Bìoball air-loidhne

2 Petru 3 - Geba Roman New Testament

Dèaḿăkhai B́ĭcè Adèlela

¹ B́èlò̄ thè̆buthè̆we tòcò, ajo ḿî je hweni thĭ cèborŏ gīb́è tèb́è nu. D́ŏ cè gīb́è lō abu nu jo htowè̄htosò̆ thĭ dègomohtani cab́ô̆htè akò òibò̄ thowîthatcă nu.

² Ja thaèni thĭ gō gomohtani jè dèd́ò̆htôd́ò̆dèlè d́ŏ Prò̆fèt Atcahtĭ kî bwè Thodŏpho tòcò adèjî̄b́è abu htè aḿî wî B́ĭcè kî Amèhlô̆htage wa dèbwè adèhtulahmèla tòcò nu.

³ Aŭsu ŭsu ḿî thĭ gî̄ thîhè̆b́è d́ŏ muni agudulă tòcò abu nu bija ahtèkè̆htèôdè htè alôkô phehî adèthaèni tòcò kò d́òkò̆,

⁴ “Dèaḿăkhai ḿî̆dîḿî ńò Zè dèdole ò d́ò̆ d́òlè̄? Cò ò d́ò̆ d́òlè̄? Manè̄ kò̄ d́òdo dō, pa tòcò thĭgè kî dè mè ane acab́ô̆ hlĕ dèòb́òla akăhtî nu.”

⁵ Cè tòcò b́ila agādŭ kî htîtoŏ anigu hlĕ mocè̆kho nu Mò̄kho ògè kî Lākho pòhtagè htĭkho d́ŏ Kib́ĭcè alēahwè akhoacè̆ nu.

⁶ Htĭhtahala akhoacè̆ Lākho aŭsu tèb́è kè̆hlè̆mè̄gè.

⁷ Barasă Mò̄kho khŏnujo kî Lākho hlĕnu ḿî b́èb́è̆lăge kî hmî htè agè̄ gè̄hòkò̆ bija ab́icèklèhtò tò ò ńò tòcò anikhĭ.

⁸ Barasă, b́èlò̄ thĭ athò tòcò, thîhè̆bò̄ htè kò òkô Kib́ĭcè akă dini ḿî mè acab́ô̆ ad́e dòhtò nu kî ad́e dòhtò nu ală kî dini lò nu.

⁹ Kib́ĭcè nu Zè mèkô plaplă Zè dèaḿăkhai akă, ḿî d́ŏ thĭ nikhĭ nu, Zò khòthad́ò̆sô dè d́ŏ Ca da thaèni thĭ kè̆ thĭ hlè̆mè̄ ńò, ḿî thĭ gē geb́ahtîbò̄ Cè d́ŏ dèsalatha aklè̆ nu.

¹⁰ Kib́ĭcè Amuni gō dolekò̆ acab́ô̆ bwèahudè nu; b́ĕnu Mò̄kho gè̄ hlè̆mè̄kò̆ d́ŏ dèlamulapha aklè̆, kîd́ò̆ Lākho gā lagôjôkò̆ d́ŏ dègoklè̆; Lākho kî dè ò akho tòcò gè̄ gè̄htakò̆.

¹¹ Mègōnu d́ŏ dètcahtîdòlò dè gè̄ mè ane gōnu d́ō, thĭ mò bè̄hta thĭ tha akò òwîòtcă kî òi dèthub́uthèb́è̆, thĭ htè asòmò̆dôi Kib́ĭcè Amuni adèdole tòcò nu.

¹² B́ĕ thĭ òsô̆wô̄i Kib́ĭcè Amuni akhè̆ kî mèdè èzènè cab́ô̆htè muni ajo gō doleplaplăbò̄ anikhĭ nu, b́ĕnu Mò̄kho gè̄ gè̄hta kî kè̆lōôlōkò̆, kî dè aò Mò̄kho lŏcăcè gā lagôjôlōkò̆.

¹³ Barasă wācăhlèbò̄ Mò̄kho athè̆ kî Lākho athè̆ htè acab́ô̆ Zè dèaḿăkhai ò adĕ, bija adî̄ahma tòcò kò òb́è alle nu.

¹⁴ Mègōnu d́ō, b́èlò̄ athò tòcò, b́ĕ thĭ wāhlè dè ajo tòcò asŏakhè̆ nu, htukhohtuăbò̄ cab́ô̆htè Kib́ĭcè gā pahtîbò̄ thĭ d́ŏ dèplî̆dètcă aklè̆, dèjīdèd́wă abu nu.

¹⁵ Tcabò̄ wî B́ĭcè adèkhòthad́ò̆ ḿî dèhlô̆htage anikhĭ dèkhwèdèja nu. Thè̆buwe amòb́èlò̄gudu Păulu nu, acab́ô̆ ze hwe nènò d́ŏ cè cèborŏ tòcò abu nu.

¹⁶ Ze hweni htŏ thĭ cè acab́ô̆ dèilani cè dèthîhè̆ ò adĕ nu cò d́ò̆sa lŏ htŏ thĭ dè ajo tòcò nu. D́ŏ cè cèborŏ abu, dè aba gî̄ dî thîhè̆ za ńò ḿî ḿî ògè tòcò cò pwĕ acab́ô̆ adî thîôthîcè ńò tòcò b́a dôbô̄debe ahtabohtab́ă acab́ô̆ zè mègè dèhwela tcahtĭ alewe tòcò lò. Gōnu akhoacè̆ aphî̆htakò̆ zi nikhĭ dèkè̆dèô nu.

¹⁷ Barasă d́ō, thĭ jò thò tòcò, thĭ thîhè̆dòlò htŏ dè ajo akhoacè̆, wolakhalaibò̄ thĭ ne, dî ḿî ma ńò d́ō, thĭ gô̄ lôkô ni bwètitŏ tòcò akă, htèniwĭniwa d́ŏ thĭ dèsò̆htohme abu nu.

¹⁸ Barasă dohtawebò̄ d́ŏ dèhludètă kî dèhtî̆nigô̄ni ab́èkja wî B́ĭcè Amèhlô̆htagedè Jezŭ Krĭstu abu nu. Dèdòdèthe kèb́è d́ò̆è Cè b́ĕ khŏnujo kî alekă lahtŭlablo! Amèn.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan