Bìoball air-loidhne

2 Petru 1 - Geba Roman New Testament

¹ Simeŏnè Petru, Jezŭ Krĭstu azôpho kî abōhmubicè, hwe d́ò̆sa thĭ anib́èplo wa akhwèaj́a dèzè̄ lò d́ŏ wi Kib́ĭcè adèdî̄dèhma kî Amèhlô̆htagedè Jezŭ Krĭstu ailagè wa dèb́u alīdobwîthè̆ dèbwè aò nu.

² Ahluată kî dèjīdèd́wă kè̄ b́è ila pĕhtabala d́ò̆è thĭ d́ŏ dèthîhè̆ Kib́ĭcè wî B́ĭcè Jezŭ abu nu.

Kib́ĭcè Adèjo kî Adèrô

³ Kib́ĭcè adèkhodèă b́è ilani lŏcăcè htŏ wa dèò kî dèthub́uthèb́è̆ anikhĭ ab́èkja dèthîhè̆ Cè htè ajogè wa d́ŏ Zò dò Ce the kî dèwîdètcă abu nu.

⁴ D́ŏ Zè dèaḿăkhai ado kî alīdobwîthè̆ abu nu cab́ô̆htè thĭ gī nikôb́èbò̄ Zè dèb́ĭcè d́ŏ thĭ hlô̆htagè phehî adèkhorokhara acè̆ nu.

⁵ Mègōnu d́ō, mè pĕhtabò̄ thĭ dèb́u kî dèphîdèmè awîab́è; thĭ dè awîaè kî dèthîhè̆,

⁶ thĭ dèthîhè̆ kî dènodèbèlage ane, dènodèbèlage ane kî dèkhòthad́ò̆, thĭ dèkhòthad́ò̆ kî dèthub́uthèb́è̆,

⁷ thĭ dèthub́uthèb́è̆ kî thè̆buwe adèb́èlò̄, thĭ thè̆buwe adèb́èlò̄ kî dèb́èlò̄thòklè̆.

⁸ Manè̄ kò̄ d́òdo dō, thĭ kò òi ma dèzwî̄dèè ajo tòcò kî akò̄ ò pĕhta ma d́ŏ thĭ hîklè̆ nu d́ō, thĭ kò tò òkoòklôkò̆ ńò d́ŏ thĭ thîhè̆ wî B́ĭcè Jezŭ Krĭstu acè̆ nu.

⁹ Manè̄ adèzwî̄dèè tò ò ńò dèbwè ḿî bwègādŭ zòbra ahè bōcubōkha kî asòthô̆bô̄hnègè htè ab́è ŭsab́ăthab́ă htŏ d́ŏ adèkhòwè hlĕ aŭsu tòcò nu dèbwè nu.

¹⁰ Mègōnu akhoacè̆, thè̆buwe tòcò, htukhohtuă d́okhlŏ d́ŏ dèphîdèmè awîab́è aklè̆ thĭ dèb́èjo kî thĭ dèb́èrô gā ladîlase d́okhlŏbò̄ nu. Thĭgè mè ma gōjo d́ō, thĭ gā da ladēnib́è dèkhòwè abu taplă ńò.

¹¹ Mègōnu d́ō, dè gè̄ mènikò̆ thĭ agē lenīb́è wî B́ĭcè Amèhlô̆htagedè Jezŭ Krĭstu Ahtĭage alahtŭlablo abu nu.

¹² Mègōnu akhoacè̆ thĭ thîhè̆ htŏ kî ò htŏ nòthò̆ dèdî̄dèhma ajo dèdè̆ abu hnò̆nu jè gè̄ mè gomohtani thèjô̆kò̆ thĭ dè ajo tòcò jo.

¹³ Jò òwe dètcahtĭ alle abu athŭtherĕ jè kè̄ b́è htowè̄htosò̆ thĭ jo gomo do.

¹⁴ Acab́ô̆ wî B́ĭcè Jezŭ Krĭstu d́ò̆sadòlògè jè nu, jè gè̄ lè̄lakè̆b́è je neb́î̆cè akô̆tho jo akhî b́ôhtî htŏ.

¹⁵ Adokhlŏ nu ḿî jè dèhtukhohtuă ajo dèdè̆ nu agè̄ mè gomohtanikò̆ thĭ d́ŏ ji thĭ hwăgè nu nu.

Dètcahtî Thè̆ne Jezŭ Adòathe

¹⁶ B́ĕ wò d́ò̆sa thĭ wî B́ĭcè Jezŭ Krĭstu adèdole nu, tè b́è wò d́ò̆sa thĭ dèlèblohtô̆lahlô ńò, ḿî wa tcahtî thè̆negè Zi hĭ Zè htè̆ akhoacè̆ nu.

¹⁷ Manè̄ kòd́òdo dō, d́ŏ B́ĭcè Pa ò nu Zî phînigè dèphlŭthere kî dèdòdèthe b́ĕ Dèdòdèthe Ahĭahtè̆ aklè̆ dèlē thèhtagè d́ŏ Cò ò adò, “Ajo ḿî Jo Phokhŏ amòb́èlò̄, Jè b́èthagudŭ dèbwè nu.”

¹⁸ Kîd́ò̆ b́ĕ wò òkôwe Ca kă d́ŏ khòlò̆ atcahtĭ akho nu, wî thîhè̆b́ègè dèlē thèhta d́ŏ Mò̄kho nu.

¹⁹ Wî thîhè̆ ladîlase d́okhlŏ ḿî prò̆fèt adèd́òdòlò thĭ mò sòkhĕńe acab́ô̆ hmîŭd́ŏ ahlî̆ dèkhiklè̆ akhò̆pha nu htô̆do dèhlî̆hta Sèdūwò gî̄ hlî̆hta thĭ thabu nu.

²⁰ Thĭ mò thîhè̆ ŭsu ḿî d́ŏ Cè Tcahtĭ abu prò̆fèt adèd́òdòlò tòcò nu bija dèbwè̆ tè b́è gomo ahtabohtab́ă acab́ô̆ ca tha alō lò ńò.

²¹ Manè̄ kò̄ d́òdo dō, dèd́òdòlò tòcò tè b́è aòhta dŏ bija atha bu dèbwè̆ ńò, ḿî Spirito Tcahtĭ adèhtônāi acè̆ Kib́ĭcè abija tcahtĭ tòcò d́òphlò̆htakò̆ akhoacè̆ nu.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan