Bìoball air-loidhne

2 Timò̆theo 4 - Geba Roman New Testament

¹ D́ŏ B́ĭcè kî Jezŭ Krĭstu htè agī cirra bija athĭ kî athôḿô̆ ahlò̆mò̄, Cè kè d́è̆lî̄htage Ze ne acab́ô̆ Saphra aŭidè nu acè̆, jè hmèla nè,

² (dè asŏakhè̆ è ḿîwî, tè è ńò ḿîwî), d́ò̆htôlabò̄ Vanzĕlō awîakè̆. D́òisaibò̄ bija, ikhoiăbò̄ bija, thèhlô̆bò̄ bija d́ŏ dèthozôthazô abu nu.

³ Asŏakhè̆ gō dokò̆ b́ĕ bija da thaè sòkhĕńe be dèd́ò̆htôlai dèdî̄dèhma ńò, kî cè tòcò gā wāhlèkò̆ sara d́ŏ akò d́ò̆htôlani cè dè htè ca thaè sòkhĕńe tòcò nu kò òèhta òèhtakò̆.

⁴ Cè tòcò gā d́ab́a tud́ukhlŏ ane kî dèdî̄dèhma kî thaè sòkhĕńe dèlèblo lò.

⁵ Barasă nè nu, na tcahtî nòthò̆ dè mè ane amŏamo hnò̆nu, sòiwōibò̄ ne ne. Kha sègnè̆bòdòbò̄ ne ne. D́òsaibò̄ bija Vanzĕlō. Acab́ô̆ ni ḿî Kib́ĭcè adèmèpho dèbwè akhò̆, mè pĕhtazòhtabò̄ dè mè alab́è ńò lò tòcò nu.

⁶ Ḿî jè nu, jè gè̄ b́è dèhluhtai anikhĭ nare b́è htŏ. Akhî dohtîgè jè d́ŏ jè gè̄ lè̄dakè̆ jè dèòthôḿô̆ jo htŏ.

⁷ Jè cwè htŏ dècwè aègudu htŏ. Jè cwè htô̆ akŭdu nu htŏ. Jò òi hme htŏ dèb́u htŏ.

⁸ Cahta b́ĕ khŏnu jo, dènodèbè adèlīdèbwî htè dèmèdî̄mèhmage jè òhnè htŏ ji nikhĭ. Ḿî Kib́ĭcè Acirradè adî̄ahma adèila ji nikhĭ nu. Ci ki ilakò̆ jè b́ĕ muni dini nu. Kî tèb́è htĕ jè dèbwè anikhĭ lò ńò, gajă bija htè ab́èlò̄ Cè kî adôlai Zè dè òlî̄hta kòd́ò̆ athè̆ lŏcăcè tòcò anikhĭ lò.

Păulu Adèd́ò̆sa

⁹ Mèbò̄ htô̆ ne ledohtî jè d́ŏ aplă nu.

¹⁰ Dĕmas b́èlò̄ dè ab́èkja Lākho jo acè̆, lè̄dagè jè kî legè d́ŏ Thèssalò̆nika u nu. Krè̆scèns legè d́ŏ Galătiage, kî Tĭto legè d́ŏ Dalmătia age nu.

¹¹ Aòkô ja kă ḿî Lŭka dèbwè lò. Jobò̄ Mărko agē lekô na kă d́ŏ jò ò jo. Manè̄, zè mèzo za jè dèphîdèmè.

¹² Jè thè̆legè, Tikĭkus d́ŏ Ephè̆sus u nu.

¹³ Nî ḿî lehtî jè d́ō, leibò̄ ji scid́ŏdo htè jè b́è̆lădagè d́ŏ Trŏas u, d́ŏ Karpus ò nu tîkî. Lei kô cèhtŭ dalā nu, lasădè̆è cè dèphe dalā nu.

¹⁴ Bija amūdè Alèssăndro dèbwè nu mèssègnè̆ zî̄gè jè. Kib́ĭcè ki i tèpwè cè alī acab́ô̆ zè mè akhò̆ nu.

¹⁵ Thidĭibò̄ ne ne kî cè. Manè̄ kòd́òdo dō, za htad́ĕd́ò thĕbwethîlî̆ wè dèd́ò̆htôla tòcò nu.

¹⁶ B́ĕ jè b́è khascĭge dèhmŭ akhahtî tapla nu, asò̆hto òjīplo jè tò ògè dèbwè̆ ńò, ḿî bija hèbāthĭwī lŏ jè dòkhò̆. D́ŏ dè nu akhoacè̆, Kib́ĭcè gè̄ dè lè̄ d́ò̆bò̄è cè tòcò akho dèkèḿè dimĭ ńò.

¹⁷ Nòthò̆ hnò̆nu, Kib́ĭcè òkô ja kă kî i jè dèkhodèă, akhoacè̆ jò d́òhtôlai b́è Kib́ĭcè aVanzĕlo pĕhtazòhta cab́ô̆htè bijakhwĭpho alewe lŏcăcè tòcò gî̄ thîhè̆b́è anikhĭ, kî jô hlô̆htab́ègè d́ŏ dècirra thĭ jè lò.

¹⁸ Kib́ĭcè ka b́ahlô̆hta jè d́ŏ dèkî̆kkèmèhlò̆ lŏcăcè, kî Zò gò̄ hmò jè thè̆ jè htô̆do d́ŏ Mò̄kho ahtĭage abu nu. Kib́ĭcè kè̄ b́è dò̆bò̄è dèdòdèthe lahtŭlablo tîkî. Amèn.

Dèhnŭsè Alekăgudŭ

¹⁹ Jo sŏwîsŏmò b́è Priskĭlla kî Akwĭla, kî Onecĭphrus ahiphophăpho tòcò nu.

²⁰ Èrastus òdagè b́ĕ Kòrĭnthia u bu, kî Trophĭmus nu ascwihta cè akhoacè̆ jè b́è̆lăda cè d́ŏ Milĕtus u abu nu.

²¹ Dukhlŭkî dèhòkhè̆ hnî̆ńò, mèbò̄ htô̆ ne ledohtî jè nu tîkî. Eubulus, Pŭdèns, Lĭno, Klò̆dia kî thè̆buthè̆we Krĭstupho alewe tòcò thè̆le adèsŏwîsŏmò nè lò.

²² Kib́ĭcè kò̄ òkô dò̆bò̄è na tha tîkî. Kib́ĭcè adèhludètă kè̄ b́è dò̆bò̄è thĭ gŏ abwè tîkî.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan