ nu,

⁵ kî d́ŏ Jezŭ Krĭstu htè aḿî thè̆thî ahmeaglo aòla ŭsu dèthĭ aklè̆, Lākho thèd́è̆b́è Asaphra dèbwè adèjīdèd́wă kè̄ b́è d́ò̆è thĭ. Cè b́èlò̄ wa kî Cu ŭsab́ăgè wa kî Ci thwi,

⁶ kîd́ò̆ Zè mèphî̆htagè wa saphra kî phŭgi tòcò agā khazô Cî B́ĭcè kî Ca Pa dèbwè nu. Jezŭ Krĭstu kè̄ b́è d́ò̆è dèdòdèthe kî dècô̆dèthèlè̆ thèjô̆ lahtŭlablo. Amèn.

⁷ Tcabò̄, Zî ḿî agē lelakò̆ d́ŏ dè̄tob́o akho dèbwè nu; bija gŏ abwè gā tcahtîkò̆ Cè; d́ŏ aphlŏphlò̆ Ca tha tòcò nu papa, kîd́ò̆ bijakhwĭpho gŏ akhwĭ athara gō jo gā haikò̆ Cè. Ajo ḿî dè adî̄ahma lò, Amèn.

⁸ “Jî ḿî Alpha kî Omega, aò khŏnujo, hlĕ akăhtî kî alekă dèbwè,” ḿî Kib́ĭcè Dèado Amèzadè lŏcăcè d́ògè do.

Krĭstu Adètcahtî

⁹ Ji mi ḿî Zowănnī, kî d́ŏ gè dèòjīplo Jezŭ abu, jî ḿî thĭ thè̆buwe kî ja khaplo thĭ dèssègnè̆ d́ŏ dèkhòthad́ò̆ abu htè bija agī nib́è Zi htĭ Ze ge tòcò nu. Hlĕnu Jò ò d́ŏ Patmòs Khò̆htĭkho kî b́ĕ jò d́òŭd́ò̆sa hwă Kib́ĭcè alēahwè kî kha hwă Krĭstu anikhĭ thè̆thî nu.

¹⁰ D́ŏ Kib́ĭcè Amuni dini nu, Spirito Tcahtĭ zāglo jè kî jî thîhè̆b́ègè dèlēdèhwè d́ŏ je lekă dimi, mè acab́ô̆ khaja alē thè nu.

¹¹ Ad́ò jè, “Dè htè gajă na tcahtîb́ègè tòcò nu, hwela lŏbò̄ d́ŏ Cè tèb́è abu nu; mèhwă d́ō thè̆lebò̄ d́ŏ dèòplo thăthôtoplo aò d́ŏ Ephè̆sus, Smĭrna, Pèrgamum, Thiatĭra, Sardîs, Philadè̆lphia, kî Laodĭsea tòcò nu.”

¹² Ja khwè̆b́a je ne agā tcab́a ajî̄b́èhtî jè dèbwè nu d́ō, ja tcahtîgè hmîŭd́ŏhtè̆ thăthôtod́ŏ,

¹³ aò khwè̆b́agè dè alăkî Bija Apho dèbwè nu, Cò thò scid́ŏdò̄dô azôla do d́ŏ Za khascĭd́i lò nu tèb́è kî Co cŏb́aglogè Za thaî̆nèbò alò htè̆b́e dòblò.

¹⁴ Zu khulŭ b́ô̆thòthwigè acab́ô̆ thŏsô ḿî̆dîḿî ńò dèscihtĭthob́o nu kî Za gādŭphlo gè̄htagè acab́ô̆ hmîŭkhlo nu,

¹⁵ Za khakhò hlăsirigè acab́ô̆ kreb́ă ab́è pô̆b́ăthè̆cwè nu, kî Ze lēthègè acab́ô̆ pèllèmu gèjè nu.

¹⁶ D́ŏ Zu cukhò adèhtwè dòkhò̆ abu Cô pôgloi sè thăthôdèmè̆, d́ŏ Zò hòbu nu d́asĕ athô̆ ò gīkhò̆ tèb́è phlòhtagè kî Zu mūkă gè̄hta acab́ô̆ Lumuhtihta nu.

¹⁷ B́ĕ ja tcahtî Cè lò kî ja lakhuthĭmūklègè d́ŏ Za khakhò akăhtî nu, ḿî Cò tòb́è hwă jè kî Cu cukhò adèhtwè dòkhò̆ Cò d́ògè, “Scisă ḿè; aḿî jè lò, Akăhtî kî Agudulă.

¹⁸ Jî ḿî aòthôḿô̆ dèbwè. Ji thĭgè kî khŏnujo jò kò̄ ò thèjô̆ kî lahtŭlablokò̆, kîd́ò̆ jô ò kî dècô̆dèthèlè̆ d́ŏ dèthĭ kî halè̄ akho lò.

¹⁹ Khŭnujo hwela lŏbò̄ dè htè na tcahtî aphî̆hta khŏnujo kî agî̄ phî̆htakò̆ alekă tòcò nu.

²⁰ Sè thăthôdèmè̆ htè na tcahtîgè d́ŏ ju cudèhtwè dòkhò̆ abu kî hmîŭd́ŏhtè̆ thăthôtod́ŏ adèòhu ḿî gōjo; Sè thăthôdèmè̆ ḿî Mò̄khobwèzo thăthô dèbwè htè atcai dèòplo thăthôtoplo nu kî hmîŭd́ŏhtè̆ thăthôtod́ŏ ḿî dèòplo thăthôtoplo nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan